Kea ɛ ‑pʋʋ' 'ʋn "ni kpʋʋɛn 'ʋn ‑pliɔn'
69
Dafi 'a 'dʋ ‑wlʋa 'de 'dʋblei klaa" 'a 'dʋsbɛ 'di ɛ, ‑si' ‑plʋ mɛ nyɔ ɔ bla.
2 'Oo 'ma Kea, ‑ɩn ‑pʋʋ' 'ʋn,
"ni kpʋʋɛn 'ʋn ‑pliɔn' ‑jei".
3 'Ɩn bluɛ 'e 'pɔɔ 'di, dɛ 'ɩn 'jea kwa "i ‑te' ɛ se nɩ‑.
'Ɩn bluɛ 'e "nibie', "ni "muua‑ 'ʋn "jrui.
4 'Ɩn "wɔɔ' ‑wɔɔ ‑wɔɔ"‑ 'sʋ 'ɩn je sea,
'ma pliɔn' ‑je a jɛ 'sʋɛ.
'Ɩn ‑gbʋɛn 'e ‑jei" ‑gbʋʋn ‑gbʋʋn" 'ma jea 'ma Kea fuo‑.
5 Nyʋ ‑ʋʋ ‑nyɩa 'ʋn foo" 'ʋn ‑tɩ 'ʋn ɛ,
ʋʋ ‑tiɛi" ʋʋ je 'ma "jru mɩɩ ‑sii.
'Ma tʋnyʋ ‑ʋʋ ‑nɩai" ‑ʋʋ ‑jea 'ma 'blʋku i ‑saa', ʋʋ kmai".
Dɛ 'ɩn sea 'ʋn "duo mɛ ‑ɛɛ kpan 'ɩn 'je ‑sa?
6 'Kaa ‑mɔ Kea ‑ɩn ‑juuɛ' ka 'ma nʋʋdɩ nynia "jrii,
'de 'ma dɛsaʋn se 'kwla pa 'de ‑ʋn "juɛi.
7 Nyʋ ‑tea' ‑mɔ Kea ‑kwlɩ" ‑tɩn' 'bo ʋʋ "i 'dbaa,
Tʋ "bo, 'blʋa ke jaʋn 'a Kea, Israɛ ‑kɔun 'a Kea,
‑ɩn ‑sɔn 'ʋn ‑ɩn po 'ʋn sʋn o
‑wɛe nyʋ ‑sea' ‑mɔ Kea juuo ‑ɩn ‑je ʋʋpʋ‑ 'kle "kpei ja‑,
'oo Tʋ "bo, 'oo Tʋ "bo, "sʋɩ ‑nɩa 'de jaʋn 'di 'a Kea,
Israɛ 'a Kea, nyʋ ‑bii" 'a 'de ‑mɔ o ɛ,
‑tɩn' 'bo ʋʋ "i 'dbaa 'de 'ma ‑tɩ' 'ʋn.
8 'Kaa 'de ‑ma "juɛi nʋʋ ‑tɩ 'ʋn mɔ ‑tɩn' a 'tbaa "mii,
‑wɛe tai' a "maa 'ʋn.
9 'De ɛɛ' ‑tɩ' 'ʋn 'ɩn 'kpa 'dʋɩ 'de 'ma 'cɛ ‑wi" "juɛi,
ka nyɔ ɔ sea nyɔ juuo 'ka 'ɩn nɩ 'de 'ma de 'a "nynuu‑ ‑pee.
10 ‑Ma ‑gbu" 'a 'tʋn ‑nɩa 'de 'ʋn pɛe o, ɛ ‑kɔ' nɛ ‑gboa,
‑crei" ʋʋa ‑creea" ‑ʋn ɩa 'da 'mɔ 'mɛ ‑ke.
11 'Ɩn ‑fɩɩn" 'ɩn 'bɔ wɔn ɛmɛ ‑tɩ nyiɔpʋ‑ a ‑cree" 'ʋn.
