కమండర్త బరొస
7
1 ఇద్ తీర్దె యేసు అవ్ సమ్దొన్ బారెతె పర్జతున్ వెహ్చి, కపెర్నహోమ్ ఇన్వల్ చహర్తె సొత్తొర్.
2 అగ సిపాయిరొర్ కమండర్ మత్తొర్.
వోనొర్ సేవ్కల్ వొరొర్ బేమరితె అర్సి, సానల్ ఆసి మత్తొర్.
వోర్ సేవ్కన్ కమండర్ వెలె మాని కీందుర్.
3 వోర్ కమండర్ యేసున్ బారెతె కేంచి, యూదుల్క్‌నుర్ కహితుర్ పెదొల్కున్ కేయుసి, “‘నా సేవ్కన్ చొకొట్ కియ్లె వాయన’ ఇంజెర్ వోన్ కోరట్” ఇంజి, వూర్కున్ యేసునగ సారి కీతొర్.
4-5 తె వూర్ యేసునగ వాసి, “పర్బు!
వోర్ వెలె చొకొట్నొర్ ఆందుర్.
మా పర్జతున్ వెలె పెర్మతె సూడంతొర్.
మావ సునగోగున్ గిర్ వోరె దొహుస్తొర్.
వోర్ అదికారిన్, నిమె మదత్ కీతెకె చొకొట్ మందంత” ఇంజెర్ జుల్మ కీతెర్.
కమండర్ యేసునగ బరొస కియ్వల్
6 తె యేసు వూర్ పెజెయ్ సొత్తొర్.
తన్వ రోతున్ జరసి లక్ మనెకెన్ కమండర్ తన్వుర్ సోప్తలిర్‌కున్ కేయ్సి, “పర్బు!
నిమె తక్‌లిబ్ యేత్మ.
నిమె నావ రోన్ వాయ్లె, నన కామి సియొన్.
7 అహ్నె నన నిహ్గ వాయ్లె గిర్ కామి సియొన్.
సిరిప్ నీవ జబన్ సీతెకె ఆయర్.
నా సేవ్కల్ చొకొట్ ఆంతొర్.
8 హుకుమ్ సియ్వల్ ఇత్తెకె నాకున్ టావయె.
బారితెకె నన ఉండె వొరొర్ అదికారిన్ బూడ్ మన్వన ఆందున్.
నా బూడ్ మన్వలిర్ సిపాయిర్ పొరొ నాకున్ అదికార్ మంత.
నన వొరొన్, ‘సొన్’ ఇత్తెకె దాంతొర్.
ఉండె వొరొన్, ‘వర్’ ఇత్తెకె వాంతొర్.
అని నా సేవ్కన్, ‘ఇద్ కీమ్’ ఇత్తెకె కీంతొర్ ఇంజి వెహట్” ఇంజెర్ సోప్తలిర్‌కున్ యేసునగ రొహ్తొర్.
9 కమండర్ రొహ్తురంగ్ గొస్టింగ్ కేంచి, యేసు గుల్ ఆతొర్.
అని తన్వ పెజెయ్ వాయ్వలిర్ సంగ, “వేన్ అచొర్ బరొస వాలెన్ ఇజ్రయేల్ పర్జతగ గిర్ బోన్గనె సూడ్మకి ఇంజి మీకున్ వెహ్చెర్ మంతొన్” ఇంజెర్ ఇత్తొర్.
10 బస్కెతె యేసునగ రొహ్తుర్ మల్సి కమండర్త రోన్ వాతెరొ, అస్కె వూర్కున్ బేమరితె మన్వల్ సేవ్కల్ చొకొట్ ఆసి దిస్తొర్.
సాతొర్ డియొన్ యేసు నేండుస్వల్
11 అద్ ఆత పెజె, యేసు నాయిన్ చహర్దె సొన్లె పెసితొర్.
వోనుర్ సిస్యలిర్ అని వెలెటిర్ పర్జ గిర్ వోన్ సంగ సొత్తెర్.
12 అద్ చహర్త పాటకున్ కరుమ్ సొనెకెతె, కహితుర్ కూర్దున్ కాంచి వాసెర్ మత్తెర్.
సాతొర్ వోర్ రాండె వెయ్లొనొర్ వొరొరె మరి ఆందుర్.
అద్ వెయ్లొన్ సంగ, అద్ చహర్తుర్ వెలెటిర్ లోకుర్ వాసెర్ మత్తెర్.
13 అద్ వెయ్లొన్ సూడ్సి, పర్బున దిల్తగ బెయ్ కివుల్ లాగ్త.
తె వోర్, “బాయి ఆడ్మ!”
ఇంజెర్ ఇత్తొర్.
