యేసున్ లాడ్ కియ్వల్ బక్తన మరన్
11
1 బెతనియ ఇన్వల్ నాటె లాజర్ ఇన్వల్ వొరొర్ బేమరితె అర్సి మత్తొర్.
వోనంగ్ తకక్ మార్తల్ అని మరియల్ గిర్, అదె నాటె పిసెర్ మత్తంగ్.
2 పర్బున్ సెంట్+ సోక్సి, వోనంగ్ కాల్కున్ తన్వంగ్ కెల్క్‌నె ఉసుమ్త అద్ మరియల్ ఇదె ఆంద్.
వేర్ లాజర్ తానొరె తముర్ ఆందుర్.
3 అదెన్ సాటి అవ్ రండ్ తకక్, “పర్బు, నిమె లాడ్ కియ్వల్ బేమరితె అర్సి మంతొర్” ఇంజెర్ యేసునగ కబుర్ సారి కీతంగ్.
4 అద్ కబుర్ కేంచి యేసు, “ఇద్ బేమరి వోన్ జక్లె వాయ్మకి.
బతి బగవంతనొర్ మరిన్ మాన్ సీసి, బగవంతనె మయ్మ తర్లె వాత” ఇంజెర్ వెహ్తొర్.
5 యేసు మార్తన్, తాన సేలడున్ అని లాజర్తున్ లాడ్దె సూడ్న్‌దుర్.
6 వోర్ లాజర్ బేమరితె మత్త అద్ కబుర్ యేసున్ కేంజ వాత.
తెర్ బతి, ఉండె రండ్ రోజ్క్ అగనె ఆగ్తొర్.
7 అహన్ ఆగ్త పెజె, “యూదయ యేరియతె మల్సి దాకట్” ఇంజెర్ సిస్యలిర్‌కున్ ఇత్తొర్.
8 అస్కె సిస్యలిర్, “గురుజి!
అగటుర్ యూదుల్క్ ఇంద్కెట్‌కె నీకున్ బండనె పాయ్లె సూడ్సెర్ మంతెర్.
ఉండె అగ దాక ఇంతియ్?”
ఇంజెర్ యేసున్ పూసి కీతెర్.
9 తె యేసు, “ఉంది దివొసున్ బార గంటంగ్ వేడ్చి మందంత.
+ ఇద్ దిహతె తాక్వల్ దునియత వేడ్చి సూడ్త కాడ్కి, కొద పాయొర్.
10 బతి రాత్నె తాక్వల్ వేడ్చి సెల్వ కాడ్కి, వోర్ కొద పాంతొర్” ఇంజెర్ వెహ్తొర్.
11 ఇహిన్ వెహ్త పెజె యేసు, “మావొర్ సోప్తల్ లాజర్ మీండ్సి మంతొర్.
వోన్ జోప్నల్ తెహ్లె దాంతొన్” ఇంజెర్ ఇత్తొర్.
12 అస్కె సిస్యలిర్, “పర్బు, వోర్ మీండ్సి మత్తెకె, తప్వక్ తేచ్చి చొకొట్ ఆంతొర్!”
ఇంజెర్ వెహ్తెర్.
13 యేసు లాజర్త మరన్తున్ బారెతె వెహ్తొర్ బతి, వూర్ సిస్యలిర్ సాదరన్ జోపున్ బారెతె వెహ్తొర్ ఇంజి మత్తెర్.
14 తె యేసు, “లాజర్ మార్తొర్” ఇంజి కుల కుల వెహ్చి,
15 “అగ నన మన్మకి అచొర్ చొకొట్ ఆత.
మీ సాటినె ఇహిన్ జర్గ్‌త.
మీవ బరొస బడె మాయన ఇన్వలె నావ ఇచ.
ఇంగె మరట్ అగ దాకట్ దెట్!”
ఇంజెర్ వూర్కున్ ఇత్తొర్.
