ఆక్రితంగ్ దివొస్క్‌నె జర్గ్‌వలిక్ గట్నంగ్
13
1 యేసు మందిర్తల్ బహ్రి వానెకె, వూర్ సిస్యలిర్‌గటల్ వొరొర్ ఇహిన్ ఇత్తొర్.
“గురుజి, అచుల!
పెరజతి బండనె బాతంగ్ రొహ్క్ దొహ్తెరొ సూడ!”
ఇంజెర్ ఇత్తొర్.
పెరజతి బండనె సోబతె దొహ్త మందిర్ అని మంజిల్క్
2 తె యేసు, “నిమె పెరజతి బండనె దొహ్తంగ్ రొహ్కునె సూడ్సెర్ మంతి బతలొ, బతి ఇవ్ బండంగ్ ఉందిత్ పొరొ ఉంది నిల్సి మన్వక్‌నె సమ్ది గిర్ ఉల్టె మానుంగ్” ఇంజెర్ జవబ్ సీతొర్.
3 అగటల్ పెసిసి, యేసు తన్వుర్ సిస్యలిర్ పేతురు, యాకొబు, యోహన్ అని ఆంద్రెయన్ సంగ మీరె మాసి, అద్ మందిర్తున్ మునె మన్వల్ ఒలివ మరన గుటత్ పొరొ సొంజి ఉత్తొర్.
4 తె యేసు వొరొరె మనెకె సిస్యలిర్, “ఇవ్ సమ్దొ బస్కె జర్గంతంగ్ మాకున్ వెహ?
అని ఇవ్ సమ్దొ జర్గన్ మునె మాకున్ బాతల్ నిసని దిసర్?”
ఇంజెర్ పూసి కీతెర్.
5 తె యేసు, “మీకున్ బోరె పసి కియ్వక్‌నె సూడట్.
6 బారితెకె, నా పొరొడె వెలెటిర్ లోకుర్ మిహ్గ వాసి, ‘ననయ్ కిరిస్తున* ఆందున్’ ఇంజెర్ వెలెటిర్కున్ పసి కీంతెర్.
7 లడెయ్కున్ బారెతె, మీకున్ కేంజ వాయర్తె, దడ్కి తిన్మట్.
ఇవ్ తప్వక్ జర్గయ్ లాగర్.
బతి అస్కెనె సమ్దొత మూరె మాయ్వల్ ఆక్రిత గట్క వాయొ.
8 ఉంది దేస్నుర్ ఉండె ఉంది దేస్నుర్ సంగ లడెయ్ కీంతెర్.
ఉంది రాజ్నుర్ ఉండె ఉంది రాజ్నుర్ సంగ లడెయ్క్ కీంతెర్.
వెలె జాగనగ బూకంప్క్ అని కరుంగ్ గిర్ వాంతంగ్.
అవ్ సమ్దొ బాలెంత ఆయన్ మునె వాయ్వలిక్ నొపిన్ మోడి మందంతంగ్ ఇంజెర్ కరి కియన.
9 బతి ఇవ్ సమ్ది జర్గ్‌నెకె మిరట్ దిహన్తె మంట్!
కహితుర్ మాయ్నలిర్ మీకున్ పెదొల్కున్ మునె అని అదికారిర్ మునె కేయుస్తెకె అగ నిల లాగర్.
అని మీకున్ సునగోక్నగ వోసి చాటల్క్‌నె పాయుసీంతెర్.
నా హిందల్ రాజలిర్ మునె, డగుకున్ మునె నా బారెతె గవ వెహ్వల్ గట్క వాంత.
10 ఇదెన్ మొదొలె మిరట్ సమ్ది దేస్క్‌నగ సొంజి, జాతి పాతిత తేడ సూడ్వక్ సమ్దిర్‌కున్ బగవంతన చొకొట్న కబుడున్ పచర్ కియ లాగర్.
11 అద్ వకత్నె మీకున్ పియ్సి, అదికారిర్గ వోసి పూసి కీంతెర్.
బతి మిరట్, ‘ఇద్ సిక్సతల్ బహన్ వడ్క్‌సి తపుసికొమ్’ ఇంజెర్ పరెసన్ ఆయ్మట్.
