गोंडि बासता इद पूना नियमुन बारेते
मुने वेह्वल गोस्टि
बासा इंवल माय्नन बगवंतल सीता इनम आंद
असल बासा इत्तेके बतल? नरिमन्कलिर वोरोन वोरोर तम्वा मंदा अनि दिल्ता अनि उंडे बदे समाचरतुन गोस्टिना रूप्ने अर्तम आनल वेह्वल सेलेके लिहि कीसि मंवडुन बासा इंतेर. इद बासा गोस्टिने इत्तेके बद गोस्टि बगा वायना इंवल वाक्यम्ना रूपुन पिय्सि, कालमुन पिय्सि तयर आसि मंदंता. ईतल बासा कीनेकेने इद कलितगा नरिमन्कल सम्दो जाति-जंवर्क्नगटल अलग अनि डगुर-पांदे मंतोर. इद बासये माय्नलिरा मुके गुन आंदु. इदेन हिंदले माय्नना जाति, रीति-रिवज, काय्दङ-कानुन्क अनि मान-पांदे ताक्वल इद दुनियतुरकुन करे मांता.
बासा बगटल वाता? बगवंतल इद कलितुन बेय सोबा गडि कीतोर. बहन इत्तेके, तीर-तीर्क्नङ मरक्ने, रङ-रङ्नङ पुङक्ने, दुस्रो दुस्रो जंवर्ते, दुस्रो-दुस्रोक जातिने अनि बासने तयर कीतोर. बारितेके इहिन वेले तीर्क मत्तेके, बगवंतन चोकोट लागंता. अदेन साटि बगवंतले इव सम्दो बासना वरमुन दुनियतुर माय्नलिरकुन सीतोर. माय्नना पुट्गड्मि बगवंतनल आतपिनय, बासना पुट्गड्मि गिर बगवंतनले आता.
बासता उदेस बतल? इद दुनियतगा मंवल हर उंदि बासतुन मान पुटना अनि अद बासतुन बारेते दिहंते परिक्सा कीसि करियना. इद बासा वड्क्वल पर्जा इचुर इचुर मरुङ्सि, तान बूले माय्वक मंले, राकि कीसि इरना. नमुनतुन बहन इत्तेके, मा कोया सेलेके गोंडि गोस्टिन डिक्सनरिना रूप्ने, मा कोया बासतुन पुस्तक्ना रूप्ने चापि कीसि इरना. अह्ने पाटने रूप्ने अनि सिनिमना रूप्ने गिर तयर कीसि राकि कियना.
कोयने सेलेके गोंडि बासते बय्बिल बारि मंदना? हर वोरोन बासतुन वाचि किय्वल अनि लिहि किय्वल हक मंता. हर वोरोन सतेमुन करि किय्वल अनि अर्तम किय्वल हक मंता. तनकुन इस्टम वाता अदेनगा बरोसा इर्ले हर वोरोन हक मंता. दुनियतगा मंवल हर वोरोन गिर बगवंतन बारेता कबुडुन वाचि किय्वल अनि केन्ज्वडा हक मंता. अनि तम्वा साटि मंवल अद कबुर केन्चि, मन-दिलतगा सोन्च किय्वल जुरत मंता. बगवंतल मा साटि बतल कीतोर अनि बतल तयर कीसि इर्तोर इंवडुन बारेते मरट इंके वेरि मा बासते वाचि किय्मकि. बगवंतल मा सम्दिरकुन बतल वेह्चेर मंतोर इंवल करि कियन साटिने, इदेन कोयने लिहि किय्वल जर्ग्ता. इद तीर्दे वोर बगवंतन करि कीसि, वोन बारेते सम्जे मासि, मरट वोना सेवा बरोबर तरिकते कियना इन्जेरेंते, इद मुके काम किय्वल जर्ग्ता.
बय्बिल इत्तेके असल बतल आंदु? बगवंतले तंवङ वचन्क अनि हुकुम्क मंवल इद ग्रंतुन तंवुर प्रवक्तलिरकुन अनि बक्तलिरकुन वेह्चि लिहि कियुस्तोर. वीर लिहि किय्वलिर सम्दिर गिर आसिया, आप्रिका अनि यूरप इंवलिक मूंद कंडल्क्नङ, दुस्रोक दुस्रोक देसल्क्नगा अनि दुस्रोक दुस्रोक पिडिनगा बगवंतल हुकुम सीता तीर वीर लिहि कीतेर. वीर सम्दिर लग-बग चालिस (40) जन्क मत्तेर. वूर इदेन पंद्रा नुह्क (1,500) साल्क येसु पर्बु पुट्वक मनेके अनि, येसु पर्बु पुट्ता पेजे उंदि नूर (100) सालकुन रोपो लिहि कीतेर. इत्तेके पूरो सोडा नुह्क (1,600) साल्क इद बय्बिल ग्रंत्नङ पुस्तक लिहि किय्वल जर्ग्ता. इदेनगा पूरो साट सारुङ (66) पुस्तक मंतङ. इदेनगा रंड बागल्क मंतङ: मोदोडा बागमुन पडना नियम इंतेर अनि रेंडवा बागमुन पूना नियम इंतेर. बति इद ग्रंत्नगा सिरिप रेंडवा बागम कोयने अनुवाद कीसि मंता. मोदोडा बागम उंडे गिर पूरो अनुवाद आय्ले मंता.
