బేమరి వాలెన్ యేసు చొకొట్ కియ్వల్
14
1-2 ఉంది ఆరమ్న దివొసున్ నేటి పరిసయుల్క్‌న బాజ్నొర్ వొరొర్ అదికారిన రోన్ జేవున్ కియ్లె, యేసు సొత్తొర్.
అగ మన్వలిర్ వోన్ దిహన్తె సూడ్సెర్ మత్తెర్.
ఇచుల కేంజట్!
అగ వొరొర్ మేందొల్ తోయ్వల్ బేమరితె మత్తొర్.
3 తె యేసు అగ మన్వలిర్ దర్మ గురుర్ అని పరిసయుల్కున్ సూడ్సి, “దర్మత కానున్తున్ పియ్సి, ఆరమ్న దివొసున్ నేటి బేమరి వాలెన్ చొకొట్ కియ్వల్ నాయమ్ ఇంతిట్ కి నాయమ్ ఆయొ ఇంతిట్?”
ఇంజెర్ పూసి కీతొర్.
4 బతి వూర్ దబ్ మత్తెర్.
తె యేసు వోర్ తోయ్వల్ బేమరి వాలెన్ ఇట్సి, చొకొట్ కీతొర్.
అని అగటల్ వోన్ సారి కీతొర్.
5 అస్కె యేసు, “ఆరమ్న దివొసున్ నేటి మీవొర్ మరియ్ ఆయి, కోందయ్ ఆయి కుహితగ అర్తెకె, పొరొ తెండ్విటియ్?”
ఇంజెర్ వూర్కున్ పూసి కీతొర్.
6 అదెన్ వూర్ బతయ్ జవబ్ సియ పర్మకి.
బస్కె డగుర్-పాన్ పుటంత?
7 అద్ జేవున్తగ కేయుస్తుర్ వెర్తలిర్ ఉద్వలిక్ చొకొట్నంగ్ జాగన్ ఆగుటి కియ్వల్ సూడ్సి, యేసు వూర్కున్ ఇద్ నమున వెహ్తొర్:
8 “బోరె నీకున్ మర్మి జేవున్తగ కేయ్తెకె, డగుక్ ఉద్వల్ జాగతగ ఉద్మ.
బారితెకె రోతొర్ నీకున్ తెర్ డగుకున్ కేయ్సి మంద వచొ.
9 అహన్ ఉద్కితె, సమ్దిర్‌కున్ కేయుస్వల్ మాయ్నల్ నిహ్గ వాసి, ‘ఇగె వేన్ ఉద సీమ్’ ఇంజెర్ ఇంద వచొ.
అస్కె నిమె సిర్‌మిందింగ్ ఆసి, ఆక్రి మన్వల్ జాగతగ ఉద లాగర్.
10 అదెన్ సాటి నీకున్ బోరె కేయుస్తెకె, ఆక్రి మన్వల్ జాగతగ ఉద.
అస్కె నీకున్ కేయుస్వల్ నిహ్గ వాసి, ‘నా సోప్త!
అద్ డగుక్ ఉద్వల్ చొకొట్న జాగతగ సొంజి ఉద’ ఇంజెర్ వెహంతొర్.
అద్ గట్కతె నీ బరొబర్ ఉద్వలిర్ మునె నీకున్ డగుర్-పాన్ పుటంత.
11 “తన్వ తన డగుర్-పాన్ కియ్వన్ చుడుర్-పాన్ సియ్వల్ జర్గంత అని తన్వ తన చుడుర్-పాన్ కియ్వన్ డగుర్-పాన్ సియ్వల్ జర్గంత” ఇంజెర్ వెహ్తొర్.
12 అస్కె యేసు తనకున్ కేయుస్తొర్ వోన్ సంగ, “నర్క ఆయి, పియల్ ఆయి జేవున్ కియ్లె, నీ సోప్తలిర్‌కునె ఆయి, నీ తాదల్-తమునె ఆయి, నీ చుటల్-బందునె ఆయి, దనెవంతలిర్ ఆయ్వలిర్ నీ ఆజు-బాజుతుర్కునె ఆయి కేయ్మ.
ఉంది మోక వూర్ తాన్ బద్లి నీకున్ కేయంతెర్.
అస్కె నిమె దొస్త అదెన బర్పెయ్ ఆంత.
13 బతి నిమె జేవున్ సీనెకె గరిబ్కున్, లెంగ్డలిర్-పెంగ్డలిర్‌కున్, గుడ్డి-గూనలిర్కున్ కేయ.
14 వూర్ నీకున్ మల్సి తిండి దొస్వ కాడ్కి, బగవంతన ఇచ తీర్ తాక్వలిర్ బరొబర్ నేండ్నెకె, నిమ్ దొస్త అదెన్ బగవంతల్ బర్పెయ్ కీసి, నీకున్ ఆసిర్‌వాద్ సీంతొర్” ఇంజెర్ వెహ్తొర్.
డగుర్ జేవున్త నమున
15 అస్కె యేసున్ బరొబర్ ఉచ్చి మన్వల్ వొరొర్ అవ్ గొస్టింగ్ కేంచి, “బగవంతన రాజ్నగ జేవున్ కియ్వల్ బెయ్ వెలె ఆసిర్‌వాద్ యేత్మడ్ మందర్” ఇంజెర్ ఇత్తొర్.
16 తె యేసు వోన్ సంగ, “వొరొర్ మాయ్నల్ జేవున్ తయర్ కియుసి, వెలెటిర్కున్ కేయుస్తొర్.
17 అని జేవున్త యేల ఆనెకె, కబుర్ వెహ్చి మత్తుర్‌కున్, ‘వరట్!
ఇంకె జేవున్ కియ్లె, సమ్దొ తయర్ మంత’ ఇంజెర్ వెహ ఇంజి సేవ్కన్ సారి కీతొర్.