14 అని సొంజి పాడెతున్ ఇట్తొర్.
తె కాంద్ వాయ్లలిర్ ఆగ్తెర్.
అస్కె యేసు, “డియొని!
నన వెహ్చెర్ మంతొన్, తేద!”
ఇంజెర్ ఇత్తొర్.
15 తె సాతొర్ వోర్ తేచ్చి ఉత్తొర్ అని వడ్క్‌వల్ సురు కీతొర్.
వోన అవనగ వోన్ యేసు హవ్లి కీతొర్.
16 అద్ సూడ్సి సమ్దిర్ బెయ్ వెరిసి, “మా నడ్డుమ్ డగుర్ పర్‌వక్తల్ వాతొర్.
బగవంతల్ తన్వ పర్జతున్ మదత్ కియ్లె పావె మాతొర్” ఇంజెర్ బగవంతన్ డగుర్-పాన్ సీతెర్.
17 యేసున్ బారెత ఇద్ కబుర్ పూరొ యూదయ యేరియతగ అని ఆజు-బాజుతంగ్ సమ్దొ యేరియనగ గిర్ కప్త.
బాప్తిస్‌మ సియ్వల్ యోహన్ జేల్తగ అర్వల్ (7:11-17; 18-23)
యోహన్ యేసునగ సేవ్కలిర్‌కున్ రొహ్వల్
18 ఇవ్ జర్గ్‌తంగ్ సమ్దొ గట్నన్ బారెతె, యోహన్తుర్ సిస్యలిర్ వోన్ వెహ్తెర్.
19 తె యోహన్ తన్వుర్ సిస్యలిర్‌గటల్ ఇవిర్కున్ కేయ్సి, “‘వాయ్లె మన్వల్ బచి కియ్వని* నిమెయ్ ఆంది కి?
సెలెకె మమొట్ ఉండె వొరొన్ సాటి సూడ్సెర్ మంద లాగర్?’
ఇంజెర్ వోన్ పూసి కీమ్ట్” ఇంజి పర్బునగ రొహ్తొర్.
20 తె వూర్ పర్బునగ వాసి, “‘వాయ్లె మన్వని నిమెయ్ ఆంది కి?
సెలెకె, మమొట్ ఉండె వొరొన్ సాటి సూడ్సెర్ మంద లాగర్?’
ఇంజెర్ నీకున్ పూసి కీమ్ ఇంజి బాప్తిస్‌మ సియ్వల్ యోహన్ మాకున్ సారి కీతొర్” ఇంజెర్ వెహ్తెర్.
21 అద్ గట్కతెన్ యేసు వెలెటిర్ బేమరినె మన్వలిర్‌కున్, దుకెలలిర్కున్, బూత్క్ సోప్రె మాతుర్కున్ చొకొట్ కీసెర్ మత్తొర్.
అని వెలెటిర్ గుడ్డిర్‌కున్ గిర్ నదుర్ సీతొర్.
22 తె యేసు వూర్ కబ్రియలిర్ సంగ, “గుడ్డిర్ సూడ్సెర్ మంతెర్.
లేంగ్డలిర్ తాక్సెర్ మంతెర్.
పెర్స నొపినుర్ చొకొట్ ఆసెర్ మంతెర్.
చెవ్డిర్ కేంజ పర్సెర్ మంతెర్.
సాతుర్ నేండ్సెర్ మంతెర్.
గరిబ్క్ చొకొట్న కబుర్ కేంచెర్ మంతెర్.
ఇహిన్ కడ్క్‌నె సూడ్తన్ అని కెవ్క్‌నె కేంజ్తన్ మిరట్ మల్సి సొంజి, యోహన్తున్ వెహట్.
23 అహ్నె నా బారెతె, అనమిన ఆయొర్ వోర్, ఆసిర్‌వాద్ యేతంతొర్ ఇంజి, వోన్ వెహట్” ఇంజెర్ వూర్కున్ జవబ్ సీతొర్.
24 యోహన్ సారి కీతుర్ కబ్రియలిర్ మల్సి సొత్త పెజె, యేసు అగ మన్వల్ మాందితున్ సంగ యోహన్తున్ బారెతె, “బోడి గుటనెకె మిరట్ బాతొన్ సూడన్ సాటి సొత్తిట్?
వడిదె హికె-హకె మెలివల్ జాడిత గున్తున్ దాత్నొన్ తె సూడ్లె సొన్మకి.
25 ఆతొన్ సూడ్లె ఆయ్వెకె, ఉండె బాతొన్ సూడ్కొమ్ ఇంజెర్ సొత్తిట్?
వెలె సోబతంగ్ పాంగుక్ పోండ్తొన్ సాటి కి బతల్?
