‑Too" "i powlu nyɔ ɔ kpa 'e Kea o ɛ
109
Dafi 'a 'dʋ ɔ "nyɩa 'dʋ bleʋn klaa' a.
Kea ‑ɛɛ 'nynɩ 'ma 'bɛɛai" ɛ,
ɛ 'bo ‑snii' ‑teɛ.
2 Dɛ ‑nʋɛ 'diwɔnyniiʋn a wluuɛ 'ʋn 'de i,
‑wɛe ʋʋa ‑tuu"‑ 'ʋn sɩ "kpei.
3 Ʋʋa' 'ma ‑flɛɛn wlu ‑pin' 'ʋn ɛ,
"jru ke ‑tɔn" se 'e nɩ, ʋʋa jea 'ʋn tʋ o ‑fɔn'.
4 'Ma ‑pa "kpei blaa',
mɛ ‑nɩ 'ma ‑tɩ' kmaa' ‑kei" ʋʋa ‑sa 'ʋn.
5 'Dɔe 'ma nʋa, dɛsaʋn mɛ ʋʋa ‑saa' 'ʋn ɛɛ' ‑kei",
‑wɛe 'ma 'ʋn 'nyɛ 'a mɛ ‑nɩ ʋʋa 'ma ‑tɩ' kmaa' ‑kei".
6 Dɛ ʋʋ 'tmʋa ɛ ka: ‑Ɩn ‑sa 'e 'diwɔnynii due',
ɔ 'je ɔɔ' tʋnyɔ nɩ‑,
‑wɛe nyʋ ‑pa "kpei bla i due' 'je ɔɔ' diian fɔ o nɩ‑!
7 ‑Sɔntɩ ʋʋa mua ɔɔ' 'pee 'jea',
ɔ 'jeɛ juuo ka ɔ nʋa dɛsaʋn ɛ,
‑wɛe ɔɔ' baewlu 'jeɔ 'pee kpʋʋn‑.
8 Ɔ 'bo 'kmʋ ‑kwle ɛ,
‑wɛe nyɔ jrɔ' 'jeɔ ‑kwɔ o sii".
9 Ɔɔ' "nynuu‑ sie "kwie,
ɔɔ' 'nynɔ sie ‑tɩɔn" 'nynɔ.
10 Ɔɔ' "nynuu‑ na daɩn" 'ʋn,
ʋʋa' ‑gbu" 'e "jɛi ‑gba',
ʋʋ 'je diidɛ ‑srɔ 'de ‑gbi" ‑gbai" 'dii.
11 Nyɔ ‑ɔɔ kpan ɔ 'ble 'a,
'plee ɔɔ' dɩ ‑wee'‑ "kpei,
‑wɛe nyʋ 'srʋ 'je ɔɔ' dbo 'a crɔn' ‑wee'‑ kpa.
12 Ɔɔ' 'tʋn 'bo 'e nyɔ "o nyɔ pɛe o nɩɛ,
nyɔ jrɔ' 'bo ɔɔ' "kwie nynuu‑ 'a wɛe 'jee ɛ.
13 Ɔɔ' "ji sɔn i,
ɔɔ' 'nynɩ "mae‑ 'de nyʋ ‑ʋʋa mua nɩa' o.
14 Tʋ "bo po ɔ "bo ‑wi" 'a dɛsaʋn 'a ‑tɩ' ‑kwlʋ o,
‑wɛe ɔ de 'a dɛsaʋn 'bo "kpei 'mʋʋɛ,
15 Tʋ "bo po ʋʋa' dɩsaɩn 'a ‑tɩ' ‑kwlʋ o 'wɩ "o 'wɩ,
‑wɛe ʋʋa' ‑tɩ' 'e nyʋ 'dii blu 'de 'blʋa "kpei,
16 Dɛ ‑nʋɛ ɔɔ' nʋʋdɩ se 'dɔe nɩ 'de nyʋ ‑pee,
ɔ ‑tuɛ" wɛenyɔ ke nɩa" nyɔ 'kle mamaʋ,
'sʋ ɔ je wɛenyɔ ‑ɔɔ pɛe cɛan mlaʋn'' 'dba.
