కబ్లె మాయ్వన్ బతల్ కియన
17
1 ఉంది దియ యేసు తన్వుర్ సిస్యలిర్ సంగ, “పాప్నగ కోండి కియ్వలిక్ తప్వక్ వాంతంగ్.
బతి అవ్ బోన్ హిందల్, వాంతంగొ వోన్ సిక్స తపొ.
2 నా పొరొ బరొస ఇర్వలిర్ ఈతుర్ చుడుర్-పాన్దె మన్వలిర్‌గటల్ వొరొర్ పాప్ కియన్ సాటి, ఉంది మోక బోరె కారన్ ఆనుర్తె, ఆతొర్ మాయ్నన గోటితగ ఉంది డగుర్ జత్తతున్ దొహ్చి, సమ్దుర్‌తగ వాట్వల్ చొకొట్ మందంత.
3 అదెన్ సాటి, మీవ మిరట్ దిహన్తె మంట్.
మిహ్గటల్ బోరె ఆయి పాప్ కీనుర్తె, వోన్ దమ్కి సీమ్ట్.
అని వోర్ పాప్నల్ కబ్లె మాతెకె, మాపి కీమ్ట్.
4 ఉంది మోక వోర్ ఉంది దియత్ రొపొ యేడుంగ్ జోకంగ్ *మీకున్ ఉల్ట పాప్ కీసి, అంటిత్కె యేడుంగ్ జోకంగ్ మిహ్గ వాసి, ‘నన కబ్లె మాసెర్ మంతొన్’ ఇందనుర్తె, వోన్ మాపి కీమ్ట్” ఇంజెర్ వెహ్తొర్.
పాప్నగ అరుస్వవలిర్ పొరొ సిక్స వాయ్వల్ (17:1-4)
విస్వాసున్ బారెతె
5 అపొస్‌తుల్క్, “మావ బరొసతున్ బడి కీమ్” ఇంజెర్ పర్బున్ కోర్తెర్.
6 తె పర్బు, “మీకున్ మోవెర దానతచొర్ బరొస మత్తెకె గిర్ ఆయర్.
ఇద్ డగుర్ మరత్ సంగ, ‘యే!
మరతి సీర్క్ మిసడి సమ్దుర్‌తగ సొంజి అర’ ఇత్తెకె గిర్, అద్ మీ గొస్టి కేంచి అరంత” ఇంజెర్ వెహ్తొర్.
సేవ్కన జిమెదారి
7 యేసు ఉండె గిర్ ఇహిన్ వెహ్తొర్: “నీవ పొలమ్ ఊడ్వల్ సేవ్కలె ఆయి, సెలెకె నీవంగ్ గొరెంగ్ మెహ్వల్ గాయ్కియ్ ఆయి, కామ్నల్ రోన్ వాతొర్ ఇత్తెకె వోన్ సంగ, ‘వెయ్నె వాసి జేవున్ కియ్లె ఉద!’
ఇంజెర్ ఇంతి కి?
అసలె ఇన్వి.
8 అహన్ ఇందన్ బద్లి, ‘నా సాటి గాటొ-కుస్రి అట.
సేలతె నడి దొహ్చి, నాకున్ వహ్డి కీమ్.
నన తిన్వల్ ఆత పెజె నిమె తింద్కి’ ఇంజెర్ ఇంతి.
9 నిమె వెహ్తప్ వోర్ సేవ్కల్ కీతొర్ ఇంజెర్, వోన్ నిమె దనెవాద్ వెహంతి కి?
నిమె అసలె వెహ్వి.
10 “మిరట్ గిర్ వెహ్త తీర్ నిబి కీత పెజె, ‘మమొట్ సాదరన్ సేవ్కలిర్ ఆందుమ్.
మా పొరొ మన్వల్ జిమ నిబి కీతొమ్ అచొరె’ ఇంజి వెహన” ఇంజెర్ వెహ్తొర్.
