Kea kpa tʋ 'a "jru
68
Dafi 'a 'dʋ ɔɔ blea, ‑ɛ ‑nɩa 'de 'dʋ "jru kpɔ' i ‑tei 'a 'dʋsbɛ 'di ɛ.
2 Kea sɔn a 'ʋn 'sʋ ɛɛ' tʋnyʋ ‑wee' ‑gba' ja,
'sʋ ɛɛ' ‑flɛɛnyʋ a 'kpa 'kwla 'de ɛ "juɛi
3 Ka dao' a cɩɩan i ɛ, 'ka ʋʋa cɩɩɛn "i,
ka "nma a cɛan "ni 'de nɛ 'di ɛ,
'ka 'di 'a wɔnyniiʋ a sɔn i 'de Kea "juɛi.
4 'Kaa "isrɛʋn ‑mʋ a muɛ 'mʋa‑ nʋa'
ʋʋa muɛ 'mʋa‑ ‑cnuɛn" ‑saa' de Kea "juɛi.
5 Ao ble ao 'je Kea 'da, ao 'bɛɛ ɛɛ' 'nynɩ "i.
Ao kain ‑jeblʋ wɔn 'de "ju ‑ɔɔ jia 'de bue" "kpei 'a ‑tɩ' 'ʋn,
ɔɔ' 'nynɩ mɛ ‑nɩ Tʋ "bo, ao nʋ 'mʋa‑ 'de ɔ "juɛi.
6 'De Kea 'a ‑te na' ‑kweai ɛ, ɛ nɩɛ "kwienynu "bo,
ɛɛ ‑fɔn' ‑tɩɔn" nynʋkpae' 'a tʋ
7 Nyɔ nyʋ 'bɔa, Kea a "nyɩɔ 'cɛ ‑tuu" ‑tuu,
ɛɛ "siiɛ ‑kaso 'dinyʋ i ‑wɛe 'mʋa‑ 'je ʋʋpʋ‑ nʋ,
'kaa nyʋ ‑jʋ ‑ʋʋa blaa ɛɛ' kɛ' wɛin ‑mʋ ‑wi" a siɛ 'de ‑pɩɔn" blʋa‑ "kpei.
8 'Oo Kea, ‑ta ‑ɩn kʋan 'de ‑ma 'cɛ 'mla a,
‑ta ‑ɩn na 'de ‑pɩɔn" blʋa‑ "kpei ɛ. ‑Te' ‑kwlʋ
9 'Sʋ 'blʋa crɛ', jaʋn kaiɛn wɔn ‑wɛe jaʋn cɛn "ni,
'de Kea "juɛi, Kea ‑nɩa 'e Sinai crʋ "kpei Israɛ 'a Kea.
10 'Oo Kea, ‑mɔ ‑dbaa "ni klaa" ‑ɛ nʋa ‑ma "nynuu 'dɔe "jrii ɛ,
‑wɛe ɛ "nyɩ nyʋ ‑sea' 'kpɩ 'ble 'kmʋ nɩa'. Ta ʋʋa' dɩ cɛan.
11 'De 'blʋa ‑nɛ 'di 'bo ‑ma "nynuu‑ ‑te, 'diwɔnmɔ Kea,
‑ɩn ‑nmaeɛ nɛ' 'de wɛenyʋ 'a ‑tɩ' 'ʋn.
12 'Sʋ Tʋ "bo 'tmʋɛ wlu due';
ɔɔ' dboʋn‑ nɩ "sʋɩ ‑tuu" ‑ʋʋa ‑tmʋ ‑pɔia" ‑tɩ.
13 'Blʋajeʋn ‑ke Israɛ ‑nyʋ a ‑fɔan' tʋ a pleɛ ʋʋ "juɛi
tai' "maa nyʋ ‑wee'‑ mɛ,
‑wɛe ʋʋa' 'nynʋkpae' ‑sia 'e ‑gbɛin" a ‑seea' ʋʋa' "wlii 'ʋn.
14 ‑Ta ao pean i' ‑mɛ "Kwi pai" 'a nain ‑pooa 'wɛi "jrui ɩa' 'jrɩ 'a nain pooɛ 'sani "jrui.
15 ‑Ta "ikma Kea ‑gba' 'blʋajeʋn ‑wi" ja a,
'sʋ dee ‑gboa dba' 'de Samɔ crʋ "kpei.
16 Aomɔ‑, crʋ ‑nmɔa "jrii ɛ,
Basan crʋ‑ crʋ ‑ɛɛ "jru ‑tiai" ɛ, Basan crʋ‑.
17 Crʋ ‑ɛɛ "jru ‑tiai" ɛ,
dɛɛ ‑tɩ crʋ Kea ‑sa 'e mu ‑ɛ "kpei
ɛ 'jea "ti aoa nʋʋ ɛ ‑kwlɛn o ‑ɛ?
Ɛɛ' crʋ tu "kpei 'bo
Tʋ "bo a mu ɛɛ' ‑te na' nʋa'
'de nɔ" 'oo nɔ" ‑wee'‑ "klein 'di.
18 Kea 'a tʋfɔn dɩ‑ ‑tiɛi" ɩ se ‑sro' ‑ta 'ble,
Kea nɩɛ 'de ɩa' ‑kwea'‑
ɛ 'wlʋɛ 'de Sinai crʋ "kpei
‑wɛe ɛ ji 'de ɛɛ' ‑gbu" ‑kweai 'di.
