I Hananya nda Safira
5
1 Mamu sana mndu guli ta hgə lu ka Hananya nda markwa taŋ Safira.
Ka skwaptá hahəŋ ta vwaha taŋ guli.
2 Ka dzraftá həŋ nda markwa taŋ,
ka ɗifanaghutá tsa tsedi ya,
ka klaktá pɗakwa ni,
ka vlaŋtá gwal ghunay.
3 Ka *Piyer nda tsi mantsa:
« Ari Hananya,
kabgawu kəl ká ka zlanaŋtá ŋuɗufa gha ta halaway,
ka tsakalanatá wi ta Sulkum nda ghuɓa,
ka ɗifanaghutá tseda tsa vwah skwap ka ya na?
4 Ta kul skwaptá ka ná,
ka ŋa gha a nzakwa ni ra?
Tahula skwapta gha guli,
ka ŋa gha a tseda ni guli ra?
Waká ka kurata magatá skwi manda na na?
ŋa mnduha a tsakalanata ka ta wi wu,
ŋa Lazglafta,
» kaʼa.
5 Na mnata lu ta tsa gwaɗa ya,
ka zləmbatá Hananya,
ka mtuta.
Ka hlutá zləŋ ta inda gwal ta snaŋtá tsa skwi ya.
6 Ka sliʼaftá duhwalha,
ka ɗahamta,
ka klaghata paɗamta.
7 Tahula luta awa hkən manda paɗamta,
ka lam markwa taŋ,
sna a tsatsi ta skwi ta slata wa.
8 Ka piyer nda tsi mantsa:
« Ari makwa na,
mniha mna,
manda na na tseda tsa vwah skwap kuni ya ra?
» kaʼa.
« Aŋi,
mantsa ya skwapta ŋni,
» ka tsa marakw ya.
9 Ka Piyer mantsa « Waká kaghuni dzrafta kawadaga ta dzəgha Sulkuma Mgham Lazglafta na?
Wya tsa gwal ta paɗamtá zəʼala ghuni ya ta wa tgha,
dzaʼa tsukwaghatá kagha guli,
» kaʼa.
10 Gi hada hada,
ka zləmbatá tsi ta kəma Piyer ka mtuta.
Ta lam tsa duhwalha ya ná,
nda mta.
Ka tsukwaghatá həŋ,
ka laghu da paɗamta ta vata zəʼala taŋ.
11 Ka ksaftá tsi ka zləŋ ta gwal zlghay nda ŋuɗuf,
nda hamata sanlaha ta snaŋtá tsa skwi ya.
Mazəmzəmha kavghakavgha
12 Nda ndəgha mazəmzəm nda mandərmimi maga gwal ghunay mataba mnduha.
Snu sna gwal zlghay nda ŋuɗuf ta tskavata kawadaga ma rmaka həga Lazglafta ta hgə lu ka rmaka Salumuŋ.
13 Haɗ sana mndu ta guya vgha nda həŋ wa.
Kulam nda va tsa,
ta ghubay lu ta həŋ.
14 Ta sgaku nda sga ndəghata zgwana nda miʼaha ta zlgha Mgham *Yesu ta sgavaghata ta ghəŋa taŋ.
15 Ta hlak hla lu ta gwal kul ɗughwanaku,
ka pghatá həŋ ta wa tvi ta kativiŋ nda ya ta pəta,
ŋa lanaghata dər sulkuma *Piyer yeya tsi ta sanlaha ma həŋ ta lab tsi ta tvi.
16 Nda ndəgha gwal ta gazlakta ma luwaha ta wanaftá Ursalima ta hlakta gwal kul ɗughwanaku,
nda gwal nda kasa da ghwaɗaka sulkum,
ka mbambafta həŋ demdem.
Giri ŋa gwal ghunay
17 Mbaɗa mali ta ghəŋa gwal dra skwi ŋa Lazglafta,
nda gwal ta vata ni,
ta nzakway ka la *Sadukiya,
ka dra gwal ghunay.
18 Ka sliʼaftá həŋ ka hlaftá gwal ghunay,
ka pghamtá həŋ ma gamak.
19 Girviɗik,
ka gwaniŋtá duhwala Mgham Lazglafta ta wa tgha tsa gamak ya ka hligiŋtá gwal ghunay mida.
20 Kaʼa nda həŋ mantsa:
« Lawa la da həga Lazglafta ka mna kuni ta gwaɗa ta ghəŋa tsa lfiɗa hafu ya ŋa mnduha,
» kaʼa.
21 Ka snatá tsa gwal ghunay ya ta tsa gwaɗa ya ka sliʼaftá həŋ bit tgha ka laghu da həga Lazglafta ka tagha skwi ŋa mnduha hada.
Ka tskavata i mali ta ghəŋa gwal dra skwi ŋa Lazglafta nda gwal ta vata ni,
nda la galata mndu mataba la Yahuda,
ŋa dzra gwaɗa.
Ka ghunaftá həŋ ta mnduha ŋa dzaʼa hlagaptá tsa gwal ghunay ya kay,
ma gamak.
22 Ta lagha tsa gwal ghunaf lu ya ná,
kuɗataŋ haɗ həŋ ma tsa gamak ya wa.
Ka vradaghata həŋ da mnay ŋa taŋ.
23 Ka həŋ mantsa:
« Ta lagha aŋni kay ná,
tɗetsa nda ha wa tgha gamak manda va vla ni,
ta hada tsa gwal ta nghay ya guli ma vla taŋ.
Buts ka ŋni gunatá tgha ná,
kuɗataŋ,
haɗ mndu mida wu,
» ka həŋ.
