Tʋ "bo 'bɔ 'ʋn 'ɛ
44
Kore 'a "nynuu 'a 'dʋ ‑nɩa 'e 'dʋ "jrukpɔ' i ‑tei 'a 'dʋsbɛ 'di ɛ.
2 Dɩ ‑ɩn nʋa 'de ‑a "bo ‑wi" 'a nɔ" "i tɛin" ɛ,
‑a ‑wɔɩn', ʋʋ po ‑a "kuan' mɛ 'oo Kea.
3 'De ‑ma "ikmaa' 'ʋn ɛ,
‑ɩn ‑nyɩ" ɛɛ' 'blʋa tu ‑a "bo ‑wi" 'mɛ.
‑Ɩn ‑sa 'blʋa jrɩ' i ‑wɛe ‑ma 'cɛ 'ɛ 'blʋa 'je "i 'bɛ.
4 Ɛ se ʋʋa' ‑cnɛ mɛ ‑nyɩ" ʋʋpʋ‑ 'blʋa ‑nɩa 'mʋʋa‑ ‑nɩ,
ɛ se ʋʋa' 'kwa i kua' mɛ ‑nyɩ" ʋʋpʋ‑ tʋ 'a "jru kpaa' nɩ‑.
"Ɩɩn ɛ nɩ ‑ma 'kwa i kua' o,
‑ma "ikmaa' o, ‑ma nyʋ o 'wlʋa o,
‑ma 'diwɔnmɔa' klaa" o ɩmɩ ‑nyɩ" ʋʋpʋ‑ 'blʋa ‑nɩa 'mʋʋa‑.
5 'Oo Kea, ‑mɔ cɛn 'e wlu ‑wɛe Sakɔbʋ 'pʋ.
6 Kɩɩn ‑mɔɔ nʋɛ, ‑wɛe ‑aa nʋ ‑aa tʋnyʋ i,
‑mɔ ‑ɔɔ nʋ 'saaʋn ‑wɛe ‑aa sʋʋan ‑aa tʋnyʋ bʋ ‑sɔn i.
7 'Ɩn se 'ma plʋ ‑kwlɩ" ‑te',
ɛ se 'ma ‑placnɛ mɛ ‑ɛɛ ‑pʋʋ' 'ʋn nɩ‑.
8 'Kaa ‑mɔ ‑ɔɔ ‑seie ‑a ‑ʋn 'de ‑aa tʋnyʋ 'kwa,
nyʋ ‑ʋʋa ‑flɛɛan ‑a ‑ʋn ‑mɔɔ' ‑dbaa' ʋʋpʋ‑ ‑tɩn' "i.
9 Kea, ‑aa ‑bɛɛ' ‑ma 'nynɩ "i 'de 'wɩ ‑wee'‑ 'di, ‑aa' sea. ‑Te' ‑kwlʋ.
10 'De ‑mɛ ‑ma ‑fuun ‑a nya i, ‑ma ‑dbaa' ‑a ‑tɩn' "i,
‑ɩn ‑ke ‑aa "sʋɩ 'bɔ tʋ 'ʋn mu ‑tɩ 'mɛ.
11 ‑Ɩn nʋɛ' ‑wɛe ‑aa ple 'de ‑aa tʋnyʋ "juɛi,
‑wɛe nyʋ ‑ʋʋa ‑flɛɛn ‑a ‑ʋn "duo ‑aa "wlii ‑wee‑' 'ʋn.
12 Kɩɩn, ‑Ɩn ‑to ‑a 'e 'wɛ
ka nyɔ ɔ toa ''nɔdɛ 'de ɛɛ' 'dba na' a,
‑wɛe ‑ɩn ‑gba' ‑a ja 'de 'blʋɩ 'srʋ 'dii.
13 ‑Ɩn ‑to 'e ‑ma 'blʋa 'mɛ foo" 'ʋn,
‑wɛe ‑ɩn se dɛ jrɛ' 'je 'de ɛɛ' plea' 'ʋn.
