పార్తన-వింతి కియ్వలిక్ పడనంగ్ నేకింగ్
9
1 బగవంతల్, ఇజ్రయేల్ పర్జతున్ సీత మొదొడ నియమ్నగ, మాయ్నన కెయ్దె తయర్ ఆత అద్ పార్తన-వింతి కియ్వల్ డేరత్ బారెతె అని నేకి-బదిన్ బారెతె మత్త.*
బలి చడి కియ్వల్ బొవ్ల
2 అద్ పార్తన-వింతి కియ్వల్ డేరతున్ నడ్డుమ్ ఉంది పడ్ద టాంగి కీసి, తాన్ రండ్ బాగల్క్ కీతెర్.
మునెత బాగమ్నగ ఉంది డివెన జల్కర అని నివొద్నంగ్ సారింగ్ ఇర్వల్ టేబల్ మందు.
ఇద్ బాగమున్ పవిత్ర జాగ ఇందిర్.
3 అద్ పడ్దతున్ పెజెట బాగమున్ బెయ్ పవిత్ర జాగ ఇందిర్.
4 అద్ బాగమ్నగ ఉంది సోనెతె తయర్ కీత ఊద్ నిరుస్వల్ కుండి అని నియమ్న సందొక మందు.
అద్ సందొక సోనెత రేక్నె, పూరొ అత్క్ వాట్సి మందు.
అద్ సందొకత్ రొపొ మన్న* ఇర్త అద్ సోనెత కోప, అహరోన్త కొడ్స్‌త బెడ్డె,* హుకుమ్క్ లిహి కీతంగ్ పాటిన్ దాత్నంగ్ చెక్తంగ్ రండ్ బండంగ్ మందుంగ్.
5 అద్ సందొకత ముచడ పొరొడ బాజున్ పాప్క్ మాపి కియ్వల్ జాగ* ఇంతెర్.
బగవంతన మయ్మత వేడ్చితున్ తొహ్వలిక్ రూప్క్* అద్ జాగతున్ కేప్సెర్ మారెల్క్‌నె ముచ్చి మందుంగ్.
ఇవ్ సమ్దొన్ బారెతె, ఇంకె పోడి కీసి వెహ్లె వకత్ సెలె.
6 ఇవ్ సమ్దొ ఇహిన్ తయర్ కీత పెజె, కటొడలిర్ పార్తన-వింతి కియ్వల్ డేరత మునెత బాగమ్నగ సొంజి, నేకితంగ్ కార్యన్ రోజి కీసెర్ మందిర్.
7 బతి సిరిప్ పెర్సొర్ కటొడల్ తన్వంగ్ పాప్కున్ సాటి అని పర్జ కరె మాయ్వక్ కీతంగ్ పాప్కున్ సాటి, అర్పన సియ్లె, నెతుర్ పియ్సి, సాల్దున్ ఉంది జోక పడ్దతున్ పెజెట బెయ్ పవిత్ర జాగతగ సొందుర్.+
8 ఇవ్ సమ్దొన్ పియ్సి, బస్కె వేరితె ఈతల్ పార్తన-వింతి కియ్వల్ డేరత జాగ మందంతయొ, అస్కె వేరి, స్వర్గ్‌న బెయ్ పవిత్ర జాగత సరి కోలె మాయొ ఇంజెర్ పవిత్ర ఆత్మ తొహ్చెర్ మత్తొర్.
9 అద్ సమ్దొ ఇంకెడ కాలమ్నగ జర్గ్‌వడ నమున ఆంద్.
అవ్ సేసంగ్ అని బలిదాన్క్, పార్తన-వింతి కియ్వలిర్ బక్తలిర మన్-దిల్దున్ కసుక్నల్ అసలె మోక్డొ సుటి కియ పరొంగ్.
