Ao ble ao 'je Tʋ "bo Kea 'da
47
'Dʋ Kore 'a "nynuu blea ‑ɛ ‑wlʋa 'e bleʋn klae" 'a 'dʋ sbɛ 'di ɛ.
2 Ao 'blʋa 'dinyʋ ‑wee'‑ "klein ao bla ‑cɛi",
ao kpa wlu "jɛi ao 'bɛɛ‑ Kea 'a 'nynɩ "i 'de 'mʋa‑ 'ʋn.
3 Dɛ ‑nʋɛ, Tʋ "bo Kea ‑nɩa 'e dɩ ‑wee'‑ "klein "jrukpɔ' kmai",
ɛmɛ ‑nɩ 'blʋa ‑wee'‑ 'a Tʋ "bo.
4 Ɛmɛ ‑nʋɛ ‑wɛe nyʋ ‑wee'‑ a jaa "jru ja 'de ‑a ‑sɔn,
‑wɛe 'blʋɩ ‑wee'‑ a 'je ‑a wɔn.
5 Ɛ ‑sa 'e ‑aa 'blʋa,
ɛ 'bleɛ ‑aa 'mʋa‑,
‑amɔ ‑nɩa Sakɔbʋ 'a ‑tɩ' kma nynuu ɛ. ‑Te' ‑kwlʋ.
6 'De dɔ ‑kwleɛ 'ɛ wlu 'ʋn o, ‑cɛi" blaa' o,
'mʋa‑ nʋa' 'ʋn mɔ ‑aa Tʋ "bo a pa 'de ɛɛ' ‑gbu" 'di.
7 Ao blee ‑aa Kea o, ao ble,
ao ble 'de Tʋ "bo 'a 'nynɩ 'ʋn,
ao 'bɛɛ‑ ɛɛ' 'nynɩ "i.
8 'blʋa ‑wee'‑ "klein 'a Tʋ "bo mɛ ‑nɩ Kea,
ao ble 'dʋ 'dɔe ao 'je ɛɛ' 'nynɩ "i 'bɛɛ‑.
9 Kea ‑teɛi 'de ɛɛ' Tʋ "bo kpatɛ‑ ‑kwea i "kpei,
‑wɛe ɛɛ jrɛɛ' 'blʋa ‑wee' "klein "kpei.
10 Tʋ "bo ‑nɩa 'e 'blʋɩ 'dii 'kɩɩɛn "jrui
ʋʋ nɩ ‑ma 'cɛ ‑o, Ablaam 'a Kea',
Dɛ ‑nʋɛ "ikmanyʋ ‑nɩa 'blʋa ‑wee'‑ "klein "kpei ɛ,
ʋʋ nɩɛ Kea 'a dɛ ‑o.