దుస్రొక్ బాసంగ్ అని బగవంతల్ వెహ ఇతతున్ వెహ్వలిక్ వరమ్క్
14
1 అదెన్ సాటి పెర్మతె మన్లె వెలె కోసిద్ కీమ్ట్.
పవిత్ర ఆత్మ సియ్వలిక్ వరమ్కున్ వెలె ఆసతె కోరట్.
ముకెతె బగవంతల్ వెహ ఇతతున్ వెహ్వల్ వరమున్ కోరట్.
2 బారితెకె కరె మాయొ అద్ బాసతె వడ్క్‌వల్ మాయ్నలిర్ సంగ ఆయొ బతి, బగవంతన్ సంగ వడ్క్‌సెర్ మంతొర్.
బగవంతన ఆత్మత సక్తితె వోర్ మర్మతంగ్ గొస్టింగ్ వెహంతొర్.
ఇదెన్ మాయ్నలిర్ బోరె అర్తమ్ కియ పరుర్.
3 బతి బగవంతల్ వెహ ఇతతున్ వెహ్వన బోద, మాయ్నలిర బరొసతున్ బడి కియ్లె, బక్తితగ మునె సొన్లె అని సాంతితె మన్లె కామి సీంత.
4 కరె మాయొ అద్ బాసతె వడ్క్‌వన వరమ్ తన్వ తన బడె మాయ్లె కామి సీంత.
బతి బగవంతల్ వెహ ఇతతున్ వెహ్వల్ వరమ్ పూరొ చర్చితుర్ బక్తలిర్ బక్తితగ బడె మాయ్లె కామి సీంత.
5 మిరట్ సమ్దిర్ వాయొంగ్ అవ్ బాసంగ్ వడ్కన ఇన్వల్ ఆస కీంతొన్.
బతి ఇదెన్ తెర్ అదిక్ బగవంతల్ వెహ ఇతతున్ వెహన ఇంజెర్ ఆస కీసెర్ మంతొన్.
బారితెకె, వడ్క్‌తంగ్ అవ్ బాసన అర్తమ్ వెహ్వల్ బోరె సెల్వెకె, చర్చితుర్‌కున్ బతయ్ పాయ్ద పుటొ.
బతి చర్చితుర్ బక్తలిర బరొస బడె మానల్ బగవంతల్ వెహ ఇతతున్ వెహ్వల్ బస్కె గిర్ వెహ వచొ.
అదెన్ సాటి, బాసన వరమున్ తెర్ ఇద్ వరమె వెలె కామి సీంత.
6 దాదలిర్-బాయిక్నిట్!
నన మిహ్గ వాసి, మీకున్ వాయొంగ్ అవ్ బాసనె వడ్క్‌తెకె మీక్ బతల్ పాయ్ద పుటంత?
నా హిందల్ బగవంతల్ మీకున్ పూన గొస్టి కరుసన సెలెకె, మీకున్ గియన్ సియుసన సెలెకె, నా తొడ్దె తన్వ బోద వెహుసన.
ఇవ్ బవె గిర్ నన వెహ పర్వెకె, నా హిందల్ మీకున్ బతల్ పాయ్ద పుటంత?
బతయ్ పుటొ!
7 జీవ సెలెంగ్ అవ్ వస్తుంగ్ ఆయ్వలిక్ బొంగ అని పేప్రె వడుస్నెకె, వూర్ అవెన నాంద్ బరొబర్ తెండ్వెకె, బదెన్ వడుసంతెర్ ఇన్వల్ మాకున్ బహన్ కరె మాంత?
కరె మాయొ!
8 అని తురత నాంద్* బరొబర్ పెసివెకె లడెయ్ కియ్లె, బోర్ తయర్ ఆంతెర్?
బోరె ఆయుర్!
9 అదె తీర్దె, మిరట్ వడ్క్‌వల్ వెంజెడె చొకొట్ వడ్కబీగర్ కేంజ్వలిర్‌కున్ బగ అర్తమ్ ఆంత?
అసలె అర్తమ్ ఆయొ!
ఇవ్ సిరిప్ వడితగ వడ్క్‌తప్ మందంతంగ్.
10 ఇద్ పరిపంచమ్నగ వెలె తీర్క్‌నంగ్ బాసంగ్ మంతంగ్ బతి, అర్తమ్ సెల్వక్‌నె బదె బాస మనొ.
11 బతి బోరె వొరొర్ వడ్క్‌వల్ బాస నాకున్ అర్తమ్ ఆయ్వెకె, వోర్ నాకున్ ముసపరిన్ దాత్ మందంతొర్.
వోన్ నన ముసపరిన్ దాత్ మందంతొన్.
12 మిరట్ పవిత్ర ఆత్మ సియ్వలిక్ వరమ్కున్ సాటి ఆసతె మత్త కాడ్కి, చర్చితుర్ బక్తలిర్ సమ్దిర్ బరొసతగ బడె మాయ్లె, అవ్ మీకున్ పుటన ఇంజెర్ కోరట్.
