Kea 'a poo wlu fai"
105
Ao ble ao 'e Tʋ "bo 'da, ao wee ɛ o,dɩ klae" ɛ nʋa, ao 'tmʋɩ nyiɔpʋ‑!
2 Ao ble, ao bla dɩ,
ao 'je Tʋ "bo 'nynɩ ‑sa,
ao 'tmʋ dɩ 'dɔe ɛ nʋa.
3 Ao 'bɛɛ‑ aoa' ‑cɛi",
'de ɛɛ' 'nynɩ kweai 'a ‑tɩ' 'ʋn,
nyʋ ‑ʋʋa ‑pɔn a Tʋ "bo i ɛ,
ʋʋa' pɛe nʋ 'mʋa‑.
4 Ao "biie 'de Tʋ "bo o,
ao ‑tee' ɛɛ' "ikmaa' i.
Ao ‑pɔn ɛ ke aoa' naa' i mamaʋ.
5 Dɩ klae" klae" ɛ nʋa o,
ɛɛ' jrii‑ ‑wi" ke, 'tmʋʋ ‑tɩ ‑ɩ ‑wlʋa 'de ɛ 'wɔn ke‑,
ao po ɩa' ‑tɩ' ‑kwlʋ o.
6 Ao Ablaam 'a "nynuu‑,
‑ʋʋ ‑nɩa ɛɛ' "juɛi nʋʋ ɛ,
ao Sakɔbʋ 'a "nynuu‑ ɛ ‑sa 'o ɛ.
7 Tʋ "bo ‑nɩ ‑aa Kea,
ɛmɛ ‑ɛɛ po 'blʋa ‑wee'‑ "klein ‑je o.
8 Dbɛɛdɛ ɛ ‑tua" 'e o,
wlu ɛ cɛan ‑tie", 'de nyʋ 'a "ji 'a "wlu due' ‑pee
o, ɛɛ' "mae‑ ɩ o.
9 Wlu ɛ cɛan ‑tie" 'de Ablaam ‑pee,
mɛ ɛ po "kpae' 'de Isakɩ 'ʋn.
10 Ɛ nʋʋɛ kɛ' 'ʋn 'de Sakɔbʋ 'a ‑tɩ' 'ʋn,
wɛe ɛ nɩ dbɛɛdɛ 'de ɛ ke Israɛ 'nynɩ.
11 Ɛ 'na: 'Ma muɛ ‑ʋn Kanaa 'blʋa "nyɩɩa',
ɛ 'je 'kɛn nɩ ao 'je kpa.
12 ‑Ta ɛ nɩa kan', ‑mɛ ʋʋ se "i ‑tie,
ʋʋ nɩɛ sɛ klɛɛ, ʋʋ nɩɛ 'dʋɩ ‑o 'de 'blʋa 'di,
13 ‑wɛe ʋa nʋ ‑wlʋ 'nɔ, ‑mu' 'nɔ 'blʋɩ 'dii.
14 'Kaa Kea se 'wɔn, nyɔ jrɔ' se ʋʋpʋ‑ 'kle ‑tu",
'de ʋʋpʋ‑ 'a o 'wlʋ ‑tɩ‑ 'ʋn,
ɛ ja 'beɔ ‑wi" 'kle "kpei.
15 Ao 'bo nyʋ 'ɩn poa 'cna "jru "i blaa,
'de ao 'bo 'ma wlu 'kwajaaʋn dɛsaʋn "jrii nʋɛ.
16 Ɛ ja 'mɩɩɛ 'de 'blʋa ‑wee'‑ "klein "kpei,
ɛ 'bɔ ʋʋpʋ‑ diiɛ "nyɩ ‑tɩ 'mɛ.
17 Ɛ dboɛ nyɔ due' nya:
Sosɛfʋ pleeɛ' ka kʋʋɔn nɩa.
18 Ʋʋ saan ɔɔ' bɩ ‑gbae ceɛ' "dbi,
‑wɛe ʋʋ pʋɩ 'de ɔ dɔ'.
19 Mamaʋ 'sʋ dɩ Sosɛfʋ 'tmʋa tɛin" je nʋʋɛ‑,
'sʋ wlu Tʋ "bo 'tmʋa toɛ' ka ɔ 'blea ‑kɩn ɛ.
20 'Blʋajei 'na ao kain ɔ,
nyɔ ‑siia 'blʋa ‑wee'‑ "klein wɔn 'na ao "sii ɔ i,
21 'sʋ ɔ ‑teɛ' ɔɔ' ‑gbu" ɔ kwa,
‑wɛe ɔ 'je ɔɔ' dɩ ‑wee'‑ "klein ‑je o po.
22 ‑Wɛe ka ɔ nɩa "i 'ka ɔ po "nynuu‑ ‑wee'‑ ‑gboo "i,
'de ɔ 'e nyʋ ‑cɔɩn'‑ ‑wee'‑ tɔi" ‑tɩ tɔɔ‑.
23 'Bo mɔ Israɛ ji 'de Esipʋ ‑blʋa‑ "kpei,
'de Sakɔbʋ nʋʋ 'wɩ pla‑, 'de Kamʋ "bliblʋa 'di.
