'Ma Kea ɛɛ 'tʋn ‑sii 'kmʋ nɩa' 'mɛ
63
'Dʋ Dafi blea ‑ta ɔ nɩa 'de Suidablʋa 'a 'kpaa' "kpei 'de ɛ.
2 'Oo Kea, ɛmɛ ‑nɩ 'ma Kea.
'Ma ‑pɔn ɛ i. Ka 'blʋa ‑nɩa "kpankpan,
‑ɛ ‑jea 'sʋɛ ‑ɛɛ ‑pɔan "ni i ɛ,
'kamɔ 'ma nyiɔ jɔ ‑wee'‑ a 'wla ɛɛ' ‑fli i.
3 'Kamɔ ɛ nɩ ‑wɛe 'ma 'jraa 'de ɛɛ' 'fɔi" ‑te ‑gbu 'di
'de 'ɩn 'je ɛɛ' "ikmaa' ke ɛɛ' 'nynɩ 'wlʋʋa' 'je.
4 Dɛ dɛ‑nʋɛ', ɛɛ' 'diwɔnmɔa' ‑sii 'kmʋ nɩa' 'mɛ.
Ɛmɛ ‑tɩ ɛɛ' 'nynɩ ‑sadʋ "ti 'de 'ʋn 'wɔn.
5 'Ma 'kmʋnɩa' ‑wee'‑ a muɛ "diwan‑ poa'.
'Ma muɛ sɩn "jɛi kpaa' 'ɩn 'je ɛɛ' 'nynɩ "i 'bɛɛ‑ ‑wɛe 'ɩn 'jeɛ bae‑.
6 'Ma ‑suu a muɛ dboa' ka nyɔ ɔ dia 'cna dɩ ke
wɔnmɔdɩ 'a "kwli ‑wee'‑ ɛ.
'Mʋa‑ ‑tɩ a muɛ 'ʋn 'wɔn "jia' 'de 'ɩn 'jeɛ ‑kla ‑nynɩ ‑gba.
7 ‑Bo 'ɩn nɩ 'o 'ma 'pɛɩn' "maʋ ‑wɛe ɛɛ' ‑tɩ' 'je 'ʋn ‑kwlɩ" 'kpa a,
‑mɛ 'ma naa ɛɛ' 'sʋ 'a ‑tɩ' tɔ' "kpei.
8 Dɛ ‑nʋɛ, ɛmɛ ‑ɛɛ ‑wlʋ 'ʋn o,
ɛmɛ ‑tɩ 'ɩn nɩ 'e 'mʋa‑ 'ʋn 'de ɛɛ' ‑fli ‑sɔn.
9 'Ma ‑suu 'nɩɛ ɛ ‑pʋn",
ɛɛ' diiansʋn kpʋn ɛ 'mii ‑sisi'.
10 Nyʋ ‑ʋʋa ‑pɔan 'ma 'kmʋ ‑sakɔ i ɛ,
ʋʋa muɛ 'mɛa' ʋʋ 'je 'e ‑klu' ‑tie" cɛn.
11 Ʋʋa muɛ ‑cnɛ "i 'mɛa'
'de too' wɛ 'je ʋʋpʋ‑ 'wɔn i di.
12 'Kaa 'beɔ ‑mɔ ɔɔ muɛ Kea 'mʋa‑ i nʋa';
nyɔ "o nyɔ ‑ɔɔ mua wlu ‑tie" cɛa' 'de Kea 'a 'nynɩ 'ʋn ɔɔ muɛ 'nynɩ 'wlʋa,
dɛ ‑nʋɛ sɩ 'tmʋʋ 'a wɔn ɔ muɛ "sun 'a.