Kea kmai" 'de dɛ "o dɛ ‑wee'‑ "klein ''kpei
147
Ao 'bɛɛ‑ Tʋ "bo 'a 'nynɩ "i.Kɩɩn, ɛ nmɔ "jrii ‑wɛenyʋ 'je dɩ bla,
nyʋ 'je Kea 'nynɩ ‑sa.
‑Wɛe ɛ nɩɛ ka ‑cɔɔn'‑ ka,
nyʋ 'je ɛɛ' 'nynɩ "i 'bɛɛ‑,
dɛ ‑nʋɛ ɛmɛ ‑nɩ ɛ nɩɛ ɛɛ' ka.
2 Tʋ "bo mɛ ‑sa de, ‑ɛ po Selisalɛmʋ ‑kwlɔ,
ɛ 'kɩɩɛn Israɛ 'a nyʋ ‑nɩa 'kwlɩ jai "jrui.
3 Nyʋ ‑ʋʋa pɛe cɛan mlɛʋn",
ɛ ‑tuɛ" ‑mʋ ‑wi" ‑tɩ' ‑kwlɩ' i.
Ɛɛ bla ʋʋpʋ‑ 'a ‑ci" dɛ "i.
4 Ɛ juuɛ 'cɩ ‑sɩɩn,
‑wɛe ɛ ‑tu" ɩ ‑wee'‑ 'nynɩ i due due'.
5 ‑Aa Tʋ "bo "bɛi, ɛ diɛ ‑kla,
ɛɛ' dɛ "jrii juua' se "ti na' 'ble.
6 Tʋ "bo 'a ‑teɛ' "nmianyʋ kwa wɛi,
ɛɛ jaa 'diwɔnyniʋn ja, 'sʋ ɛ jea ʋʋ 'blʋɔ ‑tu".
7 Ao ble ao 'da Tʋ "bo, 'de ao 'jeɛ sɛ po,
ao nʋ aoa' ‑si' ‑plʋ, ao 'je ‑aa Kea 'nynɩ ‑sa.
8 Ɛɛ poɛ "ni 'de 'jɛi",
‑wɛe ɛ 'je dba 'de 'blʋa "kpei,
'de sii" 'je crɩ "kpei mɛɛ‑.
9 Ɛɛ "nyɩɛ wan" 'a "nynuu‑ ‑a ‑fɩan" 'mɩɩɛ ke‑,
"nɔdɩ‑ ke, ɛɛ "nyɩ diidɛ.
10 Soo" 'a 'dii kuua', se dɛjrɛ' nɩ 'de ɛ "jri 'de,
ɛ se tʋ ‑fɔn' i 'a 'kpɩ 'blea,
mɛ ‑ɛɛ nmɔɔ ɛ 'diwɔn nɩ‑.
11 Tʋ "bo kma nyʋ "klein ‑ʋʋa ‑tea' ɛɛ' ni' 'a ‑tɩ',
nyʋ ‑ʋʋ tba ɛɛ' 'diwɔnmɔa' tɔi" ke‑.
12 'Oo ‑mɔ, Selisalɛmʋ,
‑ɩn ‑sa Tʋ "bo 'nynɩ,
‑ɩn ‑bɛɛ' ‑ma Kea 'a 'nynɩ "i, 'oo Siɔn!
13 Dɛ ‑nʋɛ ɛmɛ ‑ɛɛ kuu ‑ma klu 'a ‑gbaa' i,
ɛɛ poɛ ‑ma "nynuu "diwan‑, 'de ‑ma ‑gbu" ‑sɔn,
14 ɛɛ "nyɩɛ ‑ma 'blʋa pɛe 'a blua',
ɛɛ "nyɩɛ ‑ʋn diidɛ 'dɔe ‑ma jea dbo.
15 Ɛɛ ja ɛɛ' 'tʋnʋ ‑tɩ 'de 'blʋa "kpei,
ɛɛ' wlu 'a poɛ 'e 'blʋa.
16 Ɛ ja dee' kpɩn‑: Ka jee" ‑fua" nɩa,
ɛɛ jrɛ' i ‑ta ‑wee' ka "ni ‑kɩn a waa i ɛ.
17 Ɛ ‑fi" ɛ dee' kpɩn‑.
Nyɔ ‑bɛɛ' ‑ɔ ‑je ɛɛ' dee' "juɛi nyna‑?
18 ‑Bo ɛ wlu 'sʋ, ɩ cɛn "ni. Ɛɛ ja pʋʋɔ', ‑wɛe "ni 'a sɛn 'blʋɔ i.
19 Ɛ ‑sa ɛɛ' wlu 'kwla 'de Sakɔbʋ ‑pee,
ɛɛ' kɛ' ke, ɛɛ' 'tʋn nʋ ‑tɩ 'de Israɛ ‑pee.
20 Ɛ se kan' ‑mɔ nʋ 'de 'blʋa 'srʋ jrɛ' ‑pee,
ɛmɛ ‑nʋɛ ‑wɛe ʋʋ se ɛɛ' kɛ' jrɛ' juuo‑.
Ao 'bɛɛ‑ Tʋ "bo 'a 'nynɩ "i.