‑Ɩn ‑bo 'ʋn 'bɔ ɛ 'ma ‑kea" nɔ"
71
Tʋ "bo, ‑mɔ ‑nɩ 'ma sro' 'wlaaɩn',‑ɩn ‑bo 'mii "taiɛ 'kpɩ 'bo "mii waa.
2 ‑Mɔ ‑srɛai" ɛ, ‑ɩn ‑seie 'ʋn,
kɩɩn ‑ɩn ‑wlʋ 'ʋn o, ‑ɩn ‑te' doun" ‑wɛe ‑ɩn ‑je 'ʋn 'pʋʋ‑.
3 ‑Mɔ ‑nɩ ‑kliosou" ‑ɛ ‑sɔn 'ɩn 'je 'kwla paa‑,
‑ta 'ɩn 'jea i ‑te jeejee ɛ,
‑ɩn cɛn wlu ‑tie" ‑ɩn ‑na ‑ɩn ‑je 'ʋn 'pʋʋ‑,
dɛ ‑nʋɛ, ɛmɛ ‑nɩ ‑mɔ ‑nɩ 'ma ‑kliosou",
‑mɔ ‑nɩ 'ma 'kwla pa na'.
4 'Oo 'ma Kea, ‑ɩn ‑seie 'ʋn 'de 'diwɔnyniiʋn 'kwa,
'de "kudbaʋn 'kwa, 'de nyɔsaʋn 'kwa.
5 ‑Mɔ 'ɩn tba tɔi" Tʋ "bo,
‑ta 'ɩn nɩa ‑kɔai" ‑saan" a, ‑mɔ 'ɩn 'pɛn jai.
6 Kɩɩn dɛ ‑tba' 'ma 'wlʋ nɔ" ɛ,
‑mɔ ‑nɩ 'ma kwawɛi ‑tei,
'ɩn 'wlʋa a ‑mɔ ‑tu" 'ma ‑tɩ',
ɛmɛ ‑tɩ 'ma 'bɛɛ ‑ma 'nynɩ "i nɔ" 'oo nɔ" ‑wee'‑ 'di.
7 'De nyʋ ‑tuu" "juɛi ɛ,
'ma 'kmʋnɩa' nɩɛ jrii' ‑o,
'kaa ‑mɔ ‑nɩ 'ma 'kwla pana' ‑cɛɛn'‑.
8 ‑Ma 'nynɩ "i 'bɛɛa' "jiɛ 'de 'ʋn 'wɔn,
‑sɔn' 'oo ‑sɔn' 'di ɛɛ 'tmʋɛ ‑ma 'beɔ nɩ ‑tɩ.
9 'Ɩn 'kpa ‑kea" kaan la,
‑ɩn ‑bo 'ʋn nyai ‑fuun ɛ,
‑bo 'ɩn se 'kpɩ 'ble 'de ɛ, ‑ɩn ‑bo 'ʋn 'bɔ ɛ.
10 'Ma tʋnyʋ a pooɛ 'ma ‑tɩ',
nyʋ ‑ʋʋa fua 'mii pooɛ 'ma ‑tɩ'.
11 Ʋʋa' 'sʋ a "wuuan' ʋʋ 'na:
Kea 'bo ɔ, Ao nʋɔ i ao 'jeɔ kpʋn.
Nyɔ 'oo nyɔ jrɔ' se nɩ ɔ 'jeɔ ‑seie
12 Kea, ‑ɩn ‑bo 'ʋn o teɛn, 'ma Kea,
‑ɩn ‑too"‑ ‑ɩn ‑je 'ʋn sʋn o poa' ji.
13 Tai' "maa ʋʋpʋ‑, ʋʋ 'je i sɔn‑,
nyʋ ‑a ‑pɔn a 'ma 'kmʋ ‑saa' i ɛ,
‑tɩn' 'tbaa ʋʋpʋ‑ "i, ʋʋ 'jee 'kle 'di 'kpa,
nyʋ ‑ʋʋa ‑pɔn a 'ma dɛsaʋn "jrii nʋa' i ɛ.