13 కరె మాయొ అద్ బాసతె వడ్క్‌వల్, తాన అర్తమ్ వెహ్నల్ సక్తి సీమ్ ఇంజెర్ బగవంతన్ పార్తన కియన.
14 బారితెకె మోక అద్ బాసతె పార్తన కీకతె, నావ ఆత్మ పార్తన కియ్మడ్ మందర్ బతి, నావ మన్ లంగ్ మందంత.
15 అదెన్ సాటి, నన రండుతె తీర్క్‌నె కీంతొన్: కహి జోకంగ్ ఆత్మతె పార్తన కీంతొన్ అని ఉండె కహి జోకంగ్ వాయ్వల్ బాసతె మన్దె పార్తన కీంతొన్.
కహి జోకంగ్ ఆత్మతె వారంతొన్ అని ఉండె కహి జోకంగ్ వాయ్వల్ బాసతె మన్దె వారంతొన్.
16 సిరిప్ మిరట్ ఆత్మతె బగవంతన్ డగుర్-పాన్ సీసెర్, బోనె కరె మాయొ అద్ బాసతె పార్తన కీతిట్ ఇంట్.
ఇదెన్ బారెతె వొడ్కి సెలొర్ వోర్, నిమె కియ్వల్ పార్తన అర్తమ్ ఆయ్వ సొంజి, ‘ఆమెన్’ ఇంజెర్ వోర్ బహన్ ఇందనుర్?
అసలె ఇనొర్!
17 నిమ్తె బగవంతన్ డగుర్-పాన్ సీసెర్ చొకొట్ పార్తన కీసెర్ మంతి.
బతి దుస్రుర్ బక్తితగ బడె మాయ్లె, అద్ బతతునె కామి సియొ.
18 నన వాయొంగ్ అవ్ బాసన వరమున్ మీ సమ్దిర్‌గటల్ అదిక్ వాడకమ్ కియ్లె, కారన్ ఆయ్వల్ బగవంతనె దనెవాద్ వెహ్చెర్ మంతొన్.
19 తెర్ బతి, చర్చితుర్ బక్తలిర్ సంగ వూర్కున్ కరె మాయొ అద్ బాసతె దహ హజర్ (10,000) గొస్టింగ్ వెహ్వడున్ తెర్, వూర్కున్ వాయ్వల్ బాసతె సియుంగ్ గొస్టింగ్ వాప్రి కీసి, బోద వెహ్వల్ చొకొట్ మందంత.
చర్చితుర్ బక్తలిర్‌కున్ సూచన కియ్వల్
20 దాదలిర్-బాయిక్నిట్!
సోంచ్ కియ్వల్ గొస్టితగ చుడుకున్ మోడి మన్మట్ బతి, డగుకున్ మోడి మంట్.
అని కరబ్-పాన్ద గొస్టితగ చుడుకున్ మోడి మంట్.
21 దర్మ-గ్రంత్‌నగ,
“నన వీర్ పర్జత్ సంగ దుస్రొక్ బాసంగ్ వడ్క్‌వలిర కెయ్దె,
అని ముసపరిరంగ్ సివ్లినె వడ్కుసంతొన్.
తెర్ బతి వీర్ నావ గొస్టి కేంజుర్”
ఇంజెర్ బగవంతల్ లిహి కియుస్తొర్.
22 అదెన్ సాటి కరె మాయొ అద్ బాసతె వడ్క్‌వల్ నమ్తుర్ సాటి ఆయొ బతి, నమ్‌మకి వూర్ సాటినె నిసని ఆసి మంత.
బగవంతల్ వెహ ఇతతున్ వెహ్వల్ నమ్‌మకి వూర్ సాటి ఆయొ బతి, నమ్తుర్ సాటినె నిసని ఆసి మంత.
23 చర్చితుర్‌గ మిరట్ సమ్దిర్ మీరె మాసి మనెకె, బోనె వాయొంగ్ అవ్ బాసనె వడ్క్‌వల్ సురు కీతెర్ ఇంట్.
అస్కె అవెన్ బారెతె అర్తమ్ కియుర్ వూర్ సెలెకె, పర్బున్ నమ్‌మకి వూర్ మిహ్గ వానిర్తె, వీర్ సమ్దిర్‌కున్ పిసంగ్ పియ్తంగొ బతలొ ఇంజెర్ మీకున్ ఇనురియ్?
తప్వక్ ఇంతెర్!
24-25 బతి మిరట్ సమ్దిర్ బగవంతల్ వెహ ఇతతున్ వెహ్తిట్ ఇంట్.
అస్కె ఇదెన్ బారెతె అర్తమ్ కియుర్ వూర్ సెలెకె, పర్బున్ నమ్‌మకి వూర్ మిహ్గ వానిర్తె, మిరట్ వెహ్వల్ కేంచి తమ్వ పాపున్ కరి కీంతెర్.
వూరంగ్ దిల్క్‌నగ మక్డితె మన్వలిక్ సమ్దొ ఉజగిరి అరంతంగ్.
