‑Fɔn' 'ma tʋ
64
Dafi 'a 'dʋ ɔɔ blea, ‑ɛ ‑nɩa 'de 'dʋ blei klaa" 'a 'dʋsbɛ 'di ɛ.
2 'Oo Kea ‑ɩn po 'ma "kuuan doun" o,
‑ɩn ‑wlʋ 'ʋn o 'de 'ma tʋnyʋ 'ma faan' ‑pee "juɛi
3 ‑Ɩn ‑tu" 'ʋn 'kwla 'de 'diwɔnyniiʋn ‑ʋʋa pooa 'ma ‑tɩ' ‑pee,
'de nyʋ 'a kpɔ ‑ʋʋa nʋa dɛsaʋn ‑pee.
4 Ʋʋa' wlu "nma a ka ‑cɛn nɩa,
ʋʋa' wlu saɩn a tba nyʋ 'sɩn.
5 Ʋʋ pa 'kwla ‑wɛe nyɔ ‑sea' dɛjrɛ' nʋ ʋʋ 'jeɔ dɩ tba.
Ɔ seɛ ‑kwlɩ" ‑te' ʋʋ a je ɔ dɩ i tbaa‑ de dɛ jrɛ' 'ɛ waa ʋʋpʋ‑ 'dii.
6 Ʋʋa kuuɛ ba 'a dɩ i 'de dɩsaɩn 'a ‑tɩ' 'ʋn,
ʋʋa pooɛ ‑tɩ' ‑wɛe ʋʋa ‑gba' "klɛ, ʋʋ na: ‑Ɔɔ muɛ "jriɛ 'jeea'?
7 Dɩsaɩn 'a 'sʋ mɩ ʋʋa naa tɔ' "kpei, dɩ ‑a ‑tea' ɩ nyni 'e 'wɛ,
nyʋ ‑wee'‑ 'a pɛe nɩ "bie ‑gbau" ‑ɛ ‑tɩan 'di ‑su' bii ‑o.
8 'Kaa Kea tooɛ ʋʋpʋ‑ 'sɩn kɩɩn, 'sɩn kpʋn ʋʋpʋ‑ 'mɛ:
9 ʋʋa' mɩɩɔ ja ʋʋpʋ‑ ‑tɩ' o, ‑wɛe nyʋ "klein ‑a ‑gbʋn a ʋʋpʋ‑ ja,
ʋʋa ‑fun" a "jru i.
10 Dɛ waa nyʋ ‑wee'‑ "klein 'dii ‑wɛe ʋʋa 'bɛɛ Kea 'a 'nynɩ "i
'sʋ dɩ ‑nʋʋa 'mʋʋa‑ de ɛ, ɩ tɔɔ ʋʋpʋ‑ dɛ.
11 'De Tʋ "bo 'ʋn 'bo "isrɛnyʋ ‑wee'‑ a nʋ 'mʋʋa‑,
'de ɛ 'ʋn 'bomɔ ʋʋ ‑wee'‑ a 'wlaa sro'. 'De nyʋ "klein ‑srɛai" ɛ,
ʋʋa muɛ ʋʋa' ‑cɛ" ‑tɩ' o poa'.