'Beɔ klaa" 'a ‑kwlɔ
48
'Dʋ kore 'a "nynuu‑ ble a.
2 Nyɔsoa "bɛi
ɛɛ' 'nynɩ nɩɛ "i 'bɛɛ‑ ka‑,
'bo ɛɛ' ‑kwlɔ ɛ ‑teea kpɔ "i ‑ wɛe ‑ɛ ‑kweai 'di,
3 crʋ ‑nmɔa "jrii, ‑ɛ nʋa 'blʋa ‑wee'‑ 'tʋn,
Siɔn crʋ ‑, 'bo Kea ‑te, Tʋ "bo klaa" 'a ‑kwlɔ!
4 Kea 'a ‑cɛ" mɛ ‑ɛɛ fuo ɛɛ' 'cɛ i.
Ɛ poɛ ʋʋpʋ‑ 'saan 'dei, ʋʋ "maeɛ i.
5 'blʋa 'srʋ 'a 'beɔ ‑wi" 'kɩɩɛn "jrui
‑wɛe ʋʋ muɛ tʋ o ‑fɔan'.
6 Ta ʋʋ 'jeeɛ "jriɛ 'sʋ ɛ, faʋn "jiɛ ʋʋpʋ‑ 'ʋn
ʋʋa' dɩ a crɛ' 'sʋ ʋʋ 'kpa 'kwla.
7 ‑Sri" 'kpa ʋʋ "kpei,
ka ‑gbmaʋn di a 'kpa 'de 'nynɔkpao 'ʋn ɛ.
8 Ʋʋ ‑kɔ' ‑pato' ‑ɛ ‑wlʋa 'e
'jrʋ 'a 'wlʋɩn' pʋʋɔ' ɔ kpa 'de "ni "kpei ɛ.
9 Dɩ nyʋ 'tmʋa 'de ‑aa ‑pee 'de ɛ,
‑aa ‑cɛ" 'kpa 'jee ɩ "jriɛ ‑wɛ 'de Nyɔsoa
‑ɛ ‑nɩa Tʋ "bo Kea ‑ɛ ‑bɛɛa' dɩ ‑wee'‑ "klein "wɔin o ‑kwlɔ.
Kea a muɛ ɛɛ' ‑kwlɔ ‑tu i fua' jeejee.‑Te' ‑kwlʋ.
10 Kea, ‑bo ‑a ‑nɩ 'de ‑ma ‑gbu" 'di ɛ,
‑aa naa ‑ma nyiiɔɔ' ‑tɩ' kmaa' tɔ' "kpei jeejee.
11 Ka ‑ma 'nynɩ 'wlʋa a mua 'kamɔ
‑ma 'nynɩ "i 'bɛɛa' 'e mu mamaʋ 'sʋ
ɛ 'je 'blʋa 'a "ti 'ɩn nyni ‑ke, ‑ma nʋʋdɩ 'dɔe ‑tiɛi".
12 Nyʋ ‑nɩa 'o Siɔn ke
nyʋ ‑nɩa 'e Suideblʋa 'a ‑kwlɛ ‑wee'‑ 'dii‑ ke
ʋʋ 'di nmɔwɔn, dɛ ‑nʋɛ ‑ma nyʋ 'a 'pee 'jesʋn 'srɛ "i.
13 Ao‑ ‑nɩa Kea 'a 'cɛ ɛ, ao ‑pin' Siɔn ‑ɛ ‑blaa blo 'deiɛ
ao pa 'de ɛ 'di ‑wɛe ao 'je ɛɛ' ‑gbʋ" ‑sro'.
14 Ao 'crɩ ɛɛ' ‑gbʋ" 'dɔe 'dɔe "jrii ‑wɛe ‑bo 'de nya a
ao 'je ɩa' ‑po bla 'de aoa' "nynuu‑ ‑pee.
15 Ao ‑gbʋn ka ‑aa Kea "beai ɛ,
ɛɛ muɛ ‑aa Kea nɩa' jeejee,
ɛɛ muɛ ‑a ‑je o poa' 'de nɔ" "o nɔ" ‑wee'‑ 'di.