పరొ రాజనంగ్ కలంగ్
41
1 రండ్ సాల్క్ ఆత పెజె, పరొ రాజన్ ఉంది కల దిస్త.
అద్ కలతగ వోర్ నయ్లు లవిడ డర్డిత్ కరుమ్ నిల్సి మత్తొర్.
2 అస్కె లవిడల్ బెయ్ తాజ్యలిక్ యేడుంగ్ మూరంగ్ బహ్రి వాసి, హిర్వల్ జాడి మేయ్సెర్ మత్తంగ్.
3 అని అవెన్ పెజెయ్ బకలిక్ యేడుంగ్ మూరంగ్ నయ్లు లవిడల్ బహ్రి వాసి, బెయ్ తాజ్యలిక్ మూరన్ కరుమ్ నిల్తంగ్.
4 తె బకలిక్ యేడుంగ్ మూరంగ్ బెయ్ తాజ్యలిక్ యేడుంగ్ మూరన్ మింగ్తంగ్.
అస్కెన్ పరొ రాజన్ చేవ్ వాత.
5 బతి జులుక్ ఆత పెజె ఉండె నరుమ్తొర్.
అస్కె వోన్ ఉండె ఉంది కల దిస్త.
అద్ కలతగ దాననె నించి మన్వలిక్ యేడుంగ్ సెన్క్ ఉందియ్ డేటెతగ బెర్‌స్వల్ సూడ్తొర్.
6 అద్ ఆత పెజె ఉండె యేడుంగ్ కొడ్కెల సెన్క్ మియ్వల్ వోర్ సూడ్తొర్.
బతి అవ్ సెన్క్ కొడ్కెల మత్త కాడ్కి, కాస్త వడిదె కిడ్డ-మొడ్డ వత్తంగ్.
7 అస్కె అవ్ వత్తంగ్ కొడ్కెల సెన్క్, దాననె నించి మన్వలిక్ సెన్కున్ మింగ్తంగ్.
అద్ గట్కతె పరొ రాజన్ చేవ్ వాసి, అద్ కల ఆంద్ ఇంజెర్ కరి కీతొర్.
8 సక్రె తేత్త పెజె, వోన మన్ పూరొ కలనె తిరిసెర్ మత్త.
ఉండె అవెన అర్తమ్ కరె మాయ్వ సొంజి, గుల్ ఆతొర్.
అదెన్ సాటి వోర్ ఈజిప్ట్‌నగటుర్ సగున్ సూడ్వలిర్‌కున్ అని బుది-గియన్ వాలిర్కున్ కేయుసి, అవ్ కలంగ్ వెహ్చి, అవెన అర్తమ్ పూసి కీతొర్.
బతి బోరె అవెన అర్తమ్ వెహ పర్మకి.
సేవ్కల్ పరొన్ తోడొ యోసెప్న గొస్టి వెహ్వల్
9 అస్కె ఆంగుర్క్‌న రసత కోజ అందుస్వల్ సేవ్కన్ యోసెప్న గొస్టి హేతు వాత.
తె పరొన్ సంగ ఇహిన్ వెహ్తొర్: “అయ్యొ!
నీకున్ ఉంది గొస్టి వెహ్వల్ మరుంగ్తొన్. ఇంకె నావ తపున్ కరి కీతొన్.
10 అద్ బతల్ ఇత్తెకె, నిమె నా పొరొ అని ఉండె వొరొర్ సేవ్కన్ పొరొ సోంగున్ వాసి, తప్ కీతుర్కున్ సిక్స వాట్సి, ఇర్వల్ టానెతగ *మాకున్ వాటుసీతి.
11 మమొట్ ఇవిర్తె ఉందియ్ నర్క దుస్రొ దుస్రొక్ అర్తమ్ వాలెక్ కలంగ్ కంజ్క్‌తొమ్.
12 అగ రాజ మహల్తున్ కేప్వలిరొర్ అదికారినొర్ సేవ్కల్ హెబ్రి జాతితొర్ డియొర్ కాండి మత్తొర్.
వోన్ సంగ మావంగ్ కలంగ్ వెహ్త పెజె, అవెన అర్తమ్ మాకున్ వెహ్తొర్.
13 వోర్ మాకున్ వెహ్త తీర్ జర్గ్‌త.
నా నవ్కరి నాక్ మల్సి వాత.
అని సారింగ్ బొడ్స్‌వన్ జవ్కుసి, వోన మేందొడున్ మరతగ దింగ్-దొంగ్ కియుస్తిట్” ఇంజెర్ వెహ్తొర్.
