Israɛ 'a 'kmʋ soa‑ ɛ 'je ‑a dɛ tɔɔ‑
78
Asafʋ 'a tɔ' "kpei naa ‑tɩ.
'Ma 'cɛ, ao kpʋn 'ma 'snɩ i,
ao po dɛ ‑ɛɛ mua aopʋ‑ ‑pee 'tmʋa' doun" o.
2 'Ma muɛ ao dɛtɔa' 'de ‑tɩ' "i pooa' 'ʋn,
'de 'ɩn 'je tɔ' 'di nɩa' ‑nɩa tɛin" 'tmʋ.
3 Dɩ ‑a ‑juua o, dɩ ‑a ‑wɔan o,
dɩ ‑ɩa "kuuan ‑a "bo ‑wi" 'po ‑aʋn o,
4 ‑a sɩ 'kwla ‑tu" i 'de ‑aa "nynuu ‑pee,
‑aa mʋɩ 'tmʋa' 'de nyʋ ‑tba' ‑a "i ‑pee,
dɩ klae" Tʋ "bo nʋa' ke,
ɛɛ' "ikmaa' ke, ɛɛ' jrii' ‑tuu" ‑tuu ɛ nʋa ke‑.
5 Ɛ criɛ ‑cɩɛ de Sakɔbʋ ‑pee,
ɛ bla kɛ' 'de Israɛ ‑blʋa "kpei
‑wɛe ɛ wlu 'de ‑a "bo ‑wi" ‑pee ɛ 'na:
ao tɔɔ aoa' "nynuu‑ dɛ.
6 ‑Bo ɛ nɩ kan' a ‑wɛe ʋʋa "ji ‑ɛɛ mua jia'
'jeɛ 'tmʋ 'de ʋʋa' "nynuu ‑pee,
‑wɛe ‑mʋ ‑wi" 'a ‑nɩ "nynuu 'jeɛ 'tmʋ
'de ʋʋa' ‑nɩ "nynuu ‑pee ‑ke.
7 ‑Bo ɛ nɩ kan' ‑wɛe ʋʋ 'je Kea tɔi" tba,
'de ʋʋ 'bo Kea 'a nʋʋdɩ o "mae ɛ,
‑wɛe ʋʋ 'je ɛɛ' kɛ' wɔn 'je.
8 ‑Wɛe ka ʋʋa' "bɛma ‑wi" nɩa ʋʋ je kan' nɩ‑,
ʋʋ kuɛ "jru, ʋʋ toɛ Kea 'kpʋ "i, ʋʋa pɛe kmuɛ "i,
‑wɛe ʋʋ se Kea 'a ‑tɩ' tɔ' 'ʋn 'je.
9 Eflaimʋ 'a 'cɛ ‑ʋʋ ‑jea plʋ nʋ ‑ʋʋ ‑jea tʋ ‑fɔn' ɛ,
tʋ ‑fɔn' nɔ" ɛ, ʋʋ toɛ 'kpʋ.
10 Ʋʋ se Kea 'a dbɛɛdɛ 'ɛ ‑tɩ' ‑tu",
ka Kea 'a kɛ' "siia' 'nynɩ ʋʋ seɛ "i nɩ ʋʋ 'je kea 'a kɛ' i kpʋn.
11 Ɛɛ' jrii ɛ nʋa o,
dɩ klae" ɛ nʋa 'de ʋʋ "juɛi, ʋʋ "maeɛ ‑mɩ ‑wee'‑ o.
12 'De Sɔan 'a ‑kle' 'di 'de Esipʋ ‑blʋa "kpei ɛ,
Kea nʋɛ jrii' 'de ʋʋ "bo ‑wi" "juɛi.
13 Ɛ kain ɛ 'tɔniɛ wɔn ʋʋ je ‑si',
‑wɛe ɛ po "ni 'fɔi" ka ‑gblo" nɩa.
14 Bue" mɛ ‑kɔn ʋʋpʋ‑ "juɛi 'de ‑sɔn 'di
‑wɛe nɛ kɔn 'e ʋʋpʋ‑ "juɛi "maʋ.
