Tʋ "bo "bɛi
135
Ao 'bɛɛ‑ Nyɔsoa 'a 'nynɩ "i.Kɩɩn, ao 'bɛɛ‑ Tʋ "bo 'a 'nynɩ "i, ao 'bɛɛ‑ ɛɛ' 'nynɩ "i,
ao ‑nɩa ɛɛ' dbonʋʋ ɛ,
2 aopʋ‑ nyʋ ʋʋ ‑tea 'de Tʋ "bo o ‑gbu" ‑sɔn,
‑wɛe ‑ɔ ‑tia" 'de Kea ‑gbu 'a "kpae' "kpei ɛ,
3 kɩɩn, ao 'bɛɛ‑ Tʋ "bo 'a 'nynɩ "i,
dɛ ‑nʋɛ Tʋ "bo nmɔ 'diwɔn;
‑wɛe ao 'je dɩ bla ao 'jeɛ 'nynɩ ‑sa,
dɛ ‑nʋɛ ɛ nɩɛ "dia 'je ka‑.
4 Tʋ "bo ‑sa 'e Sakɔbʋ 'mɛ, ɔ 'je ɛɛ' dɛ nɩ,
Israɛ nɩɛ ka ɛɛ' dɛ ‑kʋan ‑tɩ' nɩa.
5 'Ɩn juuɛ, 'de tɔ' ‑tɩ 'ʋn ɛ, ka Tʋ "bo 'bɛai",
‑wɛe ‑aa Tʋ "bo nɩa 'e ‑kɩɩ'‑ ‑wee'‑ "jrukpɔ ɛ.
6 Dɩ "klein ‑a nʋa Tʋ "bo 'tʋn ɛ,
ɛɛ nʋɩ 'de jaʋn 'di ke‑,
'de 'blʋa "kpei ke‑,
'de 'tɔniɛ ‑sɔn ke‑.
7 'De 'blʋa 'a "ti na', 'bo ‑cnu' a sɔn ‑klu'.
‑Bo "ni a sea dba a, 'bo ɛɛ crɛɛ "ni "jrii.
Ɛɛ ja pʋʋɔ' ɛ ‑tua" 'kwla a.
8 Ɛmɛ bla' Esipʋ nyʋ 'a "i ‑saanynu‑,
dɛ ‑tba' 'e nyiɔ "kpei, ‑ɛ mua ɛ ‑jɛɛa "nɔ dɩ ɛ.
9 Ɛ nʋɛ Faraɔn ke, ɔɔ' dbonʋʋ ‑wee'‑ "klein,
"jri o sie dɩ nyʋ sea 'je due' ke,
jrii' klae" klae", 'de Esipʋnyʋ 'a ‑kweea'‑.
10 Ɛmɛ ‑po' 'blʋa 'a ‑ta ‑tuu" sʋn ‑pʋn",
‑wɛe ‑ɛ ‑sa 'beɔ ‑kmai" ‑wee'‑ i:
11 Siɔn ke, Amoritɩ ‑wi" 'a 'beɔ ke,
Ɔkɩ Basan 'a 'beɔ,
ɛ ke 'beɔ "klein ‑nɩa de Kanaa ke.
12 ‑Wɛe ʋʋpʋ‑ 'a 'blʋa 'kpa Israɛ a dɛ.
13 'Oo Tʋ "bo, ‑ma 'nynɩ 'wlʋʋa' nɩ',
"nɔ "o "nɔ ‑wee'‑ 'di,
‑wɛe dɩ ‑ma nʋa nɩ ‑sisi' mamaʋ' 'sʋ.
14 Dɛ ‑nʋɛ Tʋ "bo a nʋɛ ɛɛ' 'cɛ "isrɛ' ‑tɩ "jrii,
‑a ‑mɔ ‑nɩa ɛɛ' dbonʋʋ ɛ,
‑aa ‑tɩ' kmaa' klaa" mɛ ‑nɩ 'de ɛ 'ʋn.
15 'Sani" ke "nma ke, ‑ɩ ‑nɩa 'blʋa 'a kwɛin ɛ,
nyiɔ mɔ ‑ɔɔ nʋɩ:
16 ɩ 'ble wɔn 'mɛ, 'kaa ɩa' wlu‑,
ɩ 'ble "jri 'mɛ, 'kaa ɩa' 'jei.
17 Ɩ 'ble doun" 'mɛ,
'kaa ɩa' 'wɔn dɛjrɛ' ‑gblu' un.
‑Wɛe feeɛ' dɛ ‑saan" ka 'a jii 'de ɩ wɔn 'di.
18 Nyʋ ‑ʋʋa ‑pɩ' ke,
nyʋ ‑wee'‑ "klein ‑ʋʋ ‑tbɩ' tɔi" ɛ,
ʋʋ ke ɩ ‑wee'‑ a muɛ ‑kooa'.
19 'Oo Israɛ, ‑ɩn ‑bɛɛ' Tʋ "bo 'a 'nynɩ "i.
Arɔn ɔɔ' "nynuu‑,
ao ‑wee'‑ "klein 'bɛɛ‑ Tʋ "bo 'a 'nynɩ "i.
20 Lefi 'a "nynuu‑,
ao ‑wee'‑ "klein 'bɛɛ‑ Tʋ "bo 'a 'nynɩ "i,
ao nyʋ ‑ʋʋa ‑tea' Tʋ "bo 'a ni',
ao ‑wee'‑ 'bɛɛ‑ Tʋ "bo 'a 'nynɩ "i.
21 Tʋ "bo 'a 'nynɩ "bɛi 'de Siɔn,
Tʋ "bo ‑ɛɛ tʋ"bokpatɛ‑ nɩa 'de Selisalɛmʋ.
Kɩɩn, ao 'bɛɛ‑ Tʋ "bo 'a 'nynɩ "i.