Kea 'a 'nynɩ "i 'bɛɛa' nmɔ "jrii
92
'Dʋ nyʋ a blea ‑kwlewɩ "kpei ɛ.
2 Ɛ nmɔ "jrii nyʋ 'je Tʋ "bo 'a 'nynɩ "i 'bɛɛ‑,
‑wɛenyʋ 'je Kea ‑nɩa 'e dɩ ‑wee'‑ "klein "jrukpɔ' 'ɔ 'nynɩ "jɛi kpa.
3 ‑Wɛe ‑bo ‑sɔn ɔ jea ‑sɩn',
nyʋ 'je ɛɛ' nyʋ 'a ‑tɩ' kmatɩ‑ 'tmʋ,
‑wɛe "maʋ ɛ, nyʋ 'je ɛɛ' ‑maa' 'wlʋ wlu "kpei 'a ‑tɩ' 'tmʋ,
4 nyɔ ɔ ble ɛɛ' 'dʋ tu 'mɛ,
'de blaadɩ ‑ɛɛ "dbu nɩa ‑puue o,
‑si' ‑plʋ o, 'de ɩ "kpei.
5 ‑Ma nʋʋdɩ a nʋɛ' Tʋ "bo, 'mʋa‑ a jea 'ʋn "ji,
‑wɛe dɩ ‑ma sʋn a nʋa, 'ɩn 'je ɩa' ‑cɛi" bla.
6 ‑Ma nʋʋdɩ "bɛi kan' a‑ Tʋ "bo!
‑Ma tɔ' "kpei naadɩ tɛn ‑sɔn.
7 Nyɔ ‑sea' tɔ' 'di nɩ sɩ juuo‑,
nyɔ ‑duua ‑mɔɔ' 'wɔn ɩ 'de i.
8 ‑Bo dɩsaɩn nʋʋ a sea 'bɔa ka ‑kɔ' sii" nɩa,
‑bo 'diwɔnyniiʋn a sea blɛblɛ nʋ ɛ,
‑mɛ ʋʋa' ma" 'a muɛ i sɔan',
'de nɔ" ‑wee'‑ "klein 'di.
9 'Kaa ‑mɔ Tʋ "bo,
‑ɩn ‑nɩɛ 'beɔ 'de nɔ" 'oo nɔ" ‑wee'‑ 'di.
10 ‑Ɩn ‑gbʋn Tʋ "bo,
‑ɩn ‑gbʋn ‑ma tʋnyʋ ‑wee'‑ a sɔn i,
'kaa nyʋ "klein a nʋa dɛsaʋn,
‑wee'‑ a muɛ ja ‑gbaa'.
11 ‑Ma ‑nyɩɛ" 'ʋn 'kpɩ ka ‑ti nɩa,
‑wɛe ‑ma po 'ʋn 'cna ‑ɛ ‑blea 'nʋ 'dɔe "jru.
12 ‑Bo 'ma sea 'ma tʋnyʋ ja ‑gbʋn,
‑wɛe dɩ "klein ʋʋa 'tmʋa 'de 'ma ‑tɩ' 'ʋn,
‑bo 'ma sɩ 'wɔn ɛ, faʋn' 'a nʋ 'ʋn.
13 Dɛ ‑nʋɛ "isrɛnyʋ a 'boa' ka ‑kao nɩa,
ʋʋa muɛ "jɛi ka tu nyʋ a 'daa sɛtrɩ ‑nɩa 'e Diban nɩa.
14 Ɩ dooɛ' 'dɔe 'ʋn Tʋ "bo,
‑wɛe ɩa 'bɔa 'de ‑ɩn o ‑gbɛin" ‑aa Kea.
15 Ɩa muɛ croa' mamaʋ 'sʋ, ɩ 'je ‑kea" 'kpa,
ɩa muɛ "ni 'blea', ‑wɛe "ni 'jɩ "ji ɩ 'je 'dei ku‑.
16 ‑Wɛe ɩ 'jeɛ to ka Tʋ "bo "srɛai ɛ
ɛmɛ nɩɛ 'ma ‑kliosou" o‑, ɛɛ' di ‑topin.