Kea a muɛ ɛɛ' 'blʋa 'a 'pee 'jea'
50
Asafʋ 'a 'dʋ.
"Ikma Kea, Tʋ "bo wlu', ɛ 'da 'blʋa ‑wee'‑ "klein 'mɛ,
dɛ ‑wlʋa 'de 'jrʋ 'a 'wlʋ na' ‑ɛ ‑jɛɛa ɛɛ' blu na'.
2 'De Selisalɛmʋ, Kea a fan' ɛɛ' "jrii nmɔa' nɩɛ 'pepe.
3 Ɛ ji ‑aa Kea,
ɛ 'bo wɔn "mu ‑tɩ' 'bɔ ɛ.
Nɛmɩɔ‑ ‑nɩɛ "juɛi ‑ɛɛ di dɩ ‑wee'‑,
‑piie klaa" ‑nɩ 'de ɛ 'dewei.
4 Ɛ 'da 'blʋa ke jaʋn 'mɛ: ‑wɛe ɛ 'je ɛɛ' 'cɛ 'ɛ 'pee 'je.
5 Ao 'kɩɩɛn 'ma 'cɛ ‑ɛ kpʋn a wlu "kpei "jru i,
nyʋ ‑ke 'ʋn 'nynɩ 'sraa ‑saa' poa dbɛɛdɛ ɛ.
6 ‑Wɛe jaʋn 'je Kea 'a "isrɛtɩ‑ ‑tɩ 'tmʋ,
Kea mɛ ‑nɩ 'pee 'jei. ‑Te ‑kwlʋ.
7 'Ma 'cɛ, ao po doun" i, Israɛ ‑tɩ 'ɩn 'jea 'de ‑ʋn ‑pʋn" 'ɩn 'jeɛ 'tmʋ,
'mɔ Kea, 'mɔ ‑nɩ ‑ma Kea.
8 Ɛ se 'sraa ‑ma ‑sa mɛ ‑ɛɛ "bli 'ma ‑cɛ' ‑ʋn nɩ‑
dɛ ‑nʋɛ, nmii mua" ‑wee'‑ "klein
‑ma ‑saa' 'sraa 'ʋn nɩɛ 'de 'ʋn "juɛi jeejee.
9 'Ɩn se ‑ma bli' ‑tɔe 'ʋn "duo i 'de ɩa' ‑gbu" ‑sɔn ɛ ke
‑ma ‑faan" ‑gbae ‑nɩa 'de ɩa' 'pɛɩn' ke‑.
10 Dɛ ‑nʋɛ 'kwladinmi ‑wee'‑ "klein nɩ 'ma dɩ ‑o,
ɩ ke nmii ‑wee'‑ ‑nɩa 'de crɩ "kpei ke‑.
11 'Ɩn juuo nʋɩ "klein ‑nɩa 'de jaʋn ‑kwlʋ 'mɛ,
'de 'kwladinmii ‑wee'‑ nɩ 'ma dɛ ‑o.
12 ‑Bo 'mɩɩɛ mɔɔ ‑cɛ" ɛ sea 'ʋn nʋ 'de ɛ,
'ɩn 'jeɛ ‑ʋn 'tmʋʋ ‑oo?
Dɛ ‑nʋɛ 'blʋa ke dɩ "klein ‑nɩa
'de ɛ "kpei nɩ 'ma dɩ ‑o.
13 'Ma diɛ bli' ‑tɔe ‑ɩ ‑blea 'cna ‑ae,
‑ɩn" 'ma 'na ‑faan" ‑gbae 'a nmɔ?
14 'Sraa ‑ɩn ‑jea ‑sa ‑ɩn ‑jea Kea ‑nɩa 'e dɩ ‑wee'‑ "klein "jrukpɔ' "nyɩ
ɛmɛ ‑nɩ 'dɔe ɛ nʋa ‑ʋn "jrii ɛ
‑ɩn po ɩa' ‑tɩ' ‑kwlʋ o,
‑wɛe wlu ‑ɩn cɛan ‑tie" 'de 'ʋn "juɛi, ‑ɩn nʋɛ.
15 ‑Wɛe ‑sɔntɩ ‑ma mua 'de 'kle 'di nɩa' a,
‑bo ‑ɩn ‑da 'ʋn, 'ma muɛ ‑ʋn ‑seia'
‑wɛe ‑ɩn ‑je 'ma 'nynɩ "i 'bɛɛ‑.
16 'Kaa Kea wlu' 'de 'diwɔnynii ‑pee ɛ 'na: dɛɛtɩ‑
‑ma ‑sro' 'de 'ma kɛ' 'dii 'de 'ma dbɛɛdɛ nɩ ‑ɩn "wɛin,
17 'de ‑mɛ dɩ 'ma tɔɔa ‑ʋn ‑ma ‑fuun ɩ nya i
‑wɛe ‑ma blaa 'ma wlu 'blʋɔ‑.
18 ‑Bo ‑ɩn ‑je "jrii ɛ, ɔɔ ke ‑ma ‑kpaa' ba bɩ' i,
‑wɛe ‑ɩn ‑ke nyʋ 'a 'nynɔjeʋn "bee bʋ' i.
19 'Srɛ 'ɛ 'sʋ ‑nɩ 'de ‑ʋn mɩɩɔ "kpei,
‑wɛe sɩ 'a 'sʋ nɩ 'de ‑ʋn 'wɔn.
20 ‑Bo ‑ɩn ‑ke nyʋ deejrʋ' ‑tei ɛ,
‑ma dooa ‑ma de 'di 'a 'nynɩ,
‑wɛe ‑ma ‑jrɛɛ" ‑ma 'de 'a "ju 'a 'nynɩ saɩn i.
21 Dɩ ‑ma nʋa ‑mɩ ‑nao,
'de 'mɔ "muɩ wɔn. ‑Ma naa tɔ' i 'ee,
ka ‑ɩn ‑nɩa 'ka 'ɩn 'nɩɩ‑?
'Kaa 'ma muɛ ‑ʋn "bli ‑cɩa',
‑wɛe dɩ ‑ma nʋa 'ɩn 'jɩ 'de ‑ɩn "juɛi ‑te'.
22 Ao ‑tu" aoa' ‑cɛ" 'ɛ ‑tɩ' aopʋ‑ ‑ɔɔ ‑ma" 'e 'a Kea o ɛ,
'ma muɛ aopʋ‑ i cɩɩan' 'de nyɔ jrɔ' se aopʋ‑ ‑seie i.
23 Nyɔ ‑juua dɩ 'ɩn nʋɔ "jrii mɔ ‑ɔɔ ‑'bɛɛ "mii.
Ɔmɔ ‑duo" ‑jeblʋ ‑ɛ "i 'ma 'muɛ tɔɔa' ka
Kea mɛ ‑ɛɛ "nyɩ nyʋ 'pʋʋa'.