Sabi 38

Magatá gwira dra skwi tsuh tsuh

1 Ka magaftá tsi ta gwira pla ghəŋ ŋa dray tsuh tsuh nda udza kwehi. Ka mitər his nda rita slrakwa ni, ka mitər his nda rita bughwata ni, ka gragra nzakwa taŋ, ka mitər nda rita slada ni. 2 Ka magaftá tsi ta tuldiha ni fwaɗ fwaɗ ka skwa turtuk nda tsi. Ka zlərɓatá tsi nda ghuva tili.

3 Ka magaftá tsi ta inda huzlaha gwir: Hutayaha ni ŋa pgha hutiɗifa ni lmusa, nda pelha ni, nda nzəganzəga ni, nda gayaha ni, nda kwamblehha ni. Ka magaftá tsi ta inda tsa huzlaha ni ya nda ghuva tili. 4 Ka magaftá tsi ŋa ta gwir ta katsar ka ghuva tili manda gatá kadəŋ, ka famta ma huɗa tsa gwir ya, nda ma mndəra ɓlatá wa ni, ŋa nzakwa ni ma takataka tsa gwir ya. 5 Ka nwaptá tsi ta gidaŋha fwaɗ, ka pruŋta ta wa tuldiha tsa katsar ka ghuva tili ya fwaɗ fwaɗ ŋa hahamtá sandlaŋha. 6 Ka fifiɗaftá tsi ta sandlaŋha udza kwehi, ka zlərɓata nda ghuva tili. 7 Ka hahamtá tsi ta tsa sandlaŋha ya da tsa gidaŋha ta slərpuha tsa gwir ya ŋa klay tida. Ka magaftá tsi ta tsa gwir ya nda kataku, ka ghurum vli ma huɗa ni.

Magatá glifiŋ nda tughwa ni

8 Ka magaftá tsi ta glifiŋ nda tughwa ni tani ka ghuva tili. Nda daragalha^ª miʼaha ta maga slna ta wa tgha tumpula guyaku ya magata tsi.

Magatá kuraghuta daɓa həga tumpul

9 Ka tsatá tsi ta daɓi ta wanaftá tsa həga tumpul ya. Ka wanaftá tsi nda wupayha gagaf lu nda vəvɗatá sləvdza liŋ kulefeɗ. Mitər hutaf mbsak dzaʼa nzakwa slrakwa ni nda təv sud. 10 Ka magaftá tsi ta matalaha ni hisambsak, nda tughuha ni hisambsak ka ghuva tili. Hdeuʼhdeuʼha tsa matalaha ya, nda htsiŋha taŋ ŋa habanata ya guli ná, nda kfura tsedi magafta tsi ta həŋ. 11 Ta slərpa ni təv nur ya guli ná, mitər hutaf mbsak tsa wupayha ya, nda matalaha ni hisambsak, nda tughuha taŋ hisambsak ka ghuva tili. Hdeuʼhdeuʼha tsa matalaha ya, nda htsiŋha taŋ ka kfura tsedi həŋ. 12 Nda ta slərpa ni nda ga mazu ya guli ná, wupayha ka mitər hisambsak hutaf mida, nda matalaha ni ghwaŋ, nda tughuha ni ghwaŋ. Hdeuʼhdeuʼha tsa matalaha ya, nda htsiŋha taŋ ka kfura tsedi həŋ. 13 Nda ta slərpa ni nda ga silwa təv safa fitik ya guli ná, ka mitər hisambsak hutaf mida. 14 Ta sana slərpa tva lami ná, mamu wupayha ka mitər ndəfáŋ nda rita, nda matalaha taŋ hkən, nda tughuha taŋ hkən guli. 15 Nda təv sana slərpu tva lami da tsa daɓi ya, mamu wupayha ka mitər ndəfáŋ nda rita, nda matalaha taŋ hkən, nda tughuha taŋ hkən guli. 16 Wupayha ta waftá inda tsa daɓa ni ya ná, ka vəvɗatá sləvdza liŋ kulefeɗ. 17 Tughuha tsa matalaha ya ná, ka ghuva tili həŋ. Htsiŋha taŋ ŋa habanata nda hdeuʼhdeuʼha taŋ ka kfura tsedi. Ghəŋa tsa matalaha ya ná, ka kfura tsedi. Inda tsa matalaha ta wanaftá kuraghuta tsa daɓi ya ná, ka magaftá tsi ta htsiŋha taŋ ŋa habanata ka kfura tsedi.