15 Ɛ kain ɛ "sou wɔn 'de ‑pɩɩɔn" blʋa "kpei
‑wɛe ɛ ‑sa ʋʋpʋ‑ "ni 'na tʋn 'ʋn.
16 'Bo "sou 'di 'bo "ni 'a 'sɩn a 'wlʋ
‑wɛe ɛɛ sɛn i 'de ɛɛ nʋ "ni ‑gbuu.
17 Ʋʋa kpa ʋʋa' dɛsaʋn nʋa' nya,
ʋʋ toɛ Kea ‑nɩa 'e dɩ ‑wee'‑ "klein "jrukpɔ' wɔn o 'de ‑pɩɩɔn" blua "kpei.
18 Ʋʋ ‑tɩɛn' Kea i 'de ʋʋ pɛe o
‑wɛe diiɛ ‑jɛ ʋʋpʋ‑ mɔ nɩa "i, ɛ 'jeɛ ʋʋpʋ‑ "nyɩ.
19 Dɛ ʋʋ 'tmʋa 'de Kea ‑pee ɛ ka:
Kea 'bɛɛ 'mɛ ɛ 'jea diiɛ "nyɩ 'de ‑pɩɩɔn" 'blʋa "kpei?
20 Ɔ bla "sou tu "jru 'sʋ "ni 'wlʋ 'e 'wɛ,
"ni ‑gbii a ‑siɛ' i, Kea bɛɛ' 'mɛ
ɛ 'je ‑a diiɛ "nyɩ ‑ae ɛ 'bɛɛ 'mɛ ɛ 'je ɛɛ' 'cɛ nmi "nyɩ?
21 Tʋ "bo 'wɔan wlu ‑nɛ 'sʋ ɛ 'kpa 'cɛn,
'cɛn ɛ 'kpa ɛɛ nɛ ‑teɛ Sakɔbʋ ‑pʋn",
ɛ 'kpa 'cɛn 'de Israɛ "kpei.
22 Dɛ ‑nʋɛ ɛmɛ ‑nɩ ʋʋ se Kea ‑kwlɩ" ‑te',
ʋʋ se Kea 'a nyʋ sʋn opotɩ‑ tɔ' 'ʋn 'je.
23 Ɛ wlua 'de bue" ‑nɩa "jɛi ‑pee 'sʋ jaʋn kain ɛ wɔn.
24 Diiɛ ɛ "nyɩa ʋʋpʋ‑ mɛ ‑nɩ
manɩ ‑wlʋ 'e "jɛi ‑ɩa blu ɩmɩ ‑nɩ diiɛ 'ɛ "jru.
25 Ʋʋ diɛ "ikmaʋ 'a diiɛ due due',
diiɛ Kea "nyɩa ʋʋpʋ‑ ɛ ʋʋ dbo.
26 Pooɔ' ‑wlʋa 'e 'jrʋ 'a 'wlʋ na' o,
'jrʋ ‑gbɩn "kpei mɩ ɛ ja.
27 Ɛ 'wla nmi ‑tuu" ‑tuu
'de ʋʋpʋ‑ "kpei ka "puue nɩa.
Ɛ "cniɛ nuɩ "i 'de ʋʋpʋ‑ "kpei ‑ke
ka 'tɔniɛ 'ɛ ‑pɩɩɔn" nɩa.
28 ‑Ta ʋʋ 'kɩɩan "jru i 'bo ɛ 'wlɛi,
‑wɛe ɩ ‑gbae ʋʋa' 'pɛna' 'dei.
29 Ʋʋpʋ‑ di' ʋʋ je dbo.
Dɩ "klein ʋʋa pɔan Kea "nyɩ ʋʋpʋ‑ 'mɛ.
30 'Kaa dɩ "klein ‑nɩa 'mʋʋa‑
ʋʋa' tɔ' se blu 'de ‑mɛ 'kamɔ
diiɛ nɩ 'de ʋʋpʋ‑ wɔn 'di.
