Kea ‑nɩ ‑aa ‑kliosou"
46
'Dʋ Kore 'a "nynuu blea ‑ɛ ‑wlʋa 'de 'dʋblei klaa" 'a 'dʋsbɛ 'di ɛ, ‑si' ‑plʋ mɛ nyɔ ɔ blaa nɛ.
2 Kea mɛ ‑nɩ ‑aa sro' 'wlaa 'ɩn, ‑ɛ ‑nɩ ‑aa ‑kliosou".
‑Bo ‑a ‑nɩ 'e 'kle 'di ɛmɛ ‑ɛɛ ‑wlʋ ‑a o.
3 Ɛmɛ ‑tɩ dɛ jrɛ' 'ɛ faʋn se ‑a nʋ i,
‑bo 'blʋa mɛɛ' ‑cɛ" ɛ sea crɛ 'de ɛ,
‑bo crɩ a sea ‑gbue' ɩa sea 'tɔniɛ wɔn 'kpa o,
‑bo 'blʋa a sea crɛ,
4 ‑bo 'tɔniɛ ɛ sea‑gbu" mɔ 'de
ɛɛ sea 'plɩ a cɛn ‑bo ɩa sea crɩ "jɛi ‑sa mɔ 'de ɛ ‑Te' ‑kwlʋ.
5 "Ni ‑gbuu jrɛ' ‑nɩ 'e mu ke 'wlɛ
‑ɛɛ po 'mʋa‑ 'de Kea 'a ‑tein
'de ‑ɛɛ bɩ cɛn Kea ‑nɩa 'e dɩ
‑wee'‑ "klein "jrukpɔ' 'ɔ kɛɛma' ‑kwlɔ 'di ‑tie".
6 Kea nɩɛ 'de ɛɛ' ‑kwlɔ tu 'a ‑kwea'‑,
ɛ seɛ 'bɛɛ ɛ 'je blu,
‑bo ‑sɔɔn' sea ‑sɩn' ɛ, Kea a ‑teɛ' kwawɛi.
7 ‑Bo cnuɛn" 'kpa 'de 'blʋɩ 'nynɩ ɛ,
'blʋadinyʋ ‑wee'‑ ‑gba' ja,
‑bo Kea "wɔ 'sʋ' blʋa‑ sɔn i.
8 Tʋ ‑fɔn' Kea, Tʋ "bo ke ‑a na',
Sakɔbʋ 'a Kea nɩɛ ‑aa sro' 'wlaa na'. ‑Te' ‑kwlʋ.
9 Ao ji, ao 'je Tʋ "bo 'a nʋʋdɩ 'je,
dɩ ɛ ‑gba' "jɛi 'de 'blʋa 'di ɛ.
10 Ɛ nynaa tʋ i 'de 'blʋa ‑wee'‑ "klein "kpei,
ɛmɛ ‑cɩɩɛn plʋ i, ɛ ‑cra' "di, ‑ɛ po tʋ ‑fɔn' ‑dɩ "jri.
11 Ɛ 'na: Ao nynai, Ao juuo ɛ ka 'ɩn nɩa Kea.
'Mɔ ‑ɔɔ kpa tʋ 'a "jru 'de nyiɔ "kpei,
'mɔ ‑ɔɔ kpa tʋ 'a "jru 'de 'blʋa "kpei.
12 Tʋ "bo kmai" ɛ ke ‑a ‑na',
Sakɔbʋ 'a Kea nɩɛ ‑aa sro' 'wlaa na' ‑Te' ‑kwlʋ.