Kea 'a 'sʋ 'wlʋ 'nynɩ
115
Ɛ se ‑amɔ nɩ‑, Tʋ "bo,ɛ se ‑amɔ ‑je 'nynɩ 'wlʋ nɩ‑.
"Ɩɩn‑ ɛmɛ ‑nmɔ 'diwɔn, ‑ɛɛ kpʋn a wlu "kpei,
ɛmɛ ‑je ɛɛ' ‑cɛ" 'nynɩ ‑sa.
2 Dɛɛtɩ‑ 'blʋadinyʋ 'je ‑a ‑pee wlu ʋʋ 'je 'nʋ:
'de ‑mɛ aoa' Kea ‑mɛ 'deɛ ‑gboɛ'‑?
3 ‑Aa Kea nɩɛ 'e jaʋn 'di,
'de dɛ ɛ nɩa "i mɛ ɛɛ nʋ.
4 'Blʋadinyʋ 'a ‑nɩ kea ‑wee'‑ nɩ 'wɛi ke,
'sani" nyiɔɔ' sʋn nʋa ‑o.
5 Ɩ 'bleɛ wɔn 'kaa ɩa' wlu‑,
ɩ 'ble "jri 'mɛ 'kaa ɩa' 'jei.
6 Ɩ 'bleɛ doun" 'de ɩa' 'wɔn i.
Ɩ 'bleɛ 'mla 'kaa ɩa' 'wɔn 'nʋ.
7 Ɩ 'bleɛ sɩn 'de ɩa' 'tʋn dɛi;
ɩ 'bleɛ bɩ 'kaa ɩa' na‑
wlu ‑saan" ka se 'de ɩa' mlakleɛ‑ 'di nɩ‑.
8 Nyʋ ‑ʋʋ nʋɩ ke, nyʋ ‑ʋʋ pʋɩ tɔ' ke,
ʋʋ ‑wee'‑ nɩɛ dɛ due'.
9 Aomɔ Israɛ ‑kɔʋn,
ao tba Tʋ "bo tɔi".
Ɛmɛ ‑ɛɛ ‑kaan ʋʋpʋ‑ "i, ‑ɛɛ ‑wlʋ ʋʋpʋ‑ o.
10 Arɔn 'di, ao tba Tʋ "bo tɔi".
Ɛmɛ ‑ɛɛ ‑wlʋ ʋʋpʋ‑ o, ‑ɛɛ kaan ʋʋpʋ‑ "i.
11 Aomɔ ‑ɔɔ pleea Tʋ "bo ɛ,
ao ‑te' Tʋ "bo ‑kwlɩ".
Ɛmɛ ‑ɛɛ ‑wlʋ ʋʋpʋ‑ o,
‑ɛɛ kaan ʋʋpʋ‑ "i.
12 Tʋ "bo poɛ ‑aa ‑tɩ ‑kwlʋ o,
ɛɛ muɛ ‑a "diwan‑ poa'.
Ɛ muɛ Israɛ ‑kɔʋn ke,
Arɔn 'ɔ ‑gbu" "diwan‑ poa'.
13 Ɛɛ muɛ mɩɩ" ke,
klae" ‑a ‑jeɛ wɔn "diwan‑ poa'.
14 Tʋ "bo a muɛ ao ke,
aoa' "nynuu 'a 'dɔe "kpei poa'.
15 Tʋ "bo ‑nʋa' 'blʋa ke jaʋn ke ɛ,
ɛ po ao "diwan‑.
16 Jaʋn ‑mɛ nɩɛ Tʋ "bo 'a dɛ ‑o,
'kaa ɛ "nyɩɛ 'blʋa ‑mɛ nyiɔpʋ‑.
17 'Mɛʋ 'a ‑tu" Tʋ "bo ‑kɔi" 'bode,
‑ta ʋʋ nɩa, 'bo ‑wee'‑ nʋɛ doo,
18 'kaa ‑apʋ mɔ ɛ,
‑aa muɛ Tʋ "bo 'a 'nynɩ "i 'bɛɛa',
dɛ ‑jea ‑sɩan ‑ɛ mua nyaa.
Kɩɩn, ao 'bɛɛ‑ Tʋ "bo 'a 'nynɩ "i.