Selisalɛmʋ sɔn i
79
Asafʋ 'a 'dʋ.
'Oo Kea, nyʋ ‑sea' ‑ʋn ‑juuo mlaa ‑ma ‑tein 'mɛ,
ʋʋ kpʋʋn ɛ ‑ma ‑gbu" ‑kweai ‑flɛn",
ʋʋ wa Selisalɛmʋ ‑wee' 'mɛ.
2 Ʋʋ "nyɩɛ ‑ma dbonʋʋn 'a "ku nʋɩ ‑nɩa 'e "jɛi ɛ,
nyʋ ‑ʋʋ kpʋan wlu "kpei 'a "ku
ʋʋ "nyɩɛ ‑mɩ 'kwladinmi.
3 Ʋʋa' nmɔ ʋʋ 'wlai ɩa' ‑gbuu a ‑si'
'de Selisalɛmʋ ‑kwlɔ 'dei,
dɛ ‑nʋɛ nyɔ ‑jea ʋʋpʋ‑ i nmae ɛ ɔ se nɩ‑.
4 Nyʋ ‑ke ‑a ‑kʋʋan" i ‑mʋ ‑wi" a ‑cree" ‑a ‑ʋn ‑ɛ,
‑wɛe nyʋ ‑nɩa ‑a 'dewei ‑mʋ a ‑flɛɛan ‑ʋn' ‑ɛ,
ʋʋa wlaa a ‑ʋn ɛ.
5 Nɔ" ‑jɛɛ 'di ‑ɛ Tʋ "bo,
‑ma 'cɛn 'je "ti 'de ‑apʋ mɔ ‑pee ɛ,
‑ma 'cɛn klaa" ‑jɛɛ siian nyʋ i ka nɛ nɩa' a?
6 ‑Ɩn ‑ja ‑ma 'cɛn 'de nyʋ ‑sea' ‑ʋn ‑juuo "kpei,
ɛ ke 'blʋa 'srʋ ‑ʋʋa' ‑gbɛɛa' ‑ʋn "juɛi ɛ.
7 Dɛ ‑nʋɛ ʋʋ 'faeɛ Sakɔbʋ i,
‑wɛe ʋʋ dooa ɔɔ' dɩ ‑wee'‑ "klein.
8 Dɩsaɩn ‑a "bo ‑wi" nʋa tɛin" ɛ,
‑ɩn ‑bʋɩ ‑sro' ɛ 'de ‑a "jru, ‑ɩn ji ‑too"‑,
‑ma nyiɔɔ' wɛe 'jea ji 'de ‑a "kpei.
Dɛ ‑nʋɛ ɛmɛ ‑nɩ ‑a ‑nɩɛ wɛenyɔ‑.
9 ‑Ɩn ‑wlʋ ‑a o Kea ‑nɩa ‑aa 'pʋʋi ɛ,
'de ‑ma 'nynɩ 'a "i 'bɛɛ ‑tɩ 'ʋn,
'de dɛ ‑ɩn ‑nɩa 'a ‑tɩ' 'ʋn ɛ,
‑ɩn ‑seie ‑aʋn, ‑ɩn ‑wlʋ ‑aa dɛsaʋn "kpei.
10 Dɛɛ ‑tɩ 'blʋɩ ‑sea' Kea juuo 'je wlu ka?
‑Ta ʋʋa Kea mɛ nɩ ‑ɛ?
Nyʋ ‑sea' ‑mɔ Kea juuo ɛ,
‑ɩn ‑tee' ʋʋpʋ‑ i 'de ‑a "juɛi,
dɛɛtɩ‑ ʋʋ 'dba ‑ma dbonʋʋ ‑ɛ.
11 'De nyʋ ʋʋ poa ‑kaso 'di
‑mʋ ‑wi" 'a ‑fɩn" wlu 'je ‑mɔ Kea jɛɛ‑
'de ‑ma "ikmaa' 'je nyʋ ʋʋ 'jea 'dba ‑wi" ‑mʋ ‑seie.
12 Nyʋ ‑ʋʋ ‑ke ‑a ‑kɔan" i,
‑ʋʋa ‑flɛɛan ‑ʋn ‑ɩn ‑sa ‑mʋ ‑wi" ‑kei"
kpɛ ‑cɛɛn'‑ ‑mɛ" 'sɔn 'oo Kea.
13 'Kaa ‑apʋ ‑jɔ ‑nɩa ‑ma 'cɛ,
'blae 'a ‑gboo ‑ɛɛ ‑jeopoi ‑mɔ ‑nɩa a,
‑aa muɛ ‑ma 'nynɩ "i 'bɛɛa'
'de nɔ" 'o nɔ" ‑wee'‑ "klein 'di.
‑Aa muɛ blea' ‑a ‑je ‑ʋn 'da
'de nɔ" 'oo nɔ" ‑wee'‑ "klein 'di.