12 ‑Bo 'ɩn paa 'kwɛ dɩ 'ʋn, ʋʋa wlaa 'ʋn 'ɛ.
13 'Mɔ ‑nɩ ʋʋa' ‑sɔn "i cɛn i 'de ‑kwlɔ ‑kwea.
‑Wɛe nmɔ 'na ʋn a blee 'ʋn 'dʋ 'ʋn.
14 'De 'mɔ ɛ, Kea, 'ma poɛ ‑ʋn baewlu o,
'ma baewlu kpʋn nɔ" nyni 'oo Tʋ "bo
‑ɩn kpʋn 'ma baewlu 'de ‑ma nyiɔɔ' ‑tɩ' kmaa' 'ʋn,
'de ‑ma 'diwɔnmɔʋn 'a 'ʋn, 'de ‑ma wlu "kpei kpʋn 'a 'ʋn.
15 ‑Ɩn ‑bo "mii "taiɛ 'ɩn 'bo 'pɔɔ ‑sɔn paa, ‑ɩn ‑sa 'ʋn 'de mu.
‑Ɩn ‑sa 'ʋn 'de nyʋ ‑ʋʋa ‑flɛɛn a 'ʋn 'kwa 'de 'ɩn 'bo "nibie' bluɛ.
16 "Ni 'a ‑gboo 'bo 'ʋn "jru i "fiiɛn,
"ni 'bo 'ʋn "jru i "muuɛ, 'blʋ 'bo 'ʋn "kpei ‑cri" ɛ.
17 ‑Ɩn ‑wɔn 'ʋn Tʋ "bo,
‑ma nyiɔɔ' ‑tɩ' kmaa' a nʋɛ 'ʋn 'dɔe "jrii,
‑ma nyiɔɔ' wɛe 'jea' 'jeɛ nʋ ‑ɩn ‑je 'ʋn o "biie‑.
18 ‑Ɩn ‑bo ‑ma "juua 'kwla ‑tu" ɛ 'de 'mɔ ‑nɩa ‑ma dbonʋɩ ‑pee.
'Ɩn nɩɛ "nmianyɔ, ‑ɩn kpʋn 'ma baewlu ‑too"‑.
19 ‑Ɩn ‑kpa 'ʋn ‑pʋn", ‑ɩn ‑pʋʋ' 'ʋn.
‑Ɩn ‑seie 'ʋn 'de 'ma tʋnyʋ 'kwa.
20 ‑Ɩn ‑juuɛ' ka ʋʋa ‑cree" 'a 'ʋn ɛ,
ka ʋʋa 'dbaa 'ʋn ‑tɩn' "i ɛ,
ka ʋʋa ‑sa 'ʋn "kukpei ɛ,
'ma tʋnyʋ ‑wee'‑ 'kɩɩɛn "jrui 'bo ‑ʋn ‑juɔi".
21 ‑Crei" 'a 'mɔnɩ se 'ʋn 'mii cɛɛn 'ma pɛe cɛn mlɛʋn",
ɛɛ' 'wɛ kpʋn 'ʋn 'ɛ, 'ma fuɛ nyɔ ‑jea 'ma wɛe 'jeɛ,
‑ɔ ‑jea 'ʋn ‑tɩ' ‑kwlɩ' i ‑tu" ɛ, 'kaa 'maa 'je nyɔ jrɔ'.
22 'Ma tʋnyʋ poɛ 'ma diiɛ "kudba dɛ o,
‑bo "ni 'na tʋn nʋ 'ʋn ɛ, ʋʋa "nyɩɛ 'ʋn ‑koonmɔ‑.
23 Ʋʋa' ‑kɔ' diiɛ ke ʋʋa' "wliiɛ ‑nɩ ʋʋa' ‑cɛ" 'ɛ ‑sepɩɛ,
ʋʋ ke ʋʋa' "dɛi ‑wi" ke‑.
