'Ma Kea ‑ɩn ‑wlʋ 'ma ‑kɔ "kpei
51
'Dʋ Dafi blea ‑wɛe ‑ɛ ‑crɩɩa 'de 'dʋ ‑jeopoi 'a 'sbɛ 'di ɛ.2 Ta Dafi "dua Uri 'a 'nynɔ Baseba 'ʋn ɛ 'bomɔ Kea 'a wlu 'kwajaai Natan muu 'de ɔ o.
3 'Oo Kea ɛmɛ ‑ɛ ‑nmɔa 'diwɔn ɛ, ɛ 'je 'ma wɛe‑.
'De ɛɛ' nyiiɔn' ‑tɩ' kmaa' ‑ɛ cɛan ‑je "kpei ‑tie"
'de ɛɛ' ‑tɩ' 'ʋn ɛ, ɛ ‑sa 'ma dɛsaʋn "jriɛ ‑pʋn".
4 Ɛ jre 'ma nyiɔɔjɔ‑, ɛ ‑sa 'ʋn 'ma dɛsaʋn 'a
‑flɛn" ‑wee'‑ ‑pʋn" ‑wɛe 'ɩn 'je 'pepe nɩ‑.
5 Dɛ ‑nʋɛ, dɛsaʋn 'ɩn nʋa a, 'ɩn juoɛ "i 'mɛ,
'ma dɛsaʋn nɩɛ 'ʋn "jri 'dei ke.
6 Ɛɛ 'sʋ 'ɩn nʋ dɛsaʋn "jrii‑, dɩ ɛ sea "i nɩɛ ɩmɩ 'ɩn nʋ,
'de ɛɛ' ‑tɩ' 'ʋn dɛ "o dɛ ‑nʋɛ 'ʋn "jrii‑ 'de ɛ,
ɛ 'bleɛ ‑kɩn, nyɔ se ɛ ‑tɩ' "bli kpai.
7 Kɩɩn tɔ' ‑o, 'ɩn 'wlʋʋ 'de dɛsaʋn 'di,
'ɩn de 'tɛn 'ma "kwli i 'de dɛsaʋn 'di.
8 'Kaa ‑jɛ ɛ nɩɛ "i ‑wɛe tɔ' ‑tɩ 'jea 'e
'ma 'mɩ ‑sɔn nɩɛ, ‑mɛ ɛ po 'ʋn tɔ' 'di 'ja.
9 Ɛ ‑sa 'ʋn 'ma dɛsaʋn "kpei ‑wɛe 'ɩn 'je i ‑kwɛ ɛ nʋ isɔpʋa ɛ 'je 'ʋn wɔɔ
‑wɛe 'ɩn 'je "plu 'ɩn 'je ‑pɔɔ ‑si.
10 Ka ɛ ‑kɔa' 'ma dɛsaʋn ɛ, ɛ 'tmʋɛ 'de 'ʋn ‑pee
‑wɛe 'ɩn 'di 'je 'cna "kpei cɛn 'de 'ɩn 'je 'mʋa‑ nʋ.
'Mɔ 'kpɩ wa "i ɛ, ‑wɛe 'ɩn 'je bla 'ɩn 'je dee‑.
11 Ɛ ‑sa 'ma dɛsaʋn "jriɛ ‑pʋn",
ɛ 'mʋʋ 'ma ‑kɔ ‑wee'‑ "kpei.
12 'Oo Kea, ɛ nʋ pɛe dee ‑ɛ ‑nɩa
'pepe ‑wɛe ɛ 'jeɛ 'de 'ʋn po.
Ɛ po 'ma tɔ' ‑gbɔdee "ni.
13 Ɛ 'bo 'ʋn nyai ‑fuun,
ɛ 'bo 'ʋn ɛɛ' ‑suu ‑ɛ ‑kweai ‑ɛɛ jia 'de 'ʋn ‑saa.
14 'Pʋʋa' 'ɩn 'jea a, ɛ po 'ʋn ɛɛ' 'mʋa‑ pɛe o
Ɛɛ' ‑suu ‑nmɔa 'diwɔn ‑a kuu 'ma dɩɩ ‑wɛe 'ɩn 'je 'dei ku‑.
15 ‑Bo ɛ nɩ kan' ‑mɛ nyʋ ‑ʋʋa' 'jeɛ wɔn ɛ,
'ma muɛ ʋʋpʋ‑ ɛɛ' ‑jeblʋ tɔɔa'
‑wɛe dɛsaʋnʋʋ 'je "jru "bie 'de ɛ o.
16 "Oo Nyɔsoa, ɛmɛ Kea ‑ɛ ‑pʋʋa 'ʋn ɛ,
nyiɔɔ' nmɔ 'ɩn 'wlai ɛ,
ɛ ‑sa 'ʋn ɛɛ' ‑kao "jru ‑wɛe ka ɛɛ 'jea nyʋ 'a wɛe
'ɩn 'je wɔn "jɛi kpa 'ɩn 'jɩ 'tmʋ.
17 Nyɔsoa, ɛ 'bai 'ma wɔn
‑wɛe 'ɩn 'je ble 'ɩn 'je ɛɛ' 'nynɩ "i 'bɛɛ‑.
18 ‑Bo ɛ nɩ 'sraadɛ ‑mɛ "i 'de ɛ, ‑mɛ 'ɩn ‑sɛ' 'de‑,
'kaa ɛɛ' 'je 'sraanmi 'a "dia ɛmɛ ‑tɩ ‑o ka‑.
19 'Sraadɛ ‑jɛ nmɔa 'e Kea "jri 'dei ɛ,
ɛmɛ ‑nɩ pɛe ‑jɛ ‑cɛan mlɛu" ɛ.
'Oo Kea nyɔ ‑ɔɔ pɛe cɛan mlɛu"
‑wɛe ɛ cɛan ‑tie" 'de ɔɔ' 'kmʋ 'ʋn ɛ,
‑mɔɔ' jei tu a nʋɛ ‑ʋn 'tʋn.
20 Ɛ nʋ Siɔn ‑kwlɔ dɛ 'dɔe "jrii‑.
Ɛ ‑sa de ɛ 'je Selisalɛmʋ ‑kwlɔ blo' 'dei bla.
21 ‑Bo ɛ nɩ kan' 'sʋ ɛ, ‑mɛ 'sraa ‑jɩ nyʋ a ‑sa' 'de "isrɛa 'ʋn ɛ
ɛɛ muɛ ‑mɩ kpʋan' ka nmi muu" ‑jɩ nyʋ a poa "jri
‑wɛe ‑ɩ ‑wee'‑ a sian nɩa. ‑Mɛ ‑aa muɛ bli' muu" 'sraa 'ʋn ‑saa'
'bo ɛɛ' 'sraa ‑sa ‑klɩɩn 'wɔn.