'Ɩn nɩɛ "i 'ɩn 'je ble 'ɩn 'je ‑ʋn 'da
138
Dafi 'a 'dʋ.
'Ma muɛ ‑ma 'nynɩ "i 'bɛɛa',
'de 'ma pɛe ‑wee'‑ 'ʋn,
'ɩn 'je ble 'ɩn 'je dɩ bla,
'de nyʋ klae" ‑nɩa 'de 'blʋa ‑nɛ "kpei "juɛi.
2 'Ɩn "biiɛ 'de ‑ma ‑gbu" ‑kweai o,
‑wɛe 'ma bla 'blʋɔ‑,
'ma 'bɛɛ ‑ma 'nynɩ "i,
'de ‑ma nyiɔɔ' ‑tɩ' kmaa' ke,
‑maa' 'wlʋ wlu "kpei 'a ‑tɩ' 'ʋn,
dɛ ‑nʋɛ ɛmɛ ‑nɩ dɩ ‑ɩa wlu ‑ɩn cɛan ‑tie",
‑bo ‑ɩn nʋɩ ɩ cɛn "jri "kpei ‑tie";
dɩ ‑a ‑juua 'de ‑ma ‑tɩ' 'ʋn ɩ cɛn "jri "kpei ‑tie".
3 'Wɩ ‑jɛɛ 'di 'ɩn 'da ‑ʋn,
‑wɛe ‑ɩn ‑wɔan 'ma 'dawlu ɛ,
‑ɩn ‑si" i 'ma dɩ 'e 'mɛ ke 'wlɛ,
‑wɛe ‑ɩn ‑nyɩ" 'ʋn 'kpɩ.
4 'Beɔ "klein ‑nɩa 'e 'blʋa ‑nɛ 'di ‑ta,
‑bo ʋʋa sea ‑ma wlu 'wɔn,
ʋʋ po ‑ʋn sɛ' Tʋ "bo.
5 ‑Wɛe ‑bo ʋʋa sea ble,
ʋʋ 'je ‑ma nʋʋdɩ ‑wee'‑ 'tmʋ,
‑ma 'beɔ nɩa' "bɛi Tʋ "bo.
6 Tʋ "bo ‑nɩɛ 'e jaʋn 'a 'kee dein" mɔ 'de ɛ,
nyʋ ‑ʋʋa ‑jaa' ʋʋa' ‑cɛ" ja, ‑ma ‑jeɛ ʋʋpʋ‑ i,
‑wɛenyʋ ‑ʋʋa ‑bɛɛa' ʋʋa' ‑cɛi",
ʋʋ siɛ ‑ta ‑tɔɔn ‑ma jea ʋʋ "kpei 'je.
7 ‑Bo 'ɩn jii 'de 'kle 'di mɔ 'de ɛ,
‑mɔɔ ‑sa 'ʋn 'ma tʋnyʋ 'a 'cɛn klaa" "wɛin,
‑ma muɛ sʋn kpaa' ‑ɩn ‑je 'ʋn 'pʋʋ‑.
8 Kɩɩn, Tʋ "bo a muɛ 'ʋn o 'wlʋʋa'.
‑Ma nyiɔɔ' ‑tɩ' kmaa' se "ti ‑ta 'ble,
'oo Tʋ "bo, ‑ma dɩ ‑ɩn nʋa,
‑ɩn ‑bʋɩ 'kpʋ "i toɛ.