Ɛɛ' blaadɩ 'a wlu ‑kɔ' ‑gbɔ'lɛ ‑sea' wlu 'ble ‑ɛ ‑wlʋa 'blʋɩ ‑tɔɔn "kpei ɛ
56
Dafi 'a 'dʋ ‑ɛ ‑nɩa 'de 'dʋ bleʋn klaa" 'a 'dʋsbɛ‑ 'di ɛ, ɛɛ' 'dʋ tu bleeɛ' ‑ta Filitɛn nyʋ ‑wi" kpʋn ɔ 'de Gaatɩ ɛ.
2 ‑Ɩn ‑je 'ma wɛe 'oo Kea,
dɛ ‑nʋɛ nyiɔpʋ‑ a tɛɛn 'ʋn wɛin 'wɩ 'oo 'wɩ ‑wee'‑ 'di
ʋʋa ‑piɛn' 'ʋn 'dei, ʋʋa ‑fɔn' 'ʋn o.
3 Kɩɩn 'ma tʋnyʋ a tɛɛn 'ʋn wɛin,
dɛ ‑nʋɛ, nyʋ ‑ʋʋa ‑fɔan' 'ʋn tʋ o, ʋʋ ‑tiɛi".
4 ‑Sɔntɩ faʋn nʋ 'ʋn ɛ, 'ɩn ‑teɛ' ‑mɔ kea ‑kwlɩ".
5 'Ma 'bɛɛ Kea 'a 'nynɩ "i 'de ɛɛ' wlu 'a ‑tɩ' 'ʋn,
'ɩn ‑teɛ' kea ‑kwlɩ" faʋn se 'ʋn nʋ,
dɛsaʋn ‑jɛ nyiɔ ‑nɩa 'mɛi 'bɛɛ 'ʋn "jrii nʋa' ‑a?
6 'De 'wɩ 'oo 'wɩ ‑wee'‑ 'di ɛ, ʋʋa "ka 'ma wlu 'ʋn.
Ʋʋa naa 'ma 'kmʋ ‑satɩ tɔ' "kpei.
7 Ʋʋa pooɛ 'ma ‑tɩ', ʋʋa siɛ 'ʋn "jriɛ o,
'sʋ ʋʋa na 'ʋn bʋ 'dei ‑wɛe ʋʋ 'je 'ʋn 'kmʋ ‑sa.
8 Dɩsaɩn "klein ʋʋ nʋa 'mʋʋa‑ ʋʋ 'jɩ "wɛin 'pʋ ‑oo?
Kea, 'de ‑ma 'cɛn 'di ɛ, ‑ɩn ‑sa ʋʋa' ma" i
9 Kpɛ ‑tiiɛ' 'ɩn 'kpa 'kwla, ‑mɔ Kea ‑ɩn ‑juuɛ',
'ma "miini "ji bi ‑ɩn ‑ma 'mɛ.
Ɩ ‑wee'‑ "klein se 'crɩɩɛ 'de ‑ma 'sbɛ 'dii?
10 ‑Sɔntɩ 'ma muɛ ‑ʋn 'daa,
'ma tʋnyʋ a muɛ 'kwla 'kpaa,
'bo 'ma muɛ juua' ka ‑ɩn ‑nɩa 'ma Kea a.
11 'Ma 'bɛɛ Kea 'a 'nynɩ "i 'de dɩ ɛ 'tmʋa 'a ‑tɩ' 'ʋn,
kɩɩn 'de ɛɛ' wlu 'a ‑tɩ' 'ʋn, 'ma 'bɛɛ' Tʋ "bo 'a 'nynɩ "i.
12 'Ɩn ‑teɛ' Kea ‑kwlɩ", faʋn se 'ʋn nʋ,
dɛ nyiɔpʋ‑ 'je 'ʋn nʋʋ ‑ɛ.
13 'Oo Kea, dɩ ‑a wlu 'ɩn cɛan ‑tie" 'ma mʋɩ nʋa,
‑wɛe 'ɩn 'je ‑ʋn sɛ' po.
14 Dɛ ‑nʋɛ ‑ɩn pʋʋ' 'ʋn ɛ, ‑ɩn siɛ 'ʋn o,
'ɩn se blu ‑wɛe ‑bo ɛ nɩ kan' 'de 'ɩn 'je na 'de ‑mɔ Kea "juɛi,
'de ‑ma ‑sɔn 'ʋn 'oo Kea.