కలనంగ్ అర్తమ్ వెహన్ సాటి యోసెపున్ కేయుస్వల్
14 అద్ కేంచి పరొ రాజల్ యోసెపున్ టానెతల్ కేయుస్తొర్.
వోర్ తల అని దాడి కొర్యుసి, యేర్ తుంగ్సి, చొకొట్నంగ్ కప్డింగ్ కెర్సి పరొనగ వాతొర్.
15 తె పరొ రాజల్ యోసెపున్ తోడొ, “నన ఉంది కల కంజ్క్‌తొన్.
తాన అర్తమ్ బోరె వెహ పర్మకి.
నిమె కలంగ్ కేంచి, అవెన అర్తమ్ వెహ పరంతి ఇంజి నన కేంజ్తొన్” ఇంజెర్ వెహ్తొర్.
16 తె యోసెప్ పరొన్ సంగ, “నా తర్సొ ఆయ పరొ బతి, బగవంతలె నీకున్ బరొబర్ జవబ్ సీంతొర్” ఇంజెర్ వెహ్తొర్.
17 ఇద్ కేంచి పరొ వోన్ సంగ, “నన మొదొడ కలతగ నయ్లు లవిడ డర్డితగ నిల్సి మత్తొన్.
18 తె బెయ్ తాజ్యలిక్ యేడుంగ్ మూరంగ్ లవిడల్ బహ్రి వాసి, జాడి మేయ్సెర్ మత్తంగ్.
19 అవెన్ పెజెయెన్ బకలిక్ రూపున్ చొకొట్ సెలెంగ్ అవ్ యేడుంగ్ మూరంగ్ లవిడల్ బహ్రి వాతంగ్.
ఆతంగ్ మూరన్ పూరొ ఈజిప్ట్ దేస్నగ నన బస్కెన్ సూడ్మకి.
20 బకలిక్ మూరంగ్ అవ్ తాజ్యలిక్ యేడుంగ్ మూరన్ మింగ్తంగ్.
21 మొదొల్ బహన్తె బకలిక్ మత్తంగొ, అవెన్ మింగ్త పెజె గిర్ అహ్నె మత్తంగ్.
అస్కెన్ నాకున్ జల్నె చేవ్ వాత.
22 అద్ ఆత పెజె ఉండె నరుమ్తొన్.
అస్కె నాకున్ ఉండె ఉంది కల దిస్త.
అద్ కలతగ దాననె నించి మన్వలిక్ యేడుంగ్ సెన్క్ ఉందియ్ డేటెతగ బెర్‌స్వల్ సూడ్తొన్.
అవ్ సెన్క్ చొకొట్ బరె మాసి మత్తంగ్.
23 అవెన్ పెజెయ్ ఉండె యేడుంగ్ సెన్క్ మియ్తంగ్.
ఇవ్ కొడ్కెల సెన్క్ కాస్త వడిదె కిడ్డ-మొడ్డ వత్తంగ్.
24 ఇవ్ కొడ్కెల సెన్క్, అవ్ దాననె నింతంగ్ సెన్కున్ మింగ్తంగ్.
ఇవ్ రండ్ కలన బావ్ సగున్ సూడ్వలిర్‌కున్ అని బుది-గియన్ వాలిర్కున్ పూసి కీతొన్.
బతి బోరె అవెన అర్తమ్ వెహ పర్మకి” ఇంజెర్ ఇత్తొర్.
కలన బావ్ యోసెప్ వెహ్వల్
25 అస్కె యోసెప్, “ఇవ్ రండుతె కలన అర్తమ్ ఉందియ్.
బగవంతల్ మునె జర్గుస్‌వడున్ బారెతె నీ సంగ వెహ్చెర్ మంతొర్.
26 యేడుంగ్ తాజ్యలిక్ మూరన అని యేడుంగ్ నింద్తంగ్ సెన్క్ ఇవ్ రండునతె ఉందియ్ అర్తమ్.
అద్ బతల్ ఇత్తెకె చొకొట్నంగ్ యేడుంగ్ సాల్క్.
27 అని అవెన్ పెజెయ్ పెసితంగ్, బకలిక్ యేడుంగ్ మూరంగ్ అని వత్తంగ్ యేడుంగ్ కొడ్కెల సెన్క్ ఇవ్ రండునతె ఉందియ్ అర్తమ్.
అద్ బతల్ ఇత్తెకె కరబ్నంగ్ యేడుంగ్ సాల్క్.
28 నన ఇంకె వెహ్త తీరె, బగవంతల్ మునె జర్గుస్‌వడున్ బారెతె నీకున్ తొహ్తొర్.
29 ఈజిప్ట్ దేసెమ్ పూరొ ముక్తరి పంట పండ్వలిక్ యేడుంగ్ సాల్క్ వాంతంగ్.