17 Ɔɔ 'jeɛ nyʋ ‑soo' pooa' 'a "dia,
'daɩn kpʋn ɔ,
ɔ seɛ "i nɩ ɔ 'je nyʋ "diwan‑ po,
"diwan‑ a muɔ kɩɩn tɛɛan'.
18 ‑Jɛ ɔ ‑tu" 'a 'daɩn ‑pʋn" ka nyɔ ɔ ‑tu" 'a 'ʋnpaadɛ ‑pʋn" 'jaa,
ɛ pa 'de ɔ 'ʋn ka "ni a pa 'de nyʋ 'ʋn ɛ,
ka 'cna a pa 'e ɔɔ' 'kpɩ 'di ɛ.
19 Ɩ "fiin ɔ "jrui ka 'ʋnpaadɛ nɩa,
ɩ nɩ wlʋ ɔ 'je 'di bla jeejee.
20 Ɛmɛ ‑nɩ ‑kei" Tʋ "bo 'jea 'ma tʋnyʋ ke,
nyʋ ‑ʋʋa ‑tmʋa 'ʋn 'diwɔnyni ‑tɩ ‑pee ‑sa.
21 'De ɛmɛ ɛ Nyɔsoa, Tʋ''bo,
ɛ wlʋ 'ʋn o 'de ɛɛ' 'nynɩ 'a ‑tɩ' 'ʋn,
dɛ ‑nʋɛ ɛmɛ ‑ɛɛ nyiɔɔ' ‑tɩ' kmaa' ‑cɛan' je "kpei ‑tie" ɛ,
ɛ ji 'ʋn seie.
22 'Ɩn nɩɛ wɛenyɔ ke nɛa" nyɔ‑,
‑wɛe 'ma pɛe a cɛn mlaʋn" 'de 'ʋn 'di.
23 'Ma mu ka ‑fli a ‑sia',
ʋʋa nʋɛ 'mii ka nyɔ ɔ nʋa 'plaɩn ‑too' i ɛ.
24 'Ma 'kwɔi ‑wee'‑ ‑seea' "i "suɛn pa ‑tɩ 'ʋn,
'ɩn ‑plɔ' 'ma ku 'nɛ 'ʋn ‑pʋn".
25 'Ɩn nɩɛ ʋʋpʋ‑ 'a wlaa ‑nyniɛ,
‑bo ʋʋa sea 'ʋn ja ‑gbʋn ɛ ʋʋa ‑fun" a "jru.
26 Ɛ ji 'ʋn o Tʋ "bo, 'ma Kea.
Ɛ 'pʋʋ 'ʋn 'de ɛɛ' nyiɔɔ' ‑tɩ' kmaa' 'ʋn.
27 ‑Wɛe 'ma tʋnyʋ 'jeɛ juuo,
ka ‑mɔ Tʋ "bo due' koun ‑gbai' nʋa ɛɛ' dɛ tu ɛ.
28 ‑Bo ʋʋ po ‑soo' ɛ, ɛmɛ ‑ɛɛ muɛ "diwan‑ poa',
‑bo ʋʋa sea 'ʋn o ‑fɔn' ɛ,
‑tɩn' a muɛ ʋʋpʋ "i 'dbaa,
‑wɛe ɛɛ' dbonʋɩ 'je 'mʋa‑ nʋ.
29 Nyʋ ‑ʋʋa bla 'ʋn ‑pa "kpei ‑tɩn' 'dbaa ʋʋpʋ‑ "i,
ʋʋa' ‑tɩn' "fiian ʋʋpʋ‑ i,
ka nyɔ 'ɔ paa flae' 'ʋn ɛ.
30 'Ma muɛ wlu "jɛi' kpaa' 'ɩn 'je Tʋ "bo 'a 'nynɩ "i 'bɛɛ‑.
‑Wɛe 'ɩn 'jeɛ 'nynɩ ‑sa,
‑ta nyʋ ‑tuu" ‑kwea de ɛ.
31 Dɛ ‑nʋɛ ɛɛ' 'wlʋɛ nɛa" nyɔ o,
‑wɛe ɛɛ ‑seie ɔ 'de nyʋ ‑ʋʋa kpʋʋn ɔ 'pee 'kwa.