Kea 'a kɛ' 'nynɩ ‑saa'
119
Nyʋ ‑ʋʋa 'kmʋ sea dɛsaʋn 'a ‑flɛn" ‑pʋn" nɩ,'de ‑ʋʋa 'kmʋ ‑wee'‑ 'ʋn,
ka Tʋ "bo 'a kɛ' "siia 'nynɩ ‑ʋʋa na kan', ʋʋ nʋ 'mʋa‑.
2 Nyʋ ‑ʋʋa kpʋan ɛ ɛɛ' kɛ' i,
‑ʋʋa ‑pɔn ɛɛ' "jri 'de i nmɔɔ 'a i,
'de ‑ʋʋa pɛe ‑wee'‑ "klein 'ʋn ɛ, ʋʋ nʋ 'mʋa‑.
3 Ʋʋa' nʋ dɛ ‑nynia "jrii ɛ,
‑jeblʋ Kea ‑sa a ɩmɩ ʋʋa kpa.
4 Ɛ 'crɩ ɛɛ' kɛ' 'mɛ,
‑wɛe nyʋ 'jɩ wɔn 'je,
'de nyʋ 'je ɩa ‑tɩ' ‑tu".
5 ‑Ɩn nʋɛ 'ɩn 'je ‑sisi' nyna,
‑wɛe 'ɩn 'je ‑ma kɛ' wɔn 'je.
6 'De ɛɛ' ‑tɩ' 'ʋn ɛ,
‑bo 'ma sea ɛɛ' kɛ' 'ɛ ni' ‑te' ɛ,
‑tɩn' se "mii 'dbaa i.
7 ‑Bo 'ɩn 'cɛan ‑ma kɛ' ‑srɛai'' ɛ,
'ma muɛ ‑ʋn 'nynɩ ‑saa',
'de 'ma pɛe 'a "isrɛa' 'ʋn.
8 'Ma muɛ ‑ma kɛ' wɔn 'jea, ka ‑ɩn "siia' 'nynɩ ɛ.
‑Ɩn ‑bo 'ʋn 'bɔ ɛ ‑gblu' un.
9 Ka ‑koa" i ‑saan" 'a 'kmʋ 'je "isrɛ sʋn nʋɛ‑?
Ka ‑ma wlu "siia 'nynɩ ‑bo ɔ nʋ kan' ‑wɛe.
10 'Ɩn nɩɛ "i 'ma pɛe ‑wee'‑ "klein 'je 'ɛ "jri 'de i nmɔɔ‑, ɛ 'bo 'ʋn "itaiɛ,
'ɩn 'bo "jru ‑je "i ‑saa 'de ɛɛ' kɛ' ‑pee.
11 'Ɩn ‑teɛ' ‑ma wlu i 'de 'ʋn pɛe o,
‑wɛe 'ɩn je dɛsaʋn nʋ 'de ‑mɔ Kea ‑pee.
12 "Diwan kpʋn ɛ,
'oo Tʋ "bo! Ɛ tɔɔ 'ʋn ɛɛ' kɛ'.
13 'Ma muɛ ɛɛ' kɛ' ɛ "siia' 'nynɩ 'wɔn i tbaa' due due'.
14 Ɛɛ' kɛ' 'de blaa' 'bleɛ 'ma 'mʋa‑,
ɛ je "wliiɛ ‑tuu" 'blea' ‑sii.
15 'Ɩn nɩɛ "i dɩ ‑ɛɛ wlu ɛ cɛan ‑tie",
'ɩn 'jɩ tɔ' "kpei naa‑,
‑wɛe 'ma "jri 'je ‑jeblʋ ɛ ‑sa ‑pʋn" nɩ.
16 Dɩ "klein ɛɛ' kɛ' 'crɩa 'ma diɛ ɩa crɔn',
'de 'ɩn se ɛ "i nɩ, 'ɩn 'je ɛɛ' wlu o "mae‑.
17 Ɛ nʋ 'mɔ ‑nɩa ɛɛ' dbonʋɩ 'dɔe "jrii,
'de 'ɩn 'je 'kmʋ nɩ‑: 'ma muɛ ɛɛ' wlu wɔn 'jea.
18 Ɛ ‑gbai' 'ma "jri,
‑wɛe 'dɔe ‑nɩa ɛɛ kɛ' 'ʋn ɛ, 'ɩn 'jeɛ 'je.
19 'Ɩn nɩɛ 'duɩ ‑o 'de 'blʋa "kpei:
ɛ 'bo ɛɛ' kɛ' 'kwla ‑tu" ɛ 'de 'ʋn ‑pee.
20 Jeejee 'ma pɛe nyna soo,
'de ɛɛ' kɛ' 'ɛ juuo ‑tɩ 'ʋn.
21 ‑Cɛi" 'bɛʋn 'daɩn kpʋan,
‑ʋʋ ‑tɛɛan ɛ kɛ' o, ɛ ‑teɛ' ʋʋpʋ‑ kɛ' "i.
22 Ɛ seie 'ʋn 'de ‑tɩn' ke nyʋ ‑flɛɛan' 'kwa,
dɛ ‑nʋɛ 'ma 'jeɛ' ɛɛ' kɛ' ‑wee'‑ wɔn.
23 ‑Bo "ikmanyʋ a sea 'ma dɛ "jrii nʋa' ‑tɩ poo ɛ,
ke 'wlɛ ɛɛ' dbonʋɩ a muɛ ɛɛ' kɛ' tɔ' "kpei naa see.