16 అస్కె యేమల్* ఇంజెర్ కేయ్వల్ తోమల్, “యేసున్ తోడొ మరన్ ఆయ్లె, మరట్ గిర్ దాకట్ దెట్” ఇంజెర్ తన్వ బరొబర్ మన్వలిర్ సిస్యలిర్‌కున్ ఇత్తొర్.
సాతుర్కున్ నేండుస్వల్ సక్తి యేసునగ మంత
17-19 బెతనియ నార్ యెరుసలెమ్నల్ కరుమ్ కరుమ్ రండ్ కోస్క్ లంగ్ మత్త.
అగ తమున మరన్తున్ హిందల్, దుక్సతె మన్వలిక్ మార్తన్ అని మరియన్ సుమ్జి కియ్లె, వెలెటిర్ యూదుల్క్ వాసి మత్తెర్.
తె యేసు అద్ నాటున్ కరుమ్ యెవ్త పెజె, లాజర్త కూర్దున్ నారిత బండత వీచ్న బుయరితగ ఇర్సి, నాలుంగ్ రోజ్క్ ఆత ఇంజెర్ కరి కీతొర్.
20 మార్తల్, యేసు వాసెర్ మంతొర్ ఇన్వల్ కేంచి బేటె మాయ్లె మునెత్క్ సొత్త.
బతి మరియల్ రోతగన్ రెహె మాత.
21 మార్తల్ యేసున్ బేటె మాసి, “పర్బు!
నిమె ఇగె మంది ఇత్తెకె, నావొర్ తముర్ సాసి మనొర్.
22 బతి ఇంకె ఆతెకె గిర్ బతయ్ ఆయొ.
నిమె బగవంతన్ బతల్ తల్కకి అదెన్, నీకున్ సీంతొర్” ఇంజెర్ ఇత్త.
23 అస్కె యేసు, “నీ తముర్ నేండంతొర్” ఇంజెర్ వెహ్తొర్.
24 తె మార్తల్, “హో పర్బు, తస్వ కియ్వల్ దివొస్నె వోర్ నేండంతొర్ ఇన్వల్ నాకున్ టావయె” ఇంజెర్ ఇత్త.
25 అద్ కేంచి యేసు, “జీవత అని నేండుస్వన ననయె ఆందున్.
నా పొరొ బరొస ఇర్వల్ సాతెకె గిర్ మర్ల పిసంతొర్.
26 జీవతె మంజి నా పొరొ బరొస ఇర్వన్ బస్కెట్ మన్వల్ మరన్త సిక్స పుటొ.
+ ఇదెన్ బరొస కీంతి కి?”
ఇంజెర్ పూసి కీతొర్.
27 తె అద్, “హో పర్బు!
నిమెయ్ బగవంతనొర్ మరి కిరిస్తుని ఆంది అని ఇద్ కలితె వాయ్లె మత్తొని గిర్ నిమెయ్ ఆంది.
ఇదెన్ బరొస కీంతొన్” ఇంజెర్ వెహ్త.
28-30 యేసు అస్కె వేరి నాటె నేంగ్మకి.
మార్తల్ బగతె బేటె మాతయొ అగనె ఆగ్సి మత్తొర్.
తె మార్తల్ రోన్ సొత్త అని మరియన్ కుసయె కేయ్సి, “గురుజి వాతొర్.
నీకున్ కేయంతొర్” ఇంజెర్ సేలడున్ సంగ వెహ్త.
ఇద్ గొస్టి కేంజ్త బరొబర్ మరియల్ తేచ్చి, యేసునగ సొత్త.
31 కహితుర్ యూదుల్క్ మరియన్ సుమ్జి కీసెర్ రోన్ మత్తెర్.
అస్కె అద్ సప-సిప తేచ్చి సొన్వల్ సూడ్సి, వీచ్నగ సొంజి ఆడంత బతలొ ఇంజెర్, తాన్ పెజెయ్ సొత్తెర్.
32 మరియల్ యేసు మన్వల్ జాగతె సొంజి, వోనంగ్ కాల్కున్ పొరొ అర్సి, “పర్బు!