10 బహన్ ఇత్తెకె, ఇవ్ తిన్లె-ఉన్లె అర్పన సియ్వలిక్ అని సుదుడ్ ఆయ్వలిక్ కామ్క్, సిరిప్ మేందొడున్ సాటిన్ కామి సీంతంగ్.
ఇవ్ కామ్క్ సిరిప్ బగవంతన పూన నియమ్ వానల్ వేరి కామి సీంతంగ్.
యేసున నెతుడ అర్పన
11 కిరిస్తు పెర్సొర్ కటొడల్ ఆసి, మాకున్ చొకొట్నంగ్ ఆసిర్‌వాద్క్ తత్తొర్.
వోర్ స్వర్గ్‌నగ మన్వల్ పార్తన-వింతి కియ్వల్ బెయ్ డగుర్ అని బర్పుర్ వాలె డేరత జాగతగ సేవ కియ్లె సొత్తొర్.
అద్ జాగ మాయ్నల్ నివ్డి కీత ఆయొ, ఇత్తెకె ఇద్ కలిత ఆయొ.
12 కిరిస్తు హెరెన నెతురె ఆయి, పడ్డన నెతురె ఆయి, పియ్సి అగ సొన్మకి.
బతి ఉందియ్ జోక తన్వ నెతుడ అర్పన సీసి, అద్ బెయ్ పవిత్ర జాగతగ సొత్తొర్.
అదెన్ హిందల్, మాకున్ బస్కెట్ పిస్వల్ ముక్తి పుట్త.
13 మోసెన కానున్తున్ పియ్సి, ఇవ్ హెరెంగ్ కోందన నెతుర్ అని పడ్డత నీర్, వూర్ బే-సుదుడ్ వాలిర్ పొరొ సిడ్క వాడ్తెకె, సిరిప్ వూర బహిడ మేందొడున్ సుదుడ్ కీంతంగ్.
14 బతి కిరిస్తున నెతుర్ పాప్నె నించి మన్వలిక్ మావంగ్ మన్-దిల్కున్ ఉండె గిర్ బచొరొ సుదుడ్ కీంత.
బహన్ ఇత్తెకె బస్కెట్ మన్వల్ పవిత్ర ఆత్మత సక్తితున్ హిందల్, బే-కసుర్ వాలె యేసు తన్వ తన బగవంతన్ సాటి బలిదాన్ సీతొర్.
మరట్ జీవతె మన్వల్ బగవంతన పార్తన-వింతి కియన్ సాటి, వోర్ కిరిస్తు ఇహిన్ కీతొర్.
15 ఇద్ కారన్తున్ హిందల్ కిరిస్తు ఇద్ పూన నియమున్ సుర్‌వెర్తల్ ఆసి నిల్తొర్.
అని కేయ్సి మత్తుర్ వూర్, బగవంతల్ వాగ్దన్ సీత బస్కెట్ మన్వల్ ఆసిర్‌వాద్నగ ఈస యేత్నల్ వోర్ కీంతొర్.
అదెన్ లాసినె, మొదొడ నియమున్ పియ్సి పాపిరంగ్ పాప్కున్ కండి కియన్ సాటి, తన్వ జీవ సుటి కీతొర్.
చిటి లిహి కియ్వల్
16-17 జాయ్జతున్ బారెతె, బోరె నియమ్న చిటి లిహి కీతెకె, వోన మరన్ ఆయ బీగర్, అద్ చిటి కామి సియొ.
వోర్ మార్త పెజెనె, అద్ చిటి కామి సీంత.
18 ఇదెన్ హిందలె, మొదొడ నియమ్ గిర్ జన్వర్‌త నెతుర్ సియ బీగర్ కామి సియ్మకి.
19 మోసె పర్జ సమ్దిర్‌కున్ దర్మత కానున్తంగ్ హుకుమ్కున్ వెహ్త పెజె, పడ్డన అని హెరెన నెతుడున్ యేతగ మిస్డి కీసి, పొదెలత డేటెతగ* గొరెన రగల్ బూర దొహ్చి, దర్మత కానున్త పుస్తకున్ పొరొ అని సమ్దిర్ పర్జతున్ పొరొ సిడ్క వాటుస్తొర్.