24 Dɩ "klein ɛɛ tɔɔa nyʋ 'bleɛ 'ma 'mʋa‑,
ɩmɩ ‑nɩ 'ma 'srɩn ‑tu" dɩ ‑cɛɛn'.
25 'Ɩn waa wɛi 'de 'blʋɔ;
ɛ "nyɩ 'ʋn 'kmʋnɩa',
ka ɛ cɛan wlu ‑tie" ɛ.
26 'Ɩn ‑sa 'ma 'kmʋ ‑wee'‑ 'kwla 'de ɛ "juɛi,
‑wɛe ɛɛ 'wɔɔn 'ʋn ‑kɩn kwa;
ɛ tɔɔ 'ʋn ɛɛ' kɛ'.
27 Ɛ nʋɛ ‑wɛe dɩ ɛɛ' kɛ' ɛ tɔɔ 'a nyʋ ɛ,
'ɩn 'jɩ 'mii wɔn,
de 'ɩn 'je ɛɛ' "jrii nmɔ dɩ tɔ' "kpei naa‑.
28 ''Nmia a 'dba 'ʋn ɛ,
ɛ kpa 'ʋn 'jɛi" ka ɛɛ' wlu "siia' 'nynɩ ɛ.
29 Ɛ tɛɛn 'ʋn sɩ 'tmʋ ‑je o,
‑wɛe ɛ 'je 'ʋn 'saa 'ʋn "jrii nʋ,
'de 'ma 'kmʋ nɩa' 'ʋn,
'ɩn 'je ɛɛ kɛ' wɔn 'je.
30 'Maa 'a poo wlu fai",
ɛɛ' ‑jeblʋ mɛ 'ɩn ‑sa 'e,
ka ɛɛ' kɛ' "siia' 'nynɩ 'ka 'ma nʋ.
31 'Ɩn "kliiɛ ɛɛ' kɛ' i:
‑tɩn' 'bo 'ʋn "i 'dbaa, 'oo Tʋ "bo.
32 'Ɩn nɩɛ "i kɛ' ɛ bla,
'ɩn 'je ɛɛ' ‑jeblʋ o ple,
dɛ ‑nʋɛ ɛ seie 'ʋn 'ɛ.
33 'Oo Tʋ "bo, ɛ tɔɔ 'ʋn ɛɛ' kɛ' ɛ ‑jeblʋ,
'de 'ɩn 'jeɛ' "i naa mamaʋ 'sʋ 'ɩn 'je nyni.
34 Ɛ po 'ʋn tɔ'di, ‑wɛe 'ɩn 'je ɛɛ' kɛ' wɔn 'je;
'de 'ma pɛe ‑wee'‑ "klein 'jeɛ "jriɛ ‑tu".
35 Ɛ nʋɛ 'ɩn 'je ɛɛ' ‑jeblʋ "i naa‑,
dɛ ‑nʋɛ 'ma 'jeɛ ɩa' "dia.
36 Ɛ "bie 'ma pɛe 'de ɛɛ' kɛ' o fɔ o,
ɛ 'bɔ ɛ "biiɛ 'de 'ma ‑nɩ crɔn' ‑tɩ "kpei.
37 Ɛ ‑sa 'ma "jri 'de dɩ ‑sea' 'jɔ 'ble "kpei.
Ɛ nʋɛ ‑jeblʋ ɛ ‑sa, 'ɩn 'jeɛ "i nɩ‑!
38 Dɛ ‑ɛɛ wlu ɛ cɛan ‑tie",
'de nyʋ ‑ʋʋa pleea ɛmɛ Kea ‑pee ɛ,
ɛ nʋɛ 'de ɛ dbonʋɩ ‑pee.
39 Ɛ ‑sa 'ʋn ‑tɩn' ‑tɩ ‑nynia "jrii 'ma pleea "juɛi:
ɛɛ' kɛ' se "jrii nmɔɔ‑?
40 'Ma 'jeɛ ɛɛ' kɛ' nʋa' 'a "dia,
ɛ nʋɛ 'de 'ɩn 'je 'kmʋ nɩ,
'de ɛɛ' "i srɛa' 'ʋn.
41 'Oo Tʋ "bo,
ɛɛ' nyʋ 'a ‑tɩ' kmaa' ji 'ʋn o,
ɛ nyɩ" 'ʋn pʋʋa',
ka ɛ cɛan wlu ‑tie" ɛ,
42 'de 'ɩn 'je wlu 'a 'bɛɛ‑,
'de "ju ‑ɔ toa 'ʋn wɔn o ‑pee,
dɛ ‑nʋɛ 'ɩn ‑teɛ' ɛɛ' wlu ‑kwlɩ".
43 Ɛ 'bo 'ʋn tɔ' ‑tɩ 'a wlu 'de 'ma wɔn di' ‑saa,
dɛ ‑nʋɛ 'ɩn tba ɛɛ' kɛ' tɔi".
44 'Ma muɛ ɛɛ' kɛ' i ‑tea' jeejee,
'wɩ "o 'wɩ ɛ se "ti ‑ta 'ble i,
45 ‑wɛe 'de 'ma 'kmʋ nɩa' 'ʋn,
'ɩn 'je 'flɛʋn nɩa' ‑cɛɛn ‑te,
dɛ ‑nʋɛ 'ma ‑pɔn ɛɛ' kɛ' 'de blaa' i,
'de 'ma tɔ' ‑wee'‑ "klein 'ʋn.