24 Ɛ nʋɛ' 'sʋ ɛɛ' 'cɛ e "kwli 'wlʋ,
ʋʋ se ‑sro' ‑ta 'ble,
ʋʋ je "ikma ʋʋ je ʋʋa' tʋnyʋ ‑sii.
25 Ɛ pooɛ Esipʋ nyʋ 'a pɛe fai":
'Sʋ ʋʋ je ɛɛ' 'cɛ 'ʋn 'nyɛ,
ʋʋ je ɛɛ' 'cɛ ‑cnuu"‑ "jrii nʋ.
26 Ɛ dboɛ ɛɛ' dbonʋʋ Moisɩ ke,
Arɔn ɛ ‑sa 'o mu ɛ.
27 'De Esipʋ ɛ, 'de ɛɛ' "ikmaa' 'ʋn,
ʋʋ nʋɛ dɩ klae" ke,
jrii' ‑tuu" 'de Kamʋ 'a 'blʋa 'di.
28 Ɛ ja "bɛɛ‑ kwie 'de 'blʋa ‑wee'‑ di,
dɛ ‑nʋɛ Esipʋ ‑nyʋ ‑fuuɛn ɛɛ' wlu nya i.
29 Ɛ pooɛ ʋʋa' "ni fai", ɩ ‑srɛɛn nmɔ 'ʋn,
‑wɛe ɛ 'dba ɩa' ‑smii'‑ ‑wee'‑.
30 Ɛ "jiiɛ ‑crɔ" 'blʋa wɔn mamaʋ,
'sʋ ɩ je 'de 'beɔ ‑wi" 'a 'pɛn ɩn' pa.
31 Ɛ wlua 'sʋ, boo "wlu ‑taan',
‑wɛe klɩn 'plee ʋʋa' 'blʋa ‑wee'‑ "klein "kpei.
32 ‑Cnɩ a dba' 'de "ni a ‑kwɔ "i,
‑wɛe ‑tɛn "plan 'de 'blʋa ‑wee'‑ "klein "kpei.
33 Ɛ dooa Fiinyɛ‑ ‑kle ke, fikie ‑kle ke,
‑wɛe ɛ ‑cra' ti "klein ‑nɩa 'de ʋʋa' 'blʋa "kpei.
34 Ɛ wlua 'sʋ kpɔwɔn"‑ ke,
'plaɩn ‑too'‑ ‑tuu"‑ nyʋ sea 'bɛɛ ɔ 'jea ‑sro' ji',
35 ɩ di sii" ‑wee'‑ ‑nɩa 'e 'blʋa 'di 'mɛ,
ɩ di ti 'a "bi ‑nɩa 'de ‑kle' ‑wee'‑ 'dii 'mɛ.
36 Ɛ 'dba ʋʋa' "i ‑sanynuu,
‑nɩa ʋʋa 'kpɩ ‑wee'‑ 'mɛ 'de 'blʋa 'di,
37 ɛ "siiɛ ɛɛ' 'cɛ ‑sɔn, ɛ "jiiɛ ʋʋpʋ‑ 'wɛi ke,
'sani" wɔn, 'de ʋʋpʋ‑ "klu ɛ,
nyɔ jrɔ' 'ɔ pɛe se de sie‑.
38 Ʋʋa 'e 'wlʋʋa ‑nʋɛ' Esipʋ ‑kɔun 'mʋa‑ "i.
Dɛ ‑nʋɛ Israɛ 'a faʋn a nʋ ʋʋpʋ‑ 'mɛ.
39 Ɛ pooɛ ʋʋpʋ‑ ‑gblo" 'de i mɛ ‑ɛɛ kaan ʋʋpʋ‑ "i,
‑wɛe nɛ mɛ ʋʋa 'jee‑ "i "maʋ.
40 Ʋʋ ‑teeɛ' i, 'sʋ ɛ ja blo',
‑wɛe ɛ ‑sa diidɛ 'de jaʋn di',
ɛmɛ ‑ɛɛ dboo ʋʋpʋ‑.
41 Ɛ wa "sou 'sʋ, "ni 'wlʋɛ 'de ɛ 'di ɛɛ sɛn i.
‑Wɛe ɛɛ ‑si' ka juuɔ nɩa 'de 'blʋa "kpaan "kpei.
42 Ɛ poɛ ‑tɩ' ‑kwlʋ o,
ka ɛ cɛan ɛɛ' wlu ‑kwea i ‑tie",
'de Ablaam ‑nɩa ɛɛ' dbonʋɩ ‑pee.
43 ‑Ta ɛ ‑seia ɛɛ' 'cɛ 'sʋɛ, ʋʋa nʋɛ 'mʋa‑,
nyʋ ɛɛ ‑teea kpɔi" 'a ble ‑cnuɛn" ɛ 'kpaa.
44 Ɛ "nyɩ ʋʋpʋ‑ 'cɛ jrʋ' 'a 'blʋ,
‑wɛe ʋʋa' dii ʋʋ sia, ʋʋpʋ‑ a di ɩa' crɔn'.
45 'De ‑bo ɛ nɩ kan' a,
‑wɛe ʋʋ 'je ɛɛ' wlu wɔn 'je,
'de ka ɛɛ' kɛ' "siia 'nynɩ ʋʋ 'je kan' nʋ,
Ao 'bɛɛ‑ Tʋ "bo 'a 'nynɩ "i.