"Wliɛjei saʋn 'a 'kmʋ 'a ‑kwɛtɩ
52
'Dʋ ‑wlʋa 'e dʋ blei klaa" 'a 'dʋsbɛ‑ 'di ɛ: Dafi 'a tɔ' "kpei naa ‑tɩ.2 'Dʋ ɔ 'crɩa ‑ta Doɛkɩ ‑ɔ ‑wlʋa Edɔmʋ jia Sailɩ 'tmʋa' ka Dafi pa 'e Alimelɛkɩ o ‑gbu" 'di ɛ.a
3 ‑Mɔ 'diwɔnynii‑, dɛɛ ‑tɩ ‑ma ‑bɛɛ' ‑ma ‑cɛi"
'de ‑ma "ikmaa' 'ʋn ‑ɛ?
‑Ɩn ‑gbʋn: Kea nmɔ 'diwɔn 'de 'wɩ 'oo 'wɩ ‑wee'‑ 'di.
4 ‑Ma mɩɩɔɔ ‑sa sɩ "jɛi ka "nma a ‑cɛn nɩa.
Ɛɛ' sɩ ‑ti ka‑.
5 ‑Ma ‑jeɛ dɛsaʋn 'a "dia ɛ je 'dɔe ‑sii,
‑ma ‑jeɛ sɩ 'a "dia ɛ je tɔi" ‑tɩ ‑sii. ‑Te' ‑kwlʋ.
6 ‑Ma ‑jeɛ wlu ‑ɩa ‑seea' nyʋ i 'a "dia,
‑ma mɩɩɔ pooɛ nyʋ 'srɛi.
7 Ɛmɛ ‑tɩ Kea a mu i ‑saa' 'bode ‑bode 'bode, ‑te' ‑kwlʋ.
Ɛɛ muɛ ‑ʋn kpʋan' 'de ‑ma ‑gbu" 'di ‑wɛe ɛ 'je ‑mii' nʋ,
ɛɛ muɛ ‑ma ma" i ‑saa'
'de 'kmʋnɩʋn 'a 'blʋa "kpei. ‑Te' ‑kwlʋ.
8 Ɛmɛ nyʋ ‑srɛai" 'e 'je, ‑wɛe faʋn 'je ʋʋ nʋ,
'de Kea 'a faʋn 'je ʋʋpʋ‑ 'ʋn nɩ‑ ‑wɛe ʋʋ 'je ‑ʋn ‑wlaa.
9 Ao ‑gbʋn "ju ‑ɔɔ ‑wlaa' Kea sro' ɛ,
ɔɔ' "wlii 'a 'sʋ ɔ ‑foo "kpei,
‑bo ɔɔ sea dɩsaɩn nʋ ɛ, ɔ 'na ɔ kmai".
10 'Kaa 'mɔ ɛ, 'ɩn nɩɛ 'de Kea ‑pʋn" nɔ" 'oo nɔ" ‑wee'‑ 'di
ka Olivier tu a croa. 'Ɩn ‑fooɛ 'de Kea 'a 'diwɔnmɔa' "kpei
'de 'wɩ 'oo 'wɩ ‑wee'‑ 'di.
11 'Ma muɛ ‑ma 'nynɩ "i 'bɛɛa'
'wɩ 'oo 'wɩ 'di 'de ‑ma nʋʋdɩ 'a ‑tɩ' 'ʋn.
'Ɩn ‑teɛ' ‑ʋn ‑kwlɩ" dɛ ‑nʋɛ ‑ma 'diwɔnmɔa'
poɛ "jri "kpae' 'de ‑ma 'cɛ 'ɛ ‑tɩ' 'ʋn.