బగవంతల్ యాకొబున్ వాగ్దన్ సియ్వల్
46
1 తె యాకొబ్ తన్గ మత్త సమ్దొ దన్-దవ్లతున్ పియ్సి, యాత్ర కియ్వల్ సురు కీతొర్.
అహన్ యాత్ర కీసెర్, బేర్సెబతగ వాసి, తన్వొర్ బాబొ ఇసక్నొర్ బగవంతన్ బలిదాన్క్ సీతొర్.
2 అంటిత రాతున్ బగవంతల్ యాకొబున్ దర్సన్‌తె దిసి, “యాకొబ్!
యాకొబ్!” ఇంజెర్ కేయ్తొర్. అద్ కేంచి, “వెహ పర్బు” ఇంజెర్ ఇత్తొర్.
3 తె వోర్, “ననయ్ బగవంతన ఆందున్.
నీ బాబొనొర్ బగవంతన ననయ్ ఆందున్.
నిమె ఈజిప్ట్ సొన్లె వెరిమ.
అగ నీవ సంతాన్దున్ బడి కీసి, డగుర్ జాతి కీంతొన్.
4 ఈజిప్ట్‌నగ నన గిర్ నీ సంగ వాంతొన్.
నీవ సంతాన్దున్ అగటల్ మలుసి తరంతొన్.
యోసెప్ నీ సంగ మనెకె, సాంతితె పరన్ సుటి కీంతి” ఇంజెర్ ఇత్తొర్.
యాకొబ్న కుటుంబతుర్ ఈజిప్ట్ దేస్నె సొన్వల్
5 తె యాకొబ్ బేర్సెబతల్ పెసితొర్.
వోనుర్ మర్క్ పరొ రాజల్ సారి కియుస్తంగ్ కాసుక్నగ బాబొన్, తమ్వంగ్ వెయ్లొకున్ అని తమ్వుర్ మరి-మియడున్ ఉపుసీతెర్.
యాకొబ్న కుటుంబ ఈజిప్ట్ వాయ్వల్
6-7 వూర్ తమ్వ డోర్-జన్వర్, కనాన్ దేస్నె కమయ్ కీత దన్-దవ్లత్ సమ్దొతున్ పియ్సి, ఈజిప్ట్‌నగ వాతెర్.
ఇద్ తీర్దె యాకొబ్ తన్వ కుటుంబతున్ (మరి-మియడ్ అని తంగ్మరి-తంగ్మియకున్) ఈజిప్ట్‌నగ పియ్సి వాతొర్.
యాకొబ్న కుటుంబత వేలి
8-9 యాకొబ్ అని వోనుర్ మర్క్ ఈజిప్ట్‌నగ వాతెర్.
వూరంగ్ పొరొల్క్: యాకొబ్నొర్ మడనొర్ మరి రూబెన్.
వేనుర్ మర్క్: హనోక్, పల్లు, హెస్రోన్, కర్మి.
10 సిమియొన్తుర్ మర్క్: యెముయేల్, యామిన్, వోహద్, యాకిన్, సోహర్, సావ్లు (కనాన్త వెయ్లొనొర్ మరి ఆందుర్).
11 లేవినుర్ మర్క్: గెర్సొన్, కహత్, మెరారి.
12 యూదనుర్ మర్క్: యేరు, వోనన్, సేలల్, పెరెసు, జెరహు.
యేరు, వోనన్ కనాన్ దేస్నె మార్తెర్.
పెరెసునెర్ మర్క్: హెస్రోన్, హాముల్.
13 ఇసకార్తుర్ మర్క్: తోల, పువ్య, యాసుబ్*, సిమ్రొన్.
14 జెబులున్తుర్ మర్క్: సెరెద్, యేలొన్, యహలేల్.
15 వీర్ సమ్దిర్ లేయన పీటెతె పుట్తెర్ ఆందుర్.
పదన-ఆరమ్నగ మనెకె దీనల్ ఇన్వల్ మియడున్ గిర్ అద్ జల్మ సీత.
తాన సంతాన్దుర్ సమ్దిర్ తీస మువిర్ (33) జన్క్.
16 గాదునెర్ మర్క్: సిప్యొన్, హగ్గి, సూని, యెస్బొన్, యేరి, అరొది, అరెలి.
17 ఆసెరునెర్ మర్క్: ఇమ్నల్, ఇస్వల్, ఇస్వి, బెరియల్, వీర సేలడ పొరొల్ సెరహ్.
