3वा योहन
योहन लिहि कीता मूडवा चिटि
दंडोस्क
1
1 सोप्तल गयियुन साटि, चर्चितुरोर पेदोल्ता आय्वल योहांता लिहि कीसेर मंतोन.
नी पोरो नाकुन वेले पेर्मा मंता.
2 लाड्नोर सोप्ता!
निमे बाव-बक्तितगा बडे मातपे, नीवा तबियत गिर चोकोट मन्जि, सम्दो चोकोट जर्गना इन्जेर पार्तना कीसेर मंतोन.
3 कहितुर येसुनुर बक्तलिर* यात्रा कीसेर इगे वातेर.
अनि नी बारेते, ‘वोर सतेमुन पिय्सि, चोकोटे ताक्सेर मंतोर्’ इन्जेर गवा वेह्तेर.
अद केन्चि नाकुन बेय आनंद लाग्ता.
4 बरोसतगा निमे नावोर मरिन दात्नोनि आंदि.
ना मरि-मियड सत्ने ताक्सेर मंतेर इंवल गोस्टित तेर अदिक नाकुन आनंद सिय्वल दुस्रो बदे सेले.
गयियुन अदिकार सिय्वल
5 लाड्नोर सोप्ता!
नीकुन वोड्कि सेलुर वूर, दुस्रो मुलुक्नुर बक्तलिर वातेके गिर बति, निमे मान-पान चोकोट कीसेर मंति.
6-7 वूर बक्तलिर नीवा पेर्मतुन बारेते चर्चितुरकुन गवा वेह्तेर.
बविसत्ने आतुर पर्बुना वचन वेह्वलिर बक्तलिर, किरिसतुन नंमकि वूरा मदत येत्वक्ने सरिय निह्गा वानिर्ते, बगवंतल आनंद येतनल वूरकुन मदत कीसेर मन.
8 दुस्रुरकुन वूर पचर किय्वल सतेम्नगा मरट ईसदार्क आयना इत्तेके, तप्वक आतुरा मान-पान सूडना.
वायुटुन सुटि कीसि चोकोटुन पिय्सि ताकना
9 नना अगटा चर्चितुरकुन उंदि गोस्टि लिहि कीतोन.
बति वूर्गटल वोरोर अदिकारि आका इंवल दियोतेर्पेस मा गोस्टि वोप्सेर सेलोर.
बारितेके तंवा पोरो उंडे बोरे अदिकारि मंवा इंतोर.
10 अचोरे आय्वा, वाय्वलिर बक्तलिरकुन मान-पान कियोर अनि दुस्रुर कीकोम इत्तेके गिर वोप्सेर सेलोर.
अहन मान-पान किय्वलिरकुन अड्डम आसेर, वूरकुन चर्चितुर्गटल अलदि वाट्सेर मंतोर.
अनि मा बारेते आयोङ-सोनोङ अव बेय करब वड्क्सेर मंतोर.
अदेन साटि नना वाता पेजे, वोन बारेते वेह्चि, तोहंतोन.
11 ना लाड्नोर सोप्ता!
निमे वोना नमुना येच्चि ताक्मा.
वायुटुन आय्वा चोकोटुने पिय्सि ताका.
चोकोट किय्वल बगवंतनोर आंदुर.
वायुट किय्वल बगवंतनोर आयोर.
12 देमेत्रिन बारेते चर्चितुर सम्दिर चोकोट वेह्चेर मंतेर.
बगवंतना सतेमुन पिय्सि वोर ताक्ता काड्कि, अद सतेम गिर चोकोट्नोर इन्जेर गवा सीसेर मंता.
मरट गिर अद करलेन इन्जेर वेह्चेर मंतट.
ममोट वेह्वल सतेम इन्जेर नीकुन टावा.
आक्रितङ गोस्टिङ
13 उंडे वेले गोस्टिङ नीकुन लिहि कियना इन्जेर मंता.
बति साय्ते अनि पोंटिंते लिहि किय्वल नाकुन पसंद सेले.
14 नीकुन बस्के सूड्का इनल बेय जीवा आसेर मंता.
अहन मरट बेटे माता पेजे मुकबिलि वड्ककट.
15 बगवंतल नीकुन सांति सियिर!
इगे मंवलिर सोप्तलिर नीकुन दंडोस वेह्चेर मंतेर.
अगा मंवल हर वोरोर सोप्तन मावा दंडोस वेहा.