Tʋ "bo, ‑ɩn juuo 'ʋn ɛ 'pepe
139
Dafi 'a 'dʋ ‑ɛ ‑crɩɩa' 'de 'dʋ ‑jeopoi klaa" 'a 'sbɛ 'di ɛ.
Nyɔsoa, ‑ɩn ‑tin 'mii ‑ɩn ‑juoo 'ʋn ɛ 'pepe.
2 ‑Bo 'ɩn ‑tei o, ‑bo 'ɩn sɔn 'ʋn o, ‑ɩn ‑juɩ'.
‑Ɩn siɛ nɔ" nya sese,
dɛ 'ma naa tɔ' "kpei ‑ɩn jeɛ juuo‑.
3 ‑Bo 'ɩn nɩ nabʋja o,
‑bo 'ɩn 'pɛn i o ‑ɩn juɩ'.
Dɩ "klein 'ma nʋa,
ɩa' dɛjrɛ' se ‑ʋn tai' "maa‑.
4 'Ɩn se wɔn 'bai ke,
Tʋ "bo ‑mɛ dɛ 'ɩn 'jea 'tmʋ ‑ɩn ‑juuɛ' sese.
5 ‑Ɩn ‑nɩɛ 'de 'ʋn 'de,
‑ɩn nɩɛ 'de 'ʋn "juɛi,
‑ɩn ‑teɛ' 'ʋn ‑ma sʋn "kpei.
6 Dɛ ‑ɩn juua 'ʋn 'pepe ɛ,
ɛ nmɔ "jrii 'bo 'mɔ ‑kwlɩ",
dɩ 'klein 'ɩn 'bɛɛa 'mii 'wɔan' a,
‑ɩn ‑nɩɛ 'o ɩ ‑wee'‑ "jru kpɔ'.
7 ‑Ta 'ɩn 'je mu ‑wɛe 'ɩn 'je ‑ma ‑suu o tɛɛn‑?
‑Ta 'ɩn 'je ple 'ɩn 'je mu,
‑wɛe 'ɩn 'je ‑ʋn "jrii‑ "maa‑?
8 ‑Bo 'ɩn 'ja 'e jaʋn 'di ɛ, ‑ɩn ‑nɩ 'e mɛ,
‑bo 'ɩn 'pɛn i 'de 'mɛʋ "klu,
'de ‑kwlu' 'a ‑kwlu' ɛ,
‑ɩn ‑nɩ 'e ‑mɔ 'mɛ ‑ke.
9 'De ‑bo 'ɩn tba naɩn,
‑wɛe 'ɩn 'je ‑cnuu 'ɩn "maan 'ɩn mu 'de 'tɔni 'de,
'nɔ 'jrʋ a 'wlʋa fɔ o ɛ,
10 ‑ma sʋn mɛ ‑ɛɛ mu 'mii kpʋan'
‑wɛe ‑ma diansʋn 'je 'ʋn ‑jeopo
11 'De ‑bo 'ɩn 'na "bɛɛ‑ kwie kpʋʋn 'ʋn "kpei,
ɛɛ ‑srɛɛn' ‑sɔn' 'ʋn 'de 'ɩn 'de woi ɛ,
12 dɛ ‑nʋɛ, 'bo ‑ʋn "juɛi ɛ, "bɛɛ kwie‑ ‑kɔ' ‑sɔn',
‑wɛe kwie nɩ ‑pe' saa ka ‑sɔn' nɩa,
'de ‑ʋn "jri 'de. Kwie o ‑sɔn nɩɛ dɛ due' 'bo ‑ʋn "juɛi.
13 ‑Mɔ ‑nʋ' 'ma nyiɔjɔ‑,
‑ta 'ɩn nɩa 'de 'ʋn de 'a "kwli 'di ɛ, ‑mɔ ‑tuu" 'ʋn "i.