अद तोलेता ग्रंत इंके मंवलिर मा कोय्तुरङ नेकि-बदिन बहन लाग्सि मंता? कोया दर्मतगा तोत्तले सेसनङ अर्पनङ अनि बक्रना बलिदान सिय्वलिक नेकि-बदिङ ताक्सेर मंतङ. इव सम्दो तीर्क्नङ बलिदान्क माकुन सुक-सांत्ने इरना अनि मुक्ति पुटना इन्जेर हर साल कीसेर मंदंतट. बति बगवंतल मा सम्दिर साटि केपत केपत अव नेकि-बदिङ किय्वक्ने उंदिय जोका तंवोर मरिन बलिदान सीतोर. इद बलिदांतुन हिंदल माकुन स्वर्ग्नगा मुक्ति पुटंता. मरट वोर बगवंतनुर मरि-मियड आंतट. इद बलिदांता गोस्टितुन सोन्च कीतेके, बगवंतल माकुन बचोरो लाड अनि पेर्मा कीसेर मंतोर इंवल करे मांता. बगवंतल पूरो कलितुन गडि कीतोर. तान्गा मंले नरिमन्कलिर आय्वलिर माकुन गडि कीतोर. अनि नाकुन हेतु कीसेर, नावा पार्तना-विंति कीम्ट इन्जेर वेह्तोर. अदेन साटि बगवंतना गोस्टि दुनियतगा मंवलिर सम्दिर साटि, हर गट्का कामि सिय्वल आंदु. ते इद ग्रंत्ना जुरत मा कोय्तुर साटि गिर वेले मंता. बगवंतना गोस्टितगा मंवल सतेम पिडिनङ पिडिङ मारिवक्ने उंदि तीर मंवल आंदु. अनि वोर बगवंतल माकुन सीता वाग्दन बस्केन तोड-मोड कियोर. इद ग्रंत्नगा बगवंतल माकुन मुक्ति सिय्ले वोपनल, दुनियत रोपो मरट बहन पिसना इंवलिक बगवंतनङ गोस्टिङ मंतङ.
वोर बगवंतन बहन करि कियना:
1. बगवंतना उदेस: बगवंतल नीकुन वेले लाड कीसेर मंतोर. वोर उंदि उदेसुन साटि नीवुर अवल-बाबोना पीटे नीकुन जल्मा आयुस्तोर. निमे वोर बगवंतन करि कीसि, वोन सङा बस्केट मीरे मासि मंदना इंवले वोना उदेस आंदु. इदेन बारेते,
“बगवंतल दुनियतुरकुन बेय लाड कीता काड्कि, तंवोर वोरोरे मंवल मरिन इद दर्तुरितगा सारि कीतोर. वोन पोरो बरोसा इर्वल हर वोरोर नासेडम आय्वक्ने, वूरकुन बस्केट गिर पिस्वल जीवा पुटना इन्जेरेंते इहिन कीतोर” इन्जेर मंता (योहन 3:16).
2. पर्जत अनि बगवंतन नड्डुम मंवल अड्चंद: हर वोरोर बगवंतन करि कीसि, वोन सङा बस्केट मीरे मासि मंदना इंवल वोना चोकोट्ना उदेस मंता. बति माय्नलिर बोना सरि वोर सोन्जेर मंतेर. अनि वोर बगवंतल नेमि कीता कानुन तीर पिसेर सेलुर. इहिन बगवंतन उल्टा आसि पिस्वडुन पाप इन्जेर केयंतेर. इद पाप माकुन अनि बगवंतन पाकि कीसि वाड्ता. वोन सङा मीरे मासि मंवक्ने अनि लागि-बागि सेल्वक्ने कीता. इद पाप बगवंतन करुम बस्केन सोंवक्ने नरिमन्कन अड्चंद आसि निलंता अनि सम्दिर पोरो मरंता सिक्सा तचि वाटंता. बारितेके,
“नियत्नोर वोरोर गिर सेलोर!
नियत्नङ सरिन बारेते वोरोर गिर अर्तम कियोर!
बगवंतन मह्क्वल वोरोर गिर सेलोर!
सम्दिरे सरि बह्के मासि,
बततुने कामि सिय्वक आतेर”
इन्जेर मंता (रोमा 3:10-12).
