Kea 'a 'nynɩ "bɛi 'de jaʋn 'di ke 'de 'blʋa "kpei ke‑
148
Ao 'bɛɛ‑ Tʋ "bo 'a 'nynɩ "i,ao 'bɛɛ‑ ɛɛ' 'nynɩ "i 'de 'jɛi".
2 Ao 'bɛɛ‑ Tʋ "bo 'a 'nynɩ "i,
ao ɛɛ' 'soa" ‑wi", ao ɛɛ' tʋ ‑fɔn' nyʋ ‑wee'‑,
ao 'bɛɛ‑ Nyɔsoa 'a 'nynɩ "i.
3 Ao 'bɛɛ‑ Tʋ "bo 'a 'nynɩ "i,
'jrʋ ke 'cʋ ke‑, Kɩɩn,
ao 'bɛɛ‑ Tʋ "bo 'a 'nynɩ "i,
'cʋ ‑sɩɩn ‑wee'‑ "klein ‑a fan.
4 Ao 'bɛɛ‑ ɛɛ' 'nynɩ "i, 'oo jaʋn 'a jaʋn‑,
ao ‑nɩa "ni klae" 'de jaʋn "jru kpɔ' ɛ,
ao 'bɛɛ‑ ɛɛ' 'nynɩ "i.
5 Ɩ ‑wee'‑ 'bɛɛ‑ Tʋ "bo 'nynɩ "i,
Dɛ ‑nʋɛ ɛ wlua 'sʋ ɩ ‑wee'‑ nʋʋɛ'.
6 Ɛ nʋɛ' ‑wɛe ɩ ‑wee'‑ nɩ ‑sisi',
'de nɔ" 'oo ‑wee'‑ 'di,
ɛ nʋɛ' ɩ ‑wee'‑ "klein 'a kɛ',
‑ɩ se fai" pooɛ i 'de nɔ" 'oo ‑wee'‑ 'di.
7 Ao 'bɛɛ‑ Tʋ "bo 'nynɩ "i,
ao nyʋ ‑nɩa 'nɔ 'blʋa "kpei ɛ,
nmi ‑nɩa 'de 'tɔniɛ wɔn ɛ,
‑gblebie‑ foo" 'sʋ ‑ke,
8 nɛ, "ni ‑kɩn, dee' kpan‑,
‑cnu', pʋʋɔ' klae" ‑ɩa ‑jea kɛ' wɔn ɛ,
9 aomɔ, crʋ klae" ke crʋ mɩɩ",
ti ‑ɩa poa "bi ke Sɛtrɩ ti ‑wee'‑ "klein ke‑,
10 'kwladi' nmii ke "nɔ dɩ ‑wee' "klein,
dɩ "klein ‑ɩa cnia ‑pɛɛ' ke,
dɩ ‑jɩ ‑a ‑waan" ke‑,
11 'beɔ ‑wi" ‑nɩa 'de 'blʋa "kpei ke,
'cɛ ‑wee'‑ "klein ke, kɛɛma' ‑wee'‑ ke,
'blʋa 'a 'pee 'je 'ʋn ke‑,
12 ‑kwɩɩ" mɩɩ" ke‑ 'nynɩɩ mɩɩ" ke‑,
‑kɩɩ" ke‑ "nynumɩɩ" ke‑,
13 ao ‑wee'‑ 'bɛɛ‑ Tʋ "bo 'a 'nynɩ "i,
dɛ ‑nʋɛ 'de ɛ 'ʋn dɛ ‑wee'‑ se "jri i ‑sa a ‑ka nɩ‑.
Ɛɛ' 'beɔdɛ nɩɛ 'e 'blʋa ke jaʋn ‑wee'‑ "jru kpɔ'.
14 Ɛ ‑teeɛ nyɔ due' ‑ɔ ‑jea ɛɛ' 'cɛ kʋʋɔn 'kwla
‑sa kpɔ "i.
Ɛmɛ ‑nɩ nyʋ "klein ‑ʋʋ ‑jeɛ ɛɛ' ‑tɩ' tɔ' 'ʋn o,
Israɛ ‑nɩa 'de ɛ ‑pʋn" ɛmɛ ‑nɩ ʋʋa' ‑ciian"‑.
Ao 'bɛɛ‑ Tʋ "bo 'a 'nynɩ "i.