Kea 'kpɩ po dʋ
103
Ɛ 'wlʋɛ Dafi 'a 'dʋsbɛ 'di.
'Ma ‑suu, ɛ po Tʋ "bo "diwan'.
Dɛ "o dɛ ‑ɛ ‑nɩa 'de 'mɔ 'ʋn ɛ,
po ɛɛ' 'nynɩ ‑kweai "diwan.
2 'Ma ‑suu, ɛ po Tʋ "bo "diwan',
ɛ 'bo ɛɛ' 'dɔe 'a due' koun ‑gbai' o "mae ɛ.
3 Ɛmɛ ‑ɛɛ ‑wlʋ ‑ma dɩsaɩn ‑wee'‑ 'a ‑kwɔ "kpei,
‑ɛɛ 'bɔɔ' ‑ma 'wɛ ‑wee'‑ "klein;
4 ɛmɛ ‑ɛɛ ‑seie 'ʋn, 'de 'mɛ bie "wɛin,
ɛmɛ ‑ɛɛ ‑te' ‑ʋn 'diwɔnmɔa' ke,
nyʋ 'a wɛe 'jea' 'a ‑gbla "jru,
5 'de ‑ma 'kmʋnɩa' ‑wee'‑ "klein 'ʋn,
ɛmɛ ‑nʋɛ' ‑wɛe ‑ɩn ‑nɩ 'e 'mʋa‑ 'ʋn.
‑Ta ‑ɩn ‑nɩa 'e ‑ma ‑koa'' kpae" ɛ,
ɛmɛ ‑ɛɛ ‑nyɩ" ‑ʋn 'kpɩ ka ‑cii" nɩa.
6 Tʋ "bo "srɛi,
ɛmɛ ‑ɛɛ ‑wlʋ nyʋ "klein 'kmʋ a 'kpai o.
7 Kea ‑sa ɛɛ' ‑jeblʋ 'kwla 'de Moisɩ ‑pee,
ɛ ‑sa ɛɛ' nʋʋdɩ 'kwla,
'de Israɛ 'a "nynuu‑ ‑pee.
8 Tʋ "bo nmɔ 'diwɔn ‑wɛe ɛɛ 'je nyʋ 'a wɛe‑.
Ɛ kuuɛ tɔ' i, ‑wɛe nyiɔɔ' ‑tɩ' kmaa' "ji 'de ɛ 'ʋn.
9 Ɛɛ 'wlʋɛ nyʋ 'a ‑kwɔ "kpei, ɛɛ' 'nɛ nyʋ kwai;
10 Ɛɛ' 'ble nyɔ 'ɔ 'cɛn 'dii.
Ɛɛ' ‑sa ‑ʋn ɩa' ‑kei" kan'.
11 Ka jaʋn 'bɛai" 'de 'blʋa "jru kpɔ' ɛ,
'Ka ɛɛ' 'diwɔnmɔa' "bɛi,
'de nyʋ ‑ʋʋa pleeɛ ‑pee 'a ‑tɩ' 'ʋn.
12 Ka 'jrʋ 'a 'wlʋ 'ɩn ke,
'jrʋ 'a bluɩn' tɛɛn a ba o ɛ,
'kamɔ ɛɛ tɛɛn ‑a ‑ʋn ‑aa dɩsaɩn kɩɩn.
13 'Oo, 'Ka "bo a 'jea ɔɔ' "nynuu‑ 'a wɛe ɛ, 'ka
Tʋ "bo a 'je nyʋ ‑a pleeɛ ʋn 'a wɛe‑:
14 dɛ ‑nʋɛ ka ɛ nʋa ‑aa ma sʋn ɛ juuɛ',
ɛ poɛ ‑tɩ' ‑kwlʋ o, ka ‑a ‑nɩa 'blʋ ɛ.
15 Ka sii" nɩa 'ka nyiɔɔ' kmʋ 'nɩ‑,
ka tu a ‑faɩn' nɩa, 'kamɔ ɔ nɩ: ɛɛ ‑fan'
16 'bo pʋʋɔ' ‑sii ‑ɛ 'ʋn sʋ, ɛ sɔn i,
‑ta ɛ 'wlʋa‑ nyʋ seɛ "i juuo 'bode.
17 Tʋ "bo, ɛɛ' nyʋ 'a ‑tɩ' kmaa' nɩ' jeejee,
'de nyʋ ‑ʋʋa pleeɛ ‑pee ɛ,
ɛɛ' ‑maa' 'wlʋ wlu "kpei mu' mamaʋ,
'de ʋʋa' "nynuu‑ 'a ‑nɩ "nynuu‑ ‑pee.
18 Ɛ nɩɛ nyʋ ‑ʋʋ ke ɛ "sii a "i,
‑wɛe ‑ʋʋ kpʋan wlu "kpei ke,
nyʋ ‑ʋʋ poa ɛɛ' kɛ' 'ɛ ‑tɩ' ‑kwlʋ o,
'de ka ɛ "siia' 'nynɩ ‑ʋʋa' nʋɛ 'ɛ ‑tɩ' 'ʋn.
19 Tʋ "bo ‑teɛ' ɛɛ' Tʋ"bokpatɛ‑ 'de jaʋn di'.
Ɛmɛ ‑nɩ Tʋ "bo, ‑ɛɛ po 'blʋa ‑wee'‑ ‑je o.
20 Ao 'bɛɛ‑ Tʋ "bo 'a 'nynɩ "i,
ao ‑nɩa ɛɛ' "sʋɩ ‑ɩ ‑kmai",
‑wɛe ‑bo ɛ ‑tee' dɛ i 'sʋ ‑ɩa nʋɩ ɛ.
21 Kɩɩn, ao 'bɛɛ‑ Tʋ "bo 'a 'nynɩ "i,
ao ‑nyʋ "klein ‑nɩa ɛɛ' "sʋɩ,
'de jaʋn 'di ‑ʋʋa nʋʋɛ "juɛi,
'de ‑ʋʋa nʋa ɛɛ' ‑kwlʋ ‑tɩ ɛ.
22 Kɩɩn, dɩ "klein, Tʋ "bo a nʋʋdɩ ‑wee'‑,
ao 'bɛɛ‑ ɛɛ' 'nynɩ "i, ‑ta 'oo ‑ta ɛɛ' beɔdɛ nɩa,
‑Ma ‑suu ‑ɩn ‑bɛɛ' Tʋ "bo 'a 'nynɩ "i.