Nyʋ ʋʋ pooa 'srɛi 'a baewlu‑
55
Dafi 'a tɔ' "kpei naa ‑tɩ bleʋn klaa" 'jea "kwi ‑kwein nʋ ɔ 'jea ble ɛ.
2 Kea, ɛ po 'ma baewlu doun" o,
'de ɛ 'bo 'ʋn "suɛn ‑bo 'ma seɛ i baeɛ.
3 Ɛ ‑te' doun" ‑wɛe ɛ 'jeɛ "kpei ‑sa,
'ma ‑fɩn" ɛ 'dii ‑wɛe dɛ ‑sea' 'ʋn 'tʋn nʋ 'ma 'tmʋɛ.
4 Dɩ 'ma tʋnyʋ a 'tmʋa ɩa' tai' "maa 'ʋn ɛ,
‑wɛe 'diwɔnyniiʋn a ‑tu" 'ʋn 'kle,
‑wɛe ʋʋa ja 'ʋn 'daɩn "jru,
'de ʋʋa nʋ 'mii 'de 'cɛn 'di.
5 Dɛ waa 'ʋn 'dii, dɛ ‑nʋɛ 'mɛɛa' 'a faʋn "ji 'ʋn ɛ.
6 Dɛɛ' 'dii waa' ke faʋn "fiiɛn 'ʋn "jrui, dɩ 'a crɛa' o,
‑mɩ "muuɛ 'ʋn "jrui, ‑wɛe sɩan' dɩɩ" a gbʋʋn' 'ʋn "kpei.
7 'Sʋ 'ɩn wlu' ka: 'Aa ‑bo 'ɩn 'ble ‑gbɔlɛɛ' nain,
‑mɛ 'ɩn "waan' 'ɩn je fɔna' ‑cɛɛn'‑ mu.
8 ‑Mɛ 'ɩn ple' 'ɩn muɛ ‑ta ‑tɔɔn
‑wɛe 'ɩn ‑tei 'de ‑pɩʋn" 'blʋa "kpei. ‑Te' ‑kwlʋ.
9 'Ma muɛ ‑too" 'a 'ɩn 'je "jru 'wlaa ‑ta i ‑pɔn
‑wɛe ‑piie je 'ʋn jii‑.
10 Tʋ "bo, ‑ɩn ‑gba' ʋʋpʋ‑ ja ʋʋ 'bo wlu due' poɛ.
Dɛ ‑nʋɛ ‑cɛɛa' ‑nɩ 'de ʋʋpʋ‑ o ‑kwlɔ.
11 Ɩ ‑pin' blo' 'mɛ maʋ" ke 'jrʋ ‑gbao ke.
'De ɛ 'di "nmia‑ ke 'kle ke ɩmɩ ‑nɩ 'e.
12 'Di 'a wɔnynia' ‑ɛɛ ‑sa nyɔ 'ɔ ma" i ‑nɩ 'de ɛɛ' ‑kwlɔ ‑tu 'di,
"jriia ke nyʋ 'srɛi pooa' ke ɩa' ‑pɔn 'de ʋʋ "klu.
13 ‑Bo ɛ nɩ 'ma tʋnyɔ mɔ ‑ɔɔ ‑cree" 'ʋn 'de ɛ,
‑mɛ 'ɩn 'bɛɛ 'ɩn 'jeɛ 'wɔɔn‑,
‑bo ɛ nɩ 'ma ‑flɛɛnyɔ mɔ ‑nyna 'ʋn "juɛi 'de ɛ,
‑mɛ 'ɩn 'bɛɛ 'ɩn 'jeɔ "jrui "maa‑,
14 'kaa ɛ nɩ ‑mɔ ‑ɔ ‑ke 'ma "jru tɛɛan 'ʋn,
‑ɔ ‑juua 'ma pɛe "kpei ‑tɩ ‑wɛe ‑ɔ ‑nɩa 'ɩn ba a,
15 ‑Mɔ ‑ke 'ma‑ ‑wɔɔan' ba 'a 'di ‑tɩ,
‑bo ‑a ‑ke nyʋ ‑tuu" ‑tuu
a jea bʋ' i naa ‑aa jea Kea ‑gbu 'di mu.
16 'Mɛɛa' ‑ka' ʋʋpʋ‑ "kpei, ʋʋ nɩ 'kmʋ
ʋʋ 'je 'e 'mɛʋ o ‑kwlɔ mu dɛ ‑nʋɛ
'diwɔnynia' "ji ʋʋpʋ‑ 'ʋn 'ɛ.
‑Wɛe ɛ nɩ 'e ʋʋpʋ‑ pɛe o.
17 'Mɔ, ‑bo 'ɩn po Kea ‑too"‑ "i ɛ,
Tʋ "bo a muɛ 'ʋn 'pʋʋa'.
18 ‑Klae" pɛɛn o, 'Jrʋ ‑gbao o,
‑kwie" ka o, 'ma poɛ ‑too"‑ "i,
‑wɛe Tʋ "bo a po 'ma wlu doun" o.
19 ‑Ma muɛ 'ʋn ‑seie 'a
‑wɛe ‑ɩn ‑je 'ʋn tɔɔ' blua' "nyɩ,
'de 'ma tʋnyʋ 'kwa',
dɛ ‑nʋɛ nyʋ ‑ʋʋa ‑fɔan' 'ʋn tʋ o ʋʋ ‑tiɛi".
20 Kea a muɛ 'ma wlu wɔɔan',
ɛɛ muɛ ʋʋpʋ‑ ‑tɩn' "i 'dbaa‑.
'De "nɔ ‑wee'‑ "kein 'di ɛ, ɛ nɩɛ Tʋ "bo. ‑Te' ‑kwlʋ.
Ʋʋa' poo fai", ʋʋa' plee Kea.
21 "Ju ‑nɔ poɛ ɔɔ' dbɛɛnyʋ sʋn ‑pʋn",
ɔɔ' kpʋn wlu "kpei‑.
22 Ɔɔ' wlu nmɔ wɔn ka dʋ 'a 'cna nɩa,
'kaa tʋ ‑tɩ mɩ ‑nɩ 'de ɔ pɛe o,
ɔɔ' wlu pɩɩɛ' ka 'cna nɩa,
'kaa ɛ nɩ ‑placnɛ ‑sea' kpla' 'di nɩ ‑o.
23 ‑Ɩn ‑sa ‑ma kwa ku ‑gbɛ "jru 'de Tʋ "bo 'kwa
ɛɛ muɛ ‑ma ‑tɩ' ‑tu" 'a.
Ɛ seɛ 'bɛɛ‑ ɛ 'je "isrɛi "itai ɔ 'je blu.
24 'De ‑mɔ, 'oo Kea, ‑ma muɛ ʋʋpʋ‑ "itai 'a
ʋʋ 'je i "si 'de 'mɛʋ "klu.
"Ku 'dbaʋn o, "jri ʋn o, ʋʋ se ʋʋa' 'wɩ 'a tɔɔo nʋ i,
'kaa 'mɔ ‑teɛ' ‑mɔ ‑kwlɩ".