Sabi 40

Dzugwatá həga tumpul

1 Ka Yawe nda Musa mantsa: 2 « Baɗ taŋtaŋ ma tila mataŋtaŋ dzaʼa dzugwata ka ta həga, həga tumpula guyaku. 3 Ka famta ka ta akwata dzratá wi mida, ka haghuta ka nda zlala. 4 Ka famta ka ta tabəl, ka payafta ka ta skwiha ŋa tida. Ka famta ka ta pitirlaha, ka tsatsuŋta ka ta vu ta wa tsa pitirlaha ya. 5 Ka fata ka ta gwira dra urdi ka dasu ta kəma akwata dzratá wi. Ka fuŋta ka ta laɓle ta wa tgha lami da həga tumpul. 6 Ka fata ka ta gwira pla ghəŋ ŋa dray tsuh tsuh ta kəma tva lami da həga, həga tumpula guyaku. 7 Ka fata ka ta glifiŋ ma takataka tumpula guyaku nda gwir, ka ndəghamta ka ta imi mida. 8 Ka tsata ka ta daɓa ni ka wanafta dendesl, ka fuŋta ka ta laɓle ta wa tgha lami da tsa daɓi ya.

9 Ka klafta ka ta rɗa fata ŋa ɗa, ka masafta ka ta həga tumpul, nda huzla mida tani demdem. Ka pghata ka ŋa ɗa ta huzla mida demdem, ŋa nzakwa ni nda ghuɓa. 10 Ka masafta ka ta tsa rɗi ya ta gwira pla ghəŋ ŋa dray tsuh tsuh, nda huzla ni tani demdem. Ka fata ka tsa gwir ya ka ŋa ɗa, ŋa nzakwa ni nda ghuɓa. 11 Ka masafta ka ta rɗi ta glifiŋ nda tughwa ni tani, ka fata ka nda ghuɓa ka ŋa ɗa.

12 Ka gavadanaghata ka ta i Haruna nda zwana ni ta wa tgha tumpula guyaku, ka mbazanata ka ta mbaza ta həŋ nda imi. 13 Ka suɗanavata ka ta Haruna ta lgutha nda ghuɓa, ka pghanaghata ka ta tsa rɗi ya, ka fata ka ka ŋa ɗa ŋa magihatá slna dra skwi. 14 Ka gavadanaghata ka ta zwana ni guli, ka susuɗanavata ka ta sɗakw ta həŋ. 15 Ka paghanaghata ka ta rɗi ta həŋ manda va ya pghanagha ka ta da taŋ ya ŋa magihata taŋ ta slna dra skwi. Tsa pghanaghatá rɗi ta həŋ ya ná, tsaya dzaʼa fata həŋ ma slna dra skwi ka ŋa ɗa ŋa ɗekɗek ha zivir zivira taŋ, » kaʼa.

16 Ka magatá Musa ta inda skwiha demdem manda va ya mnanaf Yawe. 17 Baɗ taŋtaŋa fitik ma tila mataŋtaŋ, ma mahisa vaku, dzugwata lu ta tsa həga tumpul ya. 18 Ka dzugwatá Musa ta həga tumpul, ka didihanatá tsi ta tughuha ni, dzagwaha ta katakuha ni, paghamha ta həndilha ni, dzagwaha ta guguɗiha ni. 19 Tahula tsa, ka zlataftá tsi ta tumpul ta ghəŋa həga tumpul, fanaghaha ta skwa bukwa həga tumpul manda va tsa si mnanaf Yawe ta Musa ya.

20 Ka hlaftá tsi ta klamha dzratá wi ya ka pghamta ma tsa akwati ya. Ka zlaŋamtá tsi ta sandlaŋha tsa akwata ya, ka fuŋtá tsi ta paɗuwa vla pla dmaku ta wa tsa akwati ya. 21 Ka kladamtá tsi ta tsa akwati ya da tsa həga tumpula ya. Ka taptá tsi ta zlala ŋa haghuta, ka haghutá tsi ta tsa akwata dzratá wi ya, manda va ya mnanaf Yawe ta Musa.

22 Ka fatá tsi ta tabəl ma tumpula guyaku nda təv nura həga tumpul, nda ta kəma zlala. 23 Ka pghaftá tsi ta buradi ka dzrafta tida ta kəma Yawe, manda va ya mnanaf Yawe ta Musa. 24 Ka fatá tsi ta pitirlaha ma tumpula guyaku mbəŋ nda tabəl nda təv slərpa suda həga tumpul. 25 Ka tsatsuŋtá tsi ta vu ta wa pitirlaha ta kəma Yawe, manda va ya mnanaf Yawe ta Musa.

26 Ka fatá tsi ta gwira dra urdi ka dasu ma tumpula guyaku nda təv kəma zlala. 27 Ka draftá tsi tida ta urdi zɗa ziʼakwa ni, manda va ya mnanaf Yawe ta Musa. 28 Ka fuŋtá tsi ta laɓle ta wa tgha lami da həga tumpul. 29 Ka fatá tsi ta gwira pla ghəŋ ŋa dray tsuh tsuh ta wa tgha lami da həga, həga tumpula guyaku. Ka vlatá tsi tida ta skwa pla ghəŋ tsuh tsuh, nda mbəha nimaya manda va ya mnanaf Yawe ta Musa.

30 Ka fatá tsi ta glifiŋ ma takataka tumpula guyaku nda gwir, ka pghamtá tsi ta imi mida ŋa tsaɗa. 31 Mida ta mbaza i Musa, nda Haruna nda zwana ni ta səlaha taŋ, nda dzvuha taŋ. 32 Inda lami ta lam həŋ da tumpula guyaku, ka gavadaghata ta gavadaghata həŋ ta vata gwir a tsi, ta ghuɓiŋ ghuɓa həŋ ta nzakwa taŋ, manda va ya mnanaf Yawe ta Musa.

33 Ka tsatá tsi ta daɓi ta wanaftá həga tumpul dendesl, nda gwir. Ka fuŋtá tsi ta laɓle ta wa tgha lami da tsa daɓi ya. Mantsa ya ka Musa kɗiŋtá inda slna.

Ndəghanafta glakwa Yawe ta həga tumpul

34 Ka saha kusay tɗik bukwamtá tumpula guyaku, ka ndəghanaftá glakwa Yawe ta tsa həga tumpul ya. 35 Laviŋ a Musa ta lami da tumpula guyaku wu, kabga nzaf nza kusay tida, ndəghanaf ndəgha glakwa Yawe tsa həga tumpul ya. 36 Ma inda sliʼafta ta sliʼafta kusay ta həga tumpul ná, ta sliʼaf sliʼa la Israʼila ka ksa tvi, ka dzaʼa nda sladavata ma ya vli, sladavata ma ya vli. 37 Ka sliʼaf a tsa kusay ya wu, haɗ hahəŋ ta sliʼavata ha baɗ fitik dzaʼa sliʼafta tsi wa. 38 Gifitik ya ná, ta tsa həga tumpul ya ta nzata tsa kusaya Yawe ya. Girviɗik ya guli ná, ka vu nzakwa ni mida, ta nghə inda la Israʼila ta kəma taŋ ma inda mbaɗa taŋ.