14 ‑Ɩn ‑ta" ‑a "i nyʋ ‑ke ‑a ‑kʋaan"‑ i ʋʋa jea ‑a ‑cree"‑,
nyʋ ‑ʋʋ ‑pian' ‑a 'dei 'bɛɛ ʋʋ 'je ‑a ‑flɛɛn, ʋʋ 'je ‑a wlaa‑.
15 ‑Ma ‑ta" i ɛ 'blʋɩ 'srʋ jrʋ' 'a nyʋ "i
ʋʋa jea ‑a ‑wlaa, ‑bo ʋʋa sea 'kɩɩɛ ʋʋa duɛ "jrui.
16 "Ku a 'wlʋɛ 'ʋn "kpei jeejee, ‑wɛe 'ma 'je ‑tɩn' ‑tɩ.
17 ‑Bo 'ma sea 'ma tʋnyɔɔ' wlu 'wɔn
ɔɔ sea ‑a "i 'fa ‑wɛe ɔɔ sea ‑mɔ Kea ‑cree"‑ ɛ.
18 Dɩ ‑nɩa 'mʋʋa‑ ‑wee' nʋʋ ‑a "jrii 'mɛ
'kaa ‑a se ‑ma ‑tɩ' o "mae‑, 'de ‑a se ‑ma dbɛɛdɛ 'kpʋ "i to‑.
19 Wlu ‑a cɛan ‑tie" 'de ‑ʋn ‑pee ɛ,
‑a seɛ wɔn ‑sa, ‑jeblʋ ‑ɩn ‑tɔɔa ‑aʋn ɛ, ‑a seɛ "i 'wlʋ.
20 'Kaa ‑ɩn nʋɛ' ‑wɛe ‑a ‑klɛɛ i 'de "pɩɔn blua "kpei,
'de 'mɛan' 'a ‑gbauo'‑ ‑cri" ‑a "jru.
21 ‑Bo ‑a ‑tai" ‑aa Kea "i de‑,
‑wɛe ‑a ‑je kea jrɛ' ‑mɛ sʋn "i to 'de ɛ,
22 Kea seɛ 'wɔɔn i,
ɛmɛ ‑ɛ ‑juua dɩ ‑pa' 'kwla 'de pɛe ‑sɔn ɛ,
23 'De ‑mɛ ‑ma ‑tɩ' 'ʋn mɔ ʋʋa ‑tu" ‑a 'kle
'de 'wɩ 'oo 'wɩ ‑wee'‑ 'di,
‑wɛe nyʋ a ‑gbʋn a ja ka 'blae ʋʋa kpa 'dba na' nɩa‑.
24 ‑Ɩn ji ‑a o, ‑ɩn ‑sɔn 'ʋn,
Dɛɛtɩ‑ ‑ma ‑mʋ "nyɩɔn ‑ɛ Tʋ "bo? ‑Ɩn ‑sɔn 'ʋn,
‑ɩn ‑bo ‑a nya i ‑fuun ‑ɛ jeejee.
25 Dɛɛtɩ‑ ‑ma ‑sa ‑a "jri ‑pʋn" ɛ,
‑wɛe ‑ma ‑ma" e ‑aa 'kle ke ‑aa "nmia ‑tɩ o ‑ɛ,
26 Dɛ ‑nʋɛ, ka 'kwɛ ‑tɩ nɩa
‑aa ‑bi" ɛ ‑aa ‑cɛ" "jrii 'de "puue' 'di,
‑wɛe ‑a ‑cri" "jrii 'de 'blʋɔ‑ "kpaan i.
27 ‑Ɩn ‑sɔn 'ʋn, ‑Ɩn ji ‑a o,
‑Ɩn ‑seie ‑a ‑ʋn 'de ‑ma 'di wɔnmɔa' 'ʋn.