బగవంతన్ దనెవాద్ వెహ్వల్
11 యేసు యెరుసలెమ్ సొన్లె యాత్ర కీనెకె, గలిలయ అని సమరయ యేరియన సివత్ నడ్డుమ్‌నల్ సొంజెర్ మత్తొర్.
12 అహన్ సర్దె మన్వల్ ఉంది నాటె నేంగ్లె ఆనెకె, పెర్స నొపితె మన్వలిర్ దహ జన్క్ వోన్ మునెత్క్ వాసెర్ మత్తెర్.
13 అని వూర్ యేసున్ సూడ్సి, లంగ్ నిల్తెర్.
అని, “యేసు!
మా మాల్క!
మా పొరొ దయ తొహ్చి, మాకున్ చొకొట్ కీమ్” ఇంజెర్ జోర్తె కిలితెర్.
14 తె యేసు వూర్కున్ సూడ్సి, “మిరట్ సొంజి కటొడలిర్కున్ తొహట్”+ ఇంజెర్ వెహ్తొర్.
అహన్ సొంజెర్ మనెకెనె, వూర్ చొకొట్ ఆతెర్.
15 అస్కె వూర్గటల్ వొరొర్ తన్వ నొపి కమి ఆయ్వల్ సూడ్సి, జోర్తె “బగవంతనె డగుర్-పాన్ వాయి!”
ఇంజెర్, పెజె మల్సి వాతొర్.
16 వోర్ మాయ్నల్ సమరయ యేరియతొర్ ఆందుర్.
వోర్ వాసి యేసునంగ్ కాల్క్ కర్సి, దనెవాద్ వెహ్తొర్.
17 అస్కె యేసు, “పూరొ దహ జన్క్ చొకొట్ ఆతిట్ కి?
మంజె మెయ్తుర్ నొవ్ జన్క్ బేందిర్?
18 బగవంతన్ డగుర్-పాన్ సియ్లె, వేర్ సమరయ జాతితొన్ సుటి కీసి, మెయ్తుర్ చొకొట్ ఆతుర్ బోరె వాయ్మకియ్?”
ఇంజెర్ వోన్ పూసి కీతొర్.
19 అని, “నిమె తేచ్చి సొన్.
నీవ బరొసయ్ నీకున్ చొకొట్ కీత” ఇంజెర్ వెహ్తొర్.
స్వర్గ్‌నొర్ మాయ్నల్ మల్సి వాయ్వల్
20 కహితుర్ పరిసయుల్క్, “బగవంతన రాజ్ బస్కె వాంత?”
ఇంజెర్ యేసున్ పూసి కీతెర్.
తె యేసు, “బగవంతన రాజ్ పర్జతున్ దిస్నల్ వాయొ.
21 ‘ఇచుల!
ఇగె మంత.
అచుల!
అగ మంత’ ఇంజెర్ బగవంతన రాజున్ బారెతె వెహ వాయొ.
బారితెకె, ఇంకె బగవంతల్ మీ నడ్డుమ్ మంజి, పర్జతంగ్ దిల్క్‌నగ రాజ్ తాకుసెర్ మంతొర్” ఇంజెర్ వెహ్తొర్.
22 అద్ ఆత పెజె తన్వుర్ సిస్యలిర్ సంగ, “బవిసత్నె స్వర్గ్‌నొర్ మాయ్నల్ వాయ్వల్ దివొసున్ మిరట్ సూడన ఇంజెర్ బెయ్ ఆస కీంతిట్.
బతి అద్ దివొసున్ సూడ్విట్.
23 అస్కె పర్జ మీ సంగ, ‘ఇచుల!
ఇగె మంతొర్.
సెలెకె అచుల!
అగ మంతొర్’ ఇంజెర్ వెహంతెర్.
బతి వూర గొస్టి కేంజ్మట్ అని వూర్ పెజెయ్ విచ్చెర్ సొన్మట్.
24 హాబడగ మిడ్చ్‌తతున్ సమ్దిర్ బహన్తె సూడంతెరొ, అహ్నె స్వర్గ్‌నొర్ మాయ్నల్, ఉండె ఉంది జోక మల్సి వానెకె, సమ్దిర్ సూడంతెర్.