24 Na snaŋta taŋ ta tsa gwaɗa ya ná,
nda ndərkawa ka i mghama ngha həga Lazglafta nda la mali ta ghəŋa gwal dra skwi ŋa Lazglafta,
nzata.
Snəgla a həŋ ta skwi ŋa mnay wa.
Ka həŋ mantsa:
« Nu ta magaku nda tsa gwal ghunay ya,
» ka həŋ ɗaɗawavusta.
25 Tata tsa ndanə ya həŋ,
ka sagha sana mndu da mnay ŋa taŋ.
Kaʼa mantsa:
« waʼa tsa mnduha si ham kuni ma gamak ya kay ma həga Lazglafta ta tagha skwi ŋa mnduha,
» kaʼa nda həŋ.
26 Ka sliʼafta tsa mali ta ghəŋa gwal ngha həga Lazglafta ya kawadaga nda sludziha ni,
ŋa hlakta həŋ.
Ka mbraku mbrakwa a hlakta həŋ ta həŋ tama wu,
kabga ta zləŋay həŋ ta zləzlərtsata mnduha ta həŋ.
27 Hlakta taŋ ta həŋ,
ka hladaghatá həŋ ta həŋ ta kəma tsa gwal dagala dagala ya.
Ka mali ta ghəŋa gwal dra skwi ŋa Lazglafta mantsa:
28 « Lmaf a ŋni ta kaghuni ka taghəgəltá skwi ŋa mnduha nda hga tsa mndu ya kay ra?
Wana ndanana,
tiŋtá kuni ta tagha skwa ghuni ma luwa Ursalima.
Ta kumay kuni ta vzaŋnamtá tɓaŋ ma lwi ta gwaɗa ta mtakwa tsa mndu ya,
» kaʼa nda həŋ.
29 Ka i *Piyer kawadaga nda sanlaha ma gwal ghunay nda tsi mantsa:
« Mal sna gwaɗa da Lazglafta ka ya da mnduha.
30 Lazglafta dzidzíha mu ta sliʼaganaptá *Yesu si dza kuni ma zləŋafta ghuni ta udzu ya.
31 Tsatsi kapanaf Lazglafta ka Mgham ka fata nda ga zeghwa ni,
ka mnda mba mndu,
ŋa vla tvi ŋa mnduha la Israʼila ŋa mbəɗanafta taŋ ta nzakwa taŋ,
ŋa mutsafta taŋ ta platá dmakwa taŋ.
32 Aŋni,
kawadaga nda Sulkum nda ghuɓa,
ya ta vlə Lazglafta ŋa gwal ta sna gwaɗa ni ya ná,
masləmtsəka tsa skwi ya aŋni,
» ka həŋ.
33 Ka kuzlanaftá tsi ta ŋuɗuf ta tsa gwal dagala dagala ya.
Ta kumay həŋ má ta zaɗanatá tsa gwal ghunay ya.
34 Ka sliʼavata sana la *Farisa mataba tskatá mndu,
Gamaliyel hga ni,
mndu ta tagha zlahu ŋa mnduha ya,
ta tsatsi ta fa mnduha ta iri.
Kaʼa mantsa:
« Ka lab la na mnduha na dzibil,
» kaʼa.
35 Kaʼa nda tsa tskata mnduha ya tama mantsa:
« Mnduha la Israʼila,
ɗaswa ka kuni nda skwi dzaʼa kuni da magay ŋa na mnduha na.
36 Diʼiŋaghu a fitika ni manda zlagapta sana mndu ta hgə lu ka Tewdas ta mnay kazlay:
Haɗ mndu taɓta iʼi wu kəʼa.
Ta magay mnduha ta fwaɗ dərmək ta laghu mista ni.
Ka dzatá lu ta tsatsi,
ka gazlatá tsa gwal si ta dzaʼa mista ni ya.
Ta haɗ lu tata gwaɗa tida wa.
37 Tahula tsa,
ka zlagaptá sana mndu ta fitika vinda hga mnduha,
Zudas mnda la Galili.
Ka waghatá tsi ta ndəghata mnduha mista ni.
Ka dzatá lu ta tsatsi guli,
ka gazlatá tsa gwal ta laghu mista ni ya.
38 Skwi ya ta mnaghunata yu ndanana tama,
ma magaŋ kuni ta sana skwi nda na mnduha na.
Ka tsa a nda tsa həŋ ta na skwi na katsi,
mamu kɗavakta ni.
39 Ala,
ka sagha da Lazglafta tsi katsi ná,
laviŋta a kuni ta lɓanata wa.
Ɗaswa ka kuni nda lmu dzaʼa kuni lmay nda Lazglafta,
» kaʼa nda həŋ.
Ka snanatá tsa mnduha ya ta tsa gwaɗa ni ya.
40 Ka hgəgladamtá həŋ ta tsa gwal ghunay ya da həga,
ka ɗgaptá həŋ.
« Yaha yaha kuni walglaŋta gwaɗaŋtá gwaɗa nda hga Yesu,
» ka həŋ nda i Piyer.
41 Ka sliʼaftá tsaha ya ka laghu nda rfu,
nda mnay kazlay:
Nda ra kuni ka ghuya ɗaŋwa ta ghəŋa Yesu,
ka Lazglafta nda aŋni,
ka həŋ.
42 Inda fitik tama,
zlana a həŋ ta tagha skwi ŋa mnduha,
nda mna gwaɗa ta ghəŋa *Lfiɗa Gwaɗa ta ghəŋa Yesu *Kristi ma həga Lazglafta nda ya ma həga ga mnduha wa.