31 'Sʋ Kea 'a 'cɛn 'wlʋɛ "blo 'de ʋʋpʋ‑ "kpei,
ɛ bla ʋʋa' nyʋ ‑jʋ ‑kua "kpei,
ɛ 'dba ‑kwɩɩ" mɩɩ" ‑nɩa 'e Israɛ ‑blʋa "kpei ɛ.
32 Dɩ "klein ‑nʋʋa 'mʋʋa‑ ʋʋ kpa dɛsaʋn nʋa' nya,
jrii' "klein ‑nʋʋa 'mʋʋa‑ ʋʋ sɩ tɔ' 'ʋn 'je.
33 Ʋʋa' 'kmʋ nɩa' ‑wee'‑ nɩɛ 'e ‑cɛi" 'bɛɛa' 'di,
dɛɛ waa ʋʋpʋ‑ 'dii 'de nɔ" 'oo nɔ" ‑wee'‑ "klein 'di.
34 Ɛ ja ʋʋpʋ‑ 'mɛa "kpei 'sʋ ʋʋ "biiɛ i 'de ɛ o,
‑wɛe ʋʋa ‑pɔn Kea i 'de ʋʋa pɛe ‑wee'‑ 'ʋn.
35 Ʋʋ poɛ ‑tɩ' ‑kwlʋ o ka ɛ nɩa ʋʋa' ‑kliosou" ɛ,
ka Kea ‑nɩa 'e dɩ ‑wee'‑ "klein "jrukpɔ' nɩa ʋʋa' o wlu i ɛ.
36 ‑Bo ʋʋa seɛ baeɛ, 'de ɛɛ' 'srɛ i pooa' 'ʋn ‑o.
Ʋʋa 'bɛɛ "i 'de 'srɛ 'ʋn.
37 Dɛ ‑nʋɛ ʋʋa' pɛe se "isrɛ 'de ɛɛ' ‑tɩ' 'ʋn.
Ʋʋa' kpʋn dbɛɛdɛ ‑nɩa 'de ʋʋ ke ɛ 'nynɩ ''kpei.
38 'Kamɔ ɛ nɩ 'mʋʋa‑ 'sʋ
'de ɛɛ' nyiɔɔ' wɛe 'jea klaa' 'a ‑tɩ' 'ʋn ɛ,
ɛɛ' 'wlʋɛ ʋʋa' ‑kɔ "kpei ɛɛ' ‑sa ʋʋpʋ‑ i.
‑Sɔn jrɔ' ɛ kpʋʋɛn pɛe i,
ɛ seɛ "i nɩ ɛɛ' 'cɛn 'je ʋʋpʋ‑ "kpei 'wla.
39 Ɛ poɛ ‑tɩ' ‑kwlʋ o ka ʋʋ sea 'e 'dei ku ɛ,
ka pooɔ' ‑ɔ ‑sia' ‑wɛe ɛɛ' jia de ɛ.
40 'Bo nɔ" jrɛ' 'di ʋʋa toɛ wɔn o 'de ‑pɩɩɔn" 'blʋa "kpei,
'bo nɔ" jrɛ' 'di ʋʋ ‑sa ɛɛ' 'cɛn "blo
‑ta dɛ 'oo dɛ jrɛ' sea nɩ ɛ.
41 Ʋʋ 'bɔɔ 'de ʋʋ je Kea i ‑tɩn';
‑wɛe ʋʋ "kae Israɛ 'a Kea ‑ɛ ‑kweɛai "jrii.
42 ‑Sɔntɩ ɛ ‑seia ʋʋpʋ‑ 'de ʋʋa' tʋnyʋ 'kwa ke,
dɩ klae" ɛ nʋa ʋʋ "maeɛ ɩ o.
43 'De Sɔan 'a 'blʋa 'a 'fɔi"
‑nɩa 'e Esipʋ ‑blʋa 'di ɛ, Kea nʋɛ jrii' klae".