46 'Ma muɛ ɛɛ' kɛ' wɔ ‑saa' 'de 'beɔ ‑wi" "juɛi,
dɛ jrɛ' 'ɛ ‑tɩn' se 'ʋn nʋ i.
47 'Ma diɛ ɛɛ' kɛ' crɔn',
'ɩn 'kma ɩa' ‑tɩ'.
48 'Ɩn kpʋʋɛn ɛɛ' kɛ' sɩn 'sɔɔn,
dɛ ‑nʋɛ 'ɩn kma ɩa' ‑tɩ'.
'Ɩn nɩɛ "i 'ɩn 'je ɛɛ' kɛ' 'ɛ ‑tɩ' tɔ' "kpei naa‑.
49 Wlu ɛ cɛan ‑tie" 'de ɛɛ' dbonʋɩ ‑pee,
‑wɛe 'ɩn tba tɔi" ɛ, ɛ po ɛɛ' ‑tɩ' ‑kwlʋ o.
50 Ɛmɛ ‑tu" 'ʋn ‑tɩ' ‑kwlɩ' i 'de 'ma "nmia 'di,
dɛ ‑nʋɛ wlu ɛ cɛan ‑tie",
ɛmɛ ‑nyɩ" 'ʋn 'kmʋnɩa'.
51 ‑Cɛi" 'bɛʋn a wlaa 'ʋn ɛ cruu,
'kaa 'maa to ɛɛ' kɛ' 'kpʋ "i.
52 'Ɩn poɛ ɛɛ' kɛ' ɛ "nyɩa ‑aʋn tɛin" 'a ‑tɩ' ‑kwlʋ, o Tʋ "bo,
ɩmɩ ‑tu" 'ʋn ‑tɩ' ‑kwlɩ' i.
53 ‑Bo 'ma sea 'diwɔnyniiʋn 'je,
ʋʋa sea ‑ma kɛ' 'wɛin blaa', 'cɛn "ji 'ʋn 'ɛ.
54 Ɛɛ' kɛ' mɩ ‑nɩ 'ma blewlu,
'de 'blʋa "kpei 'ɩn nɩa ka 'dʋɩ nɩa.
55 "Maʋ, 'oo Tʋ "bo,
'ma poɛ ɛɛ' ‑tɩ' ‑kwlʋ o,
'ma muɛ ɛɛ' kɛ' "jriɛ ‑tu" 'a.
56 Dɛ 'mɔ kpa ɛmɛ ‑nɩ ka ɛɛ' kɛ' "siia' 'nynɩ 'a nʋa'.
57 'Ma ‑nɩ 'ɩn ‑sa 'o, 'oo Tʋ "bo,
'ma ‑sɛ de ke'wlɛ, ɛmɛ ‑nɩ ɛɛ' wlu wɔn 'jea'.
58 'Ma ‑pɔn ɛɛ' ‑kwlʋ ‑tɩ nʋa' i,
'de 'ma pɛe ‑wee'‑ "klein 'ʋn; 'oo Tʋ "bo.
Ɛ nʋ 'ʋn 'saa' 'ʋn "jrii,
ka ɛ cɛan wlu ‑tie" 'de 'ʋn ‑pee 'deɛ.
59 'Ma naa dɛ 'ma 'kmʋ nɩa 'ʋn tɔ' "kpei,
‑wɛe 'ɩn "bie 'ma nabʋ 'de ɛɛ' kɛ' o.
60 'Ma crɛɛ "kpei,
'maa' ‑tu" ɛɛ' kɛ' wɔn 'je ‑tɩ 'wɩ "i.
61 'Diwɔnyniʋn 'a 'sai "fiin ɛ 'ʋn "jrui,
'kaa 'ɩn se ɛɛ' kɛ' o "mae.
62 ‑Too' ‑kwea, 'ma sɔn 'ʋn ɛ,
‑wɛe 'ma 'bɛɛ ɛɛ' 'nynɩ "i,
'de ɛɛ' kɛ' ‑srɛai" 'a ‑tɩ' 'ʋn.
63 'Ɩn nɩɛ nyʋ "klein ‑a ‑tea' ɛɛ' kɛ 'ɛ ni ke,
‑ʋʋa jeɛ wɔn 'ɔ ba ‑o.
64 Tʋ "bo, ɛɛ' nyʋ a ‑tɩ kmaa' "jiɛ 'blʋa.
Ɛ tɔɔ 'ʋn ɛɛ' 'tʋn nʋ ‑tɩ'.
65 'De ɛɛ' 'diwɔnmɔa' 'ʋn,
ɛ nʋɛ ɛɛ' dbonʋɩ 'dɔe "jrii,
ka ɛɛ' wlu "siia' 'nynɩ ɛ, 'oo Tʋ "bo.
66 Ɛ po 'ʋn tɔ'di 'ɩn 'je dɛi" juuo‑,
dɛ ‑nʋɛ 'ɩn ‑teɛ' ɛɛ' kɛ' ‑klwɩ".
67 ‑Ta 'ɩn sea ‑suu "kpei 'wlʋ ke ɛ,
'ma duɛ 'kwla,
'kaa' kaan ka 'ma 'jeɛ ɛɛ' kɛ' wɔn.