14 Nyɔsoa, 'ma poɛ ‑ʋn sɛ'‑,
dɛ ‑nʋɛ ‑mɔ ‑nʋ' 'ʋn,
‑wɛe 'ɩn se "jriɛ i ‑saa ‑ka nɩ‑,
dɩ ‑ɩn nʋa ɩ nmɔ "jrii
'ma ‑cɛ" 'kpa 'je kan' 'mɛ 'pepe.
15 Dɛ ‑ɛ ‑jea ‑ʋn tai' "maa‑,
'de 'ma nyiɔku 'a ‑tɩ'ʋn ɛ se nɩ‑.
‑Mɔ ‑nʋ' 'ʋn 'de kwie'.
‑Ta 'ɩn nɩa 'de 'ɩn de 'a "kwli 'di ɛ, ‑mɔ ‑ma' 'ʋn.
16 ‑Ta 'ɩn sea nyiɔ ma ke ɛ, ‑ma ‑jeɛ 'mii,
'wɩ ‑bo 'ɩn ji 'kmʋ 'ɩn 'jea nʋ
‑mɩ ‑wee'‑ 'crɩɩɛ 'de ‑ma 'sbɛ 'di,
'de ‑mɛ 'kamɔ ɩa' due' koun
‑gbai' ka se ‑tee mɔ ke "pɩ.
17 'Oo Kea, ‑gbʋn ka ‑ma tɔ' ‑tia "i,
ɛ tɛan 'de ‑wɛe ɛɛ' 'mii‑ 'wɔn 'a nɩa 'kle ɛ.
18 ‑Ma tɔ' se ‑sro' ‑ta 'ble,
ɩ ‑tiɛi" ɩ je 'tɔni 'ɛ ‑pɩɩɔn" ‑sii.
‑Bo 'ɩn 'na 'ɩn 'je "jriɛ "i ‑te,
'ɩn 'jɩ ‑sro' mɔ 'de ɛ, 'ɩn sɩ 'dei 'wɔn i.
19 'Oo Kea, ‑bo ‑ɩn ‑sa 'diwɔnynii 'de ɛ,
ɛ "paa 'de‑! 'De ‑bo ‑ɩn nʋ "ku 'dbaʋn ‑nʋ i,
‑wɛe ʋʋ 'je 'ɩn o tɛɛn 'de ɛ, ‑mɛ "paa ‑ke.
20 ‑Ma 'nynɩ mɛ ʋʋa "duo 'ʋn,
‑wɛe ʋʋa nʋ dɩ saɩn‑,
ɛmɛ ‑ma tʋnyʋ a 'tmʋʋ sɩ 'ʋn.
21 Nyɔsoa,‑bo mɛ nɩ kan' 'e,
nyʋ ‑a ‑flɛɛan ‑ʋn ka 'ɩn se ʋʋ ‑flɛɛn i ɛ‑?
Nyʋ ‑nyɩa ‑ʋn 'ʋn, 'ɩn se ʋʋ tʋ o ‑fɔn' i ɛ‑
22 'ɩn 'nyɛ ʋʋa' nyʋ tu 'ʋn 'ɛ ‑fan' ‑fan',
ʋʋ 'kpa 'ma tʋnyʋ‑.
23 Nyɔsoa, ‑ɩn ‑jrɛɛ" ɛ 'ma 'kmʋ,
‑wɛe ‑ɩn ‑je 'ma pɛe juo‑,
‑ɩn ‑gbʋn 'de 'ɩn 'ʋn 'pepe
‑wɛe ‑ɩn ‑je dɛ ‑jiia 'ʋn mia juo‑
24 ‑Ɩn ‑gbʋn 'ʋn ja,
‑bo 'ma sea ‑je ‑saʋn kpa,
‑wɛe ‑ɩn ‑je 'ʋn 'tmʋʋ‑.
‑Jeblʋ ‑ɛ ‑nɩa ‑ma ‑nɛ ‑je ɛ,
ɛmɛ ‑ɩn ‑je 'ʋn tɔɔ‑ ‑wɛe 'ɩn 'je kpa jeejee.