20 “బగవంతల్ మీకున్ ఇద్ హుకుమ్ సీసి తాకట్ ఇంజెర్ వెహ్త నియమ్న నెతుర్ ఆంద్” ఇంజెర్ వెహ్తొర్.+
21 అదె తరికతె, వోర్ అద్ నెతుడున్ పార్తన-వింతి కియ్వల్ డేరతగ అని సేవ కీనెకె వాడకమ్ కియ్వలిక్ చీజ్కున్ పొరొ సిడ్క వాట్తొర్.
22 మోసెన కానున్తున్ హిందల్ సూడ్తెకె, కమి జాస్త సమ్ది చీజ్కున్ నెతుడె సుదుడ్-పాన్ కియన.
నెతుర్ తుహబీగర్ పాప్కున్ మాపి పుటొ.
23 ఇదెన్ హిందల్, మాయ్నలిర్ నివ్డి కీతంగ్ ఇవ్ స్వర్గ్‌నగ మన్వలిక్‌నంగ్ నక్లి రూప్కున్ సాటి, జన్‌వర్క్‌న బలిదాన్ సీసి, సుదుడ్-పాన్ కియ్వల్ జురత్ అర్త.
బతి స్వర్గ్‌నగ మన్వలికున్ సుదుడ్-పాన్ కియ్లె, జన్‌వర్క్‌న నెతుడున్ తెర్ ఉండె చొకొట్నంగ్ బలిదాన్క్ పహ్జె.
24 బొమిత్ పొరొడ బెయ్ పవిత్ర జాగ సిరిప్ స్వర్గ్‌న కరల్ బెయ్ పవిత్ర జాగత మొకొట ఆంద్.
కిరిస్తు మాయ్నలిర్ నివ్డి కీత, పవిత్ర జాగత్ రొపొ సొన్మకి, బతి ఇంకె వోర్ మా హిందల్ ఆసి స్వర్గ్‌నె సొంజి, బగవంతన్ మునె నిల్తొర్.
25 పెర్సొర్ కటొడల్ హర్ సాల్ జన్‌వర్క్‌న నెతుడె బెయ్ పవిత్ర జాగతగ సొత్తపినయ్, వోర్ కిరిస్తు తన్వ తన కేపత్ బలిదాన్త అర్పన సియ్లె, స్వర్గ్‌నె సొన్మకి.
26 కిరిస్తు ఉంది మోక అహన్ బలిదాన్ సియ్మడ్ ఇత్తెకె, కలి గడె మాతగటల్‌తె ఇంకె వేరి, బచొంగొ జోకంగ్ తన్వ జీవ సియ లాగ్న్‌దు.
బతి ఇంకెడ, ఇద్ ఆక్రిత గట్కతె బస్కెట్ మన్లె, సిరిప్ ఉందియ్ జోక, తన్వ తన సమ్దిర పాపున్ సాటి, అర్పన సియ్లె వాతొర్.
27 హర్ వొరొర్ బద్ గిర్ ఉంది గట్క మరన్ ఆయ లాగర్.
అద్ ఆత పెజె, బగవంతల్ తస్వ కీంతొర్.
28 అదెన్ సాటి, కిరిస్తు ఉందియ్ జోక, తన్వ తనయ్ సమ్దిరంగ్ పాప్కున్ సాటి, బలిదాన్త అర్పన సీతొర్.
వోర్ ఉండె ఉంది జోక మల్సి వాంతొర్.
పాపున్ తన్ పొరొ వాట్సి వోయ్లె ఆయొ బతి, తన్వ సాటి బస్కె వానుర్ ఇంజెర్ సూడ్సెర్ మన్వలిర్‌కున్ బచి కియ్లె వాంతొర్.