68 Ɛ nmɔ 'diwɔn ‑wɛe ɛ nɩ 'dɔe nʋɩ:
Ɛ tɔɔ 'ʋn ɛɛ 'tʋn nʋ ‑tɩ'.
69 ‑Cɛi" 'bɛʋn 'a ‑sa ‑tɩ' "jɛi,
ʋʋa jea 'ʋn sɩ ‑tɩ' "kpei 'nɛɛ‑,
'kaa 'mɔ ɛ, 'de 'ma ‑pɛe ‑wee'‑ "klein 'ʋn ɛ,
'ma 'a poo wlu fai" 'de ɛɛ' kɛ' 'ɛ ‑tɩ 'ʋn.
70 Ʋʋa' pɛe pa tu. 'Kaa 'mɔ ɛ,
ɛɛ' kɛ' mɛ ‑ɛɛ "dia 'ma 'je.
71 ‑Bo ɛ ‑tu" 'ʋn 'srɩn ɛ nmɔ "jrii,
ɛ nɩɛ 'ma 'dɔe ‑o, ‑wɛe 'ɩn 'je ɛɛ' kɛ' 'cɛan.
72 Ɛɛ' kɛ' ɛ 'crɛa ɛ nmɔ "jrii,
ɛ 'je 'sani" ke, wɛi 'a "wlu due' ‑sii.
73 Ɛɛ' sɩn 'mɩ ‑nʋ 'ʋn, ɩmɩ ‑ma' 'ʋn;
ɛ "nyɩ 'ʋn dɛ "jrii juua', ‑wɛe 'ɩn 'je ɛɛ' kɛ' 'cɛan.
74 ‑Bo nyʋ ‑ʋʋa ‑tea' ɛɛ' kɛ' ni' 'jee 'ʋn "jriɛ,
'mʋa‑ 'a muɛ ʋʋpʋ‑ "jia',
dɛ ‑nʋɛ 'ɩn tba ɛɛ' wlu tɔi".
75 'Ɩn 'je kan' 'mɛ, 'oo Tʋ "bo,
ka ɛɛ' kɛ' 'srɛai" ɛ:
‑bo ɛ ja 'ʋn 'kle "kpei ɛ,
‑mɛ ɛɛ' ‑maa' poo' wlu fai" 'a ‑tɩ 'ʋn ‑o.
76 Ɛɛ' nyʋ 'a ‑tɩ' kmaa' ‑nɩ 'ma ‑tɩ' ‑kwlii' ‑tua",
ka ɛ cɛan wlu ‑tie" 'de ɛɛ' "juɛi nʋ i ‑pee 'deɛ.
77 Ɛ to ɛɛ' nyʋ 'a ‑tɩ kmaa' 'de 'ʋn ‑pee,
‑wɛe 'ɩn 'je 'kmʋ nɩ,
dɛ ‑nʋɛ 'ma 'jeɛ ɛɛ' kɛ' 'ɛ "dia.
78 ‑Cɛi" 'bɛʋn ‑ʋʋa ‑tua" 'ʋn 'kle foo" 'ʋn ɛ,
‑tɩn' 'dbaa ʋʋpʋ "i.
'Kaa' 'mɔ ɛ, 'ma naa ɛɛ' kɛ' 'ɛ ‑tɩ tɔ' "kpei.
79 Nyʋ ɛɛ' faʋn a nʋa, ʋʋ ji 'de 'ʋn o
Nyʋ ‑juua ɛɛ' kɛ',
80 'ma pɛe 'je "isrɛ ‑o,
‑wɛe 'ɩn 'je ɛɛ' kɛ' 'de bla,
'de ‑tɩn' 'je "mii dbaa'.
81 'Ma pɛe 'a nʋɛ ‑fea ‑fea,
'de ɛɛ' pʋʋa' 'a ‑tɩ 'ʋn,
'ɩn ‑teɛ' ɛɛ' wlu ‑kwlɩ".
82 'Ma "jri 'a 'kpɩ a mɛɛ',
'de ɛɛ' wlu ɛ 'cɛan ‑tie" 'a "kee ‑tɩ' 'ʋn.
'Ɩn na: blaa' nɔ" ɛ 'je 'ʋn ‑tɩ' ‑kwlii ‑tu" ɛ?
83 'Ɩn ‑kɔ ‑na nmi 'a ku ‑nɩa 'de dao' 'di ɛ,
kaa' 'maa' "mae ɛɛ' kɛ' o ‑gblu' un.
84 Ɛɛ' dbonʋɩ 'a 'wɩ nɩɛ ‑tiiɛ'‑?
Blaa' nɔ" ɛ 'je nyʋ ‑ʋʋa ‑tua" 'ʋn 'kle 'a 'pee 'jeɛ?
85 ‑Cɛi" bɛʋn "bluɛ 'ʋn "bi ‑gbai" "juɛi;
ka ɛɛ' kɛ' "siia 'nynɩ, ʋʋa nʋ kan' ‑gblu' un.
86 Ɛɛ' kɛ' ‑wee'‑ "klein nɩɛ ‑kwlɩ" ‑te' ‑ka.
Ʋʋa ‑tu" 'ɛ 'ʋn 'kle foo" 'ʋn: ɛ ji 'ʋn o.
87 Ɛ siɛ dɛ ‑saan"‑ ʋʋ 'je 'mii bla,
ʋʋ 'je 'ʋn 'kmʋ ‑sa 'de,
'de 'mɔ ɛ 'ɩn se ɛɛ' kɛ' 'bɔ.