సెలె, సుక్-బోగ్నె పిసెర్ సోబతంగ్ కప్డింగ్ కెర్వలిర్ రాజ్ మహల్క్‌నగ మందంతెర్!
26 తె బతతున్ సాటి సొత్తిట్?
మిరట్ పర్‌వక్తన్ సూడన్ సాటినె సొత్తిట్ ఇంజెర్ నన ఇంతొన్.
వోర్ పర్‌వక్తన్ తెర్ డగుర్ ఆందుర్.
27 వేర్ యోహన్తున్ బారెతె గ్రంత్‌నగ, ‘ఇచుల, నావొర్ కబ్రియన్ నీకున్ తెర్ మునె రొహంతొన్.
వోర్ నీ సాటి సరి తయర్ కీంతొర్’+ ఇంజెర్ లిహి కీసి మంత.
28 కేంజట్!
దునియతుర్ సమ్దిర్‌గటల్* యోహన్తున్ తెర్ డగుర్ బోరె సెలొర్.
బతి తమ్వంగ్ దిల్క్‌నగ బగవంతల్ రాజ్ తాకుస్లె వొప్తుర్‌గటల్ చుడుర్ ఆసి మన్వల్, యోహన్తున్ తెర్ డగుర్ ఆంతొర్” ఇంజెర్ యేసు వెహ్తొర్.
29 (వోర్ వెహ్వల్ కేంచి, యోహన్ సీత బాప్తిస్‌మ యేచ్చి మత్త కాడ్కి, వెలెటిర్ పర్జ అని టెక్స వసులి కియ్వలిర్ గిర్ బగవంతల్ నియత్నొర్ ఆందుర్ ఇంజి వొప్తెర్.
30 బతి పరిసయుల్క్ అని దర్మ గురుర్ యోహన్త కెయ్దె బాప్తిస్‌మ యేత్వ కాడ్కి, తమ్వ బారెతె మన్వల్ బగవంతన పిలన్తున్ వూర్ వొప్మకి.)
31-32 యేసు ఉండె గిర్, “ఇద్ పిడితుర్కున్ బాతుర్ సంగ నిపుసి బేద్-బావ్ తొహ్క?
వూర్ బోన్ దాత్ మంతెర్?
ఇత్తెకె బాజర్తె ఉచ్చి,
‘మమొట్ మీ సాటి సులుడి ఉహ్క్‌తొమ్.
బతి మిరట్ యేంద్మకి.
మమొట్ సాతొన్ సాటి పాట వార్తొమ్.
బతి మిరట్ ఆడ్మకి’
ఇంజెర్ వడ్క్‌వలిర్ చుడుక్ కాండిర్ దాత్ మంతెర్.
33 “బారితెకె బాప్తిస్‌మ సియ్వల్ యోహన్ వాసి, కానె తిన్వక్ అని ఆంగుర్ రస ఉన్వక్ మత్త కాడ్కి, ‘వోన్ బూత్ సోప్రె మాత’ ఇంజెర్ మిరట్ ఇంతిట్.
34 అని స్వర్గ్‌నొర్ మాయ్నల్ తింజెర్-ఉంజెర్ వాత కాడ్కి, ‘ఇచుల వేర్ పుదెలల్, కల్-పిదెడల్, టెక్స వసులి కియ్వలిరొర్ అని పాపిరొర్ సోప్తల్’ ఇంజెర్ మిరట్ ఇంతిట్.
35 బతి బగవంతన బుది-గియన్తున్ పియ్సి తాక్వలిర్ సమ్దిర్, అద్ బుది-గియన్ సతెమ్ ఆంద్ ఇంజి, నిరుపన్ కీంతెర్” ఇంజెర్ యేసు వెహ్తొర్.
పాపెస్తల్ వెయ్లొ యేసునంగ్ కాల్కున్ సెంట్ సోక్వల్
36 ఉంది దియ యేసున్ పరిసయుల్క్‌న బాజ్నొర్ వొరొర్ మాయ్నల్ తన్వ రోన్ జేవున్ కియ్లె, కేయ్తొర్.
తె యేసు వోన రోన్ సొంజి, జేవున్ కియ్లె ఉద్‌తొర్.
37 ఇచుల!
అస్కెనె అద్ రోన్ జేవున్ కియ్లె, యేసు వాతొర్ ఇన్వల్ గొస్టితున్,
యేసునగ వెయ్లొ సెంట్ పియ్సి వాయ్వల్
అని బండత బుడ్డితె వెలె మహ్గ్‌న సెంట్ పియ్సి వాత.
38 అని యేసున్ పెజె ఆడ్సెర్ నిల్త.
తాన కాడెల్దె వోనంగ్ కాల్కున్ పుహ్త.