నిమె ఇగె మంది ఇత్తెకె, నావొర్ తముర్ మార్సి మనొర్” ఇంజెర్ ఇత్త.
33 మరియల్ అని తాన్ సంగ వాతుర్ యూదుల్క్ సమ్దిర్ ఆడ్వల్ సూడ్సి, యేసున దిల్తె బెయ్ దుక్స లాగ్త.
34 అస్కె యేసు, “వోన కూర్దున్ బగ ఇర్తిట్?”
ఇంజెర్ పూసి కీతొర్.
తె వూర్, “పర్బు, వాసి సూడ” ఇంజెర్ వెహ్తెర్.
35 అద్ కేంచి, యేసు జొడ జొడ కాడెర్ తుహ్తొర్.
36 అద్ సూడ్సి వూర్ యూదుల్క్, “లాజర్తున్ బచొర్ లాడ్ కీతొరొ సూడట్” ఇంజెర్ ఇత్తెర్.
37 వూర్గటల్ కహి లోకుర్, “వేర్ యేసు, గుడ్డిర్‌కున్ నదుర్ వాయుస్తొర్.
తె వేర్ లాజర్తున్ సాయ్వక్‌నె ఇర పర్సి మనొర్ కి బతల్?”
ఇంజెర్ ఇత్తెర్.
సాతొర్ వోర్ లాజర్తున్ యేసు నేండుస్వల్
38 యేసున దిల్తె ఉందుంది జోక దుక్స లాగ్త.
తె వీచ్నగ సొత్తొర్.
అద్ ఉంది నారిత బండత బుయరి ఆంద్.
ఉంది బండ తాన్గ అడ్డమ్ ఇర్సి మత్త.
39 తె యేసు, “అద్ బండతున్ తెండట్!”
ఇంజెర్ వూర్కున్ వెహ్తొర్.
అస్కె సాతొర్ వోన తక్క మార్తల్, “పర్బు, ఇంకె వోన కూర్ కడిసి గాడి వాసెర్ మందర్.
బారితెకె వోర్ మార్సి నాలుంగ్ రోజ్క్ ఆసెర్ మంతొర్” ఇంజెర్ వెహ్త.
40 అస్కె యేసు, “నిమె బరొస ఇర్కితె, బగవంతన మయ్మతున్ సూడ్కి, ఇంజి నీకున్ వెహ్తొన్ కి?”
ఇంజెర్ ఇత్తొర్.
41 తె వూర్ అద్ బండతున్ తెండ్తెర్.
అస్కె యేసు పొరొ సూడ్సెర్, “బాబ, నావ పార్తనతున్ కేంజ్త కాడ్కి, నీకున్ దనెవాద్.
42 నిమె బస్కెట్ నావ పార్తనంగ్ కేంజంతి ఇన్వల్ నాకున్ టావయె.
బతి నిమెయె నాకున్ సారి కీతి ఇంజెర్ కరి కీసి, నా సిర్ముట్‌నుర్ బరొస ఇరనిర్ ఇంజి వూర్ సాటినె, ఇద్ గొస్టి వెహ్తొన్” ఇంజెర్ ఇత్తొర్.
43 ఇహిన్ ఇత్త పెజె యేసు,
లాజర్ బగవంతన సక్తితె నేండ్వల్
ఇంజెర్ జోర్తె కేయ్తొర్.
44 అస్కె తన్వ కూర్దున్ గూండి కీతంగ్ కప్డినెన్ లాజర్ బహ్రి వాతొర్.
వోన మొకొమ్ సేలతె గూండి కీసి మత్త.
“గూండి కీతంగ్ కప్డిన్ ఊలి కీసి, వోన్ సొంద సీమ్ట్” ఇంజెర్ యేసు వెహ్తొర్.
