‑Too" "i powlu nyɔ ɔ kpa 'e Kea o ɛ
102
"Nmianyɔ 'ɔ baewlu ɔɔ poa ‑ta 'kpɩ wɔi" ɛ, ‑wɛe ɔɔ 'tmʋa ɔɔ' ‑kwlʋ kpʋn ‑tɩ 'de Tʋ "bo ‑pee ɛ.
2 Tʋ "bo, ɛ po 'ma baewlu doun" o,
‑wɛe 'ma "wɔwlu 'jeɛ jɛɛ‑!
3 ‑Bo 'ɩn nɩ 'e 'kle 'di, ɛ 'bo 'ʋn "jri ‑pʋn" ‑saa,
‑bo 'ma seɛ 'da a, ɛ po 'ʋn doun" o,
ɛ ‑too" ɛ 'je 'ma baewlu kpʋn.
4 'Ma 'wɩ 'a ‑si' ka dao' a "bua,
‑wɛe 'ma 'kpɩ a sin.
5 'Ka "sii nyʋ cɛan, ‑wɛe nyɔ ɔ poa 'jrʋ 'ʋn nɩa,
'ka 'ma pɛe a nʋ 'jrʋ. Dɛdi ‑tɩ bluɛ 'ʋn 'dii.
6 'Ma fɩɩɛ' i 'wlaa a nʋɛ' 'sʋ 'ma sɔɔ'.
7 'Ɩn ‑kwɔ' ‑koo' "kpei nawɛ,
'ɩn nɩɛ ka 'kwla ‑cue‑ nɩa,
'de ‑gbu" ‑gbau" ''kpei ɛ.
8 "Nyɩɔn' cɛɛn 'ʋn "jrii,
ka nawɛ ɛ ‑tea 'e ‑gbu" a ‑tou' "jru nɩa.
9 'Ma tʋnyʋ a ‑cre" 'ʋn 'ɛ 'wɩ 'oo 'wɩ ‑wee'‑ di,
‑wɛe ʋʋa poo ʋʋa' tʋnyʋ ‑sia 'e mu ‑soo'‑ o,
ʋʋ 'na ka 'ɩn nɩa ʋʋ nɩ kan'.
10 "Puue' mɛ ‑nɩ 'ma diidɛ,
dɩ "klein 'ma 'na, "jri 'a "ni a 'kpɩ o.
11 'Cɛn ‑gbuu' ɛ wɔn i,
ɛ "dua 'ʋn 'sʋ ɛ ‑fi" e‑ 'ʋn ɛ.
12 'Ma 'wɩ a ‑kwɛ' ka ‑sii nɩa,
‑wɛe 'ma 'pʋʋan' ka sii" nɩa.
13 'Kaa ‑mɔ ɛ Tʋ "bo, ‑ɩn ‑nɩɛ 'beɔ jeejee,
‑wɛe ‑ma nʋʋdɩ 'je nɩ, 'de nɔ" 'oo nɔ" ‑wee'‑ "klein 'di.
14 Kɩɩn, ɛɛ muɛ 'ʋn sɔn 'a,
‑wɛe ɛ ‑je Selisalɛmʋ 'a wɛe 'je;
dɛ ‑nʋɛ "nɔ ɛ ‑tua", ‑wɛe ɛ ‑jeɛ 'saaʋn "jrii nʋ ɛ nyni.
15 Ɛɛ' dbonʋʋ a 'jeɛ ɛɛ' 'kao kpiin' ke,
ɛɛ' 'blʋ 'a "dia, ɩa' ‑tɩ' nɩɛ 'de ʋʋ 'mɩ ‑sɔn.
16 'blʋa ‑wee'‑ 'a muɛ kwa 'di ‑teea' 'de ɛ ‑pee Tʋ "bo,
‑wɛe ka ɛ 'bɛai" ɛ nɩa 'beɔ ɛ,
'blʋa jeʋn ‑wee'‑ "klein 'jeɛ juuo‑.
17 Tʋ "bo a muɛ Selisalɛmʋ ‑kwlɔ ‑tu" 'a,
mɛ ‑je ɛɛ' kɛɛma' dɛ to‑.
18 Nyʋ ʋʋ dia "jru i ɛ,
Kea a poɛ ʋʋa' baewlu doun" o, ɛɛ' ‑sɛɛ doun" i.
19 Ɛɛ' dɛ tu 'e 'crɩɩɛ ‑o,
‑wɛe "nynuu‑ ‑a mua jia' 'de nya 'jeɛ juuo,
‑wɛe nyʋ ‑ʋʋa mua 'kmʋnɩ 'a,
'je Tʋ "bo 'nynɩ ‑sa.
20 'De jaʋn 'di ‑kwɛa i Tʋ "bo nɩa,
ɛɛ ‑gbʋʋn' 'de 'blʋa "kpei,
21 ‑wɛe ɛ 'je ‑kaso 'dinyʋ 'a ‑fɩn" wlu 'wɔn,
'de ɛ 'e nyʋ ‑ʋʋa mua mɛɛa' wlu ʋʋ cɛan ‑tie" ‑seie,
22 ‑wɛe nyʋ 'je Tʋ "bo 'a 'nynɩ i 'jrɛɛ,
'bo Siɔn, 'de ʋʋ 'jeɛ 'nynɩ ‑sa 'de Selisalɛmʋ.
23 'Bomɔ 'blʋa 'a blo' wɔn ‑wee'‑ a mu "jrui ‑gbooa',
‑wɛe ʋʋ 'je Tʋ "bo "juɛi ‑gbɛɛ'‑.
24 Ɛ wa 'ʋn 'kpɩ "i 'bo ‑je ‑see‑,
ɛ "kʋʋn a 'ma 'wɩ "i.
25 Ɛmɛ ‑tɩ 'ɩn 'na: 'ma Kea,
ɛ 'bo 'ʋn 'kmʋ ‑saa 'bo ‑je ‑see‑,
ɛmɛ ‑nɩa jeejee ɛ.
26 "Tɛin sese ɛ, ɛmɛ ‑nʋ' 'blʋa ke jaʋn ke‑.
27 Ɩa muɛ i sɔn 'a 'kaa ɛmɛ nɩ:
Ɩa muɛ "jrii ‑kwea' ka 'ʋn paadɛ nɩa,
ka nyɔ ɔ pooa 'ʋn paadɛ fai",
'ka ɛɛ mʋɩ fai" pooa'.
28 Kaa', ka ɛ nɩa, 'kamɔ ɛ nɩ,
ɛɛ' ‑sɩn se "ti ‑ta 'ble.
29 Ɛɛ' "juɛi nʋʋ 'a "nynuu‑ a muɛ ʋʋa' 'blʋa 'di "ti 'a,
‑wɛe ʋʋa' "ji je 'dei ku‑.