30-31 అవెన్ పెజెయ్, కరుదంగ్ యేడుంగ్ సాల్క్ వాంతంగ్.
అస్కె ఈజిప్ట్ దేస్నెగ పంట పండొ.
అద్ కరు దేసున్ నాసెడమ్ కీంత.
తాన్ హిందల్ ముక్తరి పండ్త పంటతున్ గిర్ మరుంగ్సి దానిర్.
బారితెకె అద్ కరు వెలె కటింత మందంత.
32 ఇద్ కార్య బగవంతల్ నిర్నయ్ కీత ఆంద్.
వోర్ ఇత్త తీర్ తప్వక్ వెయ్నె జర్గుసంతొర్.
ఇదెన్ బారెతె నీకున్ రండ్ కలన రూప్నె తొహ్తొర్.
33 అదెన్ సాటి రాజ, నిమె బతల్ కియన ఇన్వల్ నీకున్ వెహంతొన్.
బుది-గియన్ వాలె వొరొర్ మాయ్నన్ మహ్క్‌సి, పూరొ ఈజిప్ట్ దేసున్ పొరొ నేమి కీమ్.
34 ఈజిప్ట్ దేస్న పర్జతల్ అవ్ ముక్తరి పంట పండ్వలిక్ యేడుంగ్ సాల్క్‌నగ పండ్త పంటతల్ సియునల్ ఉంది ఈస మీరి కియ్లె, వోన్ బూడ్ ఉండె చుడుక్ అదికారిర్కున్ నేమి కీమ్.
35 వూర్ అదికారిర్ నీవ అదికార్దె అవ్ ముక్తరి పంట పండ్వలిక్ యేడుంగ్ సాల్క్‌నగ పండ్త పంటతున్ మీరి కీసి, నగుక్నగ మన్వలిక్ నీవంగ్ గోదమ్క్‌నగ ఇరన.
36 అద్ రాసి వాయ్వలిక్ యేడుంగ్ సాల్క్‌న కరుదె ఈజిప్ట్ దేస్ పూరొ నాసెడమ్ ఆయ్వక్‌నె కామి సీంత” ఇంజెర్ వెహ్తొర్.
యోసెప్ ఈజిప్ట్‌నొర్ అదికారి ఆయ్వల్
37 పరొ అని వోనుర్ అదికారిర్ ఇద్ వెలె చొకొట్న సోంచ్ ఆంద్ ఇంజెర్ వొప్తెర్.
38 అస్కె పరొ వూర్ సంగ, “వేన్ దాత్ బగవంతన ఆత్మ వాలె మాయ్నల్ బోరె మాకున్ పుటనుర్ కి?” ఇంజెర్ ఇత్తొర్.
39 అని యోసెపున్ సంగ, “బగవంతల్ ఇద్ సమ్దొతున్ నీకున్ వెహ్తొర్.
నీకున్ మన్వల్ బుది-గియన్ ఉండె బోనె సెలె.
40 నావ రాజ్నగ సమ్దిర్‌గటల్ ముకె అదికారిని ఇంజెర్ నీకున్ నేమి కీంతొన్.
నా పర్జ సమ్దిర్ నిమె వెహ్తప్ కేంజంతెర్.
పూరొ దేస్నగ సిరిప్ నన వొరొనయ్ నీకున్ తెర్ డగున ఆసి మందంతొన్” ఇంజెర్ పరొ వెహ్తొర్.
41 అని వోర్, “నీకున్ ఇంకె, నన ఈజిప్ట్ దేస్న సమ్దిత్ పొరొ అదికార్ సీసెర్ మంతొన్” ఇంజెర్ యోసెపున్ వెహ్తొర్.
42 అహన్ వెహ్చి, పరొ రాజల్ కెయ్దగ మత్త తన్వ మోర్ వాలె ముద్ద తెండ్సి, యోసెప్న కెయ్దె కెరుసీతొర్.
అని పూనంగ్ కప్డింగ్ పోండుసియుసి, వోన గోటితగ సోనెత హార్ వాట్తొర్.
43 అస్కె పరొ తన్వ రెండవ రత్నగ వోన్ ఉపుస్తొర్.
అద్ రత్ సొంజెర్ మనెకె, వోన్ మునె పర్జ, “దండొస్ దొసి, కాల్ కరట్!”
ఇంజెర్ కిలిసెర్ మత్తెర్. ఇహిన్ ఈజిప్ట్ దేస్న సమ్దిత్ పొరొ యోసెపున్ అదికార్ సీతొర్.
44 అని యోసెపున్ తోడొ, “నన రాజల్ ఆసి మందంతొన్.