3. अद अड्चंदुन वीडुस्वल बगवंतना पिलन: मावङ बततुने कामि सियोङ अव कोसिद्क्ने मरट बगवंतनगा सोंदा पर्वट. अदेन साटि बगवंतले मावङ पापकुन बर्पुर कंडि किय्वडुन तयर कीतोर. बहन इत्तेके, माय्नन अनि बगवंतन नड्डुम अड्डम आसि मंवल पापुन तेंड्सि वाट्लेने, येसु किरिसतुन इद कलितगा रोह्तोर. इदेन बारेते,
“नियत्नोर किरिस्तु, बगड-नियत्नुर आय्वलिर मावङ पापकुन पिय्सि, सिक्सा बोगे मातोर. अनि माकुन बगवंतनगा करुम तर्ले, उंदिय जोका मेंदोडा रूप्ने मरन आतोर” इन्जेर मंता (1वा पेतुरु 3:18).
अनुवाद किय्वल तरिका:
मा कोयने इद ग्रंत बवेन आदर कीसि अनुवाद किय्वल जर्ग्ता? दुस्रो दुस्रो बासने लिहि कीतङ बय्बिलकुन वाचि कीसि, अवेन अर्तम कीसि, मरट सम्दिर सम्जे माय्वल मा कोया बासते लिहि किय्वल जर्ग्ता. अचोरे आय्वा, बस्के-बस्केते दुस्रोक बासनङ बय्बिल्क्नगा बदे उंदि गोस्टिता तेडा मंदुयो अस्के, ग्रीकु सेलेके हेब्रि बासता बय्बिल गिर सूड्सि, अदेना अर्तमुन पिय्सि लिहि किय्वल जर्ग्ता.
इहिन लिहि कीता अनुवाद बच्चोर वेरि नमा परनल मंता?
1. अनुवाद बूर कीतेर? अनुवाद किय्वल सिक्सान सारुङ साल्क कीसि, अनुवाद्नङ नियमकुन करिसि मंवलिर मा कोय्तुर इदेन अनुवाद कीतेर.
2. इद अनुवादुन बूर चेकिङ कीतेर? बय्बिल गियंतगा अनि अनुवाद किय्वडगा वेले अनुबव मंवलिर चेकिङ कीतेर. वूर बहन कीतेर इत्तेके, बय्बिल्ता हर पुस्तकुन, हर अद्यायतुन अनि हर वचंतुन दिहंते वाचि कीतेर. अनि अव वचन्क्नगा तप्तङ-चुक्तङ गोस्टिन चेकिङ कीसि सुद्रि कियुस्तेर.
3. कोयने अनुवाद कीता बय्बिलतुन तम्वा समाज्नगा वाडकम किय्ले बूर वोप्तेर? सम्दो तीर्क्नङ चेकिङ आता पेजे गिर, गोंडि अनुवाद्ना कमिटितुर आय्वलिर ममोट अनुवाद कीता अद हर पुस्तकुन दिहंते वाचि कीसि, मा कोया रिवजुन पिय्सि उंडे जरसि सुद्रि कीतोम अनि मा कोया सेलेके, गोंडि समाज्नगा वाडकम किय्ले गिर वोप्तोम.
दुस्रोक बासना बय्बिल्तगटल इद कोयने अनुवाद कीता बय्बिल बहन तेडा मंता?
मोदोडा बय्बिल लिहि कीता बासतुन (इत्तेके हेब्रि, अरमिक अनि ग्रीकु) वूर तोत्तुर बहंते अर्तम कीतेरो, अह्ने इद गट्कते वाचि किय्वलिर गिर सम्जे मायना इंवले अनुवाद किय्वडा मुके उदेस आंदु. नेटा दिवोस्ने वाडकम किय्वल बासते बय्बिल लिहि कीता काड्कि, हर वोरोर वाचि किय्वन सेलेके केन्ज्वन अर्तम आंता. हर बासता व्याकरन अनि निर्मान अलग मंदंता. इदेन हिंदल, दुस्रोक बासनगा मत्ता तीर गोस्टितुन गोस्टि अनुवाद कीतेके, तोले लिहि कीतङ अव वेले उदेस्क उर्पटिङ-तिर्पटिङ आंतङ. अस्के वाचि किय्वलिरकुन सेलेके, केन्ज्वलिरकुन अदेनगा मंवल करल अर्तम सम्जे मायो. तान उंडे वोरोर सम्जि कीसि वेहा लागर. ईतल परेसन मंवा इन्जेर अनि, वाचि किय्वल हर वोरोन गिर चोकोट अर्तम आयना इन्जेर, ममोट गोस्टितुन गोस्टि अनुवाद किय्वक्ने हर उंदि बागम्ना अर्तमुन अनुवाद किय्ले कोसिद कीतोम.
