Kplewlu nyɔ ɔ ‑kʋaan" 'mɛɛa' i a poa.
88
'Dʋ ‑Kore 'a "nynuu blea ‑wɛe ‑ɛ ‑crɩɩa' 'de 'dʋ ‑jeopoi klaa" 'a 'dʋsbɛ 'di ɛ, Ema ‑wlʋa Esratɩ 'a tɔ' "kpei naatɩ. "Kwikwein‑ mɛ nyɔ ɔ bla ‑wɛe nyɔ ɔ bleɛ.
2 Nyɔsoa, 'ma Kea 'de "maʋwɩ o 'jrʋ ‑gbaowɩ 'di ɛ,
'ma poɛ ‑ʋn ‑too"‑ "i.
3 ‑Ɩn po 'ma baewlu ke 'ma kplewlu doun" o.
4 Dɛ ‑nʋɛ 'kpɩ wa 'ʋn "i 'ɩn nɩɛ 'e 'mɛbie "wɔin
5 Nyʋ ‑wee'‑ a ‑sroo' ɛ 'ʋn 'bo 'mɛʋ 'a ‑tɔn "i,
ka nyɔ ɔ nɩa 'e ‑gbaɩn' 'di ɛ,
'kamɔ 'ɩn ‑kɔ 'de ʋʋpʋ‑ "jri 'de.
6 'De mɛʋn "klu 'bo 'ma ‑tein nɩ‑.
'Ɩn ‑kɔ nyɔ nyʋ 'pɛɛan i 'de ‑gbaɩn' 'di.
‑Wɛe ‑ʋa ‑tɩ' nyɔ 'ɔ poa ‑kwlʋ o 'bode ɛ.
7 ‑Mɔ nʋɛ ‑wɛe 'ɩn ‑kɔ' nyɔ ʋʋ nmaea i
'de ‑kwlu' 'a ‑kwlu' ‑wɛe ʋʋ bɔa.
8 ‑Ma 'pee a 'nyɛ 'ʋn "kpei,
'de ma 'cɛn 'wlʋɛ "blo 'de 'ʋn "kpei . ‑Te' ‑kwlʋ.
9 'Sʋ 'ma "dɛi ‑wi" ‑wee'‑ tɛɛn 'ʋn o, 'ɩn nɩɛ 'e ‑kaso 'di,
ka 'ɩn 'jea "kpae "sisʋn nʋ 'ka se nɩ.
10 'Kle 'ma 'jea 'de ɛɛ' ‑tɩ' 'ʋn ɛ.
'Ma 'kmʋ sɔin, 'de 'wɩ "o 'wɩ 'di.
Nyɔsoa, 'ma ‑teeɛ' ‑ma kwa 'di 'ma bae ‑ʋn ɛ,
11 nyʋ ‑ʋʋ ‑mɛa ʋʋ 'bɛɛ‑ ʋʋ 'e jrii ‑ma nʋa "jriɛ 'jee‑?
'Mɛʋ 'bɛɛ‑ ʋʋ 'e 'ʋn sɔn ‑wɛe ʋʋ 'e ‑ma 'nynɩ "i 'bɛɛ‑? ‑Te' ‑kwlʋ.
12 Nyʋ ‑nɩa 'e ‑gbaɩn' 'di 'bɛɛ
ʋʋ 'je ‑ma nyiiɔn' ‑tɩ' kmaa' ke,
‑maa' 'wlʋ "kpei kpʋan' 'tmʋʋ 'de 'mɛʋn o ‑klwɔ?
13 Jrii'‑ ‑ma nʋa ke‑ ‑ma "isrɛtɩ‑ ke‑,
nyʋ ‑nɩa 'de "maena' 'bɛɛ‑ ʋʋ 'jɩ juuo‑?
14 ‑Bo ɛ nɩ 'mɔ ɛ Nyɔsoa
'ma ‑cnuu' 'ma jea ‑mɔ ‑too" "i po.
15 Dɛɛtɩ ɛ‑ Nyɔsoa, ‑ma ‑fuun 'ʋn nyai
‑wɛe ‑ɩn seɛ "i nɩ ‑ɩn ‑je 'ʋn sʋn 'sɔɔn kpʋn ɛ‑?
16 Dɛ ‑wlʋa 'e 'ma ‑kooa" i ‑saan" 'a nɔ" "i,
'kle a 'nyɛ 'ʋn "kpei 'ma diɛ 'mɛa‑ 'wɔin,
‑ma 'cɛn ‑gbɔa ‑criɛ" 'ʋn "kpei
‑wɛe 'ma 'je 'kle 'de 'kpɩ wa "mii.
17 ‑Ma 'cɛn ‑criɛ" 'ʋn "kpei, faʋn "ji 'ʋn 'ɛ.
18 'De ‑sɔn "o ‑sɔn 'di ɛ,
'ɩn nɩɛ 'e ‑ma 'cɛn 'ɛ bie'
ka "ni a kpʋʋan nyɔ 'wɔn ɛ.
19 ‑Ɩn ‑sa 'ʋn 'ma "dɛi ‑wi" 'kwa,
nyʋ ‑ʋa ‑tɩ' 'ɩn kma ʋ ‑wee'‑ tɛɛn 'ʋn o.
Kwie blo' mɛ 'ma nʋ "dɛi ‑wi" 'ʋn 'bode.