బతి నీవ హుకుమ్ సెల్వ, ఈజిప్ట్ దేస్నుర్ బోరె ఆయి బతయ్ కియుర్” ఇంజెర్ ఇత్తొర్.
45 అని పరొ రాజల్ యోసెపున్, “జపెనత్-పనెహు” ఇంజెర్ ఈజిప్ట్‌న పొరొల్ దొస్తొర్.
అద్ ఆత పెజె, వోను* ఇన్వల్ నగుడొర్ కటొడల్ పోతిపెరన మియడ్ ఆసెనతున్ సంగ వోనంగ్ మర్మింగ్ కీతొర్.
తె యోసెప్ ఈజిప్ట్ దేసెమున్ తాకుస్వల్ అదికారి ఆతొర్.
46 ఈజిప్ట్‌నొర్ పరొ రాజన సేవ కియ్వల్ సురు కీతొర్ అస్కె, యోసెప్న వహి తీస (30) సాల్క్ మత్త.
యోసెప్ రాజనగటల్ బహ్రి సొంజి, ఈజిప్ట్ దేస్ పూరొ వెలితొర్.
పంటత రాసి మీరి కియ్వల్
47 మొదొడంగ్ యేడుంగ్ సాల్క్‌నగ దేసెమ్ పూరొ గిర్ ముక్తరి పంట పండ్త.
48 ఈజిప్ట్ దేసున్ రొపొ అవ్ సాల్క్‌నగ పండ్త పంటతున్, బద్ నగుడున్ సిర్ముట్ పొలమ్క్‌నగ పంట మత్తయొ, అదె నగుడె మీరి కీసి గోదమ్నగ ఇరుస్తొర్.
49 యోసెప్ వెలె పంటత రాసి మీరి కీతొర్.
అద్ కరలెన్ సమ్దుర్‌త ఉస్కెత్ దాత్ బెయ్ వెలె మత్త కాడ్కి, ఆక్రిత్ వూర్ కహ్వక్‌నె అహ్నె సుటి కీతెర్.
50 కరుదంగ్ సాల్క్ వాయ్వక్ మొదొలె యోసెప్న బాయ్కొ వోను ఇన్వల్ నగుడొర్ కటొడల్ పోతిపెర్త మియడ్ ఆసెనత్ ఇవిర్ మర్కున్ జల్మ సీత.
51 తె యోసెప్ మొదొల్ జల్మ ఆతొన్, “మనసె”* ఇంజెర్ పొరొల్ దొస్తొర్.
బారితెకె “బగవంతల్ నావ సమ్దొ కస్టమున్ అని నా బాబొన రోతుర్కున్ మరుంగ్నల్ కీతొర్” ఇంజెర్ ఇత్తొర్.
52 పెజెయ్ జల్మ ఆతొర్ మరిన్ “యెప్రాయిమ్*” ఇంజెర్ పొరొల్ దొస్తొర్.
బారితెకె “నన కస్టమ్ బోగె మాత దేసెమ్నె బగవంతల్ నాకున్ సుద్రి కీతొర్” ఇంజెర్ ఇత్తొర్.
కరుదంగ్ సాల్క్ సురు ఆయ్వల్
53 ఈజిప్ట్ దేస్నె ముక్తరి పంట పండ్వలిక్ యేడుంగ్ సాల్క్ మార్తంగ్.
54 యోసెప్ వెహ్త తీర్ కరుదంగ్ యేడుంగ్ సాల్క్ సురు ఆతంగ్.
సమ్ది దేస్క్‌నగ కరు అర్త.
బతి ఈజిప్ట్ దేస్నగ చందిత రాసి మత్త.
55 ఈజిప్ట్ దేస్నగ హర్ జాగతె కరు పగ్రె మాత అస్కె, పర్జ చందిత్ సాటి రాజన్ పూసి కీతెర్.
తె పరొ వూర్ సమ్దిర్‌కున్, “మిరట్ యోసెప్నగ సొంట్ అని వోర్ వెహ్త తీర్ కీమ్ట్” ఇంజెర్ ఇత్తొర్.
56 ఈజిప్ట్ దేస్నగ కరు అదిక్ మత్త కాడ్కి, యోసెప్ సమ్దొ గోదమ్కున్ తెర్యుసి, ఈజిప్ట్‌నుర్ సాటి చందిత రాసి వొముస్తొర్.
57 అని దుస్రొక్ దేస్క్‌నగ గిర్ కరు అదిక్ మత్త కాడ్కి, అవ్ దేస్క్‌నెర్ చందిత రాసి యేత్లె, ఈజిప్ట్‌నగ మన్వల్ యోసెప్నగ వాతెర్.