88 Ɛ "nyɩ 'ʋn 'kmʋnɩa',
'de ɛɛ' nyʋ 'a ‑tɩ' kma ‑tɩ' 'ʋn,
‑wɛe 'ɩn 'je ɛɛ' kɛ' wɔn 'je.
89 'De 'wɩ ‑wee'‑ "klein 'di, Tʋ "bo,
ɛɛ' wlu nɩ' sese 'de jaʋn di',
90 ‑wɛe ɛɛ' ‑maa' poo wlu fai" nɩ ‑sisi',
‑sʋn 'oo ‑sʋn ‑wee'‑ 'di,
‑ɩn nʋɛ 'blʋa ɛ ku ɛ 'dei.
91 Ka ɛɛ' kɛ' "siia 'nynɩ ɛ,
'kamɔ dɩ "klein ‑nɩa 'e jaʋn ‑sɔn ‑wee'‑ a nʋɛ ‑ʋn "juɛi.
92 ‑Bo ɛɛ' kɛ' se 'ma crɔn' ‑tɩ nɩ 'deɛ,
‑mɛ 'ɩn 'mɛɛ sese 'de 'ma "nmiia 'di.
93 'Ɩn seɛ "i nɩ 'ɩn 'je ‑ma kɛ' o "mae,
dɛ ‑nʋɛ ɩmɩ ‑a ‑nyɩ" 'ʋn 'kpɩ.
94 'Ɩn ‑teɛ ɛɛ' ‑tea': ɛ 'pʋʋ 'ʋn,
dɛ ‑nʋɛ 'ma 'wla ɛɛ' kɛ' wɔn 'jea' 'a ‑fli i.
95 'Diwɔnyniʋn a ‑pɔn' 'ma 'kmʋ ‑sa kɔ‑ i,
'kaa 'mɔ ɛ, ‑ma wlu mɛ 'ɩn tba tɔi".
96 Dɛ 'ɩn sia "jriɛ o,
ɛmɛ ‑nɩ dɩ ‑wee'‑ 'bleɛ "ti na':
Kaa' ɛɛ' kɛ' ‑mɛ se "tiin 'ble.
97 'Oo, Ka 'mɔ kma ɛɛ' kɛ' ‑mɛɛ' ‑tɩ' 'jaa‑!
'De ‑sɔn 'di ɛ, ɛ nɩɛ 'ma tɔ' "kpei naa ‑tɩ.
98 Ɛɛ' kɛ' mɛ ‑po 'ʋn tɔ'di,
‑wɛe 'ɩn ‑sii 'ma tʋnyʋ,
dɛ ‑nʋɛ, ɩmɩ ‑ɩa po 'ʋn ‑je o 'wɩ 'oo 'wɩ.
99 'Ɩn juuɛ dɛ 'ɩn je 'ma nyʋdɛtɔɔʋn ‑wee'‑ ‑sii,
dɛ ‑nʋɛ, 'ma naa ɛɛ' kɛ' 'ɛ tɔ' "kpei.
100 'Ɩn nɩɛ tɔ'di 'ɩn je nyʋ ‑cɔɩn' ‑sii,
'ma 'jeɛ ɛɛ' kɛ' wɔn.
101 'Ma bʋ tɛɛn ‑jeblʋ "klein ‑nynia "jrii o,
‑wɛe 'ɩn 'je ɛɛ' wlu wɔn 'je.
102 'Maa' ‑gbla" ɛɛ' kɛ' 'ɛ ‑jei",
dɛ ‑nʋɛ ɛmɛ ‑ɛɛ tɔɔ 'ʋn dɛ.
103 Ka ɛɛ' wlu nmɔ wɔn 'de 'ma mɩɩɔ "kpei ka!
Ɛ ‑sii dʋ 'a 'cna 'mɛ,
104 'de ɛɛ' wlu 'a 'saa 'ʋn ɛ,
'ɩn juuɛ dɩ "kpei ‑seea' ka,
ɛmɛ ‑tɩ 'sɩ 'tmʋ ‑jeblʋ ‑wee'‑ "klein a nyaa 'mii.
105 Ɛɛ' wlu nɩɛ ‑tau 'de 'ʋn bɩ wɔ,
‑wɛe ɛ nɩ ‑sɔn 'de 'ma ‑jeblʋ "i.
106 'Ɩn cɛn wlu ‑tie" ka 'ɩn "siia 'nynɩ ɛ,
'ma muɛ ɛɛ' "isrɛ kɛ' wɔn 'jea.
107 'Ɩn nɩɛ 'e "nmia 'ʋn; 'oo Tʋ "bo,
ɛ "nyɩ 'ʋn 'kmʋnɩa' ka ɛɛ' wlu 'da.
108 'Ma baewlu 'ma poa ka 'sraadɛ nɩa,
'oo Tʋ "bo ɛ kpʋɛn,
'de ɛ tɔɔ 'ʋn ɛɛ' kɛ'.
109 'Ma 'kmʋ nɩɛ 'e 'kle 'di jeejee,
'kaa' 'maa "mae ɛɛ' kɛ' o.
110 'Diwɔnyniʋn ‑gba' 'ʋn "klɛ ‑pee,
'kaa' 'ɩn se ɛɛ' kɛ' "i ‑gbla".