18 బతి వూర్ సమ్దిర్ జేవున్తగ సొన్వల్ తపుస్లె, ఉంది తీర్ వటి ఆగయెన్ ఇహిన్ వెహ్వల్ మొదొల్ కీతెర్: వూర్గటల్ మొదొడొర్, ‘నన వావుర్ యేత్తొన్.
సొంజి సూడ లాగర్.
నాకున్ మాపి కీమ్’ ఇంజెర్ వోర్ కోర్తొర్.
19 ఉండె వొరొర్, ‘నన సియుంగ్ జోడింగ్ కోందంగ్ యేత్తొన్.
అవ్ బహన్ కామ్ కీంతంగొ సొంజి, సూడ లాగర్.
నాకున్ మాపి కీమ్’ ఇంజెర్ కోర్తొర్.
20 ఉండె వొరొర్, ‘నావంగ్ ఇంకెనె మర్మింగ్ ఆతంగ్.
నన వాయ పరొన్’ ఇంజెర్ ఇత్తొర్.
21 “అస్కె వోర్ సేవ్కల్ తన్వొర్ మాల్కనగ మల్సి వాసి, వూర్ సమ్దిర్ వెహ్తంగ్ గొస్టింగ్ వెహ్తొర్.
తె వోర్ మాల్కల్ సోంగున్ వాసి, సేవ్కన్ సంగ, ‘నిమె యెంటనె నగుడంగ్ సందింగ్-గొందినగ సొంజి, గరిబ్కున్, లెంగ్డలిర్-పెంగ్డలిర్‌కున్ అని గుడ్డిర్‌కున్ కేయ్సి పియ్సి వర’ ఇంజెర్ వెహ్తొర్.
22 తె వోర్ సేవ్కల్ మాల్కనగ మల్సి వాసి, ‘మాల్క నిమె ఆగె సీత తీరె నన కీతొన్.
తెర్ బతి రోన్ ఉండె గిర్ నింద్లెకె మంత’ ఇంజెర్ ఇత్తొర్.
23 అస్కె వోర్ మాల్కల్ సేవ్కన్ సంగ, ‘నావ రోన్ పూరొ మాందితె నిందయ్ లాగర్.
అదెన్ సాటి నిమె నగుడున్ బహ్రి సొంజి, సరినగ అని మారక్నగ మన్వలిర్‌కున్ జుల్మ కీసి తర.
24 ఇదెన్ మునె కబుర్ యెవ్త వూర్గటల్ వొరొర్ గిర్, నన సియ్వల్ జేవున్త సవద్ సూడొర్’ ఇంజెర్ వోర్ మాయ్నల్ ఇత్తొర్” ఇంజి యేసు వెహ్తొర్.
బాతొర్ యేసునొర్ సిస్యల్ ఆయ పరంతొర్?
25-26 వెలెటిర్ మాంది యేసున్ పెజెయ్ వాసెర్ మత్తెర్.
తె యేసు వూర్ బాజున్ మల్సి, “బోర్తె నా చర్నతె వాంతొరొ, వోర్ తన్వుర్ అవల్-బాబొన్, తన్వ వెయ్లొన్, మరి-మియడున్, తాదల్-తమున్, సేలడ్-తకకున్ అని తన్వ పరన్తున్ తెర్ అదిక్ నాకున్ పెర్మ కియొర్ వోర్, నావొర్ సిస్యల్ ఆయ పరొర్.
27 తన్వ తన దుక్సంగ్-తక్‌లిబ్క్ ఇన్వల్ మొదున్ కాంచి తాకొర్ వోర్,* నావొర్ సిస్యల్ ఆయ పరొర్.
28-30 మిహ్గటల్ బోరె ఉంది బురుజ్ దొహన ఇంజెర్ మత్తొర్ ఇంటు.
తె వోన్గ తాన్ దొహ్చి మహ్లె, పహ్జె మత్త అచొర్ మంత కి సెలె ఇంజెర్ లెక కీసి సూడొరియ్?
తప్వక్ సూడంతొర్.
ఉంది మోక సూడ్వక్‌నె బునది వాట్సి, వోర్ తాన్ పూరొ దొహ పరొర్.
అదెన్ సూడ్సి, ‘వేర్ దొహ్లె మొదొల్ కీతొర్.
బతి తాన్ పూరొ కియ పర్మకి’ ఇంజెర్ వోన్ చేడి కీంతెర్.
31 అదె ఆయ్వ, వొరొర్ రాజల్ ఉండె వొరొర్ రాజన్ సంగ లడెయ్ కియ్లె, వీస హజర్క్ (20,000) సిపాయిర్ సంగ వాసెర్ మంతొర్.
ఇత్తెకె వోన్ సంగ లడెయ్ కియ్లె సొన్వల్, తన్గ మన్వల్ దహ హజర్క్ (10,000) సిపాయిర్ యెవంతెర్ కి సెలె ఇంజెర్ సోంచ్ కియొరియ్?
తప్వక్ వోర్ సోంచ్ కీంతొర్.
32 యెవుర్ ఇంజెర్ కరె మాతెకె, వోర్ రాజల్ వెలె లంగ్ మనెకెన్, ‘లడెయ్ వటిన్, సాంతి పహ్జె’ ఇంజెర్ వెహ్లె, కబ్రియన్ వోన్గ సారి కీంతొర్.
33 అహ్నె మిహ్గటల్ గిర్ బోరె ఆయి నా సిస్యల్ ఆయన ఇత్తెకె, వోర్ దిహన్తె సోంచ్ కీసి, తన్గ మన్వల్ సమ్దొతున్ సుటి కీసి వాయన.
కామి సియొ అద్ సొవొర్