‑Ɩn ‑seie 'ʋn
140
Dafi 'a 'dʋ ‑crɩɩa' 'de 'dʋ ‑jeopoi 'a 'sbɛ 'di ɛ. Dafi 'a 'dʋ.
2 Tʋ "bo, ɛ ‑seie 'ʋn 'de 'diwɔnyniʋn 'kwa.
Ɛ ‑sa 'ʋn ‑cnuu"‑ nyʋ 'kwa.
3 Dɛsaʋn 'a 'sʋ mɛ ʋʋa naa tɔ' "kpei,
ka ‑sɔɔn' ‑sɩan' 'ka ʋʋa ‑pɔn' ‑cɩɩa' i.
4 Ka sɛn 'ɛ mɩɩɔ nɩa, 'ka ʋʋa' mɩɩɔ nɩ‑,
wlu ‑ɩa ‑wlʋa 'de ʋʋ 'wɔn,
ka jɔ 'ɔ ‑ku' nɩa 'ka ɩ nɩ‑. ‑Te' ‑kwlʋ.
5 'Oo Tʋ "bo, ɛ 'bo 'mii "taiɛ,
'ɩn 'bo 'e 'diwɔnyniʋn 'kwa 'kpaa.
Ɛ ‑sa 'ʋn ‑cnuu"‑ nyʋ,
ʋʋa naa 'ma blu ‑tɩ tɔ' "kpei 'kwa,
6 ‑cɛi" 'bɛʋn ‑gba' pɩɩ‑ 'de 'ma ‑tɩ' 'ʋn,
ʋʋ ‑te' ɛ nya" sai ‑je woi,
ʋʋ ‑gba' 'ʋn "flae ‑pee. ‑Te' ‑kwlʋ.
7 'Ɩn wlu' 'de Tʋ "bo ‑pee 'ɩn 'na:
ɛ nɩɛ 'ma Kea: Tʋ "bo,
ɛ po 'ma baewlu doun" o.
8 'Oo Tʋ "bo, Kea, ‑mɔ ‑nɩ 'ma 'kpɩ,
‑mɔ ‑nɩ 'ma 'pʋʋi, tʋ ‑fɔn' wɩ o ɛ,
‑ma ‑criɛ" 'ʋn dɛ "jru.
9 Tʋ "bo, ɛ 'bo 'diwɔnynii 'a ‑kwlʋ' ‑tɩ' nʋɛ.
Ɛ 'bo ɔ "itaiɛ dɩ ɔ ‑tea',
ɩ 'bo ɔ kwa 'wɔɔn ɛ. ‑Te' ‑kwlʋ.
10 Sɛɛn ɛ ‑ku' ‑ɛɛ wlʋa 'e nyʋ ‑ʋʋ ‑pian' 'ʋn 'de woi 'wɔn ɛ,
ɛ ‑craa ʋa ‑cɛ" 'ʋn.
11 Ʋʋ ‑gba' ʋʋpʋ‑ 'kpaa nɛ jai.
Ʋʋ ‑fi" e ʋʋpʋ‑ 'de nɛ bie',
ʋʋ sea 'bɛɛ‑ ʋʋ 'jea 'wlʋ ɛ.
12 Nyɔ wlu saʋn nɩa 'wɔn ɛ,
ɔɔ' sie 'de 'blʋa "kpei.
Nyɔ ‑ɔɔ sʋn "fee a i ɛ, 'daɩn kpʋn ɔ.
13 'Ɩn 'je 'kan 'mɛ, Tʋ "bo ‑a ‑wlʋ "nmia nyɔ o,
‑ɛ ‑ble nɩa" nyɔ 'ɔ ‑gba.
14 Kɩɩn, nyʋ ‑srɛai" 'a muɛ 'nynɩ ‑saa'.
‑Tɩ' "i ‑klɛɛ nyʋ ke, ɛɛ muɛ "ti 'a mamaʋ.