111 Ɛɛ' kɛ' nɩɛ 'ma 'kɛn 'dɔe ‑o jeejee:
‑Wɛe ɩ nɩ 'ma pɛe 'a 'mʋa‑ ‑tɩ.
112 'Ɩn cɛn wlu ‑tie", 'ɩn 'je ‑ma kɛ' wɔn 'je,
'wɩ 'oo 'wɩ ‑wee'‑ 'di.
113 Nyʋ ʋʋa' kpʋn a wlu "kpei a nyaa 'mii,
'de 'ɩn kma ɛɛ' kɛ' ‑tɩ.
114 Ɛ nɩɛ 'ma sro' 'wlaa ‑ta,
‑wɛe ɛ nɩ 'ma "i kaan dɛ, 'ɩn ‑teɛ' ɛɛ' wlu ‑kwlɩ".
115 Ao tɛɛn 'ʋn o, ao nyʋ "klein ‑a nʋa dɛ ‑nynia "jrii ɛ,
'ma muɛ 'ma Kea 'a kɛ' wɔn 'jea.
116 Ɛ ‑te 'ʋn kwa wɛi ka ɛ cɛan wlu ‑tie" ɛ,
‑wɛe 'ɩn 'je 'kmʋ nɩ;
'de ‑tɛn' 'bo 'ʋn "i 'dbaa,
'de ɛɛ' tɔi" tbaa' ‑tɩ 'ʋn.
117 Ɛmɛ 'ɩn 'pɛn jai 'de 'ɩn 'je 'pʋ,
‑wɛe 'ɩn se ɛɛ' kɛ' "jriɛ ‑pʋn" ‑sa i‑.
118 Nyʋ "klein ‑a naade 'de ‑ma ‑kɛ' 'ɛ ‑tɩ' 'ʋn ɛ,
‑ma ‑fuuɛn ʋʋ ‑wee'‑ "klein nya,
dɛ ‑nʋɛ sɩ ‑tɩ 'a 'sʋ ‑nɩ 'de ʋʋpʋ‑ 'a tɔ' 'ʋn.
119 'Diwɔnyniʋn "klein ‑nɩa 'de 'blʋa "kpei 'ɛ,
ɛɛ ‑sa ʋʋa' 'srɛ ke ʋʋa ‑flɛn" ‑wee'‑ i,
ɛmɛ ‑tɩ 'ɩn kma ɛɛ' kɛ' ‑tɩ'.
120 Ɛɛ' sɩaɩn'‑ a kpʋn 'ʋn ɛ,
'ma nyiɔ nmi ‑wee'‑ a crɛ';
'de ɛɛ' 'pee "juɛi nyna 'a faʋn 'a nʋ 'ʋn ɛ.
121 ‑Tɩ "i ‑klɛɛa' ke, "isrɛa' ke,
ɩmɩ ‑a po 'ma nʋʋdɩ ‑je o;
ɛ 'bo 'ʋn 'ma 'kle ‑tu" nyʋ kwa 'bɔɔɛ.
122 'Ɩn nɩɛ ɛɛ' dbonʋɩ ‑o: ɛ kpʋn 'ma ‑pɔia" i,
ɛ 'bo ‑cɛi" 'bɛʋn "i "itaiɛ, ʋʋ 'bo 'ʋn 'kle ‑tu" ɛ!
123 'Ɩn poɛ ‑pɔia" ke,
'pʋʋa' ‑ɛɛ wlu ɛ cɛan ‑tie", 'ɩn po ɩa' "jri ‑jei" ‑popo‑.
124 Ɛ ‑tu" ɛɛ' dbonʋɩ 'a ‑tɩ',
ka 'ɛ kma nyiɔɔ' ‑tɩ' ɛ:
ɛ tɔɔ 'ʋn ɛɛ' 'tʋn nʋ ‑tɩ nʋa'.
125 'Ɩn nɩɛ ɛɛ' dbonʋɩ ‑o:
ɛ "nyɩ 'ʋn dɛ "jrii juua',
‑wɛe 'ɩn 'je ɛɛ' kɛ' 'mii 'wɔn.
126 ‑Bo ɛ nɩ 'mɔ ɛ, 'oo Tʋ "bo,
nɔ" nyni ‑wɛ, dɛ ‑ɩn ‑jea nʋ ‑ɩn ‑jeɛ nʋ,
dɛ ‑nʋɛ, ɛmɛ ‑nɩ ʋʋa ‑saa ‑ma kɛ'.
127 'Mɔ ɛ, 'ɩn kma ɛɛ' kɛ' 'ɛ ‑tɩ',
ɛ ‑sii 'sani" 'mɛ, kɩɩn,
ɛ ‑sii 'sani" ʋʋ ‑sa ‑flɛn" 'ʋn ɛ.
128 'Ɩn 'wɩn 'mii ka ɛɛ' kɛ' ‑wee'‑ "klein 'srɛai" ɛ,
'de 'ɩn 'nyɛ sɩ 'tmʋ ‑je ‑wee'‑ "klein' ʋn ɛ.
129 Ɛɛ' kɛ' ‑wee'‑ nɩɛ 'jraa ka,
ɛmɛ ‑tɩ 'ɩn ‑tɩ i 'de 'ʋn.
130 Ɛɛ' wlu ‑saa 'kwla 'de nyʋ ‑pee,
'ɛ nɩɛ ‑sɔn ‑o:
‑wɛe ɛɛ' "nyɩ ʋʋpʋ‑ dɩ "kpei ‑seea' ka ʋʋa ju ɩ.
