Kea mɛ ‑ɛɛ 'pee 'jesʋn "srɛi 'de 'blʋa "kpei
58
Dafi 'a 'dʋ ‑ɛ ‑nɩa 'e 'dʋ ‑jeopoi klaa'' 'a 'dʋsbɛ 'di ɛ, ‑ɩn ‑bo ɛ i ‑sa a mɛ ‑nɩ ɛɛ' blewlu‑.
2 Tɔ' ‑oo, aoa' wɔn "mua' mɛ ‑ɛɛ mu tɔ' ‑tɩ 'tmʋa'?
Aoa muɛ nyiɔpʋ‑ 'a 'pee 'jea' 'de tɔi" ‑tɩ 'ʋn?
3 "Ɩɩn‑, ao 'jeeɛ "jrii ka ɩ sea nɩ 'ka aoa nʋɩ.
Aoa sʋn "feeɛ i de dɛsaʋn nʋ ‑tɩ 'ʋn.
4 'Diwɔnynia' ke nyɔ ɔ 'wlʋʋ,
‑bo ʋʋa sea 'wlʋ 'sʋ ʋʋ ke sɩ 'tmʋa' 'wlʋʋ,
'sʋ ʋʋa bla nyʋ ‑pa "kpei.
5 Dɩ ‑a ‑wlʋa 'de ʋʋ 'wɔn nɩɛ ka sɛn 'ɛ ‑ku' nɩa,
ʋʋ "sun ʋʋa' ‑cɛ" 'ɛ doun" 'mɛ ka jɔ nɩa.
6 Ʋʋa' po dɩ ‑siʋn 'a wlu doun" o,
ʋʋa' po jrii' poʋn 'a wlu doun" o.
7 'Oo Kea, ‑ɩn ‑craa ʋʋpʋ‑ 'nynɩ 'wɔn i,
Tʋ "bo, ʋʋa' ‑kla' ‑gboɔ ‑ɩ ‑kɔ' ‑plaa 'a 'nynɩ ‑nɩ,
‑ɩn ‑sɩ 'de ʋʋpʋ‑ 'wɔn.
8 ‑Ɩn ‑sa ʋʋpʋ‑ i ka "ni a ‑sia'.
‑Wɛe ʋʋa' 'sɩn ʋʋa poa, ɛ 'bo ‑tajrɔ nyniɛ.
9 Ʋʋ sɔn i, ka sɩɛ 'ʋn 'jrʋ a faan "kpei nɩa,
ʋʋ 'bo 'jrʋ 'jeɛ ka "nynuu‑ ‑wlʋa ‑wɛe ‑ʋʋ sia 'e ‑gbu" 'de nɩa.
10 ‑Ta ʋʋa' "wi sea ‑gbauo'‑ nʋ keɛ,
‑ta ʋʋ kpea wɛi ke bue" "duo ʋʋpʋ‑ 'ʋn ɛ 'je ʋʋ kpa.
11 ‑Bo 'kle a sea 'diwɔnyniiʋn "kpei jiɛ,
ɛɛ' muɛ "isrɛi a 'mʋa‑ 'blea.
Ɛɛ muɔɔ' bʋ i wɔɔa' 'de 'diwɔnyniʋn 'a nmɔ o.
12 ‑Wɛe nyʋ ‑wee'‑ "klein 'je wlu ka ʋʋ 'na:
Kea a muɛ "isrɛnyʋ ‑kei" ‑saa';
kɩɩn, 'de 'blʋa ‑nɛ "kpei Kea nɩɛ due' ɛmɛ ‑ɛɛ ‑je nyɔ 'ɔ 'pee.