कहि जोकङ अनुवाद्नगा अर्तम वायन साटि दुस्रोक दुस्रोक गोस्टिङ वाप्रि कीतोम. अनि अव जागनगा वाडकम किय्वलिक गोस्टिन वचंता नंबरतुन पिय्सि पेजितगा बूड लिहि कीसि मंदंतङ. नमुनत: मत्तयि 16:24 “तंवा तक्लिबुन तना सोसि कीसेर” इन्जेर कोयने मंता. बति ग्रीकु बासते, “मोदुन कान्चि ताकना” इन्जेर मंदंता. मोदुन कान्ज्वल इत्तेके, तक्लिब बोगे माय्वल अनि मरन आय्वल.
कहि बागम्क्नगा कोयने अर्तम बरोबर वायन साटि, कहितङ वचनकुन मीरि कीसि लिहि कीतोम. 3-5इद तीर्दे रंड सेलेके अदिक वचनकुन मीरि कीतेके, मुनेतङ पेजे अनि पेजेटङ मुने वचनकुन लिहि कीतेके, वाचि किय्वलिरकुन वेले चोकोट सम्जे मांता.
मोदोडा बासता बय्बिलतुन दुस्रो बासते अनुवाद किय्वलिर बूरे गिर आयि अदेनगा मत्ता तीर अर्तमुन बर्पुर (नूटुन नूर पर्तिसत) अनुवाद किया परुर. इदेन करि कीसि, ममोट गिर बगवंतन वेले पार्तना-विंति कीसेर, अनुवाद किय्ले बुदि-गियंतुन तल्क्सेर, मा कोया-कोय्तुरकुन बगवंतना वचन बचोरो काया-कस्टम कीसि अंदुस्तोम. इंके मावा पार्तना बतल इत्तेके, मावुर वेलेटिर लोकुर इद कलि गडि किय्वल अनि मा जीवतोर माल्कल आय्वल बगवंतना वचंतुन अर्तम कियना, नंमना अनि वोनोर मरि आय्वल येसु किरिस्तुनगा बरोसा इरना. बारितेके बगवंतना सते सरि-मारगनल अनि वचंतल बह्के मासि सरि बूले मासि मंवलिर मा साटि, तंवोर मरि येसु किरिसतुन रोह्चि, वोना पवित्रा नेतुडा अनि जीवता अर्पना सियुस्तोर. अनि वोर येसुना जल्मा आय्वक मनेके, लिहि कियुस्तङ ग्रंत्क्नगा मत्ता तीर तिरिसि वोन मूंद रोज्क्ने बगवंतल नेंडुस्तोर. वोन्गा बोर्ते बरोसा इरंतेरो, वोन मुक्ति पुटंता. इदेन बारेते,
“वेर येसुना पोरोडुन सुटि कीसि, दर्तुरित पोरो मंवलिरा बोनय पोरोल माकुन बचि किया परो” इन्जेर मंता (अपो. का. 4:12).
अनि उंडे उंदि जागा,
“येसु पर्बुये मा माल्कल आंदुर इन्जेर मा तोड्दे वोप्सि, बगवंतल वोन मरंतल नेंडुस्तोर इन्जेर, मा दिलतगा बरोसा कीतेकेन, मरट बचे मांतट” इन्जेर मंता (रोमा 10:9).
गोंडि अनुवाद कमिटि
2018
इद ग्रंतुन वाडकम किय्वल तरिका:
इद ग्रंतुन वाचि कीनेके इव गोस्टिङ हेतु इरना:
1. पूनङ अनि कटिन मंवलिक बव्ते गोस्टिन (नमुनत: बाप्तिस्मा, सुनगोग, परिसया) बूड चुकङ मंदंतङो, अवेन बारेते, इद ग्रंत्ना आक्रिता बागम्नगा मंदंता.
2. उंडे गिर पदम्ना सेलेके, पूरो गोस्टिता अर्तमुन सम्जे माय्ले बगने आयि (*) ईतल सुकुम्ना निसनि मत्तेके, पेजितगा बूड इदेन बारेते मंदंता.
3. अनि (†) ईतल तल्वर्ता निसनि मत्तेके, अव गोस्टिङ दुस्रोक दुस्रोक पुस्तक्नगा गिर मंतङ इंवल तोहंता.
4. कहि जागनगा मोदोडा बासते लिहि कीतङ पुस्तक्नगा बगते इव गोस्टिङ सेलेङो, अनि कहितङ पुस्तक्नगा वचन्क चुक्सि मंतङो, अवेन तोह्ले *[ ... ] ईतङ चव्कोट मंवलिक गीतोङ दोस्तोम अनि अवेन बारेते पेजितगा बूड लिहि कीसि मंता.