బెరియనెర్ మర్క్: హెబెర్, మల్కియేల్.
18 వీర్ సోడ (16) జన్క్ సంతాన్ లాబన్త మియడ్ లేయన దాసి జిల్పల్ అని యాకొబ్న సంతాన్ ఆందిర్.
19 యాకొబ్న వెయ్లొ రాహెల్తుర్ మర్క్: యోసెప్, బెన్యమీన్.
20 యోసెపున్, మనసె అని యెప్రాయిమ్ ఇన్వలిర్ ఇవిర్ మర్క్ పుడ్తెర్.
వీర్కున్ ఈజిప్ట్‌నగ వోను ఇన్వల్ నగుడొర్ కటొడల్ పోతిపెరన మియడ్ ఆసెనత్ జల్మ సీత.
21 బెన్యమీన్తెర్ మర్క్: బెలల్, బేకెర్, అస్బెల్, గెరాల్, నయమాన్, యేహి, రోస్, ముప్పీమ్, హుప్పీమ్, ఆర్దు.
22 యాకొబున్, రాహెల్తున్ చొవ్ద (14) జన్క్ సంతాన్ ఆతెర్.
23 దానునొర్ మరి హుసీమ్.
24 నప్తాలినుర్ మర్క్: యహసేల్, గూని, యెసెర్, సిల్లెమ్.
25 వీర్ యేడ్విర్ లాబన్త మియడ్ రాహెల్త దాసి బిల్హల్ అని యాకొబ్న సంతాన్ ఆందిర్.
26 యాకొబ్నంగ్ కోర్యకున్ సుటి కీసి, వోన పీటె పుట్తుర్ వోన్ సంగ ఈజిప్ట్ వాతుర్ వూర్ సమ్దిర్ సాట్ సార్విర్ (66) జన్క్.
27 యాకొబ్, యోసెప్ అని ఈజిప్ట్‌నగ యోసెపున్ పుట్తెర్ ఇవిర్ మర్కున్ మీరి కీసి, యాకొబ్న కుటుంబతుర్ సమ్దిర్ సత్తర్ (70) జన్క్ మాంది.
యాకొబ్ ఈజిప్ట్ యెవ్‌వల్
28 తమకున్ గోసెన్తగ బేటె మాయిర్ ఇంజెర్ యాకొబ్ తమకున్ తెర్ మునె యూదన్ యోసెప్నగ సారి కీతొర్.
వూర్ సమ్దిర్ గోసెన్తగ యెవ్త పెజె,
29 యోసెప్ తన్వ రతున్ తయర్ కియుసి, తన్వొర్ బాబొ యాకొబున్ బేటె మాయ్లె, గోసెన్తగ సొత్తొర్.
అని బాబొన్ బేటె మాసి, ఉర్న్‌గి కీసి, బెయ్ ఆడ్తొర్.
30 అని యాకొబ్ యోసెపున్ సంగ, “నిమె ఉండె పిసిన్ మంతి.
నీ మొకొమ్ సూడ్తొన్.
ఇంగె నన సాంతితె పరన్ సుటి కియ పరంతొన్” ఇంజెర్ ఇత్తొర్.
31 యోసెప్ సమ్దొ కుటుంబతున్ సూడ్సి, “నన పరొనగ సొంజి ‘కనాన్ దేస్నె మన్వలిర్ నా కుటుంబతుర్ వాతెర్.
32 వూర్గ మన్వల్ సమ్దొ డోర్-జన్వర్‌తున్ పియ్సి, వాతెర్.
వూర్ డోర్-జన్వర్‌తున్ మెహ్చెర్, పోసి కియ్వలిర్ ఆందిర్’ ఇంజెర్ వెహంతొన్.
33 పరొ రాజల్ మీకున్ కేయ్సి, ‘మిరట్ బతల్ కామ్ కీంతిట్?’ ఇంజెర్ పూసి కీనుర్.
34 తె మిరట్ గోసెన్ యేరియతగ పిసెర్ మన్లె, ‘నీ సేవ్కలిర్ ఆయ్వలిర్ మా తొత్తుర్ అని మమొట్ మా చుడు-గాదడల్ ఇంకె వేరి గిర్ డోర్-జన్వర్‌తున్ మెహ్చెర్, అవెన్ పోసి కియ్వలిర్ ఆందుమ్’ ఇంజి వెహన” ఇంజెర్ సూచన కీతొర్.
బారితెకె గాయ్కిర్‌కున్ ఈజిప్ట్‌నుర్ పసంద్ కియుర్.