14 'Kaa 'mɔ ɛ, 'ɩn ‑teɛ' ‑mɔ Kea ‑kwlɩ" 'de nɔ" ‑wee'‑ "klein 'di,
'de ‑mɛ 'de, 'ɩn nɩɛ "i 'ɩn 'je ‑mɔ Kea ‑ma 'nynɩ "i 'bɛɛ‑.
15 Kɩɩn 'de 'wɩ 'oo 'wɩ ‑wee'‑ "klein 'di
'ma muɛ 'tmʋa ka ‑ma ‑nyɩa" nyʋ 'pʋʋa',
ka 'dɔe ‑ma nʋa nyʋ "jrii sea ‑sro" ‑ta 'ble ɛ.
16 ‑Ma nʋʋdɩ ‑ɩ ‑kmai" ɛ,
'ma mʋɩ 'tmʋa' 'oo Tʋ "bo,
'ma muɛ ‑tɩ ‑kwlʋ o poa' ka 'pʋʋa' 'wlʋa 'e ‑ma 'sʋ 'kwa a.
17 Kea, dɛ ‑tba' 'e 'ma ‑koa" nɔ" ‑ɛ ‑jɛɛa kaan,
‑mɔɔ ‑tu" 'ʋn 'snɩ, ‑wɛe 'ma 'tmʋ dɩ 'dɔe ‑ma nʋa.
18 Kaan ka la ‑jɛ 'ɩn 'kpa ‑kea" ‑wɛe 'ma "jru "plua a,
Kea, ‑ɩn ‑bo 'ʋn 'bɔ ɛ. ‑Wɛe 'ɩn 'je ‑ma "ikmaa' 'tmʋ,
'de nyʋ ‑nɩa 'de 'ma ‑nɩ nɔ" 'di ke,
‑ma 'kwa i kua' ke, 'de nyʋ ‑ʋʋa mua "mɩɩ‑ tbaa' ‑pee.
19 'Kaa ‑ma "i srɛa' 'ʋn ɛ Kea,
ɛ mu ɛ se "ti 'na 'ble,
dɛ ‑nʋɛ ‑ɩn nʋɛ dɩ klae" klae".
Kea, nyɔ ‑ke ‑mɔ ‑je "i ‑tee' ‑ɛ?
20 ‑Mɔ ‑ɔɔ ‑jaaʋn 'de "nmia ‑tɩ ke 'kle 'di,
'kaa ‑ma muɛ ‑a 'kmʋ nɩa' "nyɩa,
‑ma muɛ 'ʋn 'de "bie 'di ‑saa'.
21 ‑Mɔ ‑ɔɔ mu 'ʋn 'ma dɛwɔnɩa' "nyɩa,
‑wɛe ‑ɔ ‑je 'ʋn ‑tɩ' ‑kwlɩ' i ‑tu" debɔɔ' nɔ".
22 'De 'mɔ ɛ, 'ma muɛ ‑si' ‑plʋ blaa'
ɩn 'je ‑ma 'nynɩ "i 'bɛɛ‑ de 'bɔɔ "nɔ,
'ma muɛ blea' ka ‑ma kpʋan wlu "kpei ɛ
'ɩn 'jeɛ 'tmʋ. 'Ma muɛ 'mʋa‑ nʋa',
'ɩn 'je ble dɛ ‑nʋɛ ɛmɛ ‑nɩ ‑ɩn ‑seie' 'ʋn 'ɛ Israɛ 'a Kea.
23 'Ma wɔn ‑mɛ ɛɛ muɛ ‑ma 'nynɩ "i 'bɛɛa',
'ma muɛ 'mʋa‑ nʋa' 'ɩn 'je ble dɛ ‑nʋɛ ɛmɛ ‑nɩ ‑ɩn ‑seie 'ʋn 'ɛ.
24 'De nɔ" 'oo nɔ" ‑wee'‑ "klein 'di,
'ma muɛ ‑ma nyʋ 'pʋʋtɩ‑ tɔ' "kpei naa' dɛ ‑nʋɛ,
ɛmɛ ‑nɩ nyʋ ‑nɩai" ‑ʋʋ ‑jea 'ʋn 'kmʋ ‑sa,
‑tɩn' 'tbaa ʋʋpʋ‑ "i, tai "maa" ʋʋpʋ‑ 'mɛ.