అద్ గట్కతె వూర్ బగవంతన్ మునె ముర్-టొంగ్రంగ్ కొట్సి, చుక్ చుకె మాసెర్, “కరలెన్ బగవంతల్ మీ నడ్డుమ్ మంతొర్” ఇంజెర్ వొపంతెర్.
పార్తన-వింతి కియ్వల్ తరిక
26 దాదలిర్-బాయిక్నిట్!
ఇంకె మీ నడ్డుమ్ పార్తన-వింతి బహన్ తాక్సెర్ మంత?
మిరట్ చర్చితుర్ సంగ మీరె మాత పెజె, వొరొర్ పాట వారన ఇంతొర్.
ఉండె వొరొర్ ఉంది చొకొట్న గొస్టిత బోద వెహన ఇంతొర్.
ఉండె వొరొర్ తనకున్ బగవంతల్ ఉజగిరి అరుస్తతున్ వెహన ఇంతొర్.
వొరొర్ కరె మాయొ అద్ బాసతె వడ్క్‌లె సూడంతొర్.
ఉండె వొరొర్ అద్ బాసత అర్తమ్ వెహ్లె సూడంతొర్.
ఇవ్ సమ్దొన్ ఇహ్నె జర్గుసీమ్ట్ అని చర్చితుర్ సమ్దిర్ బక్తితగ బడె మాయ్లె, ఇవెన్ వాప్రి కీమ్ట్.
27 కరె మాయొ అద్ బాసతె వడ్క్‌వల్ మత్తెకె, ఇవిర్ జురత్ అర్తెకె మువిర్కున్ అదిక్ వడ్క్‌వ.
వూర్ గిర్ తన్వ వంతున్ పియ్సి వడ్కన.
అని అవ్ బాసన అర్తమ్ వెహ్వల్ వొరొర్ తప్వక్ మందన.
28 బతి చర్చితుర్ రొపొ అర్తమ్ వెహ్వల్ సెల్వెకె, కరె మాయొ అద్ బాసతె వడ్క్‌వల్ మాయ్నల్ దబ్ మందన.
వోర్ తన్వ ఆత్మతె బగవంతన్ సంగ వడ్క వచొ.
29 బగవంతల్ వెహ ఇతతున్ వెహ్వలిర్ పర్‌వక్తలిర్ ఇవిర్ సెలెకె మువిర్ వెహ వచొ.
మెయ్తుర్ వూర్ వెహ్త అదెన్ దిహన్తె పరిక్స కియ లాగర్.
30 బతి ఉచ్చి మన్వలిర్‌గటల్ అచనక్ బోనె బగవంతల్ తన్వ గొస్టి వెహ ఇందనుర్‌తె, మొదొడొర్ మాయ్నల్ వడ్క్‌వల్ ఆపుస లాగర్.
31 సమ్దిర్ కరినల్ అని సమ్దిర్ బక్తితగ మునె సొన్లె, మిరట్ వొరొన్ పెజెయ్ వొరొర్ బగవంతల్ వెహ ఇతతున్ వెహ వచొ.
32 అని బగవంతల్ వెహ ఇతతున్ వెహ్వలిర్ పర్‌వక్తలిర్, బస్కె వడ్కన, బతల్ వడ్కన ఇన్వల్ తమ్వ తమకున్ జరబ్నె ఇరంతెర్.
33-34 బారితెకె, బగవంతల్ కల గుల కీసి, లొలి పుటుస్వల్ ఆయొర్.
బతి చర్చితుర్ బక్తలిర్ నడ్డుమ్ బర్పుర్ సాంతితున్ రెహి కియ్వల్ ఆందుర్.
చర్చితుర్ సమ్దిర్ మీరె మాసి మనెకె, వెయ్లొక్ దబ్ మంద లాగర్.
వడ్కన్ సాటి అవెన్ అదికార్ సెలె.
ఇదెన్ బారెతె దర్మ-గ్రంత్‌నగ, “వెహ్త తీర్ వెయ్లొక్ తాకన”+ ఇంజెర్ లిహి కీసి మంత.
35 వెయ్లొ బతయ్ కరిక ఇందర్తె, రోన్ సొత్త పెజె తన్వొర్ మాడ్సొన్ పూసి కియన.
చర్చితుర్ నడ్డుమ్ వడ్క్‌వల్ వెయ్లొ తన్వ హిజత్ తనయ్ వోతప్ ఆంత.
36 బగవంతన వచన్ మిహ్గటలె పుడ్త ఇంతిట్ కి, సెలెకె సిరిప్ మిహ్గనె వాత ఇంతిట్?*
37 మిహ్గటల్ బోరె వొరొర్ బగవంతల్ వెహ ఇతతున్ వెహ్వల్ పర్‌వక్తల్, సెలెకె ఆత్మత బావ్-బక్తి వాలెన ఇన్వల్ మందనుర్‌తె, ఇవ్ మీకున్ లిహి కియ్వలిక్ ఆగెంగ్ పర్బునంగె ఆందుంగ్ ఇంజెర్ కరి కియన.
38 బతి ఇదెన్ బోరె వొప్వెకె దానుర్‌తె, వోన్ మిరట్ వొప్మట్.*