యేసున్ జక్లె యూదుల్క్ పిలన్ వాట్వల్
45 అద్ కామున్ సూడ్సి, మరియన్ సుమ్జి కియ్లె వాతుర్ యూదుల్క్‌నగటల్ వెలెటిర్ యేసున్ పొరొ బరొస ఇర్తెర్.
46 బతి వూర్గటల్ కహి జన్క్, పరిసయుల్క్‌నగ సొంజి, యేసు కీత కామున్ బారెతె వెహ్తెర్.
47 అదెన్ సాటి డగుక్ కటొడలిర్ అని పరిసయుల్క్ పంచ్నుర్‌కున్ కేయుసి, “మరట్ బతల్ కీకట్?
వోర్ మాయ్నల్ వెలె మయ్మతంగ్ కామ్క్ కీసెర్ మంతొర్.
48 మరట్ వోర్ కియ్వలికున్ ఇహినె సూడ్సెర్ మత్తెకె, వోరె రాజల్ ఇంజెర్ సమ్దిరె వోన్ పొరొ బరొస ఇరంతెర్.
అస్కె రోమ రాజ్నుర్ అదికారిర్ వాసి, మా మందిర్తున్ నాసెడమ్ కీంతెర్ అని మా జాతితుర్కున్ ఇగెటల్ పూడి సీంతెర్” ఇంజెర్ వెహ్తెర్.
49-50 అహన్ వెహ్త బరొబర్, “పిసలిర్నిట్!
మా జాతితుర్ నాసెడమ్ ఆయ్వక్‌నె, వొరొర్ మాయ్నల్ పర్జత్ సాటి పరన్ సియ్వల్ చొకొట్ ఇంజి సమ్జె మాయ్విటియ్?”
ఇంజెర్ అద్ గట్కతె పెర్సొర్ కటొడల్ ఆయ్వల్ కయపల్ ఇత్తొర్.
51-52 సిరిప్ యూదుల్క్‌న లాబమున్ సాటినె ఆయొ.
బతి దునియ పూరొ పగ్రె మాసి మన్వలిర్ బగవంతనుర్ లోకుర్ సమ్దిర్‌కున్ మీరి కియ్లెనె, యేసు పరన్ సీంతొర్ ఇంజెర్ మునె జర్గ్‌వల్ వచన్ వెహ్తొర్.
ఇద్ గొస్టి తన్వ తన ఆసి వెహ్మకి.
బతి అద్ సాల్ పెర్సొర్ కటొడల్ ఆసి మత్త కాడ్కినె, వెహ పర్తొర్.
53 అద్ నేటితల్ వోన్ జక్లె పిలన్ వాట్వల్ మొదొల్ కీతెర్.
54 అదెన్ సాటి యేసు అస్కెడల్ యూదుల్క్‌నగ ఉజగిరి వెలివక్నె, బోడి గుటన్ కరుమ్ మన్వల్ యెప్రాయిమ్ ఇన్వల్ చహర్తె సొంజి, అగ సిస్యలిర్ సంగ కహి రోజ్క్ మత్తొర్.
55-57 అస్కె యూదుల్క్‌న పస్క సడ్ కరుమ్ వాసెర్ మత్త.
తె, “బోనె యేసున పత లాగ్తెకె వెహన.
మమొట్ వోన్ పియంతొమ్” ఇంజెర్ డగుక్ కటొడలిర్ అని పరిసయుల్క్ హుకుమ్ సీసి మత్తెర్.
సడ్దున్ సాటి తమ్వ తమ సుదుడ్ కియ్లెన్, మునెనె వెలెటిర్ లోకుర్ ఆజు-బాజుతంగ్ నహ్క్‌నల్ యెరుసలెమ్ వాతెర్.
వూర్ యేసున్ మహ్క్‌సెర్ మందిర్తున్ రొపొ నిల్సి, “వోర్ ఇద్ సడ్దున్ వాంతొర్ కి, వాయొర్?
మిరట్ బతల్ ఇంతిట్?”
ఇంజెర్ వొరొన్ వొరొర్ పూసి కీతెర్.