19 ‑Ɩn muɛ 'e "jɛi,
‑wɛe ‑ɩn kpʋn jrʋ' ‑mʋ kʋʋɔn 'ʋn,
'de 'jrʋ a nʋ ‑ʋn ‑paan' "jrii ‑ke,
‑wɛenyʋ ‑jʋ ‑a toa ‑ʋn wɔn o ‑mʋ ‑wi"
a nʋ ‑ʋn ‑paan' "jrii
'de ‑ma ‑tena 'a ‑tɩ' 'ʋn 'oo Tʋ "bo Kea.
20 ‑A po Kea sɛ' nɔ" 'oo nɔ" ‑wee'‑ di,
ɛmɛ ‑ɛɛ ‑tu" ‑aa ‑tɩ', ɛmɛ ‑nɩ ‑aa 'pʋʋ i. ‑Te' ‑kwlʋ.
21 ‑Aa Kea nɩ nyʋ 'pʋʋi Kea ‑o.
Dɛ ‑nʋɛ, Tʋ "bo 'bɛɛ ɛ 'jeɛ nʋ
‑a ‑je 'mɛa' "wɛin 'pʋ.
22 'Kaa Kea a waa ɛɛ' tʋnyʋ 'a "jru i,
kɩɩn nyʋ ‑jʋ ‑a nʋʋdɩ nyniia "jrii ɛ,
ɛɛ waa ‑mʋ ‑wi" 'a "jru i.
23 Tʋ "bo wlu' ka: kɩɩn 'ma muɛ
‑ma tʋnyʋ 'de Basan ‑saa'
‑wɛe 'ɩn 'je ʋʋ de ja‑.
Kɩɩn 'ma muɛ ʋʋ 'de 'tɔniɛ ‑sɔn ‑saa'
'ɩn 'je ʋʋ de ja‑.
24 ‑Wɛe ‑ɩn ‑je ʋʋa nmɔ "kpei na,
'de ‑ma ‑gbe' 'je diiɛ 'je 'de ‑ma tʋnyʋ "klu.
25 Ʋʋa ‑gbʋɛ 'ja ɛɛ' jea ji, 'oo 'ma Kea,
ɛɛ' ji 'ma Kea 'ma Tʋ "bo 'de
‑ta ‑kwea i ɛ.
26 Bleʋn nɩɛ 'e ‑tɔn ɔɔ' nya,
dɩblaʋn nɩɛ 'e de,
'sʋ 'nynʋkpae' ‑tɔe nɩɛ 'e ‑kwea‑ ‑mʋ
a bla diiɛn" nynuu‑.
27 Ao 'bɛɛ Kea 'a 'nynɩ "i
'de aoa' "jru i 'kɩɩɛn na',
ao po Tʋ "bo sɛ', aopʋ‑ ‑nɩa Israɛ ‑kɔʋn 'a "ji ɛ‑.
28 ‑Saan" ‑nɔ ‑nɩa ʋʋ "juɛi mɔ ‑nɩ Bɛnsamɛ,
'de ‑mɔ 'de ɛ, 'bo Suida 'a klae" ‑wi" ‑ʋʋa "bai 'a "jri jrɩ ‑tiai" tba.
‑Wɛe Sabʋlɔn 'ɔ klae" o Nɛfitali 'a klae" tba 'e.
29 'De ‑mɛ ‑ma Kea "nyɩ ‑ʋn "ikmaa',
‑wɛe dɩ ‑ɩn nʋa 'de ‑aa ‑tɩ' 'ʋn ɛ, ɩ 'je 'dei ku‑.
30 ‑Ɩn ‑teɛ i 'de ‑ma ‑gbu" ‑kweai 'di, ‑wɛe ‑ma po Selisalɛmʋ ‑je o,
'bomɔ 'blʋajeʋn 'je ‑ʋn ʋʋa' ‑paan' ja‑.
31 Wɔnkma nmii ‑pɛan i 'de ‑gblo ‑sɔn ‑ɩn nʋɛ i,
nmii 'a ‑gbaapʋ‑ o, nyʋ ‑ʋʋa jaa "jru ja 'de ‑ʋn ‑sɔn
‑wɛe ‑ʋʋ cɛan wlu ‑tie" 'de ʋʋa ja ‑ʋn 'wɛi o,
nyʋ ‑ʋʋa ‑jea tʋ 'a "dia o, ‑ɩn ‑gba' ʋʋ ‑wee'‑ ja.
32 Nyʋ klae" a 'wlʋɛ 'e Esipʋ,
Etiopinyʋ a ple' ʋʋ sroɛ sʋn 'de Kea o.
33 Aomɔ Tʋ "bo ‑nɩa 'nɔ 'blʋa 'di ɛ,
ao ble 'de Kea 'a 'nynɩ "i 'bɛɛa' 'ʋn, ao ‑sa 'Beɔ 'nynɩ. ‑Te' ‑kwlʋ.
34 ‑A ble ‑a ‑je "ju ɔɔ jia 'de bue'' "kpei 'da,
ɛɛ nʋɛ' ‑wɛe nyʋ ‑wee'‑ "klein 'je ɛɛ' wlu 'wɔn, ɛɛ' "ikmawlu‑.
35 Ao juuo ɛ ka Kea kmai" ɛ, ɛɛ' "ikmaa' poɛ "jri "kpae'
'de Israɛ "kpei, ‑wɛe ɛɛ' "ikmaa' nɩɛ 'de jaʋn 'di.
36 Dɛ ‑tba' 'de ‑ma ‑gbu" 'di ɛ, Kea ‑ɩn ‑bleɛ "ikmaa'.
Kɩɩn Israɛ 'a Kea mɛ ‑nyɩ" ɛɛ' 'cɛ 'kpɩ ke "ikmaa' ke‑,
Kea 'a 'nynɩ "bɛi.