131 'Ɩn 'bai wɔn ‑wɛe 'ma 'wla feeɛ' i,
dɛ 'ɩn kma ‑ma kɛ' 'ɛ ‑tɩ' ɛ.
132 Ɛ ‑gbʋn 'ʋn ja ɛ nʋ 'ʋn 'saa 'ʋn "jrii,
'ka ɛ "siia 'nynɩ 'de nyʋ ‑kma ɛɛ' ‑tɩ' ‑pee ɛ.
133 Ɛ kuu 'ma nabʋ i 'de ɛɛ' wlu 'di,
‑wɛe dɛsaʋn due' koun ‑gbai' 'bo 'ʋn 'kle ‑tu" ɛ.
134 Ɛ seie 'ʋn 'de nyʋ ‑ʋʋ ‑tua' 'ʋn 'kle 'kwa,
‑wɛe 'ɩn 'je ɛɛ' kɛ' wɔn 'je.
135 Ɛ to ɛɛ' dbonʋɩ "juua 'dɔe "i:
ɛ tɔɔ 'ʋn ɛɛ' 'tʋn nʋ ‑tɩ'.
136 "Jri 'a "ni a wɔɔ 'ma ‑pɛɛ'‑ 'mɛ,
dɛ ‑nʋɛ nyɔ jrɔ' 'ɔ 'je ɛɛ' kɛ' wɔn ‑gblu' un.
137 Tʋ "bo, ɛ "srɛi, ‑wɛe ɛɛ' kɛ' "srɛi.
138 ‑Ma kɛ' ‑wee'‑ ‑kwlein tba 'de ‑ma "isrɛa' ''kpei:
'de ɩ nɩ ‑sisi'.
139 'Mɔ ɛ, dɩ 'ma tʋnyʋ a nʋa,
ɩa kpʋɛn 'ʋn ‑kwlʋ,
dɛ ‑nʋɛ ʋʋa poɛ ɛɛ' wlu 'blʋɔ i.
140 'Kaa ɛɛ' wlu ‑kwɛi 'pepe,
ɛmɛ ‑tɩ' ɛɛ' dbonʋɩ kma ɛɛ' ‑tɩ'.
141 'Ɩn nɩɛ "ju ‑saan",
ke 'wlɛ nyʋ a blaa 'ʋn 'blʋɔ,
kaa' 'ma a "mae ɛɛ' kɛ' o.
142 Ɛɛ' "isrɛa' nɩɛ "isrɛa' ‑sea' ‑kwɛi ‑ta 'ble ɛ,
ɛɛ' kɛ' ‑nɩ tɔ' ‑tɩ'.
143 'Ɩn nɩɛ 'e 'kle 'di, faʋn "ji 'ʋn ɛ,
'kaa ɛɛ' kɛ' mɛ ‑nɩ 'ma tɔ' i naa ‑tɩ'.
144 Ɛɛ' kɛ' "srɛi mamaʋ ɩ se "ti ‑ta 'ble,
ɛ "nyɩ 'ʋn dɛ "jrii juua',
‑wɛe 'ɩn 'je ɩ 'mii wɔn,
'de 'ɩn 'je 'kmʋ nɩ.
145 'Ma pɛe ‑wee'‑ ''klein 'ʋn ɛ,
'ma wee ɛ o, Tʋ "bo,
ɛ kpʋn 'ma baewlu‑,
'ma muɛ ɛɛ kɛ' wɔn 'jea'.
146 'Ma poɛ ‑tooi", ɛ ji 'ʋn o,
ɛ 'pʋʋ 'ʋn, ‑wɛe 'ɩn 'je ɛɛ' kɛ' "jriɛ ‑tu".
147 'Ma ‑siɛ' ‑sɔn "juɛi,
‑wɛe 'ma wee ɛ o,
'de ɛ 'je 'ʋn sʋn o po,
'ɩn tba ɛɛ' wlu tɔi".
148 'Ma ‑siɛ ‑sɔn' "juɛi, 'ma ɩa 'ʋn sɔn,
'de 'ɩn 'je ɛɛ' wlu "jrɛɛ‑.
149 'De ɛɛ' nyʋ 'a ‑tɩ' kmaa' 'ʋn,
ɛ po 'ma wlu doun" o, 'oo Tʋ "bo,
ɛ nʋɛ ‑wɛe ka ɛɛ' wlu "siia' 'nynɩ ɛ,
'ɩn 'je 'kmʋ nɩ.
150 Nyʋ ‑ʋʋa ‑wla dɛ ‑nynia "jrii nʋa' 'a feeɛ' i ɛ,
ʋʋ "kʋʋan 'mii, ʋʋa tɛɛn ɛɛ' kɛ' o;
151 'kaa ɛmɛ, 'oo Tʋ "bo,
ɛ "kʋʋan 'mii, ɛɛ' kɛ' ‑wee'‑ "klein ‑nɩ tɔ' ‑tɩ.
152 Sese, 'ɩn 'je kan' 'mɛ ka ɛ ‑tea' ɛɛ' kɛ',
‑wɛe ɩ sea i sɔn i ɛ.
153 Ɛ ‑gbʋn 'ma "nmia ja, ɛ seie 'ʋn,
dɛ ‑nʋɛ 'maa "mae ɛɛ' kɛ' o.
