బద్ వహితుర్కున్ బతల్ కరుసన
2
1 బతి ఇవ్ చొకొట్నంగ్ బోదన్ పియ్సి తాకన ఇంజెర్ నిమె వూర్ పర్జతున్ కరుసీమ్.
2 “బుది-గియన్తె మందన, దుస్రుర్ మాన్ సీనల్ పిసన, ఆసన్ మెయ్సి మందన, బర్పుర్ బరొసతె మందన, సమ్దిర్‌కున్ పెర్మతె సూడన అని వోర్చ్‌వల్ గున్తె మందన” ఇంజెర్ వెడిల్కున్ కరుసీమ్.
3 అదె తీర్దె మాతరికున్, “పవిత్ర జిన్గనితె పిసన, దుస్రుర్‌కున్ రాంగ్ సియ్వ, కల్-పిదెడలిర్ ఆయ్వ అని సిరిప్ చొకొటునె వెహన” ఇంజెర్ కరుసీమ్.
4-5 అస్కెనె అవ్ మాతరిక్, డియ పేకిన్, “మీ మాడ్సతున్ అని మరి-మియడున్ పెర్మ కియన.
మీవ మిరట్ జరబ్నె అని పవిత్ర* మందన.
మీవ రోత కామ్ కియన.
దయ గున్ మందన అని మీవుర్ మాడ్సుర గొస్టి పియ్సి తాకన” ఇంజెర్ బోద కరుసీంతంగ్.
అద్ తరికత డియన పిస్వల్ సూడ్సి, బోరె గిర్ బగవంతన గొస్టితున్ ఉల్ట వడ్క పరుర్.
6 అదె తీర్దె డియుర్కున్, “మీవ మిరట్ జరబ్నె మందన” ఇంజెర్ గటి-దీర్య సీసెర్ కరుసీమ్.
7 నీవ నిమె చొకొట్నంగ్ కామ్క్ కీసెర్, వూర్ డియుర్కున్ తాకుసియన.
నిమె కరుస్వలిక్ గొస్టింగ్ బేద్-బావ్ తొహ్వక్‌నె, మాన్ సీనల్ మందన.
8 పగ-దార్క్ నీకున్ తప్నగ పియ్వక్‌నె దిహన్తె కరుసీమ్.
అస్కె నిమె తప్నగ సాప్డె మాయ్వ సొంజి, వూర్ లజె మాంతెర్.
9-10 దాసిర్కున్, “మీవుర్ మాల్కలిర్ వెహ్త తీర్ తాక్సి ఆనంద్ సీమ్ట్.
వూర్కున్ బస్కెన్ మర్ల బడ్మట్ అని వూర్గటల్ బతయ్ కల్సి వోయ్మట్.
బతి వూర్ మాల్కలిర్ మీ పొరొ నమ్మకమ్ ఇర్నల్ బరొసతె చొకొట్ పిసట్” ఇంజెర్ కరుసీమ్.
అహన్ వూర్ పిస్తెకె, మావొర్ బచి కియ్వల్ బగవంతన గొస్టి దుస్రుర్‌కున్ తన్వ బాజున్ ఊమ పరంత.
11 వూర్ సమ్దిరె అహన్ పిసన, బారితెకె సమ్దిర్‌కున్ పాప్నల్ బచి కియ్లె బగవంతన పెర్మత-దయ ఉజగిరి అర్త.
12 అద్ పెర్మత-దయ మాకున్, “బదె పేన్ సెలె ఇన్వలిక్ గొస్టిన్ అని దునియతంగ్ ఆసన్ సుటి కీమ్ట్.
మావ మన్దున్ జరబ్నె ఇర్సెర్, చొకొట్-పాన్దె తాకన అని ఇంకె ఇద్ దునియతె మావ ఆత్మత బావ్-బక్తితె పిసెర్ మందన” ఇంజెర్ కరుసీంత.
13 మాకున్ బచి కియ్వల్ సక్తి వాలె బగవంతల్ ఆయ్వల్ యేసు కిరిస్తు మయ్మతె వాయ్వల్ దివొసున్ సాటి, మరట్ సమ్దిర్ ఆసతె సూడ్సెర్ మంతట్.
14 సమ్దొ కరబ్-పాన్దల్ మాకున్ సుటి కియుసన ఇంజెరెన్ యేసు కిరిస్తు తన్వ జీవ సీతొర్.
ఇదెన్ హిందల్ మాకున్ సుదుడ్ కీసి సత్నంగ్ కామ్క్ కీసెర్ పర్పెడె మాయ్లె నేమి కీతొర్.
15 ఇంకె వేరి వెహ్తంగ్ గొస్టినల్, “బవ్ గొస్టింగ్ పియ్సి తాకన అని బవెన్ సుటి కియన” ఇన్వలికున్ అదికార్దె లోకుర్కున్ కడక్ కరుసీమ్.
బోరె నీకున్ చుడుర్-పాన్దె సూడ్వక్‌నె సూడ.