బారితెకె అద్ వకత్నె మీవ దిల్తె వాసి బతల్ వడ్కన అని బహన్ వడ్కన ఇన్వల్, బగవంతలె తన్వ పవిత్ర ఆత్మత సక్తితె గొస్టింగ్ దయ కీంతొర్.
12 ఉండె బహన్ జర్గంతంగ్ ఇత్తెకె, మాయ్నలిర్ తమ్వుర్ తాదల్-తమున్, అహ్నె బాబుర్ తమ్వుర్ మర్కున్ మరన్ ఆయ్లె, హవ్లి కీంతెర్.
అని మరి-మియడ్ తమ్వుర్ అవల్-బాబొన్ ఉల్ట ఆసి వూర జీవ యేతుసంతెర్.
13 నావుర్ బక్తలిర్ ఆత కాడ్కి,* మీకున్ సమ్దిర్ పసంద్ కియుర్.
బతి ఆక్రి వేరి బోర్తె వోర్చి నిలంతొరొ, వోర్ బచె మాంతొర్.
14 “అదెన్ సాటి దానియెల్ పర్‌వక్తల్ వెహ్త అద్ బే-సుదుడ్ కియ్వల్ బెయ్ కరెబల్ వస్తు పవిత్ర జాగతగ నిల్సి మన్వల్+ మీకున్ దిస్తెకె, ఇదెన్ వాచి కియ్వల్ గిర్ కరి కియన.
అద్ వకత్నె యూదయ యేరియతగ మన్వలిర్ గుటనెకె పరర్ ఆయన.
15 రోత మిదెతగ మన్వల్ తన్వ సామన్ తర్లె ఇంజెర్ గిర్ బూడ్ రెయ్వ.
16 వావ్టె మన్వల్ తన్వంగ్ కప్డింగ్ తర్క ఇంజెర్ రోన్ సొన్వ.
17 అయ్యొ!
అవ్ దివొస్క్‌నె, పీటె మన్వలిక్ వెయ్లొకున్ అని బాలెంత వెయ్లొకున్ వెలె కస్టమ్ ఆంత.
18 ఈతంగ్ కస్ట-కాలమ్నంగ్ దివొస్క్, పీని గాలుమ్నె వాయ్వ ఇంజెర్ బగవంతన్ పార్తన కీమ్ట్.
19 ఈతంగ్ కస్ట-కాలమ్నంగ్ దివొస్క్, బగవంతల్ కలితున్ గడి కీతొర్ అగటల్తె నేండ్ వేరి బస్కెన్ వాయ్మకి.
అని ఉండె మునె బస్కెన్ ఈతల్ గతి వాయొ.
20 బతి బగవంతల్ తన నేమి కీతుర్ వూర్ మాయ్నలిర్ సాటి, ఇవ్ కస్ట-కాలమ్నంగ్ దివొస్కున్ వెలె కమి కీతొర్.
అహన్ కమి కియ్వక్ ఇత్తెకె, దర్తురిత్ పొరొ బోరె పిసి మంజి మనుర్.
21 “అవ్ దివొస్కున్ రొపొ బోరె ఆయి, ‘ఇచుల!
కిరిస్తు ఇగె మంతొర్’ సెలెతె ‘అచుల!
అగ మంతొర్’ ఇంజెర్ బోరె వెహ్తెకె గిర్ బరొస కియ్వ.
22 బారితెకె, నా పొరొడె లబడ్ కిరిస్తుర్, లబడ్ పర్‌వక్తలిర్ తమ్వ కెయ్దె ఆత అచొర్ బగవంతల్ నేమి కీతుర్కున్ పసి కియ్లె, చమత్‌కార్క్‌ అని మయ్మతంగ్ కామ్క్ గిర్ కీంతెర్.
23 అదెన్ సాటి, దిహన్తె తాకనిర్ ఇంజెర్, మీకున్ మునెనె ఇవెన్ బారెతె వెహ్చెర్ మంతొన్.
24 బతి ఇవ్ కస్ట-కాలమ్నంగ్ దివొస్క్ వీడ్త పెజె,
పోడ్ద్ సికటి ఆసి దాంత అని నెలెంజ్ తన్వ వేడ్చి సియ్వక్ ఆంత.