154 Ɛ 'wlʋ 'ʋn o, ɛ seie 'ʋn;
ɛ "nyɩ 'ʋn 'kmʋnɩa',
ka ɛ cɛan ɛɛ' wlu ‑tie" ɛ.
155 'Pʋʋa' tɛɛn 'diwɔnyniʋn o,
dɛ ‑nʋɛ ʋʋa kpʋʋɛn ɛɛ' kɛ' 'plʋ sʋn i.
156 Ɛɛ' nyʋ 'a ‑tɩ' 'kmaa' ‑siɛ' sʋn' i,
'oo Tʋ "bo, ‑pʋʋ' 'ʋn ka ‑ma kɛ' "siia' 'nynɩ ɛ.
157 'Ma 'kle ‑tu" nyʋ ke,
'ma "cɛi o nʋʋ ‑tiɛi",
'de 'maa ‑gbla" ɛɛ' kɛ' "i.
158 Nyʋ ‑ʋʋa' kpʋan wlu "kpei,
‑ʋʋa' 'jea ɛɛ' wlu wɔn,
ʋʋa nyaa 'ʋn "wɛin i.
159 Ɛ ‑gbʋn 'ʋn ja, 'oo Tʋ "bo,
ka 'ɩn kma ɛɛ' kɛ' 'ɛ ‑tɩ ja!
'De ɛɛ' nyʋ 'a ‑tɩ' kmaa' 'ʋn, ɛ 'pʋʋ 'ʋn.
160 Tɔ' ‑tɩ mɛ ‑nɩ ɛɛ' wlu 'a ‑gban,
ɛɛ' kɛ' ‑wee'‑ "klein "srɛi,
ɩ se ‑kwɛ ‑ta 'ble.
161 ‑Tɩ' se 'e nɩ 'sʋ, nyʋ ‑kmai" ʋa jea 'ʋn 'kle ‑tu",
'kaa ɛɛ' wlu mɛ ‑ble 'ma faʋn.
162 'Ma nʋʋɛ ɛɛ' wlu 'mʋa‑ i,
ka nyɔ ɔ ‑sa dɛ 'de tʋ 'ʋn ɛ,
163 'kaa 'ɩn 'nyɛ sɩ ‑tɩ 'ʋn ɛ, ɛɛ nyaa 'mii,
ɛɛ' kɛ' mɛ ‑ɛɛ "dia 'ma 'je.
164 Kpɛ ‑mɛ" 'sɔn 'de ‑sɔn 'di,
'ma 'bɛɛ ɛɛ' 'nynɩ "i,
'de ɛɛ' kɛ' ‑srɛai" 'a ‑tɩ 'ʋn.
165 Pɛe 'a blu 'a klaa" ‑nɩ 'e nyɔ ‑kma ɛɛ' kɛ' ɛ ‑tɩ 'ʋn:
‑wɛe 'kle jrɛ' seɛ 'bɛɛ‑ ɛ 'jeɔ bluua‑.
166 'Ɩn tbɛ tɔi", Tʋ "bo,
‑wɛe ɛ 'je 'ʋn 'pʋʋ‑,
'de 'ɩn 'je ɛɛ' kɛ' "jriɛ ‑tu".
167 'Ma 'jeɛ ɛɛ' kɛ' wɔn,
dɛ ‑nʋɛ 'ɩn kma ɩa' ‑tɩ mamaʋ 'sʋ.
168 'Ma 'jeɛ ɛɛ' kɛ' ke,
dɩ ɛɛ' wlu cɛan ‑tie" wɔn:
ɛɛ 'jeɛ 'ma nʋʋdɩ ‑wee'‑ "klein i.
169 'Ma baewlu mu' mamaʋ 'sʋ ɛ jeɛ jɛɛ‑,
'oo Tʋ "bo, ɛ "nyɩ 'ʋn dɩ "kpei ‑seaa' 'a tɔ',
ka ɛɛ' wlu "siia' 'nynɩ ɛ.
170 'Ma baewlu nyni 'de ɛ o!
Ɛ seie 'ʋn ka ɛ cɛan wlu ‑tie" ɛ!
171 'Ma muɛ 'nynɩ ‑saa',
dɛ ‑nʋɛ ɛɛ tɔɔ 'ʋn ɛɛ' kɛ'.
172 'Ma mɩɩɔ 'bɛɛ ɛɛ' 'nynɩ "i:
ɛɛ' kɛ' ‑wee'‑ "klein "srɛi.
173 'De ɛɛ' "ikmaa' 'ʋn ɛ, ɛ ‑te' 'ʋn kwa wɔ i,
ɛɛ' kɛ' 'de blaa' mɛ 'ɩn ‑sa 'e mu.
174 'Ma 'wla 'ma 'pʋʋa 'a ‑fli i, 'oo Tʋ "bo!
Ɛɛ' kɛ' ‑nɩ 'ma crɔn' ‑tɩ.
175 'Oo, ɛ nʋɛ 'ɩn 'je 'kmʋ nɩ,
'de 'ɩn 'je ɛɛ' 'nynɩ "i 'bɛɛ‑!
‑Wɛe ɛɛ' kɛ' 'je 'ʋn kwa wɛi ‑te'.
176 Ka 'blae' nynɔ ‑sia 'kwla nɩa;
'oo! ‑Ɩn ji ‑ma dbonʋɩ ‑jei";
dɛ ‑nʋɛ 'maa "mae ‑ma kɛ' o.