44 "Ni ‑gbii "klein ‑wee'‑ ‑srɛɛn nmɔ 'ʋn,
nyɔ '‑o nyɔ jrɔ' seɛ 'bɛɛ‑ ɔ 'jɩ 'na.
45 Ɛ ja boo "wlu ɩa jea ʋʋpʋ‑ 'a nmɔ 'na,
ɛ ja ‑gbɔnɛ, ɛ ja 'wɛ 'de 'blʋa 'di,
46 ɛ ja ''plain ‑too', ɩ dooa ʋʋa' ‑kle' ‑wee'‑,
‑wɛe ɛ ja kpɔn "wɔn ‑mɩ dooa ʋʋa' dii ‑wee'‑.
47 Ɛ nʋɛ "ni ke, "ni ‑kɩɩn ɛ je ʋʋa dii o,
ti ʋʋ doa ‑wee'‑ i ‑sa.
48 "Ni ‑kɩɩn ‑sa ʋʋa' nɔ" dɩ ‑wee'‑ i
‑wɛe ‑tɛn dooa ʋʋa' poodɩ ‑wee'‑.
49 Ɛ ‑fi" ɛ ɛɛ' 'cɛn ‑gbɔa ke 'kle 'de ʋʋ "kpei
ɛ ke ɛɛ' "sʋɩ ‑jʋ ‑blea 'kle 'a ‑gbɛ ke‑.
50 Ɛ kpa ɛɛ' 'cɛn nya,
ɛ se ʋʋpʋ‑ ‑seie 'de 'mɛa' 'kwa.
‑Wɛe ɛ ja ʋʋpʋ‑ 'wɛ klaa" "kpei ɛmɛ
‑tɩ ʋʋa' "ku 'pɛɛn i 'de ‑pɩɔn" 'blʋa "kpei.
51 Ɛ ‑sa "i ‑saanynu ‑nɩa 'e Esipʋ ‑blʋa 'di ‑wee'‑ 'kmʋ.
"Nynuu‑ ‑tɔe ‑nɩa 'de Kamʋ 'a 'blʋa 'di ɛ,
ɛ ‑sa ʋʋ ‑wee'‑ 'kmʋ ‑ke.
52 Ka nɔ" dɩ nɩa, ɛ kɔn ɛɛ' 'cɛ 'juɔi
ɛ je ʋʋpʋ‑ 'de ‑pɩɩɔn" blʋa "kpei kpa
ka 'blae 'dei ‑tei a kɔan ɔɔ' 'blae "juɛi ɛ.
53 Ɛ ‑criɛ" ʋʋpʋ‑ kwa "kpei,
faʋn se ʋʋpʋ‑ nʋ 'sʋ
'tɔniɛ "muua‑ ʋʋa' tʋnyʋ "jrui.
54 Ɛ kɔn ʋʋpʋ‑ "juɛi ɛ je ʋʋpʋ‑ 'de 'blʋa ‑kwea i 'di kpa,
‑wɛe ɛ kpa ʋʋpʋ‑ 'de crʋ
ɛ ‑sa nyʋ 'kwa i 'de ɛɛ' "ikmaa' 'ʋn ‑kwlɩ".
55 Ɛ nʋɛ 'blʋa 'srʋ i 'de ʋʋpʋ‑ "juɛi
‑wɛe ɛ ‑seeɛ 'ʋn 'de ʋʋ ‑pee,
‑wɛe jrɔ' 'ble ɔɔ' ‑nɩ 'fɔ mɛ ‑nɩ ɔɔ' 'kɛn‑.
Ɛ nʋɛ ‑wɛe Israɛ ‑nyʋ "ti 'de Kanaa ‑wi" 'a 'blʋa "kpei.
56 'Kaa ʋʋ nɩɛ "i ʋʋ 'je Kea ‑nɩa 'e dɩ ‑wee'‑ "klein "jrukpɔ'
‑klan" "kpei ‑te' 'sʋ ʋʋ toɛ wɔn o.
Ʋʋ se ɛɛ' kɛ' wɔn 'je.
57 Ʋʋ tɛɛn ɛ kɩɩn ka ʋʋ "bo ‑wi" nʋa,
ʋʋ se wlu "kpei kpʋn.