24 Ʋʋa' "jri kpe‑, ʋʋ 'bo i 'jeeɛ 'bode,
‑ɩn ‑jaa ʋʋpʋ‑ ja 'de nɔ" ‑wee'‑ 'di.
25 ‑Ɩn ‑cɛi' ‑ma 'cɛn 'de ʋʋpʋ‑ "kpei,
‑wɛe ɛ 'je ʋʋpʋ‑ i siian ka nɛ ɛ siaan nyʋ ɛ.
26 Ʋʋa' ‑gbu" sɔn i, nyɔ jrɔ' 'bo 'e ʋʋa' poo" ‑sɔn nɩɛ.
27 Nyɔ ‑ɩn bla mɔ ʋʋa ‑tu" 'kle,
nyɔ ‑ma bla ‑kɔ nɩa ‑pʋn" mɔ ʋʋa ‑tu" 'kle.
28 Ʋʋa' dɩsaɩn ʋʋ nʋa, ɩ 'crɩɩɛ 'de ʋʋpʋ‑ "jru,
‑ɩn ‑bo ʋʋpʋ‑ 'a ‑kɔ "kpei 'wlʋɛ.
29 ‑Ɩn ‑mʋʋ' ʋʋpʋ‑ 'a 'nynɩ 'de 'kmʋ nɩ sbɛ 'di,
ʋʋa' 'nynɩ 'bo 'e "isrɛnyʋ "klu nɩɛ.
30 'Mɔ ɛ, 'ɩn nɩɛ wɛenyɔ‑, 'ma sea',
'oo Kea, 'de ‑ma nyʋ sʋn o poa' 'ʋn ɛ,
‑ɩn ‑cri" 'ʋn kwa "kpei.
31 'Ma muɛ blea' 'ɩn 'je ‑ma 'nynɩ "i 'bɛɛ‑,
'oo Kea, 'de 'ɩn 'je ‑ʋn 'nynɩ ‑sa, 'de 'ɩn 'je ‑ʋn sɛ' po.
32 Ɛ nmɔ "jrii 'oo Tʋ "bo,
ɛ je bli' ‑gblɔ ‑blea ‑gbɩn ke nmi ‑blea kɔɔfa' ‑sii.
33 Aopʋ‑, wɛenyʋ aoa 'jee ao nʋ 'mʋa‑!
Kɩɩn ao nyʋ ‑biia" 'de Kea o ɛ, 'kmʋnɩa' nɩ aoa' dɛ ‑o.
34 Dɛ ‑nʋɛ Tʋ "bo a poɛ wɛenyʋ 'a wlu doun" o,
‑bo nyʋ ‑ʋʋa kpʋn a wlu "kpei
nɩ 'e ‑kaso 'di ɛɛ' po ʋʋpʋ‑ 'a ‑tɩ' 'plʋ sʋn' i.
35 'blʋa ke‑, jaʋn ke‑ 'tɔniɛ ke‑ dɩ "klein ‑a fɔan ke,
ao 'bɛɛ Kea 'a 'nynɩ "i.
36 Kea a muɛ Selisalɛmʋ 'pʋʋa',
‑wɛe Suida ‑kwlɔ ‑dee 'je pooɛ‑,
Kea 'a "nynuu‑ a muɛ dejia' 'de ɩ di, ‑wɛe ʋʋ 'jɩ 'ble.
37 Dɛ ‑jɛ ‑nɩa Kea 'a "nynuu‑ 'a "ji ɛ,
ɛɛ muɛ ‑wi" ‑mʋ 'a dɛ nɩa',
‑wɛe nyʋ ‑ʋʋa ‑jea Kea 'a "dia ‑mʋ ‑wi" 'a muɛ 'e "tia
Dɛ ‑nʋɛ Kea a muɛ Siɔn ‑kwlɔ 'pʋʋa',
‑wɛe Suida ‑kwlɔ ‑dee 'je pooɛ‑.
Kea 'a "nynuu‑ a muɛ de jia' ‑wɛe ɩ je ʋʋa' dɛ ‑nɩ.