తన్వంగ్ కెల్క్‌నె ఉసుమ్సి, మాన్దె కాల్కున్ ముక బుర్సెర్, అవెన్ సెంట్ సోక్త.
39 అద్ సూడ్సి జేవి కియ్లె కేయ్తొర్ వోర్ పరిసయుల్క్‌న బాజ్నొర్, ‘ఉంది మోక వేర్ మాయ్నల్ పర్‌వక్తల్ ఆయ్మడ్ ఇత్తెకె, తనకున్ ఇట్త వెయ్లొ బచొర్ అని బాతల్ పాపెస్తల్ ఇన్వల్ కరి కీందుర్’ ఇంజెర్ తన్వ మన్దె సోంచ్ కీతొర్.
40 అస్కె యేసు, వోన సోంచున్ కరి కీసి, “సీమొను!
నీకున్ ఉంది గొస్టి వెహ లాగర్” ఇంజెర్ ఇత్తొర్.
తె వోర్, “వెహ గురుజి” ఇంజెర్ ఇత్తొర్.
41 అస్కె యేసు, “వొరొర్ సావ్కరల్ ఇవిర్ మాయ్నలిర్‌కున్ బాకి సీతొర్.
తె వూర్గటల్ వొరొర్ సియుంగ్ నుహ్క్ (500) కూరతంగ్ బిలంగ్ అని ఉండె వొరొర్ పనస్ (50) కూరతంగ్ బిలంగ్ బాకి యేచ్చి మత్తెర్.
42 వూర్ ఇవిర్గతె అద్ బాకి కండి కియ్లె, బతయ్ సెలె మత్త.
తె వోర్ సావ్కరల్ వూర బాకితున్ మాపి కీతొర్.
మాపి కీత కాడ్కి, వూర్ ఇవిర్గటల్ వోర్ సావ్కరన్ పొరొ బోర్ వెలె పెర్మ తొహంతొర్ ఇంతి?”
ఇంజెర్ పూసి కీతొర్.
43 తె, “బోర్తె వెలె బాకి మత్తొరొ, వోరె తొహ్మడ్ మందర్ ఇంతొన్” ఇంజెర్ సీమొన్ వెహ్తొర్.
అస్కె యేసు, “నిమె బరొబర్ వెహ్తి” ఇంజెర్ ఇత్తొర్.
44 అని అద్ వెయ్లొనెకె మల్సి సీమొన్తున్ సంగ, “ఇద్ వెయ్లొన్ సూడ్సెర్ మంతియ్?
నన నీవ రోన్ వాతొన్.
తెర్ బతి నావంగ్ కాల్క్ నొర్లె నిమె యేర్ సియ్మకి.
బతి ఇద్ వెయ్లొ తన్వ కాడెల్దె నావంగ్ కాల్కున్ పుహ్త అని తన్వంగ్ కెల్క్‌నె ఉసుమ్త.
45 నిమె నాకున్ మాన్దె ముక బుర్మకి.
* బతి ఇద్ వెయ్లొ రొపొ వాతగటల్ మాన్దె నా కాల్కున్ ముక బుర్సెరెన్ మంత.
46 నిమె నా కెల్కున్ నియ్ సోక్మకి.
బతి ఇద్ వెయ్లొ నావంగ్ కాల్కున్ సెంట్ సోక్త.
47 అదెన్ సాటి నీకున్ వెహ్వల్ బతల్ ఇత్తెకె, ఇద్ వెయ్లొ కీతంగ్ సమ్దొ పాప్కున్ మాపి పుడ్త.
బారితెకె ఇద్ తొహ్త పెర్మ డగుర్ ఆంద్.
బతి ఇచుంగ్సి పాప్క్ మాపి ఆతొర్ వోర్, ఇచుసి పెర్మయ్ తొహంతొర్” ఇంజెర్ వోన్ వెహ్తొర్.
48 అని యేసు తాన్ సంగ, “బాయి, నీవంగ్ పాప్క్ మాపి ఆతంగ్” ఇంజెర్ వెహ్తొర్.
49 బతి వోన్ బరొబర్ జేవున్ ఉచ్చి మన్వలిర్, “పాప్క్ మాపి కియ్వల్ వేర్ బోర్ ఆందుర్?”
ఇంజెర్ తమ్వ తమ వడ్క్‌తెర్.
50 అదెన్ సాటి యేసు అద్ వెయ్లొన్ సంగ, “నీవ బరొసయ్ పాప్న సిక్సతల్ నీకున్ బచి కీత.
సాంతితె సొన్!”
ఇంజెర్ వెహ్తొర్.
పాపెస్తల్ వెయ్లొన్ మాపి పుట్వల్ (7:36-50)