18 Tsa laɓle wa tgha lami da tsa daɓa ya ná, gaf nda ga lu nda sləvdzi ka kubwalkubwal, nda ya ka dva ghuz, nda ya ka dva ghəlez nda tsərslata vəvɗatá sləvdza liŋ kulefeɗ. Gwal ta vivɗa ta gagafta. Ka mitər ghwaŋ slrakwa ni, mitər his nda rita slada ni, nda bughwata ni, manda tsa wupayha daɓa ni ya. 19 Ka dzagwatá tsi ta matalaha ni fwaɗ ta tughuha ni fwaɗ ka ghuva tili. Hdeuʼhdeuʼha taŋ, nda htsiŋha taŋ ŋa habay ná, ka kfura tsedi. Ka zlərɓatá lu ta ghəŋa tsa matalaha ya nda kfura tsedi. 20 Inda silikha tsa həga tumpul ya, nda ya nda ŋa daɓa ni ta wanafta tani ná, ka ghuva tili həŋ.

Huzla həga tumpul

21 Wya mbsaka huzla həga tumpul, tumpula dzratá wi. La Levi ta mbəɗafta manda ya mnaf Musa nda ma dzva Itamar zwaŋa Haruna mnda dra skwi ŋa Lazglafta. 22 Betsayel, zwaŋa Uriya, zigha Hur ma mndəra la Yahuda ta magaftá inda skwi mnanaf Yawe ta Musa. 23 Mnda ksa slna kawadaga nda tsi guli ná, tsaya Uhuliyav zwaŋa Ahisamah ma mndəra la Daŋ. Tsatsi mnda fifiɗaku, nda wiwirtsaku, nda gagaku nda sləvdziha ka kubwalkubwal, nda ya dva ghuz, nda ya ka dva ghəlez, nda ya ka liŋ kulefeɗ.

24 Tsa tsəkatá mbəhuha ka dasu, zuzukwanaf lu ta Yawe ka magutá lu ta slna həga nda ghuɓa demdem nda tsi ya ná, kiluʼ dəmbuʼ (1.000) ya, manda ya ta kru lu ma həga nda ghuɓa. 25 Gwal mataba guyatá ghəŋa mnduha ma fitika mbəɗaftá həŋ ná, ka vlatá həŋ ta kfura tsedi ta magay ta kiluʼ dəmbuʼ hkən nda fwaɗ dərmək nda hkən mbsak (3.430), manda ya ta kru lu ma həga nda ghuɓa. 26 Inda mndu ta vlatá tsedi ka gram mkuʼ, tsaya rita daram ta kru lu ma həga nda ghuɓa. Tsaya ná, inda mndu ta lami da mbsaka mbəɗata ni demdem ta klaftá imi hisambsak ka laghwi ta kəma: Zgwana dəmbuʼ mkuʼ dərmək nda hkən nda hutaf dərmək nda hutaf mbsak (603.550). 27 Ma tsa kfura tsedi ya ná, ka klaftá lu ta kiluʼ dəmbuʼ hkən nda fwaɗ dərmək ŋa nwapta ŋa maga tughuha vli nda ghuɓa, nda tughuha zlala. Ka magaftá lu ta tughuha dərmək nda tsa tsedi ya. Tsaya kiluʼ hkən mbsak fwaɗ mida ŋa tughu turtuk. 28 Nda kfura tsedi ka kiluʼ hkən mbsak ta pɗaku, ka nwaptá lu ŋa maga hdeuʼhdeuʼ ŋa matalaha nda htsiŋha ŋa habanata. Ka zlərɓatá lu ta ghəŋa tsa matalaha ya nda tsa kfura tsedi ya guli. 29 Gwagwata mbəhuha hlagagha mnduha ka ghuva tili ka zuzukwanaftá Yawe ná, kiluʼ dəmbuʼ his nda fwaɗ dərmək nda hisambsak hutaf mida. 30 Nda tsi, ka magaftá lu ta tughuha guguɗiha tva lami da tumpula guyaku, nda gwir ka ghuva tili, nda katsar ni ka ghuva tili, nda inda huzla gwir, 31 nda tughuha matalaha daɓi, nda ya ŋa tva lami da daɓa ni, nda inda silikha tsa həga tumpul ya, nda inda silikha daɓi ta wanafta ya.