Kea ‑kwlɩ" ‑tei' 'a baewlu
144
Dafi 'a 'dʋ.
‑Ma 'nynɩ "bɛi Tʋ "bo,
‑mɔ ‑nɩa 'ma ‑kliosou",
‑mɔɔ ‑kuu 'ma sʋn i 'de tʋ 'ʋn.
2 ‑Mɔ ‑nɩ 'ma ‑tɩ' kmai‑, ‑mɔ ‑nɩ 'ma 'saan:
‑mɔ ‑nɩ 'ma ''jru 'wlaaɩn': ‑mɔ ‑seie 'ʋn.
‑Mɔ nʋɛ ‑wɛe 'ma 'cɛ ɛ 'je 'ʋn wɔn.
3 Tʋ "bo, dɛ nyiɔ ‑mɔ nɩ 'ʋn,
‑wɛe ‑ɩn ‑je ɔɔ ‑tɩ' ‑tu" ‑ɛ?
Dɛ nyiɔɔ' "ju ‑mɔ nɩ 'ʋn ɛ,
‑wɛe ‑ɩn ‑je ‑mɔ "jriɛ o sie ɛ?
4 Nyiɔ ka pʋʋɔ' nɩa ‑ɔ ‑nɩa kan' a, ɔɔ' 'wɩ ‑kwɔ' ‑fli ‑ɛɛ ‑sia'.
5 'Oo Tʋ "bo, ‑kain jaʋn wɔn,
‑ɩn ‑je i "si 'nɔ 'blʋɔ‑
‑ɩn bla crʋ "i 'de dao' jeɛ kui "buu‑!
6 ‑Ɩn crɛɛ "ni "jrii,
‑wɛe ɛ 'je 'ma tʋnyʋ ja ‑gba',
‑ɩn poo ʋʋpʋ‑ 'sɩn,
‑wɛe ɛ 'je ʋʋpʋ‑ ‑je 'kwa ‑sa.
7 'De "jɛi ‑ɩn nɩa, ‑ɩn sro ‑ma sʋn 'de 'ʋn o,
‑wɛe ɛ 'je 'ʋn 'pʋʋ‑,
‑ɩn seie 'ʋn 'de "ni klae" wɔn,
‑ɩn ‑sa 'ʋn 'de nyʋsaɩn ‑nʋ 'kwa,
8 ‑ʋʋ wɔn 'di sɩ ‑tɩ 'a 'sʋ 'wlʋa,
‑wɛe wlu ʋʋ cɛan ‑tie",
ɩ ‑wee'‑ nɩa nyʋ 'srɛi pooa' a.
9 'Oo Kea 'ɩn 'je 'ma ‑si' ‑plʋ,
‑ɛɛ "dbu nɩa ‑puue bla, 'ɩn 'je ‑ʋn 'da.
10 ‑Mɔɔ ‑pʋʋ' 'beɔ ‑wi",
‑wɛe ‑ma ‑sa' Dafi ‑nɩa ‑ma dbonʋɩ 'mɛ ‑cnɛ "i.
11 ‑Ɩn ji, ‑ɩn ‑pʋʋ' 'ʋn,
‑ɩn ‑sa 'ʋn nyʋsaɩn ‑nʋ 'kwa,
‑ʋʋ wɔn 'di sɩ ‑tɩ 'a 'sʋ 'wlʋa;
‑wɛe wlu ʋʋ cɛan ‑tie'',
ɩ ‑wee'‑ nɩa nyʋ 'srɛi pooa' a.
12 ‑Aa "nynuu‑ nmai nynuu‑, ‑ta ʋʋ nɩa mɩɩ" ɛ, ʋʋ nɩɛ ka tu nyʋ doa,
‑wɛe ‑ɛ ‑bɔa 'de ‑ɛ ‑kua 'e 'dei ɛ,
‑aa nynʋkpae' nynuu, ‑kɔ' tu nyʋ ‑pa' nmɔ "i,
‑wɛe ‑ɩ nyna i 'de Tʋ "bo o ‑gbu" 'di ɛ.
13 ‑Aa ‑gbu" 'a "jɛi "ji, dɩ 'dɔe ‑wee'‑ 'a "kwli 'ʋn,
‑aa nɔ" dɩ 'je ‑gbɛn' ɩ 'je "i ‑tie. Kɩɩn,
ɩ 'je ‑kwlʋ ‑puue mɔɔ' ‑cɛ" "kpei cɛn,
'de ɩ 'je ‑aa ‑gbae "kpei "ji.
14 ‑Aa nɔ" dɩ ‑gbɛn',
"kwli 'bo ʋʋ wɔn 'wlʋɛ,
nai" ‑tɩ' 'bo ‑a ‑jeɛ',
ʋʋ 'bo ‑a kʋʋɔn 'ʋn kpʋɛn,
‑fɩn" ‑cnuɛn" 'bo 'e ‑kwlɔ nɩɛ.
15 'Mʋa‑ nʋ nyʋ ɛɛ nʋa dɩ 'dɔe "jrii ɛ.
'blʋa ‑ɛɛ 'cɛ Tʋ "bo nɩa ɛ nʋ 'mʋa‑.