25 బతి ఇవ్ సమ్దొ జర్గన్ మునె, ఇద్ పిడితుర్ నాకున్ ఉల్ట ఆయ లాగర్ అని నన వెలె దుక్సంగ్ బోగె మాయ లాగర్.
26 “నోవహున కాలమ్నె జర్గ్‌త తీరె స్వర్గ్‌నొర్ మాయ్నన వాయ్వల్ గట్కతె గిర్ జర్గంత.
27 వోర్ నోవహు రూకతగ నేంగ్నల్ వేరి, పర్జ తింజెర్-ఉంజెర్, మర్మింగ్ ఆసెర్, మర్మింగ్ కీసెర్ మత్తెర్.
అద్ గట్కతె జల్త గండమ్ వాసి, నోవహున కుటుంబతుర్కున్ ఆయ్వ మెయ్తుర్ సమ్దిర్‌కున్ నాసెడమ్ కీత.
28 “లోతున కాలమ్నె జర్గ్‌త తీర్ గిర్ జర్గంత.
అస్కె వూర్ తింజెర్-ఉంజెర్, యేచ్‌చెర్-వొమ్సెర్, ఉర్సెర్, రొహ్క్ దొహ్చెర్ పిసెర్ మత్తెర్.
29 బతి లోతు సొదొమ నగుడున్ సుటి కీసి సొత్త నేటినె, హాబడల్ పొత్వల్ గందొక్ అని తడ్మి గొకంగ్ పిర్దున్ మోడి అరుసి, లోతున కుటుంబతుర్కున్ ఆయ్వ, మెయ్తుర్ సమ్దిర్‌కున్ నాసెడమ్ కీత.
30 స్వర్గ్‌నొర్ మాయ్నల్ వాయ్వల్ దివొస్ గిర్, అహ్నె జర్గంత.
31 అంటిత్ రోత మిదెతగ మన్వల్, తన్వ సామన్ తర్లె ఇంజెర్ గిర్ బూడ్ రెయ్వ.
అహ్నె వావ్టె మన్వల్, బతతునె తర్లె రోన్ వాయ్వ.
బారితంగ్ చీజ్కున్ బారెతె గిర్ రంది కియ్మట్.
32 లోతున వెయ్లొ బహన్ మార్తయొ* హేతు కీమ్ట్!
33 తన్వ దన్-దవ్లతున్ అని తన్వ జీవతున్ బచి కీక ఇన్వన్ బస్కెట్ మన్వల్ జీవ పుటొ.
బతి నా సాటి తన్వ జీవతున్ సుటి కియ్వన్, బస్కెట్ మన్వల్ జీవ పుటంత.
34 మీకున్ వెహ్వల్ బతల్ ఇత్తెకె, అంటిత రాతున్ ఇవిర్ కటుడ్ పొరొ మందంతెర్.
వూర్గటల్ వొరొన్ సుటి కీసి, ఉండె వొరొన్ వోయ్వల్ జర్గంత.
35 రండ్ వెయ్లొక్ జత్త నోర్సెర్ మందంతంగ్.
ఉందితున్ సుటి కీసి, ఉండె ఉందితున్ వోయ్వల్ జర్గంత.
36-37 *[ఇవిర్ ఉందియ్ పొలమ్నగ మందంతెర్.
వూర్గటల్ వొరొన్ సుటి కీసి, ఉండె వొరొన్ వోయ్వల్ జర్గంత]” ఇంజెర్ యేసు వెహ్తొర్.
తె సిస్యలిర్, “ఇవ్ సమ్దొ బగ జర్గనుంగ్ పర్బు?”
ఇంజెర్ పూసి కీతెర్.
అస్కె యేసు, “బగతె జన్వర్‌త చెత్త మందంతయొ అగ రాయలిక్ మీరె మాంతంగ్”* ఇంజెర్ జవబ్ సీతొర్.