Nyʋ seɛ 'bɛɛ‑ nyʋ 'je ʋʋpʋ‑ ‑kwlɩ" ‑te'
ka plʋ 'a 'sɩn ‑ɛ ‑floa" nɩa.
58 Ʋʋa' kɔin "juɛi ‑gbɛɛa' ‑sa ɛɛ' 'cɛn "blo
wɛe ʋʋa' kɔin ‑mɩ a nyɛɛ i.
59 Kea 'wɔn ɛ 'sʋ ɛ 'kpa 'cɛn
‑wɛe ɛ ‑gbai' Israɛ kwa i.
60 Ɛ 'bɔ ɛɛ' ‑tein ‑nɩa 'e Silo ɛ,
‑wɛe ɛɛ' ‑gbu" ‑jɛ ɛ poa
‑ɛ ‑nɩa 'e nyʋ "klu ɛ 'bɔ ‑mɛ 'mɛ.
61 Ɛɛ' kɛ' ‑gbau' ‑ɛ 'di ɛɛ' "ikmaa' nɩa o,
ɛɛ' dɛwɔnɩa' nɩa o ɛ "tai ɛ "i 'de ɛɛ' tʋnyʋ 'kwa.
62 Ɛ 'kpa 'cɛn 'de ɛɛ' 'cɛ ‑pee
‑wɛe ɛ "tai ʋʋpʋ‑ "i 'de ‑placɛnɛ "i.
63 Nɛ sin ʋʋa' ‑kwɩɩ" mɩɩ" 'mɛ,
nyʋ se blei nyʋ se ʋʋa' 'nynɩɩ mɩɩ" 'da i.
64 Kea 'a 'sraa ‑saʋn ‑mʋ ‑wi" 'mɛɛ ‑cnɛ "i,
‑wɛe ‑tɩɔn" nyʋnʋkpae' ‑mʋ seɛ 'bɛɛ‑ ʋʋ 'je ‑fɩn''.
65 Ka "nyɩɔn 'kpai 'a ‑gbuua' 'de jajri 'di ɛ,
'kamɔ Tʋ "bo ‑gbuue'‑,
ka nmɔ' ‑sia tʋ ‑fɔn i "jri ɛ.
66 Ɛ na ɛɛ' tʋnyʋ ‑nɩa 'kwla 'kpaa "kpei,
‑wɛe "ku 'wlʋ ʋʋ "kpei.
67 Ɛ ‑saa Sosɛfʋ 'a ‑gbu" ‑sɔnyʋ ‑jei",
‑wɛe ɛ se Eflaimʋ 'e 'blʋa 'di nyʋ ‑sa.
68 'Kaa Suida 'a 'blʋa 'a blo' wɔn mɛ ɛ ‑sa 'e mu,
Selisalɛmʋ mɛ ‑ɛɛ "dia ɛɛ je.
69 'Bo 'mʋʋa‑ 'bomɔ ɛ poo ɛɛ' ‑gbu" klaa"
‑ɛ ‑kweai 'de jaʋn 'a 'kee dein",
'de ka 'blʋa nɩa ‑sisi' ɛ nɩ kan'
'de 'wɩ 'o 'wɩ ‑wee'‑ "klein 'di.
70 Ɛ ‑sa 'e ɛɛ' dbonʋɩ Dafi 'mɛ,
ɛ ‑sɔ 'de 'blae 'dei ‑te na'.
71 Ɛ ‑sɔ 'de nɔ" dɩ "klu,
‑wɛe ɔ 'je Sakɔbʋ 'a "nynuu‑ ‑nɩa Kea
'a 'cɛ Israɛ ‑nɩa ɛɛ' 'bleenyʋ ‑je o po.
72 Dafi poɛ ʋʋpʋ‑ ‑je o 'de pɛe 'dɔe 'ʋn,
‑wɛe ɔ po ʋʋpʋ‑ ‑je o 'de ‑cɛi" "isrɛa' 'ʋn.