3
Ɛ 'wlʋa 'de -mɔ ɛ, Nyɔsoa wlu 'de Sonasɩ -pee kewlɛ'. -Mɛ ɔɔ' dboa' 'a kpɛ 'sɔɔn -nɩ -nao. 2 Nyɔsoa 'na: Sonasɩ, -ɩn -sɔn 'ʋn -wɛe -kwlɔ klaa" nyʋ a 'daa Ninifʋ ɛ, -ɩn -jee' ɛ 'di mu 'de wlu 'ɩn -tua" -ʋn wɔn -ɩn je ɛ 'tmʋ !3 Nyɔsoa wlu a 'sʋ Sonasɩ sɔn 'ʋn ɛ, -wɛe ɔ mu 'e Ninifʋ. 'De Ninifʋ -kwlɔ -mɛ "bɛi 'de Kea "juɛi 'sʋ ɛ je -je "kpei -tie" cɛn, nyʋ a na' 'wɩ taan -wɛe nyʋ a -kwɛ' ɛɛ' -kwlɔ -tu -pɩn' 'a.
4 Sonasɩ nynia 'e ɛ, ɔ na' 'wɩ due' -wɛe ɔ kpa wlu "jɛi ɔɔ po wee, ɔ 'na: Nyɔsoa 'na: 'Wɩ 'a kwla -nyiiɛ' -sie 'e ke -wɛe Ninifʋ -kwlɔ 'je i sɔn-.
5 Ɔ 'da kan' 'sʋ Ninifʋ -nyʋ poɛ Kea 'a wlu tɔ' -wɛe ʋʋ po "suan paa' 'a wee -ke, 'dɛ -tba' mɩɩ" -ɛ -jɛa klae" -wee' 'bɔ wɔn -wɛe ʋʋ paa blɛ 'ʋn. 6 -Tɩ' Sonasɩ 'tmʋa ɩ mu' ɩ je 'beɔ -nɩa 'e Ninifʋ jɛɛ-, 'sʋ ɔ sɔn 'ʋn 'ɛ 'de ɔɔ' 'beɔ kpatɛ- "kpei -wɛe ɔ -sa ɔɔ' 'bɩɔ dɩ 'ʋn 'de ɔ paa blɔ 'ʋn -wɛe ɔ -tei 'de biʋn' 'di. 7 'Bomɔ 'beɔ ke ɔɔ' nyʋ klae" -nɩa 'de Ninifʋ poo wee, ʋʋ 'na: -A -te' ɛ ao Ninifʋ -nyʋ -wee' kɛ' "i:
Nyiɔ o, nmi o, bli' ke "nɔdɩ 'de dɛwɔn -tɩn ɛ, nyɔ 'de nmi i dia' kpaa, nyiɔ ke nmi -wee' 'de "ni 'na. 8 Nyiɔ ke nmi -wee' paa blɛ 'ʋn -wɛe ao 'je Kea "jru i -fɩn" ɩ due' due' 'de aoa' 'kpɩ -wee' 'ʋn, -jɔ kpa ɔɔ' -jeblʋ -saɩn ɛ, -mɔ juo ɔɔ' dɩsaɩn "i 'de Kea -pee -wɛe ɔ 'jɩ 'kpʋ "i to 'de ɔ 'jɩ kwa -sɔn -saa. 9 Nyɔ se o juo-, Kea 'bɛɛ ɛ 'je tɔ' -kwlin -saa -wɛe ɛ 'je 'cɛn klaa" -nɛ 'wla 'de ɛ se -aa ma" i -sai -ɛ.
10 Kea juɛ ka Ninifʋ -nyʋ a 'wlʋa ʋʋa' dɩsaɩn 'di -wɛe -jeblʋ -saɩn ʋʋa kpa ʋʋ 'boa ɩa' kpa -tɩ 'sʋɛ, Nyɔsoa 'wla 'cɛn 'mɛ, dɛ klaa" ɛ 'na ɛ 'je ʋʋpʋ "jrii nʋ 'de ɛ, ɛ seɛ nʋ la 'bode.