Tʋ "bo nɩɛ 'beɔ 'de 'blʋa ‑wee'‑ "klein "jrukpɔ'
97
'blʋa ‑wee'‑ nʋ 'mʋa‑,dɛ ‑nʋɛ Tʋ "bo nɩɛ 'beɔ.
2 Bue' ke kwie kpan, mɩ ‑fiin" ɛ "jru i.
"Isrɛa' ke ‑tɩ' "i ‑klɛɛa' ke,
ɩmɩ ɛɛ' 'beɔ kpatɛ‑ tba ‑gbɔo 'di,
3 nɛ ‑gboa ‑kɔn 'de ɛ "juɛi,
‑wɛe ɛɛ siian ɛɛ' tʋnyʋ 'de ɛ 'dewei.
4 ‑Bo "ni a sea "jrii crɛ 'de 'kmʋ "kpei, 'sʋ 'blʋa a crɛ'.
5 'De crɩ ‑mɩ ɛ ɩa cɩɛɛn wɔn 'de Tʋ "bo "juɛi,
ka "nma a cɛan "ni 'de nɩɛblai "juɛi ɛ.
6 Jaʋn a 'tmʋɛ ɛɛ' "isrɛ ‑tɩ',
‑wɛe nyʋ ‑wee'‑ "klein a 'je ɛɛ' kɛɛma' dɛ "jriɛ‑.
7 Nyʋ "klein ‑a ‑gbɛɛa' kɔin "juɛi,
‑tɩn' 'dbaa ʋʋpʋ‑ "i.
Dɛ ‑nʋɛ ʋʋ juuɛ' ka ɩ sea dɛwɔn nɩɛ.
‑Kɩɩ' ‑wee'‑ 'je 'kɔu‑ i "sii 'de ɛ "juɛi,
'de nyʋ ‑a ‑da kea ‑wee'‑ "siiɛ 'kɔu‑ i 'de ɛ "juɛi.
8 Selisalɛmʋ ‑kwlɔ 'wɩn 'sʋ ɛɛ nʋɛ 'mʋa‑.
Suida 'a ‑kwlɛ ‑wee'‑ a "mlii,
'de ɛɛ' 'pee 'je ‑tɩ 'ʋn, Tʋ "bo.
9 'De ‑mɔ ɛ Tʋ "bo,
‑ɩn ‑nɩɛ 'e 'blʋa ‑wee'‑ "jru kpɔ',
‑wɛe Kea ‑nɩa 'e dɩ ‑wee'‑ "klein "jrukpɔ' 'ɔ nʋʋdɩ ‑sii ‑kɩɩ' wee'‑ "klein.
10 Aomɔ ‑ɔ ‑kma Tʋ "bo 'a ‑tɩ' ɛ,
ao 'nyɛ dɛsaʋn 'ʋn.
Ɛɛ fuɛ nyʋ ‑ʋʋa kpʋn a wlu "kpei,
'de ‑ɛɛ ‑seie ʋʋpʋ‑ 'de 'diwɔnyniʋn 'kwa.
11 ‑Sɔn' ɔ ‑sɩn 'de nyʋ ‑ʋʋa kpʋn a wlu "kpei 'a ‑tɩ' 'ʋn.
‑Wɛenyʋ ‑ʋʋa pɛe 'srɛai" ‑mʋ ‑wi" nɩ 'e 'mʋa‑ 'ʋn.
12 "Isrɛnyʋ, ao nʋ 'mʋa‑, 'de Tʋ "bo 'a 'nynɩ 'ʋn,
ɛɛ' 'nynɩ ‑kweai, ao pooɛ 'kpɩ 'de aoa 'dʋ 'di.