2वा योहन
योहन लिहि कीता रेंडवा चिटि
योहंता दंडोस
1
1 बगवंतना केय्दे नेमे मातुर बक्तलिर्निट*, मीकुन नावा दंडोस!
नना मी चर्चितुरकुन पेदोल्ता आंदुन.
नना अनि सतुन करि कीतुर सम्दिर गिर मीकुन पेर्मा कीसेर मंतोम.
2 ममोट बारि पेर्मा कीसेर मंतोम इत्तेके, सतेम मा दिल्क्नगा मंता अनि अद बस्केट गिर मा सङा मंदंता.
3 बाबो बगवंतल अनि मा येसु किरिस्तु पर्बु, मी पोरो किवुल तोह्चि, मीकुन पेर्मता-दया अनि सांति सियिर.
मरट सतेम अनि पेर्मते पिसन साटि वोर मदत कियिर.
सत्नगा निल्सि मंट
4 बाबो बगवंतल माकुन आगे सीतपिनय, कहितुर बक्तलिर सतेमुन पिय्सि ताक्वल सूड्सि, नाकुन वेले आनंद लाग्सेर मंता.
5 लाड्नुर बक्तलिर्निट!
मरट वोरोन वोरोर पेर्मते सूडना इन्जेर मीकुन कोर्सेर मंतोन.
इद हुकुम पूना आयो बति, मोदोल वेह्ततुने लिहि कीसेर मंतोन.
6 पेर्मा इत्तेके, बगवंतनङ आगेन पिय्सि ताक्वल.
मोदोल मिरट किरिस्तुना चोकोट्ना कबुर केन्ज्तिट अगटल, ‘वोरोन वोरोर पेर्मते सूडन’ इंवले बगवंतल सीता आगे आंद.
7 नना इहिन बारि वेह्चेर मंतोन इत्तेके, येसु किरिस्तु माय्नना रूप्ने वाय्मकि इन्जेर पसि किय्वलिर वेलेटिर दुनियते पेसितेर.
वूर आतुर पसि किय्वलिर किरिस्तुनुर पगा-दार्क आंदिर.
8 मिरट कमय कीततुन सोडुस्वक्ने, बर्पुर इनम पुटनल वेरि, वूरा केय्दे पसे माय्वक्ने दिहंते मंट.
9 किरिस्तुना बोदतगा निल्सि पिस्वल, बाबोन अनि मरिन वोप्वल आंदुर.
अद बोदतगा निल्वक्ने तान सङा उंडे अदिक जोडि कीसि वेह्वल, हर वोरोर बगवंतन नंमोर वोर आंदुर.
10 आतोन मीवा रोन केय्मट अनि वोन चोकोट-वायुट गिर पूसि किय्मट.
11 वोन चोकोट-वायुट पूसि किय्वल वोनङ करब काम्क्नगा गिर ईसा येत्ता लेकते वांतोर.
12 उंडे वेले गोस्टिङ नीकुन लिहि कियना इन्जेर नाकुन वाटे मांता.
ते अवेन साय्ते कागुतुन पोरो लिहि किय्वल नाकुन पसंद सेले.
बति मीकुन बस्के सूड्का इनल जीवा आसेर मंता.
नना मिह्गा वाता पेजे मुकबिलि वड्कना इंतोन.
इदेन हिंदल माकुन बर्पुर अनंद लागंता.
13 बगवंतना केय्दे नेमे मातुर बक्तलिर,* मीकुन दंडोस्क वेह्चेर मंतेर.