25 హాబడంగ్ సుకుక్ సమ్దొ బూడ్ అర్సి దానుంగ్,
ఇహిన్ హాబడంగ్ సమ్దొ సక్తింగ్ హాలె మాసి దాంతంగ్.
26 “అద్ వకత్నె స్వర్గ్‌నొర్ మాయ్నల్ సక్తితె అని మయ్మత వేడ్చితె హాబడంగ్ టెపన్ పొరొ వాయ్వల్ మాయ్నలిర్ సూడనిర్.
27 వోర్ తన్వుర్ దూతలిర్ సంగ, ‘దర్తురితంగ్ నాలుంగ్ కోన్క్‌నగ, హాబడ కాట్ వేరి పగ్రె మాసి మన్వలిర్ బగవంతల్ నేమి కీతుర్కున్ మీరి కీసి తరట్’ ఇంజెర్ సారి కీంతొర్.
యేసున మల్సి వాయ్వడున్ బారెతె
28 “ఇంకె మిరట్ మరక్నల్ ఉంది గొస్టి కరియన ఇంజెర్ అవెన్ బారెతె మీకున్ వెహంతొన్.
బతల్ ఇత్తెకె, అవెనంగ్ కాందంగ్ కొడ్స్‌వల్ సూడ్సి, పిర్ గాలుమ్ కరుమ్ వాత ఇంజెర్ మిరట్ కరి కీంతిట్.*
29 అదె తీర్దె, ఇవ్ గట్నంగ్ జర్గ్‌వల్ సూడ్సి, వోర్ వెలె కరుమ్ మంతొర్, కావడున్ కరుమె మంతొర్ ఇన్వల్ కరి కీమ్ట్.
30-31 ఇవ్ సమ్దొ జర్గ్‌నల్ వేరి, ఇద్ ఇంకె మన్వల్ నరిమన్కన జనొబ మూరె మాసి సొనొ.
ఇద్ హాబర్ అని దర్తురి సమ్ది మూరె మాసి దానుంగ్ బతి, నావంగ్ వచన్క్ బస్కెట్ గిర్ నిల్సి మందనుంగ్.
ఇద్ సతెమ్ ఆంద్.
మల్సి వాయ్వల్ వకత్ బోనె టావ సెలె
32 “అద్ దివొస్, అద్ గట్కతున్ బారెతె సిరిప్ బాబొ బగవంతనె టావ.
అచొరె బతి, స్వర్గ్‌నుర్ దూతలిర్కునె ఆయి, బగవంతనొర్ మరినె ఆయి బోనె గిర్ టావ సెలె.
33 అద్ దివొస్, అద్ వకత్ బస్కె వాంతయొ బోనె టావ సెలె.
అదెన్ సాటి, మిరట్ దిహన్తె చేతొ మంజి పార్తన కీమ్ట్.
34 వొరొర్ మాయ్నల్, తన్వుర్ సేవ్కలిర్‌కున్, బోన వోన్ కామ్ హవ్లి కీసి, రోత డెరొటతగ కేప్సెర్ మన్వల్ సేవ్కన్ సంగ, ‘నన మల్సి వానల్ వేరి దిహన్తె కేప్సెర్ మన్’ ఇంజెర్ హుకుమ్ సీతపినయ్ స్వర్గ్‌నొర్ మాయ్నన ఆయ్వల్ నావ మల్సి వాయ్వల్ మందంత.
35 అహన్ రోతొర్ మాల్కల్ పోడ్ద్ సొనెకె వాంతొరొ, నడ్డుమ్ నర్క వాంతొరొ, గొగ్డింగ్ కూస్నెకె వాంతొరొ, పోడ్ద్ పెసినెకె వాంతొరొ, బస్కె వాంతొరొ బోనె టావ సెలె.
అదెన్ సాటి మిరట్ దిహన్తె మంట్.
36 వోర్ మాల్కల్ వెహ్వక్‌నె అచనక్ వాతెకె, మిరట్ చేతొ మనల్ సూడట్.
37 ఇద్ గొస్టి మీకున్ వెహ్తొన్ అని హరియేక్ మాయ్నన్ గిర్ వెహ్చెర్ మంతొన్.
ఇద్ గట్కతున్ సాటి తయర్ మంట